Bilangan 35
35
Ap Lewi a’ge enebaget di kota yu kota wogonto wene
1 #
Yos. 21:1-42
Ye, at Musa ano o Yerikho ik ’balogo etle akhit libotluk ’gwiang o Moab dogoma ik Yordan iak pam oruakma at Allah en Musa mo’guleselat,
2“Is aphwami Israel a’ge wene mo’gulonto ano re, yuat o. Is ono’gwiang enemining a’ge ’gela’ge wogentegismu ebano, pema is ap Lewi a’ge onowi eiye otluk welemagoluk, o kota-kota wogontogulat, ye, is onuam wolom a’ge paget ogo’gwiang wogontogulat, tuak o. 3O kota-kota eba is Lewi a’ge wogonto a’ge ai eiye otluk welat, onuam kambing domba emin, lembu sapi emin, onuam we a’ge emin, enagan e’gela no’gulemagoluk, ’gwiang ebayat ’balogo pil louwa ani o.
4’Gwiang o kota weling waling eba is ap Lewi a’ge wogontoma onuam pil lagalom ano re, onowi kota pak wogoma en ’bekhit hwerli o’borl o’gwe en toluk meter 450 hwerli walhogulat, 5ye, o kota abel o’borl akhit esa’go emin, abel esa’go ligakhit-’belagakhit emin, ai re meter 900 walhogulat, togu lemarik en, onuam pil no’gulemak o. Asogo tu ano re, is ap Lewi a’ge onowi kota-kota eba re is onuam pil no’gulemagoluk ono’gwiang wogonto ano re, aiat, egei, oluk, mo’gulontomup o,” oluk, mo’gulesi.
O kota aphwami enagap deliso a’ge pulogo pouwa wene
6-7Mo’gulesirik, mesik mo’guleselat, is Israel a’ge wene mo’gulonto ano re, yuat o. “Is ap Lewi a’ge onuam wolomma ono’gwiang emin, is enebe wolom a’ge emin, ’berlek la’bolik ano re, o kota 48 at wogontoma re, is Lewi a’ge pema wolom e, o kota 42 pulogo pogulat, ye, o kota hebarligen e, is Lewi a’ge pema oruakma re, ap mesik en ap mesik wusogo poluk, agap delhwerlayok oluk hweiye eba lasulat taga lemagoluk polik pogulat tuak o. 8Is aphwami Israel a’ge ono’gwiang wogentegis a’ge is Lewi a’ge kota-kota wogonto ano re, is Israel a’ge onowi kota-kota a’bik welagai a’ge ebano en onowi kota-kota a’bigat is Lewi a’ge wogontogulat, ye, is Israel a’ge onowi kota-kota wei nak welagai a’ge ebano en onowi we ’biren nak wogontogulat, tuak, egei, oluk mo’gulontomup o,” oluk, mo’gulesi.
9 #
Ula. 19:2-4; Yos. 20:1-9 Mo’gulesimu, at Allah en Musa mesik emin mo’guleselat,
10“Is aphwami Israel a’ge wene mo’gulonto ano re yuat o. Is ik Yordan ’balogo libotluk, o Kanaan ’gwi louwarik, 11ap mesik epenen puk a’geat de, ap mesik weriselemarik holuk e, hweiye enagap delogumu ebayat ’gwi lasu lemagoluk, o kota aphwami enagap delogulomma hebarligen pulogo pouwak o. 12Polik pogwiam e, ap mesik epenen puk a’geat de, ’bekhitsogo weriso holuk, wene lokma owan en owan a’bosu ’belak erlak oruakhwe, ap werak a’ge a’gulmu ap e kik pam mep ema a’ge ano worogumu no oluk, hweiye o kota aphwami enagap delogumu ebanoat ’gwi lasu lemak o. 13O kota hebarligen poluk po ano re, aphwami enagap deliselom a’ge aiatma re, 14o kota henagan ai re, ik Yordan ’balogo etle akhit polik pogulat, ye, o kota henagan ai re, ik yu akhit poluk pogulat, tua ano pam en nak e, o ai aphwami enagap del agomayat welema o. 15O kota hebarligen polik poma ebano re, is Israel a’ge emin, enebam lo’boktak a’ge emin, is ap ’bok a’ge emin welagai a’ge ebano emin, is mesik tiso holuk ’gwi lagalom a’ge pagerat polik poma re, is logon enepenen en puk a’ge de di dagan a’ge ap mesik werak poluk holuk e, hweiye o ap enagap del agoma ebayat ’gwi louwak o.
16Asogo tak a’geat de, ap mesik en, werigat, opoluk, ’besi a’ge pam ap woru a’ge ano warago holuk nak e, at ap ai, ap weriso a’geatma re, waremagoluk at ebe aiat wusogo pouwak o. 17Ap mesik en, werigat ai, oluk, helep e’gikmu a’ge ano pam ap mesik wusogo warago holuk e, at ap ai, aphwami wat enebiso a’geatma re, wat emagoluk ebe wusogo pouwak o. 18Ap mesik en, werik, opoluk, e e’gikmu a’ge ano pam ap mesik werisoam warago holuk, at ap ai, aphwami wat enebiso a’geatma re, waremagoluk ebe wusogo pouwak o. 19Ap a’gulmu woru a’ge ano re, at ap emep e’gik pam ema a’ge ano emin hwedik tiso holuk, o’go re, at aiat woruak o.
20At ap mesik olot het en ap mu a’ge mesik pela’gogo bo pasuam wat ago holuk a, at e werigat, opoluk, go’bu pam werisoam warago holuk a, 21emin hwerlitakma re, e’gik e’gerlik ai pam worogwiam warago holuk e, ap ai, aphwami warenebiso a’geat o, oluk, wusogoat poma re, ap worua a’ge ano a’gulmu woru a’ge paget ebe heratil lorik, emin sarlok togulat holuk ap ai wusogoat po yo.
22Asogo togulom a’geat de, ap mesik are ano ebit opo erlak welarat de weat de perlik hasu holuk a, woru a’ge epasu erlakma at de, di a’ge yu a’ge hwikhai lasu ano pam weriso holuk a, 23At e, il ho erlak welat erlik-perlik a’ge helep pam ’bulak tagalat wat ago holuk a, at ebe wiagap paik ai oluk, takpasulat, ye, werigat, opoluk weriselat tu erlakma re, 24Aphwami odoktak a’ge ebano en ap werak a’ge ano emin, ap a’gulmu worua a’ge ano emin, wene disogo togulom oluktak a’ge yu, hegitsogoat wene enebam a’ge ai erlagap pouwak o. 25Is aphwami odoktak a’ge ebano en ap a’gulmu worogumu no oluk, ap worua a’ge ano owene a’bosu opsogo ’belakpoluk, ebe woru mia o aphwami enagap delisoma eba at louwak oluk perakpouwok o. Ap Allah ebaget pulogo pouwagoluk, a’bosu a’gul pam poluk, edikpo a’ge Allah eiye a’ge Imam onue ano warom erlakhwe re, ebayat welemak o.
26-27Asogo tu a’geat de, ap werak poluk, hweiye o aphwami enagap delhorlogumu ’gwi louwarik oruakma ebano en odipmu liplau wagoam e, is ap onot werak a’ge ano hwiaruarik, a’gulmu ap worogwi holuk e, no oluk werigep, oluk, owene ’balu erlagat o. 28Asogo takma re, ap werak poluk, o aphwami enagap delak wolomma ’gwi louwa a’ge ano re, ap Allah eiye a’ge Imam onue ano warom erlakhwe, libom mia o. Ye, wat ago holuk nak e, at ap ai, o aphwami enagap delak wolomma eba en liplaumarik, owi edipmu lo obat o.
29Is Israel a’ge welat, wene le’gelak oruak a’ge hegitsogo togulom a’ge enemalik ene’balak weiyal etil laga-lema a’ge ebano en modok-modogat togu lemak o.
30 #
Ula. 17:6; 19:15 Ap mesik en ap mu a’ge mesik werisoam warago holuk, ap ’biren a, henagan a, en, ap yu aphwami eriano warenebiso a’ge demat o, oluk, ogwi holuk e, wusogo po obat a’geat de, ap mesigat nak mesik en nak oso holuk en nak e, wusogo po mia o.
31Ap warenebiso a’ge ano en, an watnobogup erlak o, oluk, uang wogentasu holuk e, wo mia o. Aphwami wat enebiso a’ge holuk, wusogo onobogulom o, oluk wene oruakma re, at ebe aiat wusogo po yo.
32Ye, ap mesik o enagap delisoma eba hweiye louwarik welema a’ge ano en ap Allah eiye a’ge onue ano owan warom erlakhwe, owi pam laik oluk, uang wogentasuam e, is wo modok mia o.
33Ye, ap e’gik mep oruak holuk woru ai, obat a’geat de, ap mesik woru erlakhwe de worua holuk e, onowiat wiagapsogo pouwa a’ge ano erlak emak oluk, hosogo asua wam worogwi ’gela’ge woru miama re, o is welagaimu eba orogole wiagap po ai wiak o. 34An Allah is aphwami Israel a’ge ene’gerlakma at welegirikmu re, o is onowi pam an welagoma eba orogole wiagap po modok wiak o, egei, oluk mo’gulontomup o,” oluk, mo’gulesi.
Currently Selected:
Bilangan 35: Wul
Highlight
Copy
Compare
Share
Want to have your highlights saved across all your devices? Sign up or sign in
