Yudas 1
1
Hau warenebegei wene
1 #
Mat. 13:55; Mrk. 6:3 An Yudas, Yakobus ot, Yesus Kristus eragam a’ge ano en, his wene yu pelal wokho hene’bek perakpou wegi ai o. Narilak norokhwi. Allah enat yo’go henebesirik henebe ede welat, Yesus Kristus paget tenhentarok oruak ai. 2At Allah en henebe edeaphenebiselat, henede ha’bugaphenebiselat, his-his nede-hedesogo welemagoluk takhenebasulat, loksogo takhenebasu lemak o.
“Aphwami logon Allah iak mo’gulontogwi a’ge ’gela’ge takpoluk wemarik, lalhonobou wema ani o,” oluk mo’gulentesi wene
3-4Narilak norokhwi. Henebe nede o. Wene Allah en his heneminat delnenebegei ano paget wene pelal wokho hene’bek perakpou weigoluk nede eberak modok welegirik e, pobuk nede sebelu mia agama re, wene disogo paget perakpou wegi ai o. Ai re, is aphwami logon Allah ebe enebit a’ge nis wongat oruakhwe nene’gerlakma ’gu egesarik e, Allah ebabut op en woknenebiso a’ge ai, is en edenogo wene mu a’ge mo’gulhontogulat e,
“Wiak a’ge yogunat togulom o,” oluk, nonue ’gain Onuk Logo a’ge Yesus Kristus anni a’bik ano ebe ukpoluk, togwi ai o. Asogo togwi ai en, Allah en e,
“Wene disogo enebam paik,” oluk egeimu page enat pelal wokho pegesema oruak o. Wene Allah en mesik erligeat nis eiyagai woknentesimu nenede ebam he’berik welege ai a’ge, is ai en erlagap pouwogoluk togwiam, his en erlele wokho henannisogo tenak wolorogup en henede ’gagalogo perakpou wegi ai o.
5 #
Kel. 12:51; Bil. 14:29-30 Wene mo’gulhentaik yu re, page enat henaluk a’geat de, pobuk henede eberak henebaik ai o. Nonue ’gain Onuk Logo a’ge en eiyagai Israel a’ge o Mesir oruakma delenebegei a’geat de, pobuk is a’ge logon enede at ebam he’berik welegesa erlak a’ge warenebegei o. 6Ye, at Allah en is malaikat yo’go ’belagonobou wago a’ge tu a’ge so’busogo wogentesi a’geat de, is logon en enarilak tu a’ge tugan ontoluk e, onu’gwarek onowi pam ukpegesema, Allah en herle werak modok-modok welema a’ge pam ene’gik herle wusogo o modok hiktakma ’gwiang ogola orogobu enebesimu oruak ai o. Asogo modok welemarik en, pobuk aphwami wene loksogo enebam pouwa ai erlige, is eneminat enebam paigoluk e, ene’gik herle hebilonobua ai henede eberit o. 7#Kej. 19:1-24Is tigisa hegitsogo re, is aphwami o Sodom a’ge emin, Gomora a’ge emin, o seli eragam o’gwe eminat e, ’babi tenontogulat, ap-ap, hwami-hwami tu puk a’ge togulat, tigisa pam e, o’gum e, odouk nasu modok welagoma eba modok welemagoluk, peragenebesimu eba oruak, oluk, nis aphwami ’berlegat pobi togulom o.
8Asogoat e, is aphwami ai enabi hogwi a’ge ’gela’ge enede ’belak welat e, onu’gwarek en enebe wiagaphorlogulat, nonue ’gain Onuk Logo a’ge onogola en mi-miarak pogulat, ’bogorl pam erligonobogwi a’ge ai onobok wiak ’balogulat, togwi ai o. 9#Ula. 34:6; Dan. 10:13,21; 12:1; Zak. 3:2; Wah. 12:7At Mikhael, malaikat Allah en yo’go ’belakpou wago a’ge onue ’gain ai en, is ap ai togwi ai ’gela’ge tu ogorlok welaga. At e, Musa ebe werak a’ge paget, Iblis emin wene ’balogulat, iak annisogo wene yagotluk wene ebam po elit a’geat de, ogorlok en disogo mo’gulesi,
“Nenaik ’gain Onuk Logo a’ge en wene yakhemak o,” oluk mo’gulesi. 10Asogo a’geat de, is aphwami ai di wene yu wene eneperlak welarat de, obok wiak ’balogwi ai o. Asogo ’balogulat, wam ede erlak a’ge en tiso ai ’gela’ge, enabusak enaluk agalat togwi ai pam enebabut pam enebe wiagaphorlogwi ai o. 11#Kej. 4:3-8; Bil. 16:1-35; 22:1-35 Is ai Allah en wiagabonobua o! Naduk at Kain tegei ai ’gela’ge e’berlik lagai ai o. At Bileam wiak tegei ai ’gela’ge, onu’gwarek en uang sabusogo horlouwogoluk, asogoat togwi. At Korah en Allah paget,
“Anat taga leik,” oluk is logon sebelogo enebaigoluk tegei ai ’gela’ge togwi ai pam, enebe nal agai ai o. 12His henarilak honorokhwi enebe henede en seni henemin mesikmu odoksogo no’gwiam, is ap ai ene’gerli erlagat hene’bek ’gu egesarik e, aphwami logon yerentarok wolom erlakma en onu’gwarek enebaget nak ebam eberogulat enemin no’gu legep ai re, wiak o. Sum pok ’gut a’ge oruakma soduk a’ge ebam lo’bok oso ai ’gela’ge, enemin wiak no’gu legep ai o. Enebe re, o hena moru nouwa erlak a’geat de, sogwei en anni wiak woluk noso ai ’gela’ge no’gwi o. Ye, mesik e, e e’gen ikhasu erlak en, e’gela modok erlak agarikmu, eme’en emin henhogwiam modok ’buk ago ai ’gela’ge oruak o. 13Ye, mesik e, ik laut lok ye’gelakma ik hererim hasulat yogun a’ge yagan a’ge erliak-’gwerliak hasulat, eragop nak takpasu ai ’gela’ge, is ai yogunat togulat, ene’gerli erlak wiak togwi o. Hwesagal ’gegilogo momu lasu ai ’gela’ge, Allah en is ai o modok hiktakma welemagoluk onobouwa a’ge oruak o.
14 #
Kej. 5:18,21-24 Nadugat Adam hwerli en dagetil waga legesarik e, hwerli sabit pam en, at Henokh dagaga a’ge en, is aphwami ai wene enebam pouwa a’ge paget disogo egei,
“Yethemit. Nonue ’gain Onuk Logo a’ge ano en osi at u’gwarek en yo’go ’belabonobou wago a’ge enebe modok a’bigat wogonoboluk ’buma o. 15’Bumarik e, aphwami ’berlegat wene enebam pasulat, no’gorliselat, tiselat e, is aphwami Allah ebe enebit a’ge nak enebe ’berlegat wene enebam pouwa o. Is Allah ebe enebit welat, di wiak yu wiak togwi a’ge lo’bok wene enebam pasulat, Allah enebit en wiak togulat eniak hurle wiak at obok wiak ’balogwi a’ge ai enebe lo’bok wene enebam pasulat, tua o,” oluk egei. 16Is ai aphwami onobok wiak ’balogulat, wene yagontogulat, togwi modogat welagai a’ge. Di a’ge yu a’ge enede en nasuam,
“Nagai,” opogulat e, ai a’geat togulat, onu’gwarek en erlikhorlogulat, di a’ge yu a’ge sabusogo horlouwogoluk, is logon eniak sakhosogo erligonobogulat, togwi a’ge.
Wene naduk mo’gulentigisa a’ge, enede eberak welemagoluk, enesa’go wusogo
mo’gulentesi wene
17A’ge re, narilak norokhwi. Henebe nede o. Is ap nonue ’gain Onuk Logo a’ge Yesus Kristus en yo’go onoboluk peragonobou waga a’ge en wene page enat mo’gulhentigisa a’ge ai henede eberip o. 18#2Pet. 3:3Is en e, wene disogo oluk mo’gulhentigisa ai,
“O ologun hwerli pam welat e, is aphwami logon Allah ebe enebit welat onogola en, di a’ge yu a’ge enede en nasuam,
Nagai, oluk ai a’geat wiak modok togulat, eniak esegen yakhentauma o,” oluk mo’gulhentigisa ai o. 19Is ai re, Allah Arogun onogola erlak welat e, enebabut aphwami enebabut onotogat welat, is logon opsogo la’bolik oruakma, me’gisogo hwerli ’bal-’balonobou wagai a’ge aiat o.
20A’ge re, narilak norokhwi. Henebe nede o. Wene Allah u’gwarek en woknentesimu henede Yesus Kristus ebam he’berik poluk, henede hurlesogoat wolomup o. Asogo welat, Allah Arogun en henede ’gagalisoam se’ban ogu lomup o. 21Asogo ogulat, honogola en e,
“Nonue ’gain Onuk Logo a’ge Yesus Kristus nenebe ede en, nis pobuk noburlal-hoburlal taknonobouwa,” oluk, yetharok welat e, at Allah en nenebe ede ai re, his en at emin hwedigat wolomup o.
22-23Aphwami enebe o emin wi no a’geat de, delogo lebigonobogwi ai ’gela’ge, is logon enede ’biren a’ge, henedesogo delonobogu lomup o. Ye, is aphwami logon di a’ge yu a’ge enede en nasuam wiak togwi ai re, sum ’gut op oruakma, soduk wiak a’ge ebam lo’bok osoam orogole enebit ago ai ’gela’ge, is enebabut wiak togwi a’ge ai, henebit modok en honogorloksogo welat e, enebe nak e, henedesogo wolomup o.
Wene ologun wusogo se’ban is enebaget egei wene
24His nenaik Allah anni oruak a’ge ano en, elirat tenhentarok wolom a’ge e’bek lagaiam e, honoyuk ’beiksogo wathorlo erlakma en opsogo tenhentarok welemarik e, at ebe erliktogumu eba, wene henebam po erlakma enat, honogola henagai hogukhwe elirat edikhenebei louwa a’ge ai paget, hau worogu lomok o. 25Nenaik Allah ematek en nonue ’gain Onuk Logo a’ge Yesus Kristus tegei ai pam delnenebegei a’ge ano eiye a’ge anni a’bigat o, oluk, at erliktogulat, logo pogulat, togu lomogoluk, edip pam di a’ge yu a’ge walho erlakma Allah emategat welaga ai pam en, yogodak ya en, pobuk modok-modok welat asogo erliktogwi modok wolomok o, oluk,
“Amin,” egi ai o.
Currently Selected:
Yudas 1: Wul
Highlight
Copy
Compare
Share
Want to have your highlights saved across all your devices? Sign up or sign in
