Wahyu 20
20
Mo ligom ’bugom osokhwe 1.000 tahun welema wene
1Asogo entegistikmu en, e’berlik e, at malaikat mesik ’bogorl pam en ’goduk horogwi a’ge onuk kunci ’gwiang ogola opma orogobu a’ge emin, herle ’go’bi ’besieme’gen a’ge emin, e’gikmu woluk ’bu agoma yethegi o. 2-3#Kej. 3:1Asogo woluk ’bu agarik, at ’gosu ’gela’ge lok o page enat welaga a’ge onuk Iblis ogulat, Setan ogulat, ogwi a’ge ano, ebe tenak poluk, di aphwami yu aphwami lalenebiso ai ’gela’ge lalonobu erlakma en 1.000 tahun e’gik herle werak ’gwiang ogola opma orogobu welemagoluk ’belebak pesirik, ’goduk de’galim lasogo ’gwelebak pogwi ai ’gela’ge, ’goduk kunci lasogo pasumu hegi o. Eba welemarik en, hebilogo peligom hegitsogoat il mesigat hebelik welemagoluk hebilogo lagabak porluma o.
4 #
Dan. 7:9,22 Asogo hegirikmu en, e’berlik e, ap ’gain enebalema a’bik oruakma eba enebe a’bigat ’gain welat, aphwami logon eneragam onoboluk tenentarok welat wene enebam pogulat, no’gorlogulat, togu lemagoluk eiyerak enebegesema entegis o. Ye, mesik hegi re, is aphwami mene orlomene ’gela’ge lok a’ge ano emin, dogwi at ebe ’gela’ge ogut hele’gik a’ge ano emin, erligonobu erlakma en, onuk tuelak pelal wogo a’ge ano enede we’gerlogo ene’berli pam de a? Ene’gik pam de a, wo erlakma en ukpoluk, Yesus til denaga laga a’ge mo’gulentil denagai a’ge paget emin, Allah iak paget emin, ono’gorlop ’balogo warenebegisa a’ge arat togolik enelalugabonobogulat, edigenebesirik, at Kristus emin aphwami logon eneragam onoboluk tenentarok oruakma en, mo ligom ’bugom osokhwe 1.000 tahun oruakma entegis. 5Aphwami waregesa a’ge ai naduk enelalugabenebegeitik edigenebasumu entegis. Asogo a’geat de, is aphwami waregesa a’ge pema akhit logon nak e, o mo ligom, ’bugom, osokhwe togolik enelalugabonobo erlakma en 1.000 tahun tuagoluk enebesimu oruakhwe entegis o. 6Is aphwami naduk waregesa a’ge logon pobuk werak modok welemagoluk wene enebam poluk waronobumu warema. A’geat de, is logon naduk togolik enelalugabonobua, enebe Allah paget onobouwa a’ge ai nak e, onogola modok enagai houwa o. Is ai pobuk warom erlak welat, enebe Allah emin, Kristus emin, e’birek eiye emarik, o mo ligom, ’bugom, osokhwe 1.000 tahun pam, is Kristus emin aphwami logon eneragam onoboluk tenentarok welema entegis o.
Iblis mabenap poluk odouk orloukmu perakpouwa wene
7Asogo entegistikmu en, e’berlik e, o mo ligom, ’bugom, osokhwe, 1.000 tahun arat wolotluk en, ologun ’goboksogo re, Iblis e’gik herle werak a’ge ano herle hebilogo porluma o. 8#Yeh. 7:2; 38:2,9,15Asogo porlu agoam e, weim obuogoluk, aphwami ena’gul onuk lo’bok ’bogorl edip-edip o’gut ugan pam erabu akhit en, orogobu akhit en, etleba akhit en, yema akhit en, welagai a’ge lalenebiogoluk enede edikpil lasumu hegi o. Ai re, o onuk Gog a’ge emin, Magog a’ge emin, ene’bek weim yo’go lagarik, enebe modok a’bik ik ’berlik laut esa’goma welago ai ’gela’ge odoksogo enebesimu oruakma entegis o. 9Asogo odoktigisarik, aphwami Allah eiyagai o kota Allah owi seli ede hwedik a’ge ano pulholuk oruakma, o lasogo enebe waronobuogoluk ’betesogo ’gumogoluk togumu re, odouk ’bogorl pam en ’bu agalat, enebe ’berlek odouk en perlengsogo nasumu entegis o. 10Asogo nasukhwe, at mene orlomene ’gela’ge ano emin, at mesik en,
“An Allah iak mo’gulentasu legi o,” oluk iak eseiyat lalenebiso a’ge ano emin, ik laut odouk a’ge ye’gelakma hwedali al ’gela’ge e’ben wiak a’ge onuk belerang emin-emin magale nasu modok welagoma eba ha’boksogo ’belabenebegei a’ge ano eba oruakma, Iblis ano pobuk ene’bek ha’boksogo hwikha ’begeimu enemin eba welat, hup erlige nonouk togwi modok welema entegis o.
O ologun pam wene enebam pasulat, no’gorliselat, tua wene
11 #
Dan. 7:9,10 Asogo hegirikmu en, e’berlik e, Allah ’gain welagoma ebale lok ’gut a’ge oruakma, at ebe eba oruakma hegi. Asogo oruakma ’bogorl, ’gwiang, ’berlegat, at ogoiyesogo erlak agarikmu no oluk e, pobuk enil ho a’ge erlak agoma hegi o. 12Asogo erlak agokhwe, aphwami waregesa a’ge ononuk oruak a’ge emin, ononuk erlak a’ge emin, at ’gain ebalema oruak ano orogolema edik oruakma entegis o. Asogo oruakhwe, suesi’ga ’berlegat hebilogulat e, suesi’ga mesik aphwami enelaluk modok welemagoluk obabonobua a’ge nak ononuk pelal wogo a’ge hebeliselat, taga laga. Asogo hebilholuk, is aphwami waregesa a’ge enebabut togu legesa a’ge suesi’ga eba pam pelal wogo a’ge hegitsogoat wene enebam pasulat, no’gorliselat, tisoma hegi o. 13Ai ’gela’geat, aphwami pema akhit waregesarik, ik laut ye’gelakma welagai a’ge, ik laut en pelalogo lebigonobou wagalat, aphwami warotluk ’gwiang ogola opma orogobu ’bigisa a’ge, at waragai edip emin, opma orogobu emin, eiye welago a’ge ano en ono’borlu agalat, tisoma re, at Allah en is enebe lo’bok enebabut togu legesa hegitsogoat wene enebam pasulat, no’gorliselat, tisoma hegi o. 14-15Wene asogo enebam pouwa ai re, suesi’ga is aphwami logon enebe lo’bok enelaluk modok welemagoluk obabonobua a’ge nak, ononuk pelal wogo ano pam wogo erlak a’ge holuk, asogo ik laut odouk ye’gelak a’ge ai pam ha’boksogo ’belagenebasulat, ’gwiang ogola orogobu emin, waragai edip emin, eminat ha’boksogo ebayat ’belagenebasumu hegi o. Asogo ’belagenebasu laga ai re, naduk lodu paget warotlukmu en, pobuk warema re, ik odouk a’ge ye’gelakma ’belagonobua aiat o.
Currently Selected:
Wahyu 20: Wul
Highlight
Copy
Compare
Share
Want to have your highlights saved across all your devices? Sign up or sign in
