Wahyu 13
13
Mene orlomene ’gela’ge ’biren lok a’ge hebarligen agoma il yethesi wene
1 #
Dan. 7:3; Wah. 17:3,7-12 Asogo yethegirikmu en, e’berlik e, mene orlomene ’gela’ge lok a’ge mesik iak a’gul pam e, 10 pam en daintak, ye, a’gul e, sabiren a’ge, ik laut ye’gelakma en liplau wagoma yethegi o. Iak 10 ai, ebe lo’bok ebam e, ’gare-’gare ap ’gain ’buktak onobogwi ai ’gela’ge ’buktak, ye, a’gul sabit a’ge ai re, ebe lo’bok e, ebam Allah onuk wik-wiaksogo takpogwi a’ge pelal wokho oruakma yethegi o. 2#Dan. 7:4-6At mene orlomene lok a’ge liplau wagoma hegi ai ebe re, mene ’gela’ge onuk harimau ’gela’ge. Ye, oyuk e, ’baik num ’gela’ge lok a’ge onuk beruang ai oyuk ’gela’ge. Ye, emde re, mene orlomene ’gela’ge onuk singa emde ’gela’ge asogo hebarligen agarikmu re, at ’gosu lok a’ge ano en, mene orlomene ’gela’ge ai mo’guleselat e, “An ’gain nanni a’bik welat, di a’ge yu a’ge eiye welago ano ’gela’ge, hat an nebalema ’gain wolorogun en edikhebegi o,” oluk mo’gulosoma hwelegis o. 3Hwelegistik yethegi ’gal e, at mene orlomene ’gela’ge lok ano a’gul ebano a’ge mesik werigisema, ebe warom a’geat de, op agarik sogomerli nak oruakma, aphwami ’berlegat enil holuk erliktogulat, at e’berlik modok lagaimu yerentegis o. 4At ’gosu ano en, at mene orlomene ’gela’ge lok a’ge ano mo’guleselat, “Hat ’gain hanni a’bik welerinok o,” oluk edikpesi ai en, is aphwami enede ’gosu ano emin, mene orlomene ’gela’ge lok ano emin, enebam he’berik poluk erligonobogulat disogo ogu legesa, “’Gosu lok a’ge yu emin hegit e, sa epegep. Emin hegit a’ge mesik erlak o. Sa ’gela’ge en at emin weim obu epegep. Mia o,” oluk ogumu entegis o. 5#Dan. 7:8,25; 11:36Asogo ogukhwe, o mo ligom, ’bugom, osokhwe, dugwi 42 pollil lasukhwe, at mene orlomene ’gela’ge lok a’ge ano u’gwarek en erlikhwerlasulat, Allah onuk wiagap pasulat, tagalat, aphwami eragam onoboluk tenentarok welemagoluk ’gosu lok ano en eiyerak pesimu yethegi o. 6At asogo welat, at en Allah ebe emin, onuk emin, at owi ’bogorl pam emin, is o ’bogorl pam welagai a’ge emin, ’berlegat ononuk wiagarisoma hegi o. 7#Dan. 7:21Ai ’gela’geat, aphwami ena’gul onuk lo’bok, eniak lo’bok, enagap lo’bok, onowi lo’bok, ’berlegat at en eragam onoboluk tenentarok welemagoluk edikpesimu eiye agarik, Allah eiyagai enemin weim obogulat, mabenabenebasumu hegi o. 8#Mzm. 69:28At Allah en e, ’bogorl ’gwiang owan walho erlak welat, “Is eria enelaluk modok welemagoluk tagenebaik o,” oluk, ononuk pelal wokho at Odomba Emalik, is enebaget werigisa a’ge ano oruesi’ga pam pesi o. Is ononuk asogo pelal wokho pesi a’ge nak, mene orlomene ’gela’ge lok a’ge ano, erliktu erlakma en oruakhwe, aphwami ’gwiangma welagai a’ge logon ’berlegat enede mene orlomene ’gela’ge lok ano pam he’berik poluk erliktogumu entegis o. 9-10#Yer. 15:2; 43:11Ai en e, wene mo’gulhentaik a’ge yu, his henesa’go oruak holuk e, opsogoat hwelit o. At mesik ebe herle wusogo po hegitsogoat, herle wusogo pouwa o. Ye, at mesik ’garok pam woru hegitsogoat, ’garok pam worua o. Asogo tua ai en, ebe logo re, Allah eiyagai a’ge holuk, enede at ebam he’berik poluk enepe mosogo wolom aiat o.
11Asogo hegirikmu en, e’berlik yethegi ’gal e, mene orlomene ’gela’ge lok mu a’ge mesik iak a’gul pam domba iak ’gela’ge ’biren daintak, ye, iak osoam e, ’gosu iak ’gela’ge, ’gwiangma en hebarligen agoma yethegi o. 12Enam agarik, mene orlomene ’gela’ge naduk a’ge ano eiye welat taga laga a’ge, at mene orlomene ’gela’ge pobuk a’ge ai eiye agarik, at en aphwami mo’gulentasulat e, “Aphwami ’gwiangma welegep a’ge ’berlegat, at mene orlomene ’gela’ge naduk a’ge ano werigisema re, ebe warom a’ge op aga a’ge aiat henede ebam he’berik poluk erliktu o,” oluk iak ningsogo mo’gulosoma hwelegis o. 13At mene orlomene ’gela’ge lok pobuk hebarligen aga a’ge ano, aphwami en at ebe pobi tuagoluk, is enil pam elalin a’ge tagalat, ’bogorl pam en odouk ’belabu agoma yethegi o. 14Asogo mesik taga laga ai, at mene orlomene ’gela’ge naduk lok a’ge ano en, elalin a’ge at ilem taga lemagoluk eiye takpesi a’ge ano ebe tagalat, aphwami ’gwiangma welagai a’ge iak eseiyat lalenebise laga. Asogo lalenebiselat, is aphwami ebano en, mene orlomene ’gela’ge lok a’ge ano ebe ’garok pam werigisema ebe warom a’geat de, togolik op aga a’ge ano ebe ’gela’geat heli’gogo dogwi mesik woruagoluk mo’gulesimu dogwi ebe werigisema yethegi o. 15Asogo werigisema, at mene orlomene ’gela’ge pobuk a’ge ano en dogwi ano en elalugap pasuam iak osoma yethegi o. Asogo eselat, is aphwami enede dogwi ano pam he’berik po erlak a’ge holuk nak enebe modok warenebiogoluk weim yo’go pesimu warenebil lagaimu yerentegis o. 16Asogo waronobogukhwe, at mene orlomene ’gela’ge pobuk a’ge ano en e, aphwami ’gain ononuk oruak a’ge emin, erlak a’ge emin, enilmu oruak a’ge emin, enerlagaik a’ge emin, eneragam a’ge emin, is enematekma a’ge emin, aphwami en enede we’gerlogo silo ’gela’ge sale’gen erleligonobogwi ai ’gela’ge, is ’berlegat enebe lo’bok disogo mo’gulentasu laga, “Dogwi onuk pelal wogo a’ge yu, hene’berli pam de a? Hene’gik ’bekhit akhit de a, wantogup en wemit o. 17His en, at onuk pelal wogo a’ge de a? At e, onuk paget ene’gik wonogo a’ge de a, wegep a’ge holuk, di a’ge yu a’ge o’go ’balogulat, is muon enebam o’go wogulat, togulom o. Asogo a’geat de, is aphwami logon wo erlak a’ge holuk e, asogo wogulom modok mia o,” oluk iak ningsogo mo’gulentasumu yethegi o.
18Ai en e, wene ai paget, his henebabut heberlak erlak wolom modok mia o. At e, sa en ebabut heberlak holuk e, mene orlomene ’gela’ge ai onuk paget, ene’gik 666 pam wenarigisa ai, ebe re, ap mesik onuk a’ge wenarigisa ai en e, pobitu o.
Currently Selected:
Wahyu 13: Wul
Highlight
Copy
Compare
Share
Want to have your highlights saved across all your devices? Sign up or sign in
