Wahyu 14
14
At Domba Emalik emin, eiyagai delenebegei a’ge emin, yerentesi wene
1 #
Yeh. 9:4; Wah. 7:3 Asogo yethegirikmu en, e’berlik e, yethegi ’gal e, at Domba Emalik ano dom Sion pam edik oruakma yethegi. Ai re, at ebe emin, is aphwami enebe 144.000 pam, at Domba Emalik emin, aik emin, e’birek ononuk is ai enebe lo’bok ene’berli pam pelal wogo a’ge emin, enemin oruakma yerentegis o. 2Asogo welat, eniak ’bogorl pam en e, ik hurl lok a’ge iak ’gela’ge ogulat, orlolu iak loksogo oso ’gela’ge ogulat, is aphwami logon gitar worogwi a’ge en ebe worogukhwe iak oso ’gela’ge ogulat, eniak a’bik ogumu nesa’go hwelegis o. 3Asogo eniak a’bik ogulat, Allah ebe ’gain welago a’ge ebalema eba oruakhwe, is at en walentesi a’ge logon enebe ugan ebano emin, ap enarlue ebano emin, enilem weni ’get a’ge pelalogo is aphwami pema akhit mo’golik erlakma en eneperlagat, we, is aphwami enebe 144.000 ’gwiangma en arat delenebegei a’ge ebano nak enalukmu re, worogukhwe eniak hwelegis o. 4-5#Zef. 3:13Is aphwami ai enebe re, degelak wolomogoluk, hwami enemin nogou erlak welat, enemde pam en eniak esei mesik ogwi erlagat, ye, aphwami logon en e, “Is ai wiak logon tigisema o,” oluk wene enebam po erlak a’ge welat, Domba Emalik ano ebela ’gebane lasu holuk, e’berlik no’gumu, so’boru ebe dogo erlakhwe, naduk-naduk dorogwi ai ’gela’ge, Allah en di aphwami yu aphwami onogola en ’gegilogo ono’go ’balogo delenebegeimu, is enebe Allah emin, Odomba emin, onu’gwarek enebaget onoboluk, oruakma entegis o.
Malaikat enebe henagan a’ge yerentesi wene
6Asogo hegirikmu en, e’berlik e, at malaikat mesik wene op wene modok welema a’ge aphwami ’gwiangma a’ge ena’gul onuk lo’bok, eniak lo’bok, enagap lo’bok, onowi lo’bok, mo’gulentil ’bogorl o’gwe darak nosoma yethegi o. 7Asogo neselat, iak loksogo disogo ese laga, “Nenaik Allah en wene aphwami enebam pasulat, no’gorliselat, tua ano, arat horok lau waga ai en e, Allah en ’bogorl emin, ’gwiang emin, ik laut ye’gelak emin, ik elaruk obut ’berlek emin, walhesi a’ge ano honogorloksogo welat, henede at ebam he’berik poluk, erliktogu lomup o,” oluk osoma yethegi o.
8 #
Yes. 21:9; Yer. 51:8; Wah. 18:2 Asogo egeitikmu en e’berlik e, at malaikat mesik wagarik e, disogo osoma nesa’go hwelegis o, “Aphwami logon en is logon enede ’balotluk, enebam aganhan en ’babi tenontogu lemagoluk, anggur e’gen a’bosu wogontogwi ai ’gela’ge, is aphwami o kota Babel a’ge enebam aganhan en aphwami ena’gul onuk lo’bok en ’babi tenontogu lemagoluk, enede ’gagalogwi a’ge ano, enebe arat wollo’gen dagalegesa, yu hweinat!” oluk ogumu hwelegis.
9Is malaikat enebe ’biren asogo egesarikmu en, ene’berlik malaikat mesik wagarik, iak loksogo disogo osoma hwelegis, “His logon mene orlomene ’gela’ge lok ai emin, ebe ’gela’ge hele’gik a’ge dogwi ai emin, henede enebam he’berik poluk erligenebigeptik, henebe silosogo at onuk ’belak hene’berli pam de a? Hene’gik pam de a, wegep a’ge nak, 10#Kej. 19:24; Yes. 51:17; Yeh. 38:22 aphwami en, ik emin erlak, we anggur e’gen a’bosu nak esik wiaksogo na’gogwi ai ’gela’ge, Allah olot het en his edeaphonobo erlakma en, wene ningsogo henebam pouwa o. Asogo henebam poluk, nis malaikat Allah paget welege a’ge emin, Domba Emalik ano emin, nenilem henebe, odouk emin, hwedali al ’gela’ge e’ben wiak a’ge onuk belerang emin, emin la’bulik nasumu eba perakhonoboma, nonuk togwi modok wolorogup o. 11#Yes. 34:10Ai re, his henede mene orlomene ’gela’ge ai emin, dogwi at ebe ’gela’ge hele’gik ai emin, enebam he’berik poluk erligenebigeptik, henebe silosogo onuk ’belak wegep a’ge nak asogo perakhonoboma, hup modok, erlige modok, set hwalogo op mesik wolom erlakma en, henebam odouk obotut en nonouk togukhwe, henagap hobu ligago modok welema o,” oluk osoma hwelegis.
12Wene yu paget tu a’ge logo re, Allah eiyagai at iak hwelakpoluk hegitsogo togulat, henede Yesus ebam he’berik welegep a’ge ai, henepe mosogo wolom o.
13Wene asogo osoma hwelegistikmu en, e’berlik e, ’bogorl pam en iak disogo mo’gulnosoma nesa’go hwelegis, “Yogodak aphwami nonue ’gain Onuk Logo a’ge emin hwedik welat, at ebaget op togumu waronobua a’ge, onogola modok enagai houwa o, oluk pelal wokho pomup o,” oluk mo’gulnosoma Allah Arogun ’bogorl pam en iak loksogo disogo mo’gulnesi, “Ai demat o. Is aphwami ai Yesus ebaget set wik-wiaksogo togu legesa a’ge ai, ebe tigisa a’ge woluk louwa ai en e, set opsogo hwalua o,” oluk mo’gulnosoma nesa’go hwelegis o.
“’Gwiangma owi yogo a’ge e’gen arat hurle agama ebe ’balu hegit lau waga o,” oluk egesa wene
14 #
Dan. 7:13
Asogo mo’gulnesirikmu en, e’berlik e, o hena ’gut a’ge oruakma, ap ebe abat daklau waga a’ge ano ’gela’ge ’gare-’gare emas a’ge a’gul pam ’buktak, ye, ’garok ’gwanitak a’ge en e, e’gat a’bik a’ge e’gikmu tenak welat, ebe o hena ano pam hweriogo oruakma yethegi o. 15#Yoe. 3:13Ai e’berlik e, at malaikat mesik Allah owi werikmu en liplau wagarik, iak loksogo, at o hena pam hweriogo welaga a’ge ano disogo mo’gulesi, “’Gwiangma e’gen arat hurle agama ebe ’balu hegit lau waga ai en e, he’garok ai wik-wok e, yogodak e’gen ’bali ’bin o,” oluk mo’gulesimu, 16at o hena pam hweriogo welaga a’ge ano e’garok ano wik-wok e, ’gwiangma e’gen ’balo’bu wagoma yethegi o.
17Asogo hegirikmu en, e’berlik e, at malaikat mesik ’bogorl pam Allah owi werikmu en, e’garok ’gwanitak a’ge en e, e’gat a’bik a’ge woluk liplau wagoma yethegi o. 18Asogo hegirikmu en e’berlik e, at malaikat mesik odouk eiye a’ge Allah uam wusogo narlik obogumu ebano en wagarik, at malaikat e’garok e’gat a’bik ’gwanitak a’ge woluk ’begei a’ge ano iak loksogo disogo mo’gulosoma hwelegis, “’Gwiangma anggur e’gen arat hurle agama ’balu hegit aga ai re, he’garok ai wik-wok ’bali ’bin o,” oluk mo’gulesi. 19Asogo mo’gulesimu, at ano e’garok woluk ’gwiangma ’bu agarik, anggur e’gen ’gwiangma a’ge ano uak pam en ’balogo e’gen sagalogwi a’ge ebale lok a’ge ogola hwikhai lasumu hegi o. E’gen sagalogumu ai ebe re, Allah en olot het loksogo enebam pasu aiat o. 20#Yes. 63:3; Rat. 1:15; Wah. 19:15Ye, anggur e’gen ’belak ai yagarak e, o seli abel pema akhit sagalogumu re, e’gen sagalogwi a’ge ai ogola en, mep ik elaruk ’gela’ge ’bulogo hwerli 2 meter ’gela’ge ye’gelogo lagarik e, husogo re, hwerli 300 kilometer walegat lasumu yethegi o.
Currently Selected:
Wahyu 14: Wul
Highlight
Copy
Compare
Share
Want to have your highlights saved across all your devices? Sign up or sign in
