Bilangan 25
25
Israel a’ge en o Peor eiye welago a’ge asua bal erlik tegisa wene
1Is aphwami Israel a’ge ebano o Sitim dogoma eba legesarik welat, hwami muap a’ge yogunat tenentil denaga legesa. 2Asogo til denagaihwe, is aphwami Moab a’ge en enasua uam wusogo sorogulat, neneminat soruok o, oluk, is ap Israel a’ge mo’gulontogwiam, eneminat enasua erliktogulat, asua uam weraksogo a’ge ebano no’gulat, togu legesa. 3Is aphwami Israel a’ge ebano aphwami Moab a’ge enasua Baal o Peor eiye welagai a’ge ebano eneminat erliktogu legesema, asogo togu legesa ano pam at Allah olot het hobu a’ge ’gela’ge ogola het egei.
4Olot het agarik, Musa mo’guleselat, “Is aphwami Israel a’ge tagonobo ’gela’ge, an Allah nolot het hobu a’ge ’gela’ge nogola aga a’ge ano erlak emak oluk, is aphwami yu, onuelak wene hwalontogwi a’ge ’berlegat enebe tenak onoboluk, an Allah nil pam selakmayat wusogo enebemin o.”
5Mo’gulesimu, at Musa en is ap Israel a’ge wene enebam pogulat no’gorlogulat togwi a’ge ebano mo’gulentasulat, “His honomu-honomu honosi lo’bok o Peor eiye welagai a’ge asua Baal erliktil legesa a’ge ebano ogo ’berlegat wusogo enebil lit o,” oluk, mo’gulentesi.
6Ye, at Musa emin, is aphwami Israel a’ge ’berlegat emin, Allah emin hwedik togumu owi sabo werik a’ge godouk mu eriano en lo’gu marogulat il oruakhwe, ap Israel a’ge mesik en hwe Midian a’ge mesik e’berligapsogo woluk toluk o sabo werikmu woluk ’gwiselat 7At Allah eiye a’ge Harun eba Eleazar omlogo Pinehas ano en il hesirik, aphwami odoktak a’ge ebano ene’gerlakma en wa’gun mesik ha’boksogo woluk, 8ap Israel a’ge hwe ano emin muk onoboluk o sabo werik a’ge ogola ebano ’gwi lotluk, oruakma wa’gun pam ap Israel a’ge ano emin en, hwe ano emin, e’birek onogum wa’gun pema en pema poloksogo wusogo enebesi. Asogo wusogo enebesi ai pam at Allah en Israel a’ge e’gin enebam aga a’ge ano erlak aga. 9Ye, pema warenebegeimu waregesa ano re, enebe la’bulogo 24.000 at o.
10Asogo toluk, at Allah en Musa mo’guleselat
11“An nebit en is aphwami Israel a’ge erlagapsogo onobo ’gela’ge, an nak nalik worogwi a’ge weleik en e, an neli hwerlasu legi ai ’gela’ge, ap an nebe eiye a’ge Harun eba Eleazar omlogo Pinehas ai en, is aphwami Israel a’ge yu, at Allah omu nak erliktogu lemak o, oluk, modok inagarik, neli wasulat, tegei ai pam nolot het en aphwami Israel a’ge tagonobo epegi a’ge ano, erlagap poluk, nede yamuk taknebesimu re, 12at Pinehas emin welat en, taga leik oluk, wene modok daksogo mo’gulom ano re yuat o. 13At aik Allah an nogorloksogo weleik en e, modogat inagalat, neli wasulat, is aphwami Israel a’ge wat enebisoma no oluk, enagap delogo wiak perleneat ’gareliselat, tegei ai pam at emin, eiyagai e’balak weiyal et til laga lema ai pam emin, an nebe modok-modok eiye welemak o, oluk, wene modok daksogoat egei o, oluk, mo’gulomup o,” oluk mo’gulesi.
14Ap Israel hwe Midian a’ge emin oruakma, weregei ano re, a’gul onuk Simeon a’ge onue ap salu omlogo onuk Zimri aiat o. 15Ye, hwe Midian a’ge weregei ano re, aphwami Midian a’ge onue ap Zur omlogo hwe onuk Kozbi aiat o.
16Asogo toluk, at Allah en Musa mo’guleselat, 17-18“Is aphwami Midian a’ge en, nis nenemin weim hwerlitak a’geat o, oluk honobogulat, heniak eseiat hono’borl pam ligagalat, o Peor eiye welago a’ge asua Baal nenemin erliktuok o, oluk mo’gulontogwiam e, is Israel a’ge en tegisa ano pam e’gin pegin lok a’ge enebam weiyal agama, ap Midian a’ge onue agalogo hwele Kozbi weregisama re, is ap Midian a’ge nenemin weim hwerlitak o, oluk, enebe modok wusogo enebemit o,” oluk, mo’gulesi.
Currently Selected:
Bilangan 25: Wul
Highlight
Copy
Compare
Share
Want to have your highlights saved across all your devices? Sign up or sign in
