Wahyu 18
18
Aphwami o Babel a’ge wollo’gen dagalenebisoma il yethesi wene
1Asogo mo’gulnesirikmu en e’berlik e, at malaikat mu a’ge mesik ’bogorl pam ’bu agoma yethegi o. At ai anni modok a’bik welat, ebe amolit e’bak-’bage a’bikmu re, aphwami ’gwiangma a’ge ’berlegat enebam ’gwialisoma yethegi. 2-3#Yes. 13:21; 21:9; Yer. 50:39; 51:8; Wah. 14:8 #Yes. 23:17; Yer. 51:7Asogo ’bu agarik iak loksogoat disogo mo’gulesi
“O kota Babel lok a’ge ano modok erlagap pegi o! Modok wollo’gen dagalak pegi o! Is o kota Babel odoktogwi a’ge ebano, hwe danian denago a’ge ’gela’geatma re, hwe ano ebam aganhan agoam,
Tenniemit, oluk, aphwami ena’gul onuk lo’bok ’berlegat emin, ap ’gain ononuk logo ’gwiangma a’ge emin, mo’gulentasuam, is en ’babi tenhogu legesa ai o. Ye, at hwe ai ebam aganhan agoam tenhouwagoluk ebabut tago ai pam, aphwami ’gwiangma a’ge di a’ge yu a’ge o’go saborogwi a’ge enilmu oruak ’gela’ge pagathwerlil laga legesa. Asogo togu legesa a’geat de, yogodak arat wollo’gen dagalegesa yu o. O Babel lok a’ge wollo’gen dagalegesa yu, hweinat! Asogo wollo’gen dagalegesema re, Iblis osi enemin, mu’gat enebabut wiak a’ge enemin,
Sue ai a’ge nagup erlak oluk ogoiye togwi a’ge ’berlek emin, is onowi aga o,” oluk mo’gulesi.
4-5 #
Yes. 48:20; Yer. 50:8; 51:6,45 #
Kej. 18:20,21; Yer. 51:9 Asogo mo’gulesirikmu en e’berlik e, at Allah iak ’bogorl pam en mesik disogo egei,
“Aphwami en, di a’ge yu a’ge ono’borl pam louk-louk poluk lagai ai ’gela’ge, is aphwami en, at hwe ai emin wiak togwi modok welagai a’ge ai ’bogorl hegit ligagama, an Allah nede eberak modok welegi ai en e, an en is wene enebam poluk wiagabenebik o. Is wiagabenebiselat, his an neiyagai a’ge is enemin welat, is enebabut wokho wiak tumu enemin wiagaphonobuano oluk e, is ugonoboluk hweiye liplau manis o. 6#Mzm. 137:8; Yer. 50:29Ye, his en, at hwe ai wene ebam pagup a’ge en, at en is tagenebasu laga ’gela’geat, wene ebe ebam pasulat, mesik emin ebam louksogo pomup o. Ye, at en ik wogentasu ai ’gela’geat, olot het enebam pasu laga a’ge ai, o’go wene ebam pogulat, mesik emin ebam louksogo pomup o. 7#Yes. 47:7-9At hwe ai, u’gwarek en eselat,
An nebe ’gain welat, aphwami neragam onoboluk tenentarok welat e, sugwe nebegesema en nede wiak egirik nge taga leik no? Erlak o, oluk di a’ge yu a’ge ’burl e’gerlakma welat u’gwarek en loksogo erliktago modok oruak ai ’gela’geat, nonouk loksogo tagalat, ede wiak emarik nge taga lemagoluk wene ebam pomup o. 8Asogo epasu ai en e, an Allah nanni a’bikmu re, mesik erlige so’boru obuk emin, ou edip emin wogeiktik, ebe odoukmu narlik pasuam aphwami logon enede wiak emarik nge togu lema ai o,” oluk ’bogorl pam en osoma nesa’go hwelegis.
9 #
Yeh. 26:16,17 At hwe ai ebe asogo odouk nasulat, asu hobu ligagoam, is ap ’gain ononuk logo ’gwiangma welagai a’ge, at hwe ai ebam aganhan agoam, sebelho mia en, ’babi tenhouwagoluk tagoam, tenhogu legesa a’ge ebano en enil yetholuk, ebaget ngi togwi nge togwi, modok welegesa. 10At ebaget nge asogo togulat, “At wiagap pesimu nonouk tago ai, nis emin wiagapnenebisoam nonouk tulno,” oluk, onogorlok en enebe walegat edik welat, nge disogo togu legesa,
“At Allah en, his aphwami o Babel a’ge henanni a’bik ano re, we, mesik erligeat wene henebam poluk wiagap henebegei ai, eige, nebit e,” oluk, nge togumu entegis o.
11 #
Yeh. 27:31,36 Is asogo nge togukhwe, is aphwami di a’ge yu a’ge o’go saborogwi a’ge en e, disogo ogu legesa,
“Nena’ge di a’ge yu a’ge woluk lultik, is aphwami o Babel a’ge enebam o’go wogu lege a’ge ebano, pobuk salak enebam o’go wogu lomul,” oluk enebaget ngi togwi, nge togwi, modok welegesa. 12#Yeh. 27:12,13,22Asogo nge tugulat,
“Di a’ge yu a’ge ai ebe re, o’go a’bik ’balogwi a’ge emas emin, perak emin, helebe’gen o’go a’bigat ’balogwi a’ge onuk permata emin, mutiara emin, sum kain sutera sum emin, lenan sum emin, orogole re, wibe’gen ’belak a’ge ’gela’ge emin, ’borlu ’belak a’ge ’gela’ge emin, e e’ben op a’ge emin, wam lok ’gela’ge onuk gajah iak a’ge di a’ge yu a’ge hele’gogwi a’ge emin, di a’ge yu a’ge e o’go a’bik ’balogwi a’ge hele’gogulat, tembaga a’ge hele’gogulat, ’besieme’gen a’ge hele’gogulat, helep onuk pualam a’ge hele’gogulat, togwi a’ge emin, 13e’ben op a’ge kami emin, hedit ’gela’ge emin, ’be’ga ’gela’ge emin, e mur a’bosu emin, kemenyan a’bosu emin, anggur e’gen a’bosu emin, minyak goreng emin, tepung emin, gandum emin, wam sapi emin, kuda emin, domba emin, ’gwiangso ’gela’ge onuk kereta emin, aphwami enebe eneragam a’ge welemagoluk emin, ’berlegat woluk lultik, salak enebam o’go wogu lomul,” oluk nge togu legesa. 14Asogo nge togulat, is Babel a’ge disogo mo’gulentigisa,
“Di a’ge yu a’ge his henagai a’ge erlak agalat, di a’ge yu a’ge ’burl e’gerlakma welat, honogola henagaisogo welegep a’ge erlak agalat, tegeimu re, his en herasogo wo re, modok mia aga o,” oluk ogu legesa. 15#Yeh. 27:31,36Asogo egesarik, is aphwami di a’ge yu a’ge o’go sabusogo is Babel a’ge enebam saborogu legesa a’ge ebano en e,
“Is aphwami o Babel a’ge di obotut yu obotut tagenebesi ai ’gela’ge, nis asogoat taknonobouwano,” oluk onogorlok en enebe walegat edik welat, enebaget nge togulat e, disogo ogu legesa,
16-17 #
Yes. 23:14; Yeh. 27:26-30 “His Babel a’ge honosum kain lenan sum a’ge orogole wibe’gen ’belak ’gela’ge emin, ’borlu ’belak ’gela’ge emin, ’buktak poluk, henalli a’ge emas a’ge emin, helebe’gen o’go a’bik ’balogwi a’ge onuk permata ’gela’ge emin, mutiara ’gela’ge emin, wogu legep ano re, we, mesik erlige arat almaregesa yu eige, nebit e,” oluk enebaget ngi togwi, nge togwi, modok welegesa.
Is asogo togukhwe, is aphwami ik so lok a’ge onuk kapal woluk no’gwi a’ge onuelak ap ’gain emin, onosi ik so worogwi a’ge emin, is aphwami muon wogonoboluk lagai a’ge emin, is logon ik laut ye’gelak a’ge petne di a’ge yu a’ge heratil no’gwi a’ge emin, ’berlegat, is aphwami Babel a’ge enebe odouk no’gukhwe enasu hobu enil yetharok walekma edik welat, disogo ogu legesa,
18-19 #
Yeh. 27:32
#
Yeh. 27:30-34
“Eige, nonogorlok o. O kota aphwami Babel a’ge onowi seli yu ’gela’ge, o di owi yu owi mesik oruak no? Modok erlak o,” oluk, ’gwiang ena’gul pam egilogo enebaget nge togulat disogo ogu legesa,
“Eige, nede o. Is aphwami o Babel a’ge ena’ge di a’ge yu a’ge a’bikmu re, nis nonoso o’go ’balogo nenilmu oruak a’ge ’gela’ge taknonobogwi a’ge anoat de, we, mesik erlige almaregesa yu nede o,” oluk ogu legesa. 20#Ula. 32:43; Yer. 51:48Asogo ogukhwe, at mesik en e, is Allah eiyagai a’ge disogo mo’gulentesi,
“Allah en e, his hena’gulmu is o Babel a’ge wene enebam poluk wiagabenebegei ai en e, his ’bogorl pam a’ge ’berlegat honogola henagai hogulat, his Yesus en yo’go honoboluk perakhenebesi a’ge emin, his at iak mo’gulontogu legep a’ge emin, his Allah eiyagai logon emin, ’berlegat honogola henagai hogulat, tip o,” oluk osoma hwelegis.
21 #
Yer. 51:63-64; Yeh. 26:21 Asogo osoma hwelegistikmu en e’berlik e, at malaikat anni a’bik a’ge mesik wagarik helep lok di a’ge yu a’ge damologwi a’ge ’gela’ge ha’boksogo ik laut ye’gelakma ’belabiselat disogo egei,
“At Allah en his aphwami o kota Babel a’ge, disogoat annisogo hwikhenta ’bua o. Asogo hwikhenta ’bu ema re, pobuk aphwami en enil hontouwa modok erlak o. 22-23#Yeh. 26:13; Yes. 24:8#Yer. 7:34; 25:10Aphwami o di owi yu owi o’go saborogwi a’ge, ononuk erlak a’ge ’gela’ge a’geat de, ap his a’ge nak e, ononuk oruak a’ge welegesa. Ye, his en henasua a’ge pam aphwami o di owi yu owi ena’gul onuk lo’bok, lalonobogu legebat o. Asogo togu legep a’geat de, is gitar worogwi a’ge emin, weni worogwi a’ge emin, me’gin ele delak poluk ’bi’gong iak inghogwi ai ’gela’ge emin, ’bi’gong lok a’ge iak inghogwi a’ge emin, pobuk inghasuam iak enesa’go holua erlagat o. Ye, ap mesik di a’ge yu a’ge o’bogun wiak hele’giso a’ge en hele’gisoma enil houwa erlagat o. Ye, onso’boru gandum e’gen a’ge damologukhwe helep o’borlogouk oso a’ge ai, pobuk iak osoma enesa’go holua erlagat o. Ye, henesaga magale enil houwa erlagat o. Ye, ap en hwami wogonobogwiam onogola enagaisogo eniak ogwi a’ge enesa’go holua erlagat o,” oluk osoma hwelegis.
24 #
Yer. 51:49
Is aphwami o kota Babel a’ge en, aphwami Allah iak mo’gulontogwi a’ge emin, Allah eiyagai logon emin, enemep namogo waronobogulat, is aphwami logon ’gwiangma warenebegisa a’ge ’berlegat, is enat waronobogulat, tigisarikmu no oluk e, enemep ene’gik orlogunmu oruak ai en, Allah en wene enebam poluk, wiagabenebegei ai o.
Currently Selected:
Wahyu 18: Wul
Highlight
Copy
Compare
Share
Want to have your highlights saved across all your devices? Sign up or sign in
