Wahyu 15
15
Allah olot het o ologun pam aphwami enebam pouwa a’ge malaikat enebe sabiren a’ge wogentasumu yerentesi wene
1Nil asogo yethegirikmu en, e’berlik e, aphwami en pobi tuagoluk, elalin lok a’ge mesik onogorlok a’ge ’gela’ge disogo ’bogorl pam hebarligen agoma yethegi o. Allah olot het ologun pam aphwami enebam poluk wiagabonobua ai en e, agauwa sabit a’ge pam wiagabonobua a’ge, malaikat enebe sabirenat hebarligen agaimu yerentegis o. 2Asogo hegirikmu en, e’berlik e, ik laut il lalu napunak ’gela’ge odouk emin mesik o’gwe ye’gelak oruakma yethegi. Asogo hegirik pobuk yethegi ’gal e, aphwami logon enede mene orlomene ’gela’ge ano emin, dogwi at ebe ’gela’ge ogut hele’gik a’ge ano emin, enebam he’berik poluk erligonobu erlakma en, ye, onuk ene’gik wenakho pelal wogo a’ge ano wo erlagat, togu legesa pam enanni egesarik, ’bi’gong gitar ’gela’ge Allah en wogentesimu ene’gikmu wik-wok, ik laut ye’gelak ai esa’go’gwe edik oruakma yerentegis o. 3-4#Kel. 15:1#Mzm. 86:9; Yer. 10:7 Asogo welat, weni at Musa Allah eragam a’ge ano emin, Domba Emalik ano emin, e’birek onoweni worogulat disogo ogu legesa,
“Nenaik Allah, ... u a e
Hat hanni a’bikmu re, ... u a e
Di a’ge yu a’ge tu nakma re, ... u a e
Elalin loksogo onogorlok a’ge nak taga legen, ... u a e
Hat di aphwami yu aphwami enaik ’gain Honuk Logo a’ge welat, ... u a e
Hegitsogo nak tagenebasu legen, ... u a e
Op nak tagenebasu legen, ... u a e
Nenaik o, ... u a e
Nenaik ’gain Honuk Logo a’ge hat hematek nak ’geksogo welat, ... u a e
Aphwami wene enebam pasulat, no’gorliselat, tagalat, ... u a e
Aphwami ’berlegat enilem, ... u a e
Demat modok taga legen, ... u a e
Aphwami ena’gul onuk lo’bok ’berlegat, ... u a e
Heragam ’gu otluk, ... u a e
Ondogorlu pam huragalat, ... u a e
Erlikhobogulat, hau wathobogulat, togumu, ... u a e
Is aphwami salak ’gela’ge en hat onogorlok erlak welat, ... u a e
Erlikhobu erlakma en mo u, ... u a e
Erlak,” ... u a e
oluk weni worogumu hwelegis.
5 #
Kel. 38:21
Asogo yethegirikmu en e’berlik e, ’bogorl pam Allah owi werikmu ’goduk huragoam ogola re, at Allah ebe welago oluk, o sum a’ge werik ano oruakma yethegi o. 6Asogo ’goduk hwerik oruakma re, is malaikat enebe sabiren onosum meinya sum ’gela’ge onuk lenan il ’gut nogorlok a’ge ’buktak, ye, sing ’buktogwi ’gela’ge, emas a’ge enemik pam ’buktak a’ge, Allah en e’gik sabit pam aphwami wiagabonobua a’ge woluk liplau wagaimu yerentegis o. 7Asogo liplau wegesema re, is Allah en walentesimu enelaluk welagai a’ge enebe ugan ebano a’ge mesik en ik e’be sabit a’ge emas hele’gikmu Allah elaluk modok welago a’ge olot het ik ’gela’ge ne’gak a’ge, Allah en is malaikat enebe sabiren ebano wogentasumu yethegi o. 8#Kel. 40:34; 1Raj. 8:10,11; 2Taw. 5:13,14; Yes. 6:4Wogentasumu, Allah owi werikmu ano Allah olot het a’bik erliktogwi a’ge onogorlok a’ge ’gela’ge ano odouk hobu ’gela’ge ’bete egeimu re, is malaikat enebe sabiren ebano Allah en aphwami wiagabonobua ano ologun pam wiagabonobu erlakma en oruakhwe, aphwami logon Allah owi werikmu ai ’gogumu yerentegis modok erlak o.
Currently Selected:
Wahyu 15: Wul
Highlight
Copy
Compare
Share
Want to have your highlights saved across all your devices? Sign up or sign in
