Filipi 4
4
Wene ologun pam enesa’go weregei wene
1Ai enat, narilak norokhwi o. Henebe nede o. Nonue ’gain Onuk Logo a’ge emin ningsogoat hwedik wolomup o. His henebabut togu legep ano pam an nogola nagai hasulat, erlikhwerlasulat, tagalat e, nebe hene’bek weiktik nemin wollo e, oluk, epasu legi o.
2Euodia, Sintike, norokhwi o. He’birek nonue ’gain Onuk Logo a’ge emin hwedik welat, henede mesigat a’ge eberogu lorogup en mo’gulhentegis ai o. 3Ye, hat nare mesik Allah yabuk ne’birek hwedik modok togu lege a’ge ano, is hwami enebe ’biren eria lerentanogoluk mo’gulhegis ai o. Is hwami eria o, ap Klemen ano o, is pema akhit an nemin Allah iabuk mesikmu togu lege a’ge ebano o, op wene nenannisogo nemin mo’gulentil no’gu lege a’ge nononuk lo’bok, at Allah oruesi’ga pam noburlal-hoburlal tagonobouwa a’ge ononuk ’balogo pasu a’ge ano pam, ’belak oruak o.
4Holuk e, narilak norokhwi. His nonue ’gain Onuk Logo a’ge emin hwedik welat, nin hwedik nan hwedigat honogola henagai modok hogu lomup o. Pobuk niak lagaksogo mo’gulhentaigat,
Honogola henagai hogwiat wolomup o. 5Nonue ’gain Onuk Logo a’ge ano perleneat wema ai en e, aphwami ’berlek en his pobi honobuagoluk, henebabut sakhosogo togu lomup o. 6Di a’ge yu a’ge paget wenemennei yat horok eberak erlakma en, ’berlek paget Allah yo’go pogulat hau wusogo ’gonu mo’gulogu lomup o. 7Asogo mo’gulogu lorogup holuk, Kristus Yesus emin hwedik welegep ai en, at Allah aphwami en pobitu puk a’ge elalinat henede ha’bugaphonoboluk e, wenemennei eberogu legep a’ge ai, at enat sebelak poluk tenhentarok welema o.
8Narilak norokhwi. Wene ologun pam mesik yu mo’gulhentaik. Henede eberogulat e, opsogo togulat, erligonobu a’ge togulat, togwi a’ge ai pam eberogu lomup o. Ai ebe re, wene demat a’ge pam eberogulat, erliktu a’ge pam eberogulat, hegitsogo togwi a’ge pam eberogulat, enebabut lo’boktak welat togwi a’ge pam eberogulat, enebabut hianesogo togwi a’ge pam eberogulat, enebabut liok u a’ge ebam eberogulat, eberogwi modok wolomup o. 9Wene an en mo’gulhentasuam henesa’go hologulat, an tisokhwe henil niogulat, togulat e, wene wegeptik en mo’gulhwerlegep a’ge ano hegitsogoat togu lomup o. Asogo togumu re, Allah nenede ha’bugaptiso a’ge ano en tenhentarok welema o.
Allah eiyagai o Filipi a’ge en Paulus lethegesema hau warenebegei wene
10His naduk, an nebam eberak poluk letniegep a’ge en, pobuk nebam eberak welegep a’geat de, no’gosogo letnio ’gela’geat welegeptik en yogodak letniegep ai en nonue ’gain Onuk Logo a’ge e’birek hwedik welat nogola nagai a’bik hasu legi o. 11An di a’ge yu a’ge erlak holuk, oruak holuk, nede op nak wolom oluk arat mo’gulegis ai en, di a’ge yu a’ge nerlagaik en ’gonu mo’gulhentegis puk. 12An e, enerlagaik welagai ai nalugat, enilmu oruak a’ge welagai ai nalugat o. So’boru nele pam emin, nebit pam emin, di a’ge yu a’ge a’bik oruakma, erlakma, ai an waltakma no oluk e, ’berlek op nak epasu o. 13At Kristus en nanni taknebasukhwe no oluk e, di a’ge yu a’ge wiak agoam emin, op agoam emin, elit wolom nak o. 14Elit wolom a’geat de, an nerlagaik oruakma, his en letniogu legep ai op modok o.
15His Allah eiyagai o Filipi a’ge narilak norokhwi o. Naduk, an op wene mo’gulentil denaga leigoluk, o Makedonia en wagoma re, Allah eiyagai o pema akhit en letniogu legesa erlak a’geat de, his en nak nemin hwedik welat, letniogwiam hwerlasu legi ai henalugat o. 16#Per. 17:1#2Kor. 11:9An o Tesalonika etleba en di a’ge yu a’ge nerlagaiksogo oruakma, ebe naduk mesik peraknobou wegeptik e, pobuk mesik peraknobou wegep ai o. 17A’ge re, asogo letniogu legep a’geat de, peraknobou wagaiam wasulom ai paget logo pasu legi puk. We, his o’go sabuthorlo ’gela’ge re, Allah en ebe a’ge wokhentasuam his eiye orogup ai nak logo pasu legi o. 18#Kel. 29:18Yogodak e, his en letniegepma, hwerlegirik e, an ’berlegat nagai epasu legi a’ge elit agarik ado dedilagayat o. Ap Epafroditus ebam pegepma woknosu agama en, nilmu lok aga o. His en an letniegep ai re, wam Allah paget wusogo odouk narlogulat e’ben op a’ge lagabak pogwiam, at ede op ago ’gela’ge, asogo letniegepma, at Allah ede op aga o. 19Ye, his di a’ge yu a’ge henerlagaik oruakma, an naik Allah erliktaga legi a’ge Kristus Yesus emin hwedik welat ilmu ’bullak oruakhwe erliktogwi a’ge ano en, wokhentasuam henilmu lok emayat o. 20Holuk e, nenaik Allah erliktogwi modok wolomok o, oluk,
“Amin,” egi ai o.
Paulus en wene ologun wusogo hau
warenebegei wene
21His Allah eiyagai Kristus Yesus emin hwedik welegep a’ge henebe lo’bok ’berlegat hau wathenebegis o. Holuk, is logon mo’gulontomup o. Ai ’gela’ge, an narilak norokhwi Allah eiyagai enemin welege a’ge yema logon en hau wathenebigisayat o. 22Is Allah eiyagai o yema welege a’ge ’berlegat la’bulogo hau wathenebigisayat o. Hau asogo wathonobogulat, ebe logo ’gela’ge re, is at ’gain Kaisar emin welagai a’ge en hau wathenebigisa o. 23Holuk e, narilak norokhwi o. Nonue ’gain Onuk Logo a’ge Yesus Kristus ebabut op a’ge ano en henedemu welat ’gwelakhentarok welemak o.
Currently Selected:
Filipi 4: Wul
Highlight
Copy
Compare
Share
Want to have your highlights saved across all your devices? Sign up or sign in
