Bilangan 29
29
Tahun mesik ’gu ago a’ge pam en tugulom wene
1Mo’gulesirik, mesik mo’guleselat, “Dugwi 7 pelelak a’ge tanggal 1 lau wago holuk, yabuk loksogo tu erlakma en odoktak poluk, erliknobogu lemak o. Agauwa ai a’ge pam iak loksogo oso a’ge trompet ano pam iak inghogu lemak o. 2Agauwa ai pam nak e’ben op a’ge hasulat, an Allah nagai houwagoluk, an nebaget e narlogulom sapi ierak ot a’ge mesik nak emin, domba ierak mesik nak emin, domba ierak a’ge enebe 7 dogo oruakhwe tahun mesigat nak tak a’ge emin, aik ’belak erlak a’ge holuk nak woluk pou waga lemak o.
3Sapi ierak a’ge an nebaget pou wagalat, gandum e’gen wogo modok op a’ge an nebaget 3 kilo ’gela’ge walhegeik ne’gak a’ge wokho, e zaitun a’bosu emin, ebelogo poluk, pou wagalat, domba ierak a’ge an nebaget pou wagalat, gandum agap e’gen wogo modok op a’ge an nebaget po a’ge 2 liter ’gela’ge walhegeik ne’gak a’ge wokho, e zaitun a’bosu emin orlogomsogo ebelogo poluk, pou wagalat, 4Ye, domba emalik enebe 7 ebano, mesik-mesik nak an nebaget pou wagalat, enebe hegitsogo gandum e’gen wogo modok op a’ge an nebaget po a’ge 1 kilo ’gela’ge walhegeik ne’gak a’ge wokho, e zaitun a’bosu emin orlogomsogo ebelogo poluk, pou wagalat, togu lemak o.
5Asogo togulat, onowiak erlagap poluk, an nemin hwedik wolomul a’ge paget kambing ierak a’ge mesik pou waga lemak o. 6Hun-Hun pou wagalom ano re, dugwi ’get peleliselat, o dakha eselat, tagoam e, an nebaget wusogo e narlogulat, gandum e’gen wogo an nebaget pogulat, a’bosu an nebaget herlelogulat, togulom wene tak a’ge ano ’gela’geat togulom ano re, ukpo erlakma en togu lemagat o. An nebaget wusogo e narlogulom ano re, e’ben op hasulat, an Allah nagai hasu legi a’ge anoatma re, togu lemak, egei o oluk, mo’gulontomup o,” oluk, mo’gulesi.
Onowiak erlagap pasuam e, Allah emin hwediktak poluk togulom wene
7 #
Ima. 16:29-34
Mesik mo’guleselat, “Dugwi 7 pelelak a’ge tanggal 10 dugwi ai a’ge pam yabuk tu erlakma en so’boru ukpoluk, enemde hweyang ’gela’ge welat, odoktak poluk, erliknobogu lemak o. 8Agauwa ai pam e’ben op hasulat, an Allah nogola nagai, haik en e, an nebaget e narlogulom a’ge paget sapi ierak a’ge mesigat nak mesik emin, domba ierak mesigat nak mesik emin, domba ierak a’ge enebe 7 dogo oruakhwe tahun mesigat tak a’ge emin, aik ’belak erlak a’ge holuk nak woluk pou waga lemak o. 9Sapi ierak a’ge an nebaget pou wagalat, gandum e’gen wogo modok op a’ge an nebaget po a’ge 3 kilo ’gela’ge walhegeik ne’gak a’ge ano wokho, e zaitun a’bosu emin ebelogo poluk, pou wagalat, domba ierak a’ge an nebaget pou wagalat, gandum e’gen wogo modok op a’ge an nebaget po a’ge 2 kilo ’gela’ge walhegeik ne’gak a’ge wokho, e zaitun a’bosu emin ebelogo poluk, pou wagalat 10Ye, domba emalik enebe 7 ebano mesik-mesik nak an nebaget pou wagalat, enebe hegitsogo gandum e’gen wogo modok op a’ge an nebaget po a’ge 1 kilo ’gela’ge walhegeik ne’gak a’ge wokho, e zaitun a’bosu emin ebelogo poluk, pou wagalat, togu lemak o.
11Asogo togulat, onowiak erlagapsogo po a’ge paget kambing ierak a’ge mesik pou waga lemak o. Onowiak erlagapsogo poluk, an nemin hwedik wolom a’ge paget pou wagalat, an nebaget wusogo e narlogulat, gandum agap e’gen wogo an nebaget po a’ge paget emin, a’bosu herlilogo nebaget po a’ge paget emin, pou wagalom a’ge ebano re, ukpo erlakma en, eminat pou waga lemak, egei o,” oluk, mo’gulesi.
Onowi sabo wetil wegesa a’ge enede ebesogo seni sorogulom wene
12 #
Ima. 23:34; Ula. 16:13-15 Mesik mo’guleselat, “Dugwi 7 pelelak tanggal 15 a’ge dugwi ai pam yabuk loksogo tak erlakma en odoktak poluk, an Allah erliknobogu lemak o. Ai togulat, enagai en neseni sorogukhwe, agauwa 7 lail louwak o. 13Agauwa ai pam e’ben op hasulat, an Allah nagai houwagoluk, nebaget e narlogulom a’ge sapi ierak a’ge enebe 13 emin, domba ierak a’ge 2 emin, domba ierak a’ge enebe 14 a’ge dogo oruakhwe tahun mesigat tak a’ge emin, ’berlegat aik ’belak erlak a’ge holuk nak pou waga lemak o. 14Sapi ierak a’ge enebe 13 ebano pou wagalat, enebe hegitsogo gandum e’gen wogo modok op a’ge 3 kilo ’gela’ge walhegeik ne’gak a’ge wokho, e zaitun a’bosu emin orlogomsogo ebelak poluk, an nebaget pou wagalat, domba ierak a’ge 2 kiloa’ge pou wagalat, enebe hegitsogo gandum e’gen wogo modok op a’ge 2 kilo ’gela’ge walhegeik ne’gak a’ge wokho, e zaitun a’bosu emin ebelogo poluk, an nebaget pou wagalat, 15domba emalik enebe 14 pou wagalat, enebe hegitsogo gandum e’gen wogo modok op a’ge 1 kilo a’ge walhegeik ne’gak a’ge wokho, e zaitun a’bosu emin orlogomsogo ebelogo poluk, an nebaget pou wagalat togu lemak o. 16Pou wagalat, onowiak erlagapsogo po a’ge paget kambing ierak a’ge mesigat emin pou waga lemak o. Ai pou waga loma ano re, an nebaget wusogo e narlogulat, gandum e’gen wogo an nebaget po a’ge emin, a’bosu herlilogo an nebaget po a’ge emin, pou wagalom ano re, ukpo erlakma en eminat pou waga lemak o.
17Agauwa mesik wolotluk, loruk soru a’ge paget e, sapi ierak a’ge nak enebe 12 emin, domba ierak a’ge ’biren emin, domba ierak a’ge enebe 14 dogo oruakhwe tahun mesigat nak tak a’ge emin, ai ’berlegat aik ’belak erlak a’ge holuk nak pou waga lemak o. 18Sapi ierak a’ge emin, domba ierak a’ge emin, domba logon emin, pou wom a’ge oluk we’gerlak a’ge ebano hegitsogo pou wagalat, enebe hegitsogo gandum agap e’gen wogo an nebaget po a’ge emin, a’bosu an nebaget herlilogo po a’ge emin, pou waga lemak o. 19Pou wagalat, onowiak erlagapsogo po a’ge paget kambing ierak a’ge mesigat nak emin pou waga lemak o. Ai pou waga lema a’ge ano re, an nebaget wusogo e narlogulat, gandum e’gen wogo an nebaget po a’ge emin, a’bosu an nebaget herlelu a’ge emin, pou wagalom ano re, ukpo erlakma en eminat pou waga lemak o.
20Agauwa ’biren wolotluk, loruk soru a’ge paget e, sapi ierak a’ge enebe 11 emin, domba ierak ’biren emin, domba ierak a’ge enebe 14 a’ge dogo oruakhwe tahun mesigat tak a’ge emin, is ’berlegat aik ’belak erlak a’ge holuk nak pou-waga lemak o. 21Sapi ierak a’ge emin, domba ierak a’ge emin, pou wom a’ge enede eberak a’ge hegitsogo pou wagalat, enebe hegitsogo gandum e’gen wogo an nebaget po a’ge emin, a’bosu an nebaget herlelu a’ge emin, pou waga lemak o. 22Pou wagalat, onowiak erlagapsogo po a’ge paget kambing ierak a’ge mesigat nak emin pou waga lemak o. Ai pou wagalom ano re, an nebaget wusogo e narlogulat, gandum e’gen wogo an nebaget po a’ge emin, a’bosu an nebaget herlelu a’ge emin, pou wagai a’ge ebano re, ukpo erlakma en pou waga lemak o.
23Agauwa henagan wolotluk, loruk o’gwe seni soru a’ge paget e, sapi ierak a’ge enebe 10 emin, domba ierak a’ge ’biren emin, domba logon enebe 14 dogo oruakhwe tahun mesigat tak a’ge emin, ebano ’berlegat aik ’belak erlak a’ge holuk nak pou waga lemak o. 24Sapi ierak a’ge emin, domba ierak a’ge emin, domba emalik emin, pou wagalom hegit a’ge holuk nak pou wagalat, enebe hegitsogo gandum e’gen wogo an nebaget po a’ge emin, a’bosu nebaget herlelu a’ge emin pou waga lemak o. 25Pou wagalat, onowiak erlagapsogo po a’ge paget kambing ierak a’ge mesigat emin pou waga lemak o. Ai pou wagalom ano re, an nebaget wusogo e narlogulat, gandum e’gen wogo an nebaget po a’ge emin, a’bosu an nebaget herlelu a’ge emin, pou wagalom a’ge ebano re, ukpo erlakma en eminat pou waga lemak o.
26Agauwa 4 wolotluk, loruk o’gwe soru a’ge paget e, sapi ierak a’ge enebe 9 emin, domba ierak a’ge 2 emin, domba logon ierak a’ge enebe 14 dogo oruakhwe tahun mesigat tak a’ge emin, eba ’berlegat aik ’belak erlak a’ge holuk nak pou waga lemak o. 27Sapi ierak a’ge emin, domba ierak a’ge emin, domba logon emin, pou wagalom oluktak a’ge ebano hegitsogo pou wagalat, enebe hegitsogo gandum e’gen wogo an nebaget po a’ge emin, pou waga lemak o. 28Pou wagalat, onowiak erlagapsogo po a’ge paget kambing ierak a’ge mesigat emin pou waga lemak o. Asogo pou wagalom ano re, an nebaget wusogo e narlogulat, gandum e’gen wogo an nebaget po a’ge paget emin, a’bosu an nebaget herlelu a’ge paget emin, pou wagalom ano re, ukpo erlakma en eminat pou waga lemak o.
29Agauwa 5 wolotluk, loruk o’gwe soru a’ge ano paget e, sapi ierak a’ge enebe 8 emin, domba ierak a’ge ’biren emin, domba ierak a’ge enebe 14 a’ge dogo oruakhwe tahun mesigat tak a’ge emin, ai ’berlegat aik ’belak erlak a’ge holuk nak pou waga lemak o. 30Sapi ierak a’ge emin, domba ierak a’ge emin, domba logon emin, pou wom a’ge hegit tak a’ge holuk pou wagalat, enebe hegitsogo gandum e’gen wogo an nebaget po a’ge emin, a’bosu an nebaget po a’ge paget emin, pou waga lemak o, 31pou wagalat, onowiak erlagapsogo po a’ge paget kambing ierak a’ge mesigat nak emin, pou waga lemak o. Ai pou wagalom a’ge ebano re, an nebaget wusogo e narlogulat, gandum e’gen wogo an nebaget po a’ge paget emin, a’bosu an nebaget herlelu a’ge emin, pou wagalom ano re, ukpo erlakma en eminat pou waga lemak.
32Agauwa 6 wolotluk, loruk o’gwe soru a’ge paget e, sapi ierak a’ge nak enebe 7 emin domba ierak a’ge ’biren emin, domba ierak a’ge enebe 14 dogo oruakhwe tahun mesigat tak a’ge emin, ai ’berlegat aik ’belak erlak a’ge holuk nak pou waga lemak o. 33Sapi ierak a’ge emin, domba ierak a’ge emin, domba logon emin, pou wom a’ge holuk hegitsogo pou wagalat, enebe hegitsogo gandum e’gen wogo an nebaget po a’ge emin a’bosu an nebaget herlelu a’ge emin, pou waga lemak o, 34pou wagalat, onowiak erlagapsogo po a’ge paget kambing ierak a’ge mesigat eminat pou waga lemak o. Ai pou wagalom ano re, an nebaget wusogo e narlogulat, gandum e’gen wogo nebaget po a’ge emin, a’bosu nebaget herlelu a’ge emin, pou wagalom ano re, ukpo erlakma en eminat pou waga lemak o.
35Agauwa 7 wolotluk, loruk o’gwe yabuk lok tu erlak welat enagai en odoktogu lemak o. 36Odoktak poluk, an nebaget wusogo e narlogwi a’ge e’ben tang hasulat, an Allah nagai haik en e, nebaget wusogo e narlogulom a’ge sapi ierak mesigat nak emin, domba ierak a’ge mesik nak mesik emin, domba ierak a’ge logon enebe 7 dogo oruakhwe tahun mesigat tak a’ge emin, is ’berlegat aik ’belak erlak a’ge holuk nak an nebaget pou waga lemak o. 37Sapi ierak a’ge emin, domba ierak a’ge emin, domba logon emin, pou wom a’ge paget we’gerlak a’ge ebano eminat pou wagalat, enebe hegitsogo gandum e’gen wogo nebaget po a’ge emin, a’bosu nebaget herlelu a’ge eminat pou waga lemak o, 38pou wagalat, onowiak erlagapsogo po a’ge paget kambing ierak mesigat nak mesik emin pou waga lemak o. Ai pou wagalom ano re, an nebaget wusogo e narlogulat, gandum e’gen wogo an nebaget po a’ge emin, a’bosu an nebaget herlelu a’ge emin, pou wagalom ano re, ukpo erlakma en eminat pou waga lemak o.
39Disogo wokheik o, oluk, an nebaget pulogo pogulat, o’go erlak a’ge weat onogola enagai pam woknogulat, asogo togulat seni setil lagalom a’ge wene tak a’ge ano pam an Allah nebaget pogulom ano re, an nebaget wusogo e narlogulat, gandum e’gen wogo an nebaget pogulat, a’bosu an nebaget herlelogulat, an nemin hwedik welemagoluk, an nebaget pogulat, togulom aiat o, egei, oluk, mo’gulontomup o,” oluk, Musa mo’gulesi.
40Mo’gulesimu, Allah en Musa mo’gulesi ano hegitsogoat is aphwami Israel a’ge mo’gulentesi o.
Currently Selected:
Bilangan 29: Wul
Highlight
Copy
Compare
Share
Want to have your highlights saved across all your devices? Sign up or sign in
