Wahyu 11
11
“Ap enebe ’biren Allah iak mo’gulontogwi oruakma waronobua o,” oluk mo’gulesi wene
1 #
Yeh. 40:3; Zak. 2:1,2 Asogo mo’gulnegisarik e’berlik e, elit a’ge ’bouwa’gun ’gela’ge woknegisarik e, disogo mo’gulnegisa, “Allah owi werik emin, at uam wusogo narlik obogwi a’ge ebale ano emin, elit a’ge pam walhasulat, aphwami Allah owi werikmu at erliktil ’gogwi a’ge ’berlegat he’gik wenagenebil lak o. 2-3#Luk. 21:24Asogo he’gik wenagenebil lagun a’geat de, o seli Allah owi werikmu abel o’borl akhit a’ge nak e, Allah en is aphwami at ebe eneperlak a’ge wogentesimu, is en o seli etleba emin, Allah u’gwarek owi kota ai emin, onoyuk en al ’besilogukhwe dugwi 42 pam, agauwa 1.260 pam, welema ai en e, hat en walho modok erlak o. Is asogo oruakhwe, an en ap enebe ’biren sum ’belagwi sum ’buktogwi ai ’gela’ge ’buktak welat, an niak ’baksogo mo’gulontogu lemagoluk peragonobou weik o,” oluk mo’gulnesi.
4 #
Zak. 4:3,11-14 Is ap enebe ’biren eria re, e zaitun ’biren emin, esaga heberlogwi a’ge oyuk yogo ’biren a’ge emin, Nenaik ’gain Onuk Logo a’ge di a’ge yu a’ge ’berlegat eiye welago a’ge ologotma welagai a’ge ano, is ap aiat o. 5Ye, is aphwami en, “Is wiagabonobuok,” oluk ua holuk e, odouk is ap ’biren eria enemdelema en liplau wagalat, is eneselei a’ge ai enebe odouk nouwayat o. Holuk e, ap sa en, is wiagabenebigoluk tua holuk e, woru hegitsogoat asogo worua. 6#Kel. 7:17-19; 1Sam. 4:8; 1Raj. 17:1Ye, is en Allah iak mo’gulontogulat, “Moru ’bogorl pam en ’buma modok erlak,” oluk elirat mo’gulontogulat, ik ’berlegat mep emagoluk elirat togulat, ye, onogola enagai houwa pam, “Aphwami ’gwiangma a’ge di ou yu ou enebam pouwok,” oluk elirat ou edip enebam pogulat, togu lemagoluk, Allah en eiyerak enebesimu asogo tua a’ge entegis o.
7 #
Dan. 7:7,21; Wah. 13:5-7; 17:8 Wene asogo arat mo’gulontogwi holuk e, mene orlomene ’gela’ge lok a’ge mesik ’gwiang ogola orogobu en ene’bek orlumarik, enemin weim obogulat, mabenabonoboluk enebe waronobuayat o. 8#Yes. 1:9,10Asogo weragonoboluk, enebe werak e, o kota ebela lok o’gwe nonue e pam edikpoluk werigisema eba onobouwa o. O kota ai, o Sodom emin, Mesir emin, ebam elit togwi a’ge anoat o. 9Asogo onoboma oruakma re, aphwami ena’gul onuk lo’bok, eniak lo’bok, enagap lo’bok, onowi lo’bok, enebe ’berlegat werak sebelonobu erlakma en ugonoboluk, enil yethailo wom ogukhwe, agauwa henagan wolomtik en agauwa mesik pam hwerli erlige hwerli welema o. 10Asogo oruakhwe, aphwami ’gwiangma a’ge enebe ’berlek en ogulat e, “Is ap ’biren wene mo’gulnontogu legesa a’ge yema en, di obotut yu obotut a’bik nenebam pogu legesa a’ge ano enebe obat warenebegisa,” oluk onogola enagai a’bik hogulat, seni sorogulat, di a’ge yu a’ge o’go erlak is logon en logon wogontugulat, is logon en logon wogontugulat, wogentil laga lema o.
11 #
Yeh. 37:10
Agauwa henagan asogo togu lemarik, agauwa mesik erlige ’burl asogo togumu, Allah Arogun enelalugabenebiso a’ge ano is ap ’biren eriano onogola ’goluk, enelalugabonoboluk edigenebasuam e, aphwami ’berlegat enil ontoluk e, onogorlok a’bik ema o. 12#2Raj. 2:11Asogo onogorlok emarik oruakhwe, ’bogorl pam en iak loksogo is ap ’biren wene mo’gulontogu lema a’ge ano disogo mo’gulontouwa, “Orlu manis o,” oluk mo’gulentasuam, is ap ebano eneselei a’ge ebano enil yerentarok oruakhwe ’bogorl pam o hena ogola ligagaimu entegis o.
13 #
Wah. 6:12; 16:18 O ai erlige re, mouk lok onogorlok a’ge mesik erlang-perlang hasulat, o kota ai ebe 10 pam me’gisogo poluk, lok akhit ukpasulat, mesigat nak modok moluk-melaksogo pasulat, aphwami enebe 7.000 pam warenebisoam, is pema akhit waronobu erlak a’ge onogorlok a’bik emarik, is en e, “Allah ’bogorl pam a’ge, nogorlok o,” oluk erliktogumu entegis o.
14Asogo togumu entegis ai, yethemit! Wiagabonobua a’ge ano re, agauwa ’biren pam arat wiagabenebigisarik, e’berlik mesik perleneat wiagabonobua a’ge oruagat o.
’Bi’gong iak ologun pam iak inghegesa wene
15 #
Kel. 15:18; Dan. 2:44; 7:14,27 Asogo entegistikmu en, is malaikat enebe sabiren ebano, enebe hebarlik pam ene’bi’gong arat iak inghegesarikmu en, e’berlik e, mesik e’bi’gong iak inghasuam e, ’bogorl pam en eniak loksogo disogo ogumu hwelegis, “Naduk aphwami ’gwiangma a’ge en eneragam onoboluk tenentarok welegesa a’ge re, yogodak Nenaik ’gain Onuk Logo a’ge Allah en nonue Kristus en delnonobuagoluk edikpesi a’ge ano e’birek en arat eneragam nenebegesarik, at Kristus en tennentarok modok-modok welema o,” oluk ogu legesa. 16Ye, is enarlue a’ge enebe 24 en Allah eragam ’gain enebalema welagai a’ge ebano onorogole sakhunsogo Allah eragam ’goluk erliktugulat e, disogo ogu legesa,
17-18 #
Mzm. 2:5; 110:5; 115:13 “Allah Nenaik, ... u a e
Hat hanni a’bik, ... u a e
Naduk welegentik yogodak modogat welegen ai pam, ... u a e
Yogodak hat hebe ’gain Honuk Logo a’ge welat, ... u a e
Aphwami ’berlegat arat heragam enebegentik, ... u a e
Tenentarok wolorogun ai en, ... u a e
Hau wathobogu lege, ... u a e
Aphwami ena’gul onuk lo’bok ’berlek en, ... u a e
Onolot het hebam pogu legesa a’ge, ... u a e
Hat en ogo holot het enebam arat pagun ai, ... u a e
Asogo enebam pasulat, ... u a e
Aphwami waregesa a’ge logon, ... u a e
Wene enebam pasulat, ... u a e
Is logon wene enebam no’gorlogun a’ge, ... u a e
Hat hiak mo’gulontogwi a’ge emin, ... u a e
Heiyagai ononuk oruak a’ge emin, ononuk erlak a’ge emin, ’berlegat, ... u a e
Hat onogorloksogo welat, ... u a e
Hiak wogulat oruak a’ge enebaget, ... u a e
O’go arat wogentagun ai, ... u a e
Is logon o ’gwiangma wiagap pegesa a’ge, ... u a e
Hat en is arat wiagabonobogun ai, ... u a e
Asogo togun ai en, ... u a e
Hau wathobogu lege,” ... u a e
oluk weni worugukhwe hwelegis o. 19#Wah. 8:5; 16:18,21Asogo ogukhwe entegistik yethegi ’gal e, ’bogorl pam Allah owi werikmu ’goduk husogo lasuam e, Allah en wene nenesa’go weregei wene pelal wogo peti ogola yagarak welaga a’ge ano hebarligen aga o. Asogo hebarligen agoam e, obinal pobuk naduk yebekhasulat, orlolu iak ’baktak poluk en orlu eselat, mouk erlang-perlang hasulat, moru hagarle’gen lok a’ge derle’gik nasulat, tisoma yethegi o.
Currently Selected:
Wahyu 11: Wul
Highlight
Copy
Compare
Share
Want to have your highlights saved across all your devices? Sign up or sign in
