Markus 6
6
Aphwami o Nazaret a’ge onogola en
Yesus mi-miarak pegesa wene
(Matius 13:53-58; Lukas 4:16-30)
1Pobuk at Yesus o eba en libagarik e, u’gwarek owi ebema laga. Lasuam e, osi iak wogu legesa a’ge ebano e’berlik legesa. 2Legesarik e, agauwa sabit a’ge pam Allah paget weat welat e, o aphwami Yahudi a’ge se’ban ogumu eba enebe esanat oruakma ene’bek ’gwi lagarik e, wene mo’gulentesi. Mo’gulentasumu, is enebe esan ebano en e, disogo egesa,
“Eige! Nogorlok e. Ap yu asogo til denago ai re, ’geba en mo’gulegeitik tago. Ogola modok ’gagalak ai, wene no a’ge ogola welat mo’gulnentasu. E’gik nak tenentasuam elalinat obabenebiso ai, no’gosogo tago logwe! 3At ebe re, hwe Maria omlogo o weriso a’ge ano erlak no? Osi e’berlik a’ge re, Yakobus emin, Yoses Yudas emin, Simon emin, epegi. Ye, orokhwi re, nis nenemin welege a’ge yema erlak?” oluk onogola en mi-miarak pegesa. 4#Yoh. 4:44Onogola en mi-miarak pegesema, at Yesus en disogo mo’gulentesi,
“Is ap Allah iak mo’gulontogwi a’ge, o di owi yu owi lagaiam, aphwami en hau do’goksogo waronobogwi a’geat de, o onu’gwarek onowi ebema lagaiam e, is onuelak enarilak emin, onowi seli mesikmu welagai a’ge emin, is nak e, hau do’goksogo waronobogwi erlak o,” oluk mo’gulentesi. 5Asogo tigisa ai en, at Yesus o eba welat elalin a’ge mesik tu erlakma en mo egei. We, aphwami ou enebam a’ge enebe wei nak e’gik tenagenebesirik obabenebegei. 6Obabenebegeitik e, is aphwami eba a’ge en enede at ebam eberak po erlak ai paget en, at ogola en e,
“Eige! Nogorlok e,” oluk epesirik e, pobuk o eba en ukpoluk e, o werik esa’go’gwe wene mo’gulentil denaga laga.
Yesus en, ap enebe 12 yo’go onoboluk peragenebesi wene
(Matius 10:5-15; Lukas 9:1-6)
7Asogo mo’gulentil denagalat e, ap enebe 12 ebano worlentasuam wegesema re, enebe ’biren lo’bok peragenebaigoluk yo’go onoboluk e, mu’gat enebabut wiak a’ge aphwami onogola ’goluk oruakma henokho lebigenebil louwagoluk at anni wogentesi. 8Wogontoluk enesa’go weriselat e, disogo mo’gulentesi,
“His e, ebela lo a’ge paget di a’ge yu a’ge mesik modok woluk lagup o. We, ’bouwa’gun nagat, woluk lit o. Woluk lagalat, so’boru emin, ebela lagalat so’boru nagup a’ge ’gonu il-il sum yagarogup a’ge emin, uang emin, pema modok woluk lagup o. 9We, honoyuk owi nak ’buksogo lagalat e, sum ’biren ’buktu pukmu en mesik-mesik nak ’buksogo lu o,” oluk mo’gulentasulat e, mesik disogo mo’gulentesi,
10“Aphwami ene’bek laguptik e, o da ’gwil ya ’gwil, ’gogu lorogup o. We, ’gwi lagupmu ebayat woloroguptik e, o momu louwogoluk holuk eba enat liplau woroguptik e, lu o. 11#Per. 13:51#Luk. 10:4-11Ye, is aphwami o agaikhe en henebe wokhonobugulat, heniak holugulat, togwi erlak holuk e, o ai en liplau wagalat e, is o eba a’ge enede eberuagoluk, honoyuk ollong hosogo poluk liplau manup o,” oluk enesa’go wusogo peragenebesi. 12Is ebano asogo peragenebesimu lagalat e, aphwami disogo mo’gulentil legesa,
“His wiak togu legep a’ge ai ukpoluk henebabut heberlemis o,” oluk mo’gulentil denagalat, 13#Yak. 5:14mu’gat enebabut wiak a’ge a’bigat aphwami onogola ’goluk oruakma henokho lebigonobogulat, ou enebam welegesa a’ge enebe esanat, op emagoluk minyak ena’gul pam ’belabogulat, til legesa.
At Yohanes ik olomu ’belabenebise laga a’ge
ano ebe werigisa wene
(Matius 14:1-12; Lukas 9:7-9)
14 #
Mat. 16:14; Mrk. 8:28; Luk. 9:19 Yesus osi en asogo tagenebil lagaihwe, at Yesus onuk aphwami o da ya eba enaluk agarik obok ogwiam, at ’gain onuk logo a’ge Herodes esa’go hwelegei. Asogo tisokhwe is aphwami nin pema en e, disogo ogu legesa,
“Yohanes ik olomu ’belabenebise laga a’ge ebe werigisema waraga a’ge ano elaluk agarik denago yo. Asogo elaluk agarikmu ani, oluk e, elalin tu puk a’ge til denago ai o,” ogulat, 15ye, is nin pema en e,
“Erlak o. Ai at Elia ebeat o,” ogulat, is nin pema en e,
“Erlak o. Is ap pageat Allah iak mo’gulontogu legesa a’ge en mo’gulontogu legesa ’gela’geat mo’gulentil denago ai re, at ebe is ai a’ge mesik hebarligen agarik denago,” ogulat, ebe Yesus a’geat de, asogo ogu legesa ai. 16Asogo ogukhwe obok at Herodes en esa’go hwelegeirik e, disogo egei,
“Erlak o. At Yohanes o’gorlop ’balogo weregismu waraga ano pobuk elaluk agarik denago aiat o,” oluk egei. 17-18#Luk. 3:19,20Asogo egei ai re, pageat at Herodes en ot Filipus ugwe onuk Herodias ai wesimu re, at Yohanes en e, disogo mo’gulese laga,
“Hat en hot ugwe wo pukmuat wegen ai wogo wolom mia o,” oluk, pobuk naduk e’gerli wusogo mo’gulese laga ai en e, at en ap yo’go enebesimu Yohanes ebe tenak poluk woluk wegesarik e, e’gik herle wusogo o ene’gik herle wusogo onobugumu ebano ’gwelakpegesa. 19-20’Gwelakpegesema oruakma, at hwe Herodias en Yohanes iak pouk tegeirik e, at Herodes en woruagoluk ede ’gagalise laga a’geat de, at Herodes ede en e, disogo epesi,
“At Yohanes ebe Allah en perakpou wagama welat ebabut hegitsogo tiso,” oluk ebabut ’balogo ebe ogorlok welat woru mia agama, ebe erlele wokho tenak welaga. Tenak welat, iak hwelisolom agai en hwelise laga a’geat de, hweliselat e, mennei a’bik eberise laga. 21Asogo eberiso oruakma, at Herodes ebe dagaga hegit agama re, seni lok sakho nouwogoluk, osi pemerintah a’ge ’gaindek emin, ap tentara onuelak emin, ap ononuk oruak a’ge o Galilea do’go a’ge ebano emin, enemin seni nouwogoluk yo’go enebesimu odoktigisa ai erlige, at hwe Herodias ede en e,
“An en Yohanes iak pouktak poluk woruak epasu legi ano panoasuak agauwa yu pamat woruak,” oluk epesi. 22Asogo epesirik, seni sogo no’gumu, at agalogo salisik a’ge ’gwelakpesimu ’gwi lagarik weni da horlok ya horlok darlik til lasulat, modok opsogo weregeimu, at Herodes ebe emin, ap ’gwi legesa a’ge ebano emin, onogola enagai a’bik hegesa. Enagai a’bik hegesema, at ’gain onuk logo a’ge Herodes ai en e, disogo mo’gulesi,
“Hat en no’gwe a’ge ’gonu mo’gulnorogun holuk e, wokheigat o. 23O yema an ’gain welat tenentarok welegerikmu re, hat en,
Di a’ge nagai, ogun holuk e, ’burl heisogo me’gilogo pema akhit wokheigat o,” oluk Allah onuk ho’buk ’balogo mo’gulesi. 24Mo’gulesimu, at hwele salisik a’ge ano libagarik ia e’bek lagarik e, disogo mo’gulesi,
“An no ’gonu ik,” oluk mo’gulesimu re, at en e, disogo mo’gulesi,
“At Yohanes ik olomu ’belabenebise laga a’ge ano a’gul ’balogo wokhemagoluk, ’gonu ip o,” oluk mo’gulesi. 25Asogo mo’gulesimu re, erianoat, at ’gain onuk logo a’ge ano hai lagarik e, disogo mo’gulesi,
“Naik, at Yohanes ik olomu ’belabenebise laga a’ge ano a’gul ’balogo piring pam dalogo yogodak yayat woknomup o. An aiat nagai o,” oluk mo’gulesimu, 26at ’gain Herodes ano ede modok wiak aga. Asogo wiak aga a’geat de,
“An nosi nenemin seni sogo no’gulat enil pamat,
Allah onuk ho’buk ’balogo demat wokheik o, oluk obok mo’gulegistikmu re, mo u nebit. Wogeigat o,” oluk ede epesi. 27Asogo epesirik, ap tentara a’ge aphwami ene’gik herle werak tenentarok welegesa a’ge mesik disogo mo’gulesi,
“Yohanes ano o’gorlop daksogo wit-wat, a’gul ’balogo woluk manup o,” oluk perakpesi. Perakpesimu re, o ene’gik herle werak onobogumu ebano lagarik e, Yohanes ebe o’gorlop daksogo weregei. 28Weregeitik e, a’gul ’belak piring pam dalogo hwele salisik a’ge ano wogosu aga. Wogesimu, at en e, ia wogosi laga. 29Asogo tigisema, aphwami en e,
“Yohanes asogo werigisema werak oruak,” oluk egesema, is Yohanes osi iak wogu legesa a’ge ebano enesa’go holholuk ebe werak a’ge ano wau wegesarik e, owikmu werak a’ge onobogumu pei legesarik oruakma en, at Herodes en Yesus obok hwelegeirik,
“Yohanes elaluk agarik denago yo,” oluk egei ai.
Yesus en aphwami enebe 5.000 so’boru seik-’beiksogo wogentesi wene
(Matius 14:13-21; Lukas 9:10-17; Yohanes 6:1-14)
30Is ap Yesus en yo’go onoboluk peragenebesi a’ge ebano togolik at e’bek wegesarik e, disogo mo’gulegisa,
“Nis en disogo tige o, yusogo tige o. Wene disogo mo’gulentige o, yusogo mo’gulentige o,” oluk modok ’beli’gogo mo’gulegisa. 31Asogo mo’gulegisema, aphwami a’bik eba lak-wak ogulat e, so’boru ’gesogo no ’gela’ge agama re, at Yesus en osi disogo mo’gulentesi,
“Set weisogo logon hwalogup en e, o aphwami enareng erlakma nenematekma ’geksogo louwok o,” oluk mo’gulentesi. 32Asogo mo’gulentesirik e, at ebe emin enemategat ik so wusogo, o aphwami enareng erlakma legesa. 33Lagaiam, is aphwami a’bigat enil yerontoluk e,
“Is ebano enebe eba hegi,” oluk pobi enebigisa. Pobirak onoboluk e, is onowi seli lo’bok ’berlek en ik esa’go’gwe pungtagat naduk onlogotma odokti legesarik oruakma, is Yesus osilak ebano pobuk legesa. 34#Bil. 27:17; 1Raj. 22:17; 2Taw. 18:16; Yeh. 34:5; Mat. 9:36Legesarik e, at Yesus ik so ogola en ene’bek libagarik, aphwami esan ebano il yerontoluk edeabenebasulat e, disogo egei,
“Is yema domba wam o’gonogwi ’gela’ge, ap o’gononobu a’ge enebe erlak en oruak yema, nede e,” oluk di wene yu wene a’bigat mo’gulentesi. 35Asogo mo’gulentasukhwe, o arat diak egeimu re, at osi iak wogu legesa a’ge ebano e’bek wegesarik e, disogo mo’gulegisa.
“Nis o yema aphwami enareng erlak en oruakma re, o arat diak egei o. 36Holuk e, aphwami yema re, onso’boru onu’gwarek enebaget o’go ’baluagoluk o yema esa’go akhit o seli lok o’gwe, wei o’gwe peragenebemen o,” oluk mo’gulegisa. 37Asogo mo’gulegisema, at Yesus en e,
“His enat wogentemit o,” oluk mo’gulentesimu, is en e, disogo mo’gulegisa,
“Eige! Aphwami en yabuk agauwa mesigat nak wogwiam, ene’gik o’go uang wogontogwi ai ’gela’ge a’geat de, nis en 200 woluk e, so’boru roti a’ge o’go ’balogo aphwami degenikmu re, elirat wogontouwagoluk ese legen a? Mia o,” oluk mo’gulegisa. 38Asogo mo’gulegisema, at en e, disogo mo’gulentesi,
“His so’boru roti a’ge meren oruak. Henil ’gwelakhai lit o,” oluk mo’gulentesimu re, is enil ’gwelakhai lotluk wegesarik e,
“So’boru roti a’ge huaben. Ye, hiane re, ’biren,” oluk mo’gulosu wegesa. 39Mo’gulosu wegesema, at en e, disogo mo’gulentesi,
“Aphwami yema enebe ’bugu petne eba enebe logolhegeik huretil louwagoluk mo’gulentemit o,” oluk osi mo’gulentesimu re, 40is en aphwami a’bik ebano mo’gulentigisema enebe logologo huretil legesa. Enebe logolak pema 100 ’gela’ge, ye, nin logolak pema, 50 ’gela’ge, logolil legesa. 41Asogo arat huretil legesema re, at Yesus en so’boru roti a’ge huaben eriano emin, hiane ’biren eriano emin, e’gikmu wesirik e, il ’bogorl akhit likholuk, Allah hau wusogo roti eriano ’gusogo re, osi iak wogu legesa a’ge en aphwami logolak ebano so’busogo wogontouwagoluk wogentesi. Ye, hiane ’biren eriano asogoat is ’berlegat so’burontouwagoluk ’gusogo wogentesiat. 42So’burentigisema re, is enebe ’berlegat onogumsogo ne’gesa. 43Asogo ne’gesarik e, roti ’gwerik ado emin, hiane ’gwerik ado emin, dedilogo pegesema re, Yesus osi en odoksogo mul sum egeik a’ge 12 emde lorophegeik yagasogo pegesa. 44So’boru roti a’ge ne’gesa ai re, ap nak e, enebe 5.000 ne’gesa.
Yesus oyuk ik ogum petne dasobut laga wene
(Matius 14:22-33; Yohanes 6:15-21)
45Asogo arat ne’gesema en e, at Yesus en at osi iak wogu legesa a’ge ebano disogo mo’gulentesi,
“An aphwami esan yema peragenebaik en e, his naduk ik so pam ’gwi laguptik e, ik etle akhit o Betsaida eba libaga lemis o,” oluk iak ningsogoat mo’gulentesi. 46Asogo mo’gulentesimu, liplau wagaihwe, at Yesus en is aphwami ebano arat peragonoboluk e, at se’ban iogoluk duk pam ligaga. 47Ligagarik e, at emategat duk pam oruakhwe, at osi ebano ik so wusogo ik omugwe ano ede ’burl lau wegesa ’gal, o arat hup aga. 48O hup agama re, yasobu onorogole’gwe en punhau wagama re, is ik so enannisogo worogukhwe, Yesus il yerentau waga. Il yerentau wagarik e, o dakha iogoluk e, ede we’gerlisokhwe, at oyuk ik ogum petne pil-pil ene’bek wagarik e, eneragam o’gwe ’gwi-’gwani ’bekhit weigoluk ’gela’ge tegei. 49-50Asogo tagoma re, is ’berlek ebano en e, at oyuk ik ogum petne pil-pil wagoma enil yetholuk e, mu’gat oluk yuk egesarik onogorlok en eniak ngai-wai egesa. Asogo ogukhwe erianoat, at Yesus en e, disogo mo’gulentesi,
“Nosi, yuk ogup. An nebeat waga legi o. Holuk e, honogorlok hagup o,” oluk mo’gulentesi. 51Asogo mo’gulentesirik e, ik so ogola ene’bek ’gwegeimu re, yasobu ano ’garok egei. ’Garok egeimu, is en e,
“Eige! Nonogorlok e,” oluk a’bik erliktigisa. 52Asogo erliktigisa ai re, naduk roti eseik-’beseiksogo wogentesi ano pobirak erlak enede ’buk welat, pobuk yasobu ’garok egeimu en de, erliktigisa o.
At Yesus en aphwami o Genesaret a’ge
ou obabenebegei wene
(Matius 14:34-36)
53Asogo toluk e, at Yesus osi enemin o Genesaret, ik omugwe ano esa’go yu akhit liplau wegesarik e, ik so ano e daintak poluk herle hettak pegesa. 54E dainsogo herle hettak poluk wagaihwe erianoat, is aphwami eba a’ge en Yesus ebe arat pobi tigisa. 55Pobi tigisarik e, pungtak o da ya eba legesarik e, is pema en e,
“Yesus o eba oruak o,” oluk, ogwiam enesa’go holholuk, aphwami enebam ou a’ge e ’biasogo Yesus e’bek wogonoboluk waga legesa. 56At Yesus ebe o seli lokma ’gwiselat, weimu ’gwiselat, igowi’gwe ebano ’gwiselat, tisokhwe re, is aphwami en is pema ou enebam a’ge wogonoboluk o selimu onobou aga legesa. Onobou agaiam e, is en e,
“Yesus, hosum we ologun nak nene’gik tenak pul a?” oluk eniak erlagaik ’gusogo mo’gulegisarik e, is at osum ene’gik tenhegesa a’ge ogo ’berlegat enebe op etil legesa.
Currently Selected:
Markus 6: Wul
Highlight
Copy
Compare
Share
Want to have your highlights saved across all your devices? Sign up or sign in
