Wahyu 19
19
1-2 #
Ula. 32:43; 2Raj. 9:7 Asogo osoma hwelegistikmu en, e’berlik e, aphwami a’bik logolak ’bogorl pam welat eniak loksogoat disogo ogumu hwelegis,
“Nenaik Allah hanni a’bik, ... u a e
Nenebe delnenebise legen a’ge, ... u a e
Harat erlikhobu, ... u a e
Erlikhobogu lege u ’gela’ge, ... u a e
Haleluya ogu lege, ... u a e
Hat en wene enebam pasulat, no’gorliselat, ... u a e
Demat nak ese legen a’ge, ... u a e
Hegitsogo nak ese legen ano en, ... u a e
Aphwami o Babel a’ge enebabut, ... u a e
Hwe danian nil denago a’ge ’gela’ge ebano en, ... u a e
Aphwami o di owi yu owi welagai a’ge, ... u a e
Wiagabonobogwi ai en, ... u a e
Wene enebam pegentik wiagabenebegen, ... u a e
Is en heragam a’ge enemep enamogo warenebegisa paget, ... u a e
Ena’gulmu warenebigen ai en, ... u a e
Erlikhobogu lege,” ... u a e
oluk weni worogu legesa. 3#Yes. 34:10Asogo werigisarik en, pobuk mesik worogulat e,
“Nenaik Allah, ... u a e
Erlikhobogu lege, u ’gela’ge, ... u a e
Haleluya ogu lege, ... u a e
Aphwami Babel a’ge enasu hobu, ... u a e
’Garok u erlakma en ligago modok oruak,” ... u a e
oluk ogu legesa. 4Asogo ogukhwe, is ap enarlue enebe 24 ebano emin, is Allah en walentesimu enelaluk welagai a’ge enebe ugan ebano emin, enemin en at Allah ebe ’gain welago a’ge ebalema oruakma eragam ’goluk, ondogorlu pam hurotluk erliktogulat disogo ogu legesa,
“Demat ema,” u ’gela’ge,
“Amin,” ogulat,
“Erlikhobogu lege,” u ’gela’ge,
“Haleluya,” ogulat, ogu legesa.
Domba Emalik ugwe ’gela’ge hwerlasulat, seni sorua wene
5 #
Mzm. 115:13
Ye, Allah ’gain welago a’ge ebalema ebano en disogo ogumu hwelegis,
“His Allah eragam a’ge ononuk oruak a’ge emin, ononuk erlak a’ge emin, ’berlegat Allah honogorloksogo welegep a’ge nenaik Allah erliktogu lemis o,” oluk ogumu hwelegis. 6#Mzm. 93:1; 97:1; 99:1; Yeh. 1:24Asogo ogumu nesa’go hwelegistikmu en e’berlik e, aphwami a’bik odoktak welat, eniak e, ik hurl lok a’ge iak oso ’gela’ge emin, orlolu iak logat ’bageselat en iak orlu-orlu lasu ai ’gela’ge emin, disogo ogu legesa,
“Nenaik Allah erliktogu lege, u ’gela’ge,
Haleluya, ogu lege. Hat hanni modok a’bikmu, di a’ge yu a’ge tu nak ano en, yogodak arat heragam nenebegentik tennentarok welegen o. 7Asogo welat, Domba Emalik ugwe ’gela’ge waigoluk owi arat dakha egeimu, at ugwe ’gela’ge ano u’gwarek en arat leik-louksogo pagathwerlesirikmu no oluk e, ebe arat horlouwa ai en nonogola nenagaisogo, a’goluksogo, at erliktogu lomok o. 8Ugwe asogo hwerlaigoluk, osum lenan a’ge il ’gut nogorlok a’ge ’buktak welemagoluk wogesimu hegi o. Sum op ai ebe re, aphwami Allah eiyagai enebabut hegitsogo togwi a’ge aiat o,” oluk ogu legesa. 9#Mat. 22:2,3Asogo ogumu hwelegistikmu en, at malaikat ano en disogo mo’gulnesi,
“Is aphwami Domba Emalik ugwe ’gela’ge hwerlasulat, seni sogo naumagoluk yo’go enebegesa a’ge nak onogola enagai houwak o, oluk pelal womup o,” oluk mo’gulnesirik, pobuk mo’gulneselat e,
“Wene yu re, demat Allah en egei a’ge o,” oluk mo’gulnesi. 10Asogo mo’gulnese lagama, an en, at malaikat ano eragam ’goluk nodogorlu pam hweriogo welat erliktiogoluk tegis a’geat de, at en mo’gulneselat e,
“Mo in. Asogo erliknobogun. An nebe re, hat emin, harilak emin, his ’gela’ge henemin hegit o. Wene Yesus en mo’gulnentesi a’ge mo’gulentil no’gwi a’ge ai, at Allah Arogun en onogola ’gagalogo mo’gulontogwiam mo’gulontogwi ai, wene edip at Yesus en mo’gulnentesi aiat o. Holuk e, at Allah yat erliktuok o,” oluk mo’gulnesi.
Ap mesik wam kuda asu ’gut a’ge pam hweriogo oruakma il yethesi wene
11 #
Mzm. 96:13; Yes. 11:4; Yeh. 1:1 Wene asogo mo’gulnesirikmu en e’berlik e, ’bogorl hielak pasuam wam onuk kuda asu ’gut a’ge o’borl pam, ap mesik onuk e, “Ebabut He’bisogo Tago” a’ge ogulat, “Demat Nak Oso” a’ge, ogulat, ogwi a’ge, hweriogo welat, weim hegitsogo ebeselat, wene hegitsogo enebam pasulat, no’gorliselat, til nosoma yethegi o. 12#Dan. 10:6Ap ai il e, odouk magale ’gela’ge, ye, a’gul pam e, ’gare-’gare ebe a’bik ap ’gain ononuk logo a’ge ’buktak onobogwi ai ’gela’ge ’buktak o. Ye, at onuk ’gela’ge mesik mu a’ge at ebetne pelal wogo oruakhwe aphwami ’berlegat eneperlak, we, at u’gwarek nak aluk a’ge pelal wogo welaga hegi o. 13Ye, at ai osum yat mep egelik a’ge ’buktak, ye, onuk enalukmu ogu legesa re, “Allah Iak.” 14Asogo ’buktak nosoma, ap e’garagun logon ’bogorl pam a’ge a’bigat logolak onosum kain lenan sum ’gut a’ge ’buktak, ye, enebe lo’bok onuam kuda asu ’gut a’ge o’borl pam hweriogo welat, at e’berlik no’gumu yerentegis o. 15#Mzm. 2:9; Yes. 63:3; Yoe. 3:13; Wah. 14:20At asogo neselat, aphwami ena’gul onuk lo’bok ’berlegat mabenabonobouwa a’ge, ’garok e’gat a’bik a’ge emdelema en liplau wagoma hegi o. Asogo mabenabonoboluk ’bouwa’gun ’besieme’gen anni a’bik ai ’gela’ge, at iak anni pam aphwami tenagonoboluk, aik Allah anni modok a’bikmu re, di a’ge yu a’ge tu a’ge nak ano en e, olot het emarik, wene enebam pasuam anggur e’gen a’bosu na’guogoluk ebalema sagalogwi ai ’gela’ge, at oyuk en al ’besilonobua a’ge hegi o. 16Ye, at onuk ’gela’ge mesik disogo,
“Ap ’gain ononuk logo a’ge ’berlegat emin, onuelak ’gain ’berlegat emin, onue ’gain Nonuk Logo re, anat o,” oluk osum yat a’ge pam emin, aga’gu pam emin, pelal wogo oruakma hegi o.
17-18 #
Yeh. 39:17-20
Asogo hegirikmu en e’berlik e, at malaikat mesik mo pam edik welat e, iak loksogo is di sue yu sue ’berlegat ’bogorl petne ’burl eba darak nosoma, disogo mo’gulentasu laga,
“Ap ’gain ononuk logo a’ge emin, weim wene eiye a’ge emin, onosi heberlak a’ge emin, wam kuda ebe emin, ap o’borl pam huragalat no’gwi a’ge emin, aphwami ononuk oruak a’ge emin, ononuk erlak a’ge emin, eneragam a’ge emin, enematek welagai a’ge emin, ’berlegat Allah en warenebegeitik eneino a’bigat henebesi a’ge nagup en, henebe odoktu manis o,” oluk osoma hwelegis o.
19Asogo hwelegistikmu en, yethegi ’gal e, mene orlomene ’gela’ge lok a’ge ano osi ’gain ononuk logo a’ge ’gwiangma a’ge emin, onosi tentara a’ge emin, enemin en, at wam kuda o’borl pam hweriogo a’ge ano emin, osi tentara a’ge emin, enemin weim obuogoluk enebe logolak oruakma entegis o. 20#Wah. 13:1-18Asogo oruakma, at mesik pageat wagarik,
“An Allah iak mo’gulhentasu legi o,” oluk iak eseiyat at mene orlomene ’gela’ge ano ilem elalin taga laga a’ge ano en, lalenebisokhwe demat ’gela’ge, is aphwami logon en,
“Nis at mene orlomene ’gela’ge ebabut wiak a’ge yu osi o,” oluk silo ’gela’ge enebam ’balogulat, enede dogwi at mene orlomene ’gela’ge lok a’ge ano ebe ’gela’ge ogut hele’gik a’ge ano pam he’berik poluk, togu legesa a’geat de, yogodak at mene orlomene ’gela’ge ano ebe emin, iak esei lalenebise laga a’ge ano emin, e’birek tenagonoboluk, herle wusogo ik laut odouk a’ge ye’gelakma hwedali al ’gela’ge e’ben wiak a’ge onuk belerang emin-emin magale nasu modok welagoma eba enebe enelaluk ’ga’go peragenebasumu hegi o. 21Asogo yethasulat, aphwami is onosi ’berlegat ugonoboluk legesa a’ge, at wam kuda o’borl pam hweriogo nese laga a’ge ano emdelema en ’garok liplau wagalat warenebise laga. Asogo enebe wusogo enebesimu di tue yu tue ’berlegat wegesarik, eneino onogum ningsogo no’gumu yerentegis o.
Currently Selected:
Wahyu 19: Wul
Highlight
Copy
Compare
Share
Want to have your highlights saved across all your devices? Sign up or sign in
