Filipi 3
3
“Naduk taga legi ai, nal aga legimu o, oluk, pobuk ’get a’ge taga legi o,” oluk egei wene
1Narilak norokhwi. Wene ado mo’gulhentaik en e, nonue ’gain Onuk Logo a’ge henemin hwedik welat, honogola henagai hogu lomup o, oluk egi ai o. Is logon en wiagaphonobo erlakma en henebe op welemagoluk, wene naduk pelal wokho perakpou wegi a’geat de, nagaukhwak erle om erlakma en pobuk niak lagaksogo mo’gulhentaigat o. 2Is aphwami logon enebabut mene orlomene ebabut ’gela’ge ai en, di paget yu paget wiak togulat,
“Henagap hene’gerlimu a’ge ’balogo ukpomup o,” oluk henede ’gagalu agaimu no oluk e, henebabut heberlogo wolomup o. 3Nis e, nenagap nene’gerlimu a’ge arat ’belak wolom ’gela’ge, ebe demat a’ge togu lege o. Allah Arogun en nonogola ’gagalisokhwe, Allah ebe erliktogulat, Kristus Yesus emin hwedik welege, oluk erlikhorlogulat, togulat e, di wene yu wene nenagap o’borl o’gwe a’ge yu paget togu lege ai pam obapnonobua oluk opogu lege erlak o. 4Nenagap o’borl o’gwe a’ge yu paget togu lege ai pam obapnonobua oluk opo a’ge hegit wellepma re, is aphwami logon en mia ’gela’ge opogukhwe, an nak e, logo ’gela’ge epasulle o. 5#Per. 23:6; 26:5; Rom. 11:1An nebe dagegimu agauwa sabiren welegesarik e, agauwa mesik pam, nagap ne’gerlimu a’ge ’balnebigisa ai o. Nebe Israel a’ge, na’gul onuk Benyamin a’geat, nia naik Israel a’ge no oluk e, nebe Ibrani a’ge ai demat Ibrani a’geat dagegi o. Wene Allah en nenesa’go weregei wene ano paget, ap Farisi a’ge en tenak welagai ’gela’ge, ningsogoat tenak welegi a’ge ani o. 6#Per. 8:3; 22:4; 26:9-11Allah paget a’goluksogo togwi a’ge ai, an asogoat op taga legi ’gela’ge, Allah eiyagai enede Yesus ebam he’berik pegesa a’ge di obotut yu obotut tagenebil denaga legi ai o. Asogo tagalat, wene Allah en nenesa’go weregei wene ano hegitsogo togwi ai, an modok hegitsogo tagoam, aphwami logon en wene nebam po erlakma enat degelak modok welegi ani o.
7An naduk, asogo tagalat,
“Saburise legi ani o,” oluk epegi a’geat de, yogodak e, Kristus ebe wegi pam en,
“Naduk taga legi a’ge ano, nal aga legimu hegi o,” oluk pobi taga legi o. 8-9Asogo pobi taga legi ai nak puk o. Nue ’gain Onuk Logo a’ge Yesus Kristus naluk egi ai op modogat o. Di a’ge yu a’ge mu ebelesogo taga legi ano, nal om a’ge paget taga legimu oluk, pobi taga legiat o. At ebe hwerlegirik e, emin hwedik modok wolomogoluk, yabuk al a’ge ’balogo lebikpogwi ’gela’ge, di a’ge yu a’ge naduk taga legi a’ge ebano,
“We a’geat o,” oluk ukpegi ai o. Wene Allah en nenesa’go weregei wene ai pam, nu’gwarek en hegitsogo taga legi puk. Is aphwami logon enede Kristus ebam he’berik pogwiam, wene enebam a’ge no’gorlogo wokholuk pobuk Allah emin hwedik tagenebasu ’gela’ge, an asogoat nede at ebam he’berik pegimu, wene nebam welaga a’ge no’gorlogo wokhesi ai o. 10-11At Kristus di obotut yu obotut hil-hil waraga ’gela’ge, nemin hegitsogoat, an asogoat obotut hil-hil warom epasu legi o. Ai en, at waragama, Allah anni pam elalugaptegei ’gela’ge, an asogoat wareikmu, nelalugapnobua, oluk, ebam eberagat welegi o.
“An hwerlaigoluk epegi a’ge ai hwerlai laigoluk nannisogo lasu legi o,” oluk mo’gulentesi wene
12A’ge re, an yogodak ya, nede modok hurle agalat, ebe op a’ge ai arat hwerlasulat, tegis puk. Owan o. Op a’ge ai an horlouwagoluk, Yesus Kristus en nebe woknebegei ai en, ebe hwerlai laigoluk, nenannisogo taga legi o. 13Narilak norokhwi. An ai ebe arat hwerlegi oluk nede epasu legi erlak o. Ai hwerlai laigoluk wene mesigat a’ge yuat taga legi o. Ai ebe re, naduk taga legi a’ge, nebabut heberlegirik, no’borl akhit ukpoluk e, pobuk ’get a’ge norogolema oruak a’ge ai hwerla laigoluk nannisogo motluk lasu legi o. 14Kristus Yesus emin hwedik oruakma, at Allah en yo’go nebasulat e,
“Op a’ge ’bogorl pam a’ge wokheik,” oluk obok mo’gulnesimu, ebe hwerlai laigoluk, sa omut oruak sa omut erlak pungtak lagai ’gela’ge, nannisogo motluk lasu legi o. 15Holuk e, nis nenede hurle a’ge yu re, wene ai paget pobi togu lomok. Asogo a’geat de, his henede wene mu a’ge pam oborogu legep holuk e, pobi tuagoluk at Allah en pobisogo mo’gulhontouwayat o. 16A’geat de, yogodak nenebabut wene ai hegitsogo til waga lege ’gela’geat, asogo modogat til laga lomok o.
17 #
1Kor. 4:16; 11:1 Narilak norokhwi. His henebabut an taga legi ’gela’geat, an nebabut wokho, asogoat togulat, is aphwami logon en nis nenebabut wokho togwi a’ge ai, henil en wogonobogu lomup o. 18An naduk e, agauwa pobuk naduk mo’gulhentegis ’gela’geat, yogodak niak togolik lagaksogo mo’gulhentaigat o. Aphwami enebe esan en,
“Kristus nis nenebaget e pam edikpoluk werigisa ano, nenebit o,” oluk emin il ’belak ’gela’ge welat enebabut wiak togwi a’ge ai enebaget nge tagalat mo’gulhentasu legi o. 19Is ai enede Allah pam he’berik wolom a’geat de, enebam aganhan agoam togwi a’ge ai pam he’berik welat, ene’gerli ho a’geat de, op oluk ai paget ene’gerli erlaksogo erlikhorlogwi ai o. Asogo togulat e, enede di nagai yu nagai, wene ’gwiangma a’ge pam eberogwi ai, ologun pam arat wiagabonobua o. 20Asogo a’geat de, nis nonowi edip ’bogorl pam oruak o. Nonowi edipmu eba en, nonue ’gain Onuk Logo a’ge Yesus Kristus pobuk delnonobuma ai yetharok welege o. 21At ebe wemarik e, nenebe nene’gerli ’gela’ge welege a’ge yu re, at anni pam di a’ge yu a’ge ’berlegat, at eragam onobouwa ai en, at ebe erliktogwi ’gela’geat, nis nenebe erliknonobu a’geat taknonobouwa o.
Currently Selected:
Filipi 3: Wul
Highlight
Copy
Compare
Share
Want to have your highlights saved across all your devices? Sign up or sign in
