Bilangan 31
31
Midian a’ge en Israel wat enebegisa a’ge o’go tagonobo wene
1At Allah en Musa mo’guleselat,
2“Aphwami o Midian a’ge en is Israel a’ge tagonobogu legesa a’ge ebano, o’go is Israel a’ge en tagonobouwok oluk, mo’gulentemin o. Mo’gulentagunmu tagonobogwi holuk, he’balak lok pam legesarik odoktak oruakma eba ene’bek lagun ani o.
3Mo’gulesimu, at Musa en is aphwami mo’gulentasulat, is Midian a’ge en his takhonobogu legesa ano, at Allah en o’go tagonobo a’ge epasumu re, is ai, enemin weim ti lo a’ge honosilak lo’bok enesegen onogodok leik-louktak pagathorlouwak oluk, mo’gulontomup o. 4His Israel a’ge hana’gul onuk hundomok honomu-honomu enebe 1.000 pulogo onoboluk, weim til louwak oluk, perak enebemit o.”
5Mo’gulentesi a’ge ano mo’gulentegisema, is Israel a’ge ena’gul onuk lo’bok ap enebe 1.000 lo’bok nak takpoluk, la’bulogo enebe 12.000 at weim tu a’ge leik-louksogo tagenebegesa. 6Louktak poluk, ena’gul ai a’ge nak onosilak lo’bok logolak enebe 1.000 ano emin, perak enebasuam e, louwok oluk, ap Pinehas ano en Allah erliktogumu ebano en togwi a’ge tagalat di a’ge yu a’ge emin, weim wagai a’ge enaluk emagoluk iak loksogo inghogwi a’ge trompet emin, wik-wok, eminat woluk laga.
7At Allah en wene Musa mo’gulesi a’ge ano hegitsogo, aphwami o Midian a’ge enemin obogulat, ap ’berlegat wusogo-wasogo enebegesa. 8Ap wat enebegisema wat egesa a’ge pema ebano re, ap ’gain-gain Midian a’ge Ewi emin, Rekem emin, Zur emin, Hur emin, Reba emin, enebe huaben ai wusogo onobogulat, ap Beor omlogo Bileam emin wa’gun pam wusogo pogulat, tegisa.
9Werak enebegesarik, is Israel a’ge en is Midian a’ge hwami emin, enemalik emin, onuam lembu sapi emin, kambing domba emin, ena’ge-a’ge ’berlegat hogul wegesarik, 10is welagaimu onowi kota-kota emin, onowi sabo werik poluk welagaimu emin, ’berlegat odouk ’gwi-’gwelap sogo takpegesa. 11Asogo takpegesarik o hogul wegesa a’ge di a’ge yu a’ge emin, aphwami emin, onuam emin, ’berlegat wegesarik, 12hogul wogenebegisa a’ge aphwami emin, ena’ge-a’ge emin, ’berlegat ap Musa emin, ap Allah eiye a’ge Eleazar emin, is Israel o Moab dogoma o Yerikho libagaimu ik Yordan iak pam onowi sabo utholuk oruakma, eba onobou wegesa.
13Onobou wagaimu, at Musa emin, ap Allah eiye a’ge Eleazar emin, aphwami Israel ’gwelagentarok welagai a’ge onuelak emin, en is wagai a’ge ebano wogonoboluk wemagoluk, onowi sabo werikmu ebano en odipmu libegesa 14libegesarik, is enesegen oruak a’ge onuelak ap enebe 1.000 logolak a’ge onuelak emin, ap enebe lo logolak onuelak enemin, weim takpoluk wegesa a’ge ebano Musa en wene yakentesi. 15Wene yakentasulat, “His no paget hwami yema, enelaluk wogonoboluk wegep? 16#Bil. 25:1-9Ap Bileam en mo’gulentesi a’ge e’berlik lagalat, o Peor eba is Israel a’ge en at Allah ukpoluk, mu a’ge tuak oluk, tagenebegesema, at Allah olot het en e’gin pegin at eiyagai enebam pesi ai edip e, is hwami yu en tegisa ano erlak no? 17Tak enebegesa a’ge is hwami yuatma re, enemalik logomalik emin, hwami ap enemin la’bologwi a’ge emin, ’berlegat wusogo enebemit o. 18Ye, hwami ap enemin nogou erlakma en dogum oruak holuk nak e, his hwerlagup en e, enelaluk ugenebemit o.
19Ye, his yu nak e, ap mesik wusogo onobogulat, ap werak waragai a’ge ebano ten entau wagalat tigep a’ge holuk, honowi sabo wusogo pagathwerlegepma eba ’gwi lo erlakma en o’borlma yema oruakhwe agauwa sabiren wolorogup ani o. O’borlma oruakhwe, agauwa ’biren wolotluk, hubet agauwa henaganak a’ge pam emin, agauwa hebarligen wolotluk, loruk agauwa sabit a’ge pam emin, his emin, ap herle warenebil wegep a’ge emin, henebam lo’bok etil laga a’ge ebano erlak emak oluk, honowiak ho horlogulat, 20Hono’bogoyum emin, di a’ge yu a’ge enagap pam tak a’ge emin, kambing asu pam tak a’ge emin, e pam hele’gik a’ge emin, ’berlegat soduk aga a’ge holuk, e’gela pam hosogo ukpogulat togu lomup o,” oluk, mo’gulentesi,
21mo’gulentesimu, at Allah eiye a’ge Eleazar en is ap weim togwi a’ge weim takpoluk togolik wegesa a’ge ebano, mo’gulentasulat, “Togulom a’ge paget at Allah en Musa wene mo’gulesi ano re, yuat o. 22Emas emin, perak emin, tembaga emin, ’besi uak emin, besi timah ’gut a’ge emin, timah sing a’ge emin, 23ai a’ge yu a’ge enasu erlak en hesilogo pasu ai a’ge ’berlegat odouk pam weraru ai pam soduk ebam e’gerlik welema a’ge ano erlak ema o. Odouk pam werarogu lemarik, hesilogo pasuam e, ik pam emeruak o. Di a’ge yu a’ge enasu holuk nak e, ik pam nak emeruak o. 24Agauwa hebarligen wolotluk, loruk o’gwe honosum emesogo pogwi holuk nage soduk wiak a’ge ebano erlak agoam e, honowi sabo werikmu ’guom e op at o,” oluk, mo’gulentesi.
“O hogul woluk wegesa a’ge ebano so’busogo horlo yo,” oluk, mo’gulentesi wene
25At Allah en Musa mo’guleselat e,
26“Hat emin, ap Allah eiye a’ge Eleazar emin, is Israel en dogo ’gwe a’ge onuelak emin en, o hogul wogonoboluk wegesa a’ge aphwami ebano emin, wam emin, ’berlegat enebe wenakho onoboluk, 27hogul wogo a’ge eba, me’gisogo pema is enesegen oruak a’ge esan weim til legesa a’ge ebano so’but ontogulat, ye, pema ebano is Israel a’ge so’but ontogulat tit o. 28Asogo togu loroguptik, is enesegen oruak a’ge esan weim til legesa a’ge ebano so’but ontogulat, aphwami de a, lembu sapi a, keledai a, kambing domba ya, 500 wogentagup a’ge ebano a’ge mesik dedilogo an Allah nebaget pulogo pogulat togu lomup o.
29An nebaget pulogo po ano re, is ap weim ti legesa a’ge ebano hogul wogo a’ge ado me’gisogo is so’but onto a’ge ebano, logon waguptik e, yu at Allah a’geat o, oluk, woluk ap Allah eiye a’ge Eleazar ano wogosu agalat, 30Ye, ado me’gerik is Israel a’ge so’but ontogulat, aphwami de a, lembu sapi a, keledai a, kambing domba ya, wam mu a’ge a, 50 wogonto a’ge ebano a’ge mesik dedilogo an Allah nowi werik eiye welagai a’ge is ap Lewi ano, wogosu agalat, togu lomup o. 31Mo’gulesimu at Musa, emin, ap Allah eiye a’ge Eleazar emin en e, at Allah en Musa mo’gulesi a’ge ano hegitsogoat tegisa.
32Is ap weim togwi a’ge en o hogul wogulat, pema woluk wegesa a’ge di a’ge yu a’ge wegesa a’ge wenakho kambing domba re, 675.000, 33Lembu sapi re, 72.000, 34Keledai re, 61.000, 35Ye, is hwami ap enemin la’bolik erlak a’ge dogum e, 32.000 aiat o. 36Hogul woluk wegesa a’ge ado me’gerik is ap weim til legesa a’ge wonogo a’ge kambing domba re, 337.500 atma re,
37675 at dedilogo at Allah en a’geat o,” oluk, pulogo pogulat,
38 Lembu sapi re, 36.000 atma re, 72 yat dedilogo, “at Allah en a’geat o,” oluk, pulogo pogulat,
39Ye, keledai re, 30.500 atma re, 61 at Allah ebaget dedilogo, “at Allah en a’geat o,” oluk, pulogo pogulat,
40Ye, aphwami ai, re, 16.000 atma re, 32 aiat dedilogo, “at Allah en a’geat o,” oluk, pulogo pogulat, tegisa.
41At Allah en Musa mo’gulesi a’ge hegitsogo at Allah en a’ge re, ap Allah eiye a’ge Imam Eleazar wogesi. 42Ye, is ap weim til legesa a’ge en hogul woluk wegesa a’ge pema is Israel wogonto a’ge Musa en me’gisogo pesi a’ge,
43aphwami ena’ge wonogo a’ge kambing domba re, 337.500 at o.
44 Lembu sapi re, 36.000 at.
45 Keledai re, 30.500 at.
46Ye, aphwami re, 16.000 at.
47Is aphwami Israel en hogul wogo a’ge pema me’gerik a’ge ebano wogontogulat, at Allah en at Musa mo’gulesi a’ge hegitsogo ap emin, wam emin, 50 wogentesi a’ge ebano mesik dedilogo ap Lewi a’ge at Allah owi sabo werikmu eba eiye welat yabuk togu legesa a’ge ebano wogentesi.
48Wok entasuam e, is ap enesegen oruak a’ge onuelak ap enebe 1.000 esan logolak onuelak enemin, enebe lo a’ge onuelak emin, ebano en Musa e’bek wegesarik, 49at mo’gulogulat, “Is ap enesegen oruak a’ge yu nis heragam a’ge neneragam welagai a’ge enebe nis en wenak enebigerik, mesigat nak ogo mesik meme u erlakma en ebesigat oruakma re, 50nonowiak erlagapsogo poluk, at Allah emin hwedik welat, hun-hundomok emas a’ge pam hele’gik a’ge hogul wegesa a’ge onoyuk pam alli a’ge emin, ene’gik pam alli a’ge emin, ene’gik ’burl a’ge pam alli a’ge pam ap hele’gik a’ge emin, enesa’goma a’ge emin, eile ono’gorlopma wantogwi a’ge emin, ’berlegat at Allah ebaget pou wege ai o,”
51oluk mo’gulegisema, at Musa Allah eiye a’ge Eleazar emin en, obat, o poluk, di a’ge yu a’ge emas a’ge pam ene’gik ’bogun wiak hele’gik a’ge ebano ’berlegat wegesa. 52Is ap enesegen oruak a’ge enebe 1.000 esan onuelak enemin, enebe 100 esan onuelak emin, en emas a’ge pam hele’gik a’ge ’berlegat Musa Eleazar emin wogentegisema, at Allah wogegisa a’ge e’gin e, 190 at aga.
53Is enesegen oruak a’ge en hundomok-han domok hogul hwerlegesema re, 54Is ap enebe 1.000 esan ebano onuelak enemin, enebe 100 esan onuelak enemin, en emas pou wegesa a’ge ebano Musa ap Allah eiye a’ge Eleazar emin wogentegisa ma wegesarik, at Allah en nis at eiyagai Israel a’ge nenebe ebetnentasu lemak o, oluk, at Allah emin hwedik togumu owi sabo werikmu ebano pogogisa.
Currently Selected:
Bilangan 31: Wul
Highlight
Copy
Compare
Share
Want to have your highlights saved across all your devices? Sign up or sign in
