Bilangan 36
36
Zelafehad ogulani hwelani en enaik emining a’ge horlo wene
1At Yusuf eiyagai weiyelak a’ge mesik at omlogo Manasye omlogo Makhir omlogo Gilead pam en weiyelak a’ge onuelak en Musa emin, ap Israel a’ge onuelak emin, is Israel en dogoma a’ge dedelik ’gwelagentarok welagai a’ge emin, enemin oruakma ene’bek legesarik, 2#Bil. 27:7Musa mo’gulogulat, “Nenaik o. At Allah en is aphwami Israel a’ge, o geba horlogumu hul? Oluk, e’gela ’belak wogwi a’ge ano motluk so’but ontogulom a’ge mo’gulhesi ano re, ap nenare Zelafehad emining ’gwiang horlo ano re, ogulani hwelani eiye emak oluk wogontomup o, oluk, mo’gulhesi a’ge ano de mo’gulhosu ege ai o. 3Asogo a’geat de is hwelani ebano Israel a’ge ene’gerlakma eba ap ena’gul onuk mu a’ge mesik wogonobogwi holuk e, ’gwiang enaik emining a’ge a’ge ai nis nena’gul mesik a’ge en eiye welege a’ge ano is hwelani onogunlagat eiye emarikmu re, ’gwiang nis nenare emining a’ge ano erlak agalat, 4Ye, tahun 50 ono’gwiang eiyetak pagathorlogwi a’ge ano a’ge horok-horok wagokhwe, ’gwiang at Zelafehad emining ano ogulani hwelani onogunlagat eiye emama re, ’gwiang nis nena’gul a’ge horlo oluktak a’ge ebano nis nenebe elit nonobu erlakma enat ’gobok eselat tua o.”
5Asogo ogwiam e, at Allah en, wene yu aphwami Israel a’ge mo’gulentemin o, oluk, mo’gulesimu, at Musa en aphwami Israel a’ge wene mo’gulentasulat, “Wene ap Yusuf e’balak weiyelak a’ge en ogwi a’ge ai, demat ogwimu re, 6is hwelani Zelafehad ogulani en togulom a’ge at Allah en egei ano re yuat o. Is onogunlak horlul opogulat holuk, horlo obat a’geat de, is enaiklak enemin dogo a’ge ena’gul mesik ai a’ge holuk nagat horlogu lemak o. 7Is Israel a’ge ono’gwiang enaiklak enemining a’ge ai, is ena’gul onuk ai a’ge en nagat horlogulomma re, ena’gul onuk mesik en ena’gul onuk mu a’ge mesik wogontogulat togulom modok mia o. 8Is aphwami Israel a’ge onomu-onomuat ’gwiang enaiklak enemining horlogulomma re, hwelani en enaiklak enemining horlogu lomul opogulat holuk, ap enaiklak emin hegit a’ge holuk nak onogunlak horlogu lemak o. 9Ye, ’gwiang enaiklak enemining a’ge ebano re, ena’gul onuk mesik a’ge en ena’gulmu a’ge mesik wogontogulat togulom miama re, is Israel a’ge ena’gul onuk mu a’ge nak onomu-onomu eiye welemak o,” oluk, mo’gulentesi.
10At Allah en Musa mo’gulesi a’ge ano hegitsogo is hwelani Zelafehad ogulani 11Mahla, Tirza, Hoglah, Milka, Noa, is ai en enaik emin dogo a’ge onogulani weiyelak a’geat onogunlak wogenebegisa. 12Is hwelani ebano en malik ene’ba Yusuf omlogo Manasye pam en weiyelak a’ge wogenebegisa ano pam en ’gwiang enaik emining ano ena’gul onuk mu a’ge horlo erlak, we isat eiye welegesa o.
13Is aphwami Israel a’ge ebano o Yerikho ik etle akhit libom-’guom ogumu ’gwiang muap ik Yordan iak pam eba oruakhwe, at Allah en disogo tip, asogo tip, oluk wene tak a’ge emin, tagalom wene tak a’ge emin, is aphwami Israel a’ge en togu lemagoluk, Musa mo’gulesi a’ge ano re, aiat o.
Currently Selected:
Bilangan 36: Wul
Highlight
Copy
Compare
Share
Want to have your highlights saved across all your devices? Sign up or sign in
