Markus 5
5
Ap Gerasa a’ge mu’gat enebabut wiak a’ge ogola oruakma, Yesus en henokho lebigenebesi wene
(Matius 8:28-34; Lukas 8:26-39)
1Asogo erliktigisema, at Yesus osi enemin ik Galilea omugwe ano etle akhit aphwami o Gerasa a’ge onowi pam libegesa. 2Libegesarik, at Yesus ik so ogola en ik esa’goma libagokhwe erianoat, ap mesik owikmu aphwami werak a’ge onobugumu ebano en liplau wagarik e, Yesus e’bek waga. Ap ai mu’gat ebabut wiak a’ge ogola ’goluk, 3-4aphwami werak a’ge onobugumu ebano modok oruakma, aphwami logon en nin dakha nan dakha herle ’besie eme’en herle pam e’gik herle hettugulat, oyuk herle hettugulat, togu legesa a’geat de, e’gik herle daksogo hwikhasulat, oyuk herle porloksogo hwikhasulat, tagoma re, pobuk di herle yu herle ’besie eme’en herle eminat walhegesarik en, no herle pam on hettu ’gela’ge agama re, ebe tenak poluk ebabut e, ap sa en hebelu ’gela’geat mia aga. 5Asogo oruakhwe, erlige hwedik, huba’go hwedik aphwami werak onobugumu ebano ’gwiselat, dom pam ligotluk denagalat, tiselat e, iak ngai-wai eselat, u’gwarek en helep pam emep namogo wetil lasu laga. 6Asogo til lasumu Yesus laga ai erlige re, ap ano ebe walekma eba welat, Yesus il yethesi. Il yetholuk e, at e’bek pungtak wagarik e, odogorlu pam huragarik e,
7-8“Yesus Allah ’gain Onuk Logo a’ge omlogo yu, an no’gosogo taknebaigoluk wegen,” oluk mo’gulesimu, at Yesus en e,
“Mu’gat hebabut wiak a’ge yu, ap yu ogola en henokho libemen o,” oluk mo’gulosoam, at ano iak loksogo eselat e,
“Eiga. Nebit a. Allah uak a. Wiagapnobogun a,” oluk iak loksogo egei. 9Iak loksogo egeimu re, at Yesus en e,
“Hat honuk sa,” oluk ebam hin wesimu re, at en e, disogo egei,
“Nenebe esanat welege ai en e, nonuk esan pulik u ’gela’ge, nonuk Legion,” mo’gulesi. 10Asogo mo’gulesirik e, Yesus en is mu’gat enebabut wiak a’ge ai o eba en walegat peragonobouwano oluk, iak sakhosogo Yesus mo’gulesi. 11Ai erlige o eba dom petne wam esanat mugwa wogu legesa. 12Wogwi oruakma, is mu’gat enebabut wiak a’ge ebano en e, Yesus disogo mo’gulegisa,
“Nis wam ogola yagatla ’gwi lul en e, eba peraknenebemen o,” oluk eniak sakhosogo mo’gulegisa. 13Asogo mo’gulegisema, at en e,
“I o. Lit o,” egeimu, is mu’gat enebabut wiak a’ge ebano henokho libegesarik e, wam ogola yagatla ’gwi legesema, wam esan ebano ’bulema ebano en lusogo ’bi lagarik e, ik omugwema en e, ik olomu legesa. Wam ik olomu legesa ai re, wam enebe 2.000 ’gela’ge modok a’bigat ik olomu legesa. 14Ik olomu legesema re, is wam pekharok welegesa a’ge onogorlok agarik pungtak aphwami ene’bek yo’go legesarik, aphwami o seli lokma mo’gulontogulat, weimu mo’gulontogulat, mo’gulentigisa. Mo’gulentigisema re, is aphwami en e,
“No’gosogo agama en egesa,” oluk, enil houwogoluk Yesus e’bek wegesa. 15Wegesa ’gal e, ap tono hauat mu’gat enebabut wiak a’ge esan a’bik ogola ’goluk welaga a’ge ano, ebabut heberlogo op agarik, osum ’buksogo hweriogo oruakma enil hegesarik onogorlok aga. 16Onogorlok agama re, is aphwami pema wene asogo agama enil hegesa a’ge en e, disogo mo’gulentigisa,
“Ap yu mu’gat enebabut wiak a’ge ogola ’goluk welaga a’ge ano disogo tegei o. Ye, wam ebano disogo tegei o,” oluk wene ’beli’gogo mo’gulentigisa. 17Asogo mo’gulentigisema, is en e, disogo mo’gulegisa,
“Yesus. Hat hebe nis nene’bek yema wolorogun erlak o. Momu lak o!” oluk eniak sakhosogo mo’gulegisa. 18Mo’gulegisema re, at Yesus ik so ogola ’gwik ’galma re, at ap mu’gat enebabut wiak a’ge ogola ’goluk welaga a’ge ano en e, disogo mo’gulesi,
Ne’birek no’gu lomogoluk louwok o,” oluk iak lioksogo mo’gulesimu, 19at Yesus en e, disogo mo’gulesi,
“Erlak o. Howi pam lak o. Laguntik e, nonue ’gain Onuk Logo a’ge ano en ede nioluk e, disogo taknebesi, oluk harilak hosi mo’gulentai lak o,” oluk esa’go wusogo perakpesi. 20Perakpesimu, o kota 10 pam werik oruakma lagarik disogo mo’gulentil denaga laga,
“Yesus en disogo obapnebegei, yusogo obapnebegei,” oluk mo’gulentil lagama re, is enebe ’berlek en e,
“Nonogorlok o,” oluk erliktigisa.
Yairus agalogo emin, hwe mesik emep lasu modok welaga a’ge emin, Yesus en obabenebegei wene
(Matius 9:18-26; Lukas 8:40-56)
21Asogo tegeirik e, Yesus ik omugwe ano ik iak yu akhit so wusogo liplau waga. Liplau wagoma, aphwami esan pulogo at e’bek ik esa’goma odoktu egesa. 22Odoktu egesarik oruakma re, o aphwami Yahudi a’ge se’ban ogumu ebano onuelak ’gain welegesa a’ge mesik onuk Yairus wagarik, Yesus il yetholuk, eragam odogorlu pam hweriogo welat hau weriselat e, disogo mo’gulesi,
23“Yesus nue. An nagalogo ebe wei a’ge ebam ou en wareigoluk tagokhwe wegi o. Hat en he’gik tenhagunmu ebe op emarik elaluk welemagoluk, ne’birek lul en yo’go hobou wegi o,” oluk iak erlagaik ’gusogo mo’gulesi. 24Asogo mo’gulesimu e’birek legesa.
Lagaimu re, aphwami modok a’bik Yesus e’berlik lagalat ’bun-’bun ’ban-’ban ebam hi-hegitsogo legesa. 25Legesa eba a’ge, hwe mesik emep lasu modok oruakhwe 12 tahun tegei. 26Emep lasu modok welat e, dokter lak en hele’guagoluk di dokter yu dokter yo’go onoboluk, ou o’go wogontugulat e, at en a’ge modok erlagaptegei a’geat de, emep ano ’garok u erlak modok ebenagaikmu loksogoat lasu laga. 27-28Emep asogo lasu modok welat, Yesus obok esa’go holholuk e, ede en e, disogo epesi,
“An at osum ne’gik tenhelema, nemep yu erlak ema o,” opoluk lagarik, Yesus e’berlik horoksogo lasulat, osum e’gik tenhesi. 29E’gik tenhasukhwe erianoat, emep ano edipmu en ’garok egeimu, ogola en e,
“I. An ou modok wiak welegi ano, obapnebegei hegi,” oluk ede epesi. 30Asogo ede epasukhwe, at Yesus ede en e,
“Eige! An nannisogo elalin obabenebise legi a’ge ano nogola en aphwami pema enebam lagama enagat hegi,” oluk erianoat pobi tegei. Pobi toluk e, aphwami esan ebano odogun ’gwanisogo il ’gwelagontoluk e, disogo mo’gulentesi,
“An nosum sa en e’gik tenhesi,” oluk enebam hin wesi. 31Hin wesimu re, at osi iak wogu legesa a’ge ebano en e, disogo mo’gulegisa,
“Eige! Nue. Nis nenebe esanat heragam o’gwe egilluk waga lege a’ge yema hil yetnentasulat e,
Sa en tenniesi, oluk ese legen?” oluk mo’gulegisa. 32Asogo mo’gulegisa a’geat de, at Yesus en,
“Sa en tenniesi,” oluk, ebe dokhumtak paigoluk il edenogo yerentil laga. 33Yerentil lasumu, at hwe ano ede en e,
“An en tenhegimu taknebesi a’ge ano de, oso hegi,” oluk pobi tegeitik e, ogorlok agarik, uak erlik-erlik eselat e, Yesus eragam odogorlu pam huragarik e,
“An asogo welegerik e, disogo tegis o,” oluk ’berlegat ’beli’gogo mo’gulesi. 34Asogo mo’gulesimu, at Yesus en, disogo mo’gulesi,
“Nagalogo e. Hede nebam he’berigen ai en op e’gen o. Holuk e, hogola opsogo lak o,” oluk perakpesi.
35Asogo mo’gulosokhwe erianoat, o aphwami Yahudi a’ge se’ban ogumu onue ’gain ano owi pam en osi yo’go wegesarik e, disogo mo’gulegisa,
“Nue. Hagalogo ano arat waragama en wege o. Holuk e, nonue ’gain wene mo’gulnentasu a’ge yu, ’burlat hemin louwogoluk ming-ming tu no? Erlak o,” oluk mo’gulegisa. 36Asogo mo’gulegisema, at Yesus en, is eniak esa’go hwelegei a’geat de, eniak sagalogo ukpesirik ’gain ano disogo mo’gulesi,
“Hede mennei oborogun o. Hede an nebam he’berik poluk nemin louwok o,” oluk mo’gulesirik e, legesa. 37Legesarik, aphwami enebe esanat mo’gulentasulat e,
“Nene’berlik worogup erlak. We, is Petrus emin, Yohanes ot Yakobus e’birek emin, is nak e, nemin lul o,” oluk enemin legesa. 38Legesa ’gal e, ’gain ano owi pam aphwami esanat welat e, eniak modok a’bigat ngai-wai ogulat e, lo’gu marugumu legesa. 39Legesarik, at Yesus ebe o pam ’gwegeitik e, disogo mo’gulentesi,
“His e, ngai-wai ogulat lo’gu marogu legep ai nopaget. Hwele ai warom erlak, we, nogoso yo,” oluk mo’gulentesi. 40Asogo mo’gulentesimu re, is aphwami ebano en e, eida ebigisa. Eida a’bik ebigisema, at en e, enebe ’berlegat perlengsogo odipmu lebigenebesi. Lebigonoboluk e, is hwele ano aik ia emin, Yesus osi emin legesa a’ge ebano emin, is nak wogonoboluk o ogorlirakma hwele ano oruakma ’gwigisa. 41’Gwigisarik, e’gik tenak poluk e, nis neniak pam,
“Hwele yu, nagalogo. Inorogun en mo’gulheselegi o,” oluk u ’gela’ge, is eniak pam,
“Talita kum,” oluk mo’gulesi. 42Asogo mo’gulosokhwe erianoat, hwele ano ebe dagaga hwerli en 12 tahun agarikmu no oluk e, ebe inagarik, o ogorlirak o’gwe lak-wak tegei. Asogo tegeimu, is aphwami ebano enil hegesarik,
“Eige! Nonogorlok o,” oluk erliktigisa. 43Asogo erliktigisa a’geat de, at Yesus en e, disogo mo’gulentesi,
“An tisokhwe henil niegep a’ge ai, aphwami logon modok mo’gulentagup o,” oluk enesa’go weregitik e,
“Hwele yu so’boru mesik nouwagoluk wogemis o,” oluk mo’gulentesi.
Currently Selected:
Markus 5: Wul
Highlight
Copy
Compare
Share
Want to have your highlights saved across all your devices? Sign up or sign in
