Bilangan 30
30
Ho’buk ’belakpoluk togulom wene
1At Musa en is Israel a’ge ena’gul onuk lo’bok onuelak mo’gulentasulat, at Allah en wene le’gelak pesi ano yuat o.
2 #
Ula. 23:21-23; Mat. 5:33 “At ap mesik en e, an disogo taga leik o, oluk, ho’buk ’balogoat Allah mo’guloso a, demat tik o, oluk, wene modok daksogoat pasulat oso a, at tago a’ge ano sagalogo po mia o. At e, iak ua a’ge ano hegitsogoat taga lemak o.
3Hwele dogum a’ge mesik aik owi pam owan welat, an disogo tik o, oluk, ho’buk ’balogoat Allah mo’guloso a, demat tik o, oluk, wene modok daksogoat pasulat, tiso a’ge ano 4at ho’buk ’baliso a, wene modok daksogo hwalogo pagathwerlasu a, ano aik esa’go holuarik, asogo tu mia o, oluk, mo’guloum erlakma en, obat tegei, epasu holuk e, at ho’buk ’belakpoluk mo’guleselat, wene modok daksogo hwalogo pasulat, takpoluk pouwa a’ge ano, erlak ema erlakma re, at modogat taga lemak o. 5Ye, at en ho’buk ’baliselat, wene modok daksogo ’balogo pasulat, tago a’ge ano aik esa’go holholuk, hat asogo tu modok mia o, oluk, mo’guloso holuk nak e, at en ho’buk ’baliselat, wene modok daksogo ’balogo pasulat, tua a’ge ano aik en, togun no yo, oluk mo’gulema ano pam at Allah en hwe ai wiak oluk mo’gulom erlakma en ukpouwa o.
6Ye, disogo tik o oluk ho’buk ’baliso a, lebeksogo, demat tik o, oluk, wene daksogo ’balogo pasu a, takpoluk, ogun hwerlasu lomtik, 7horlo erlak welat oso a’ge ebano, ogun esa’go hwelak-poluk, asogo tu puk a’ge de tigen o, oluk, ugwe mo’guloum erlakma en mo osoam e, at en ho’buk ’baliso a, wene daksogo ’balogo pasu a, ai erlak ema erlakma re, taga lemagat o. 8Ye, horlo erlakhwe oso a’ge ano ogun en holholuk, asogo tu re miahweat de tigen o, oluk at ho’buk ’baliso a, perleneat lebeksogo wene modok daksogo ’balogo pasu a, erlagapsogo pasu holuk, at Allah en hwe ai, wiak oluk mo’gulom erlakma en ukpou wayat o.
9Hwe sugwe pogwi a’ge de a, hwe ukpogwi a’ge de a, en e, disogo tik o, oluk, ho’buk ’baliso a, demat tik o, oluk, wene modok daksogo, hwalogo pasulat holuk e, erlak ema erlakma re, wene ai, togu lemagat o.
10Hwe mesik ogun emin welat, asogoat taga leik o, oluk, ho’buk ’baliso a, demat tik o, oluk, wene modok daksogoat ’balogo pasu a, oluk tago a’ge ano 11ogun esa’go holholuk, asogo tu mia o, oluk, mo’guloum erlakma en mosogo oruakma, hwe ano en ho’buk ’baliso de a, wene modok daksogo ’balogo pasu a, tago ano re, erlak om erlakma en taga lemagat o.
12Asogo tu a’geat de, ogun en hwe en oso a’ge ano esa’go holholuk, an nugwe asogo tua erlak o, oluk, osoam e, hwe en ho’buk ’baliselat e? Wene arat modok daksogo pasu de a? Oluk tua a’ge ano, tu erlakma en ukpo obat o. At ogun en erlagapsogo pouwama re, at Allah en ugwe ano wiak oluk mo’gulom erlakma en ukpouwa o. 13Ugwe en disogo tik o, oluk, ho’buk ’baliselat e, nede logo poluk oruakma enil nio nebit o, oluk, wene modok daksogo pasulat, ua a’ge anoat, tumu re op o, mo’guleselat, tu mia o, mo’guleselat, tua, ai at ogun en nak hwalogo mo’guleselemak o.
14Asogo mo’gulom a’geat de, ogun en loruk hopmu mo’gulom erlakma en mosogo nak welago ai pam ugwe en ho’buk ’baliso de a, wene modok daksogo ’balogo pasulat, taga lemagoluk, wene ai anniap pasu o. Oso a’ge ano esa’go hweliso a’geat de, tua ya, tu mia ya, mo’guloso erlak ai pam ugwe ai en, tuagoluk wene annisogo pasu o. 15Ye, ua a’ge ano esa’go hwelak poluk, tu a, tu mia, ya, oluk, ugwe perlenesogo mo’guloso erlak ai pam ugwe wene hwalogo pasu a’ge ano tiso erlak holuk wiak ebam om a’ge ano, ugwe ebam ema erlak at ogun omuat ebam ema o, egeimu re, mo’gulhentegis o,” oluk, mo’gulentesi.
16Ap ai ugwe emin togulom a’ge wene emin, ap mesik agalogo hwele owan dogum a’ge aik emin welat, togulom a’ge wene emin, at Allah en Musa wene se’geksogo mo’gulesimu mo’gulentesi ano re, aiat o.
Currently Selected:
Bilangan 30: Wul
Highlight
Copy
Compare
Share
Want to have your highlights saved across all your devices? Sign up or sign in
