Wahyu 16
16
Allah en olot het enebam poluk wiagabenebisoma yethesi wene
1Asogo yethegirikmu en, pobuk e, Allah owi werikmu ano en, at iak loksogo is malaikat enebe sabit pam ebano disogo mo’gulentasumu nesa’go hwelegis, “An Allah nolot het ik ’gela’ge ik e’be sabiren ne’gak a’ge ai herlilogo aphwami ’gwiangma a’ge enebam ’belabi lit o,” oluk mo’gulosoma hwelegis o.
2 #
Kel. 9:10
Mo’gulesimu, is malaikat enebe sabit ebano a’ge mesik naduk Allah olot het ik ’gela’ge ne’gak ano a’ge mesik herlilogo aphwami ’gwiangma a’ge enebam ’belabu agoam e, is aphwami pema akhit logon ’berlegat enede we’gerlogo, mene orlomene lok ano onuk pelal wogo a’ge ano wasulat, enede dogwi at ebe ’gela’ge, ogut hele’gik a’ge ano pam he’berik pogulat, tigisa a’ge nak, ’bot wiak a’ge enebetne duk tagoma yethegi o.
3Asogo hegirikmu en, e’berlik e, is malaikat enebe sabiren ebano a’ge mesigat en asogo ’belabu agarikmu en, mesik en Allah olot het ik ’gela’ge ne’gak ano a’ge mesik herlilogo ik laut ye’gelakma ’belabisoam e, ik il aphwami waronobogwiam enemep ’gela’ge takpasulat e, di a’ge yu a’ge ik laut ye’gelak ogola elaluk welago a’ge ’berlegat waretil lasumu yethegi o.
4 #
Kel. 7:17-21; Mzm. 78:44 Asogo hegirikmu en, e’berlik e, is malaikat ebano a’ge enebe ’biren en asogo ’belabu egesarikmu en, mesik en e, Allah olot het ik ’gela’ge ne’gak a’ge ano mesik herlilogo ik elaruk o’gwe emin, ye, ik ebe lok lau wago’gwe emin, ’belabisoam e, ik ’berlegat il mep agoma yethegi. 5Asogo agoma re, at malaikat ik eiye a’ge en Allah disogo mo’gulesi,
“Allah hebe naduk welegentik, yogodak hotok modogat welat, ’gektak welegen a’ge en, aphwami wene hegitsogoat enebam pegen o. 6Is ap ai en, hat heiyagai a’ge emin, hat hiak mo’gulontogwi a’ge emin, enemep enamogo warenebegisema re, mep nouwagoluk wogentigen ai re, enebabut pamat hegitsogo wogentigen o, naik,” oluk osoma hwelegis. 7Asogo egeitikmu en, e’berlik e, Allah uam wusogo narlogumu ebano en disogo osoma hwelegis.
“Allah hanni modok a’bikmu re, di a’ge yu a’ge tu elit nak welat e, wene enebam pasulat, no’gorliselat, demat hegitsogo taga legen ano en, asogo tigen o, naik,” oluk ese lagama hwelegis.
8Is malaikat ebano a’ge enebe henagan pam asogo ’belebak polukmu mesik en Allah olot het ik ’gela’ge ne’gak a’ge ano mesik mo pam herlelik pasuam e, mo orlouk en aphwami enebam odouk ’gela’ge nasu lemagoluk, mo orlouk a’bik takpesimu, aphwami enebam odouk ’gela’ge nasumu hegi o. 9Asogo orlouk en odouk ’gela’ge enebam loksogo nasuam nonouk a’bik togulat, Allah olot het enebam poluk wiagabonobu hegitsogoat wiagabenebise laga a’geat de, at ebe erliktuagoluk wiak togu legesa a’ge ukpoluk, enebabut heberlom erlakma en welat, is en e,
“Allah ebe no’gorelep e,” oluk, onuk wiagaptogwi modok oruakma entegis o.
10 #
Kel. 10:21
Is malaikat ebano a’ge enebe ugan asogo ’belakpou wegesarikmu en mesik en e, Allah olot het ik ’gela’ge ne’gak ano mesik herlilogo mene orlomene ’gela’ge lok a’ge ano ’gain welago a’ge ebalema ’belabisoam e, o at ’gain welat tenentarok welagoma ebano ’berlegat hik ese laga. Asogo hik osoam e, is aphwami nonouk togulat, enemage eniak en hedin takpoluk, disogo ogu legesa,
“Nenebam yebil obotut wiak yema nebit e,” oluk, 11enebabut onotogat welat wiak togu legesa a’ge ukpoluk, enebabut heberlom erlak welat, is en e,
“Allah ebe no’gorelep e,” oluk Allah ’bogorl pam a’ge onuk wiagaptogwi modogat oruakma entegis o.
12 #
Yes. 11:15
Asogo oruakhwe, is malaikat ebano a’ge enebe huaben en asogo tigisarikmu en, mesik en Allah olot het ik ’gela’ge ne’gak a’ge ano mesik herlilogo, is ap ononuk logo a’ge o mo orlu agoma a’ge wemagoluk, ik lok a’ge onuk Efrat ai pam ’belabisoam e, is wom o’gwe ik ebe deng ese laga. 13Asogo deng egeirikmu en, e’berlik e, ’gosu lok a’ge emin, mene orlomene ’gela’ge lok a’ge emin, Allah iak mo’gulentasu a’ge ’gela’ge iak eseiyat oso a’ge ano emin, enemdema en mu’gat enebabut wiak a’ge enebe henagan yagaye ’gela’ge liplau waga laga. 14Mu’gat ai enebe re, Iblis osi a’ge aphwami enebam louk lau wagoam tu puk a’ge elalin togwi a’ge anoat o. Is asogo liplau wegesarik e, Allah anni a’bikmu di a’ge yu a’ge tu elit nak a’ge ano owi dakha ua ai pam weim enemin obuogoluk, ap ononuk logo a’ge o di owi yu owi odogonobuogoluk, weim yo’go lagaimu entegis o. 15#Mat. 24:43,44; Luk. 12:39,40; Wah. 3:3Asogo legesarikmu en, at Yesus en disogo mo’gulnesi,
“Hesa’go hwelin o. Aphwami yogot wouwogoluk hisakho wagai ai ’gela’ge, an asogoat weik o. Asogo wagoam e, aphwami enage’golom oruakma ene’gerli ago ai ’gela’ge, his asogoat hene’gerli ema no oluk honosum perleneat ’bukhorlouwogoluk degelogo poluk wolorogup holuk e, Allah en obaphenebisoam honogola henagai hagup o,” oluk mo’gulnosoma hwelegis o. 16#2Raj. 23:29; Zak. 12:11Ye, is Iblis osi enebabut wiak a’ge ebano en, is ap ’gain ebano o is aphwami Ibrani eniak pam onuk Harmagedon ogumu ai odoksogo enebasumu yerentegis o.
17Asogo hegirikmu en, e’berlik e, is malaikat ebano a’ge enebe hebarlik pam asogo tigisarikmu en, at mesik en, Allah olot het ik ’gela’ge ne’gak ano a’ge mesik herlilogo ’bogorl abel olukhwe akhit o hena ebalema ’belabisoam e, Allah owi werikmu at ’gain welago a’ge ebalema en iak loksogo disogo egei,
“Arat ologun wusogo aga o,” oluk egei. 18#Wah. 8:5; 11:13,19Asogo osoam e, ebinal pobuk naduk yebekhasulat, orlolu iak ’bak oluk en, iak orlu lasulat, mouk onogorlok a’ge aphwami Allah en walentesi a’ge hwerli yogodak hwerli, mouk ai ’gela’ge mesik erlang-perlang ho erlak a’ge aiat erlang-perlang hasulat, tagoma yethegi o. 19#Yes. 51:17Asogo osoam e, o seli lok ano ’gwiang ’baksogo henagan pam mogoliselat, aphwami ena’gul onuk lo’bok Allah ebe eneperlak a’ge onowi seli lo’bok ’berlegat moluk-melaksogo wollo’gen dagalagalat, tisoma, Allah en e,
“An nolot het a’bik anggur a’bosu ne’gak a’ge ’gela’ge ano, at o Babel lok a’ge ano wogeik o,” oluk, obok mo’gulesi a’ge ai ede eberegeitik, wogosoma hegi o. 20#Wah. 6:14Ye, ’gwiang ik e’gen o’gwe ’berlegat emin, dom ’berlegat emin, erlak agalat, 21#Kel. 9:23; Wah. 11:19’bogorl pam en moru hagarle’gen lok a’ge ebe lo’bok e’gin e, 50 kilo a’ge ’bu agalat, aphwami enebe warenebiselat, taga laga. Asogo warenebisokhwe, is en ogulat e,
“Moru hagarle’gen wiak watnenebiso yu re, Allah ebe no’gorelep e,” oluk onuk wiagap pogwi modok oruakma yerentegis o.
Currently Selected:
Wahyu 16: Wul
Highlight
Copy
Compare
Share
Want to have your highlights saved across all your devices? Sign up or sign in
