Wahyu 12
12
Hwe a’ge mesik emin, ’gosu ’gela’ge lok a’ge mesik emin, il entesi wene
1Asogo hegirikmu en, e’berlik yethegi ’gal e, aphwami en pobi tuagoluk ’bogorl pam elalin tu puk a’ge loksogo tisoma disogo yethegi o. Hwe a’ge mesik dugwi pam oyuk poluk osum ’gela’ge mo a’ge ’buktak, ye, hwesagal 12 a’ge a’gul pam ’gare-’gare ’gela’ge ’buktak a’ge yethegi o. 2Hwe ai emalik ogola a’ge arat dakhorlo hegitmu no oluk e, nonouk tagalat, iak nga ese laga. 3#Dan. 7:7Asogo nonouk tagokhwe, aphwami en pobi tuagoluk ’bogorl pam elalin tu puk a’ge loksogo tisoma mesik yethegiat o. ’Gosu ’gela’ge lok a’ge agap momi a’ge a’gul e, sabit pam, ye, a’gul pam e, iak 10 pam daintak, ye, ’gare-’gare re, sabit pam ap ’gaindek ’buktak onobogwi ai ’gela’ge en a’gul pam lo’bok ’buktak a’ge welaga. 4#Dan. 8:10Asogo welat, a’ge a’gum pam hwesagal ’bogorl pam a’ge henagan me’gisogo poluk, ’biren ukpoluk, mesik lisogo ’gwiangma ’belakpou wagarik e, hwe ano emalik derisoam haumsogo naigoluk orogolema ’gagalak welaga. 5#Yes. 66:7; Mzm. 2:9Asogo oruakhwe, aphwami en ’bouwa’gun wik-wok wam o’gonogwi ai ’gela’ge, at hwe ano emalik e, ’bouwa’gun ’besieme’gen a’ge woluk aphwami ena’gul onuk lo’bok ’berlegat eragam onoboluk annisogo tenentarok welema a’ge deregei. Asogo derisokhwe, erianoat emalik ano dil-del woluk Allah ’gain welago a’ge ebalema ano orogolema pei lasumu yethegi o. 6Asogo woluk lasukhwe, at hwe ano o leimu aphwami erlakma wolomma, Allah en ebale mesik degelogo pesimu ebano hweiye lagarik oruakma tenak oruakhwe, agauwa 1.260 pam oruakma yethegi o.
7 #
Dan. 10:13,21; 12:1; Yud. 1:9 Asogo lagarik oruakhwe, ’bogorl pam weim ’gagalagama yethegi o. Malaikat Mikhael osi enemin en ’gosu ano woruagoluk togukhwe, at ’gosu lok a’ge ano osi malaikat at oruak o’gwe a’ge akhit egesarik weim obogu legesa. 8-9#Kej. 3:1; Luk. 10:18Asogo obogulat e, at ’gosu lok a’ge ano mabenap pegesarik, at ebe emin, malaikat at osi a’ge emin, “O ’bogorl pam yema wolorogup modok erlak o,” oluk ’gwiangma ’belabonobou wagaimu entegis o. ’Gosu lok ai, onuk e, Iblis ogulat, Setan ogulat, ogwi a’ge page enat aphwami lalenebiso a’ge anoat o.
10 #
Ayu. 1:9-11; Zak. 3:1 Asogo mabenap poluk, ’belakpou wagama, ’bogorl pam en eniak loksogo disogo ogumu hwelegis, “At ai en Allah ilem iak eseiyat is nenarilak nonorokhwi hup erlige wene enebam pasu modok welago a’ge ano arat mabenap poluk ebe lebikpegesa ai obat o. Nenaik Allah ’gain Onuk Logo a’ge welat, delnonobuagoluk Kristus edikpesi ano, di a’ge yu a’ge ’berlegat eiye welat, e’birek enannisogo delnonobogulat, arat eneragam nenebegesa yu i o. 11Is nenarilak nonorokhwi ai onu’gwarek enebe enede om erlakma en, Watnonobogwi holuk e, obat o, oluk no’gumu warenebegisa. Is ai re, Domba Emalik emep namogo werigisa ai pam emin, is en Allah iak dem wene ai ’baksogo mo’gulentil no’gu legesa ai pam emin, Iblis ano arat mabenap pegesa ai o. 12Ai en e, his ’bogorl pam welegep a’ge ’berlek yema logwe! Honogola henagai hogu lomup o. Honogola henagai hogukhwe re, his ’gwiangma a’ge emin, ik laut ye’gelakma a’ge emin, nak e, Iblis ano hene’bek ’belakpou wagama, at agauwa wolom a’ge pobirak pesirik, at en e, Agauwa wei nak weleik ai nopaget, oluk olot het agarik wiagaphonobua ai en e, eige! Nede o,” oluk osoma hwelegis o.
13Asogo ’belakpou wagama welat, “An disogo ’gwiangma ’belaknobou wagama welegi o,” oluk pobi tegeitikmu no oluk e, hwe emalik ap deregei a’ge ano weriogoluk motluk denago yo. 14#Dan. 7:25; 12:7Asogo denago ai en, at ogoiyesogo o aphwami erlakma welemagoluk, Allah en ebale degelogo pesimu ano dasogo louwagoluk, sue pedi-pedi lok a’ge agapsaburl wogesimu dasogo eba lagama, Allah en tenharok oruakhwe, o mo ligom, ’bugom osokhwe, 3 tahun setengah delnasogo oruakhwe hegi o. 15Asogo oruakma, at ’gosu lok a’ge ano en, at hwe ano ik ebe en woluk louwagoluk, ik emdelema en elaruk lok a’ge ’bukhalogo, hwe ano ebe oruak o’gwe hegitsogo obok hasu laga. 16Asogo obok hesi a’geat de, aphwami en, hwe ano ebe delu ’gela’ge, ’gwiang en omuat ’bakholuk ik ano ogola ’belabisoam e, erlak agokhwe hegi o. 17Asogo ’belabisoam e, ’gosu lok a’ge ano olot het hwe ano ebam poluk, aphwami hwe ano en dogo’gwe a’ge pema akhit Allah en wene nenesa’go weregei wene ano hwelakpoluk hegitsogo tugulat, Yesus en tegei wene ’baksogo mo’gulontogulat, togwi a’ge warenebigoluk eneme’gin ’gabelegeitik, 18ebe ik laut lok ye’gelak a’ge ano esa’goma, eba lagarik edik oruakma yethegi o.
Currently Selected:
Wahyu 12: Wul
Highlight
Copy
Compare
Share
Want to have your highlights saved across all your devices? Sign up or sign in
