Wahyu 17
17
Hwe a’ge mesik ’gain danian nil noso a’ge paget mo’gulesi wene
1-2 #
Yer. 51:13
#
Yes. 23:17; Yer. 51:7 Asogo hegirikmu en e’berlik e, is malaikat enebe sabiren Allah olot het ik ’gela’ge na’gogo woluk herleligisa a’ge mesik wagarik disogo mo’gulnesi,
“Is aphwami o kota Babel a’ge, hwe ’gain danian nil noso a’ge ’gela’ge ai, ik lok a’ge esa’goma oruakma, ap ’gain ononuk logo a’ge ’gwiangma a’ge en at ’babi tenhogulat, aphwami logon en anggur e’gen a’bosu no’gwi modok welat, enede ’balagai ai ’gela’ge, aphwami ’gwiangma a’ge en at ’babi tenhogwi modok welat, togwi a’ge ai, Allah en hwe ai wene ebam poluk ebe wiagap paigoluk eme’gin ’gabelegei a’ge mo’gulheik en e, suk o,” oluk mo’gulnesi.
3 #
Wah. 13:1
Asogo mo’gulnesimu re, Allah Arogun nebam louk lau wagama, at malaikat ano en woknoboluk, o aphwami erlakma leimu laga. Asogo woknoboluk lagama welat, yethegi ’gal e, hwe ano mene orlomene ’gela’ge lok asu momi a’ge ’gela’ge o’borl pam huragarik nosoma yethegi o. Mene orlomene ’gela’ge ai a’gul e, sabit pam, ye, iak a’gul pam e, 10 pam daintak, ye, ebe ebagase re, Allah onuk wik-wiak takpasu a’ge pelal ’betesogo wogo a’ge yethegi o. 4#Yer. 51:7Ye, hwe ai osum mesik il momi a’ge ’gela’ge, ye, mesik il wibe’gen ’belak a’ge ’gela’ge, ’buktak o. Ye, alli a’ge re, emas a’ge emin, helebe’gen il op welat o’go a’bik ’balogwi a’ge onuk permata emin, mutiara emin, wantak welat, ebabut wiak tagalat, ’babi tenhouwagoluk tagalat, asogo danian nil denago a’ge ai, ik e’be emas a’ge pam na’gogo e’gikmu tenakho oruakma yethegi o. 5Ye, wene ebe hisogo a’ge e’berli pam pelal disogo wogo,
“Aphwami ’gwiangma a’ge danian nil no’gwi a’ge emin, enebabut wiak modok togwi a’ge emin, ’berlegat enia onuk Babel ’gain yu o,” oluk pelal wogo oruakma yethegi. 6Ye, hwe ai en, Allah eiyagai a’ge emin, Yesus iak mo’gulentil no’gwi a’ge emin, warenebegei a’ge enemep ne’geitik, aphwami en anggur e’gen a’bosu noluk enede ’balagai ai ’gela’ge, ede ’balagarik oruakma yethegi o.
Asogo yethegirik a’bik erliktegis. 7Asogo hegirik, erliktaga legimu re, malaikat ano en disogo mo’gulnesi,
“Nopaget erliktaga legen. An en, hwe ai ebe emin, mene orlomene ’gela’ge a’gul sabit pam, ye, iak a’gul pam 10 en daintak a’ge, o’borl pam at hwe ai hweriogo oruakhwe woluk noso a’ge ai emin, e’birek enebaget wene hisogo oruak a’ge ’baksogo ’beli’gogo mo’gulheik o. 8#Dan. 7:7; Mzm. 69:28; Wah. 11:7 Mene orlomene ’gela’ge hegen ai re, naduk welaga a’geat de, yogodak orogole erlak hegen ai re, ’gwiang ogola en orluma o. Orlu ago holuk, Allah en almerak pouwa o. Ye, Allah en ’gwiang ’bogorl owan walho erlak welat, suesi’ga is aphwami enelaluk modok welemagoluk obabonobua a’ge nak, ononuk pelal wogo ai pam, is logon ononuk pelal wogo erlak a’ge en mene orlomene ’gela’ge ai enil houwarik, is en e,
Mene orlomene ’gela’ge yu, naduk welagarik en, orogole erlak aga a’geat de, pobuk hebarligen aga yu, nogorlok o, oluk erliktua o.
9Ye, wene mo’gulheik yu paget e, enebabut heberlak oruak a’ge nak pobitu o. At mene orlomene ’gela’ge ai, a’gul ebe sabiren hegen ai ebe re, dom ebe sabiren, at hwe ai ’gain welagama eba oruak a’ge hegen o. Ye, mesik e, ap ’gain ononuk logo a’ge enebe sabiren oruak a’ge paget hegen o. 10Ye, is ’gain enebe sabiren ai a’ge, enebe huaben arat ’goboksogo ’bigisema re, enebe ’biren nak oruak a’ge ai, mesik arat ’gain welat, aphwami eragam onoboluk tenentarok oruak. Ye, mesik pobuk holuk hebarligen ema. Enam emarik e, at en aphwami eragam onoboluk tenentarok modok welema erlak. We, agauwa weiyat welema o. 11Mene orlomene ’gela’ge naduk welaga a’geat de, orogole erlak ai ebe re, ’gain enebe sabiren ebano arat ’gobologo ’bil ’bil waga legesarik, is enebe sabit ai a’ge logon pobuk togolik ’gain egesarik, ene’gik wenakho 8 ’gela’ge egesarik, pobuk Allah en almerak pouwa a’ge hegen o. 12#Dan. 7:24Ye, iak a’gul pam 10 en daintak hegen ai ebe re, ap enebe 10 pam ’gain ema a’ge owan oruak a’ge paget hegen a’geat de, is ’gain edigonoboma, at mene orlomene ’gela’ge ano emin, we, o mo il mesigat pam nak ’gain welat aphwami tenentarok welema a’ge paget hegen o. 13Is ai enede mesigat welat, at mene orlomene ’gela’ge ano mo’guleselat e,
Nis ’gain welemagoluk ediknenebegesema nononuk oruak a’ge welege ai, harat honuk oruak a’ge welerinogoluk eiyerak hebege o, oluk mo’gulegisa. 14Asogo eiyerak poluk, Domba Emalik ano weim emin obuogoluk tua a’geat de, at Domba Emalik ebe aphwami ’gain ononuk logo a’ge emin, ononuk oruak a’ge emin, ’berlegat onue onuk oruak a’ge logo aratma re, eiyagai poligonoboluk yo’go enebesimu enebabut at ebaget he’bisogo togwi a’ge ebano, at oruak o’gwe emarik, emin en, at mene orlomene ’gela’ge ano osi enemin mabenap pouwa o,” oluk mo’gulnesi.
15At malaikat ano en asogo mo’gulnesirik, mesik disogo mo’gulnesi, “At hwe danian nil noso a’ge ’gela’ge ai, ebe ’gain welagoma ik hegen ai ebe re, aphwami ’berlegat ena’gul onuk lo’bok, enagap lo’bok, onowi lo’bok, eniak lo’bok a’ge hil entigen o. 16Ye, iak a’gul pam 10 daintak ano emin, mene orlomene ’gela’ge ebe ano emin, emin e, hwe danian noso a’ge ai, ebe enebirap poluk e, di a’ge yu a’ge at ena’ge horlogulat, ebe age’golom ukpogulat, toluk, ebe wusogo pema no’gulat, pema odouk narlik pouwa o. 17Asogo tua ai re, Allah en egei a’ge hegitsogoat emagoluk, at enat ogola epasu a’ge ai, is ap ’gain ai enede ’gagalegeimu, is enede mesigat welat, is en e, at mene orlomene ’gela’ge ano mo’guleselat,
Nis ’gain nononuk oruak a’ge welege ano ’gela’ge, hat ’gain honuk oruak a’ge wolorogun o, oluk eiyerak poluk, emin en, hwe danian nil noso a’ge ano ebe worua ai o. 18Ye, hwe a’ge hil hegen ai ebe re, ap ’gain ononuk logo ’gwiangma a’ge ’berlegat eragam onoboluk tenentarok welago a’ge, o kota lok a’ge ogwi anoat hil hegen o,” oluk mo’gulnesi.
Currently Selected:
Wahyu 17: Wul
Highlight
Copy
Compare
Share
Want to have your highlights saved across all your devices? Sign up or sign in
