Markus 4
4
“Ap mesik en e’gen owi pelil laga,”
oluk ebam elitsogo mo’gulentesi wene
(Matius 13:1-9; Lukas 8:4-8)
1 #
Luk. 5:1-3
Pobuk at Yesus ik Galilea omugwe ano esa’goma welat wene mo’gulentesi. Mo’gulentasumu aphwami enebe a’bigat eragam odoktu egesema re, is enebe ik esa’goma onoboluk e, at ebe ik so pam hutla ’gwegei. 2Hutla ’gwegeitik e, wene di pam yu pam elit hasulat, a’bigat mo’gulentesi. Mo’gulentasulat e, mesik disogo mo’gulentesi,
3“Henesa’go hwelit. Ap mesik yabuk wokho e’gen owi yeriso a’ge peligoluk libaga. 4Libagarik, pelil lasulat e, e’gen owi logon ebela pam ’belebak poluk laga. ’Bi lasuam e, sue wagarik e, ’berlek perlengsogo ne’gei. 5Ye, e’gen owi logon e, helep pam ’gwiang weiyatma ’belebak poluk laga a’ge re, ’gwiang weiyatma oluk e, perleneat ’baktegei. 6’Baktegei a’geat de, o mo pou wagama re, eme’en yoru erlakma oluk e, sawet-sawet ’buk aga. 7Ye, e’gen owi logon e, molip salma ’belabil lagama re, molip ebano lok agalat e, owi op a’ge yogo ano sebelhesimu ’gen-’gen agarik e, e’gen u erlakma en mo egei. 8Ye, e’gen owi mesik e, ’gwiang opma ’belabil laga a’ge re, ’baksogo ebe lok agarik e, e’gen egei. Edip mesik pam e, e’gen 30 egesegei. Edip mesik pam e, 60 egesegei. Edip mesik pam e, e’gen 100 egesegei,” oluk mo’gulentesirik e,
9e’berlik disogo mo’gulentesi,
“His henesa’go oruak holuk e, opsogo hwelit o,” oluk mo’gulentesi.
Yesus en e, “Wene ebam elitsogo mo’gulhentasu legi ai, ebe disogo o,” oluk mo’gulentesi wene
(Matius 13:10-17; Lukas 8:9-10)
10Asogo mo’gulentesirik, at Yesus ematek oruakma, pobuk is enebe 12 ebano emin, is nin pema Yesus en wene mo’gulentasukhwe enesa’go hweligisa a’ge emin, e’bek wegesarik e, disogo mo’gulegisa,
“Hat en wene ebam elit hasulat mo’gulnentigen ano, ebe ’gesogo oluk mo’gulnentigen,” oluk ebam hin wegesa. 11-12#Yes. 6:9,10Hin wegesema re, at en e, disogo mo’gulentesi,
“Allah en eragam enebasu wene ai, at ogola hisogo welago a’ge, wene his nak e, henaluk emagoluk ’baksogo mo’gulhonto epesi a’geat de, is aphwami o’borl o’gwe a’ge ai nak e, at Allah en e,
Is wiak togwi a’ge ai ukpoluk enebabut heberlumu re,
an en erlagapsogo ukpaikno oluk e,
is enil hogu lema a’geat de,
dokhumsogo hogu lema erlak o.
Ye, enesa’go hologu lema a’geat de,
dokhumsogo hologu lema erlak o,
oluk egei ai hegit emagoluk, wene di pam yu pam elit hasulat, mo’gulentasu legi ai o,” oluk mo’gulentesi.
At Yesus en, “Ap mesik e’gen owi pelil laga,
oluk mo’gulhentegis ano re, ebe disogo,”
oluk mo’gulentesi wene
(Matius 13:18-23; Lukas 8:11-15)
13At Yesus en asogo mo’gulentesirik e, pobuk disogo mo’gulentesi,
“His e, wene ebam elitsogo mo’gulhentegis ano pobirak erlak heneperlak welegep holuk e, pobuk wene di pam elit hasulat, yu pam elit hasulat, mo’gulhentasuam e, no’gosogo pobirak poluk henaluk ema. 14Ap mesik e’gen owi pelil noso a’ge oluk mo’gulhentegis ai ebe re, Allah iagat mo’gulentil no’gwi aiat o. 15Ye, e’gen owi logon ebela pam ’belabegei ai ebe re, is aphwami pema en Allah iak enesa’go holugumu re, Iblis perleneat wagalat e, wene enedemu yogo a’ge ano henokho woluk lasu o. 16Ye, e’gen owi logon helep pam ’belabegei ai ebe re, is aphwami logon en Allah iak ai enesa’go holugularat de, onogola en enagai hogulat e, perleneat wogwi. 17Asogo perleneat wogwi a’geat de, wene ai enedemu eme’en yogo erlak il mesigat oruakma en, aphwami nin pema en Allah iak ai paget, e’gin-pe’gin enebam pogulat, wiagabonobogulat, tugumu re, perleneat enede ’buk otluk e, wene ano ’goboksogo ukpoluk libagai aiat o. 18Ye, e’gen owi logon molip salma ’belabegei a’ge ebe re, is aphwami logon Allah iak ai enesa’go hweligisarik enat de, 19onogola en e,
Yogodak ya paget no’gosogo tik e, oluk, wenemennei yat horok eberak poluk,
Na’ge a’bik wellep e, oluk onogola eberugulat, onu’gwarek en lalhorlugulat, onogola en di a’ge yu a’ge nagai opogulat, togwi ai en e, wene ai edip ’gen-’gen agalat e, e’gen egesiso erlak aiat o. 20Ye, e’gen owi logon ’gwiang mulimu ’belabegei ai ebe re, is aphwami logon Allah iak ai enesa’go hil-hol wegesarik e, wene ano enedemu e’gen egesiso yo. Edip mesik pam en e’gen 30 egesiselat, edip mesik pam en e’gen 60 egesiselat, edip mesik pam en e’gen 100 egesiselat, egesiso aiat o,” oluk mo’gulentesi.
Yesus en, “Esaga ’gwialogo sogoluak lekho po mia,” oluk ebam elitsogo mo’gulentesi wene
(Lukas 8:16-18)
21 #
Mat. 5:15; Luk. 11:33 At Yesus en asogo mo’gulentesirik e, pobuk disogo egei,
“Aphwami en esaga ’gwialogo re, sogoluak en lekho pogulat, e ’bet en nogo ogumu ebano lekho pogulat, tuogoluk ’gwialogwi no? Erlak o. We, ’gwialogo re, e delak pam pouwogoluk ’gwialogwi o. 22#Mat. 10:26; Luk. 12:2Di a’ge yu a’ge hisogo oruak a’ge ebano, selakma hebarligen emagoluk hisogo oruak o. Ye, di a’ge yu a’ge sebelak oruak ai, ’baksogo selakma emagolugat, sebelak oruak o. 23Ai enat, sa en esa’go oruak holuk e, opsogoat holuak o,” oluk mo’gulentesirik, 24-25#Mat. 7:2; Luk. 6:38#Mat. 13:12; 25:29; Luk. 19:26wene mesik disogo mo’gulentesi,
“Wene mo’gulhentasu legi ai, opsogo pobi togu lomup o. Sa en wik-wok tenak oruak holuk, pobuk Allah en logon emin wogeselat, ye, sa en wogo erlak, we, wei nak tenak welema holuk, delogo togolik hwerlasulat, tua ai en e, his en aphwami logon wouwagoluk elit a’ge walhogulat wogontogu legep ai ’gela’ge, his en wogentagup hegitsogoat, at Allah en elit a’ge walsogo wokhontoluk e, logon emin ebam louksogoat wokhontouwayat o,” oluk mo’gulentesi.
Yesus en owi ’baktiso a’ge ebam elitsogo mo’gulentesi wene
26Yesus en wene asogo mo’gulentesirik e, mesik disogo mo’gulentesi,
“Allah eragam enebasu ai re, ap mesik iabukmu e’gen owi peliso ’gela’ge o. 27Iabukmu hwik ’belabiselat e, o hik osoam nogoselat, dakha osoam elaluk agalat, tisokhwe re, owi ano ’baktagalat e, lok ago yo. Asogo lok ago a’geat de, no’gosogo lok ago e, oluk e, wongat welago. 28Owi ai yabukmu yorogwiam e, naduk-naduk omuat ebe naduk ’baktagalat e, pobuk e’gen eselat, hurle ago ai o. 29#Yoe. 3:13Hurle agoam e,
E’gen ’balu ano arat horok lau waga o, oluk, e’gen ’balogwi a’ge ’garok ’gorlo a’ge woluk ebe perleneat ’balogwi o,” oluk mo’gulentesi.
’Gebi e’gen owi pam elitsogo mo’gulentesi wene
(Matius 13:31-32,34; Lukas 13:18-19)
30Asogo mo’gulentesirik e, pobuk mesik disogo egei,
“Allah eragam enebasu ai ebe re, no ’gela’ge ul. Ye, no ebam elitsogo ul. 31Ai ebe re, ’gebi e’gen owi ai ’gela’ge o. Ap mesik en ’gebi e’gen owi pelegei. Di a’ge yu a’ge e’gen owi ai, weiyat a’geat de, ’gebi e’gen owi ai nak e, modok weiyat o. 32Asogo a’geat de, sawi emin, wudat emin, owi a’ge nin pema emin, yorogwiam e, ’baktagalat e, edip wei a’ge ’gela’ge ligago. A’geat de, ’gebi ai nak e, pelogwiam edip modok logat libagalat e, e’gik a’bik dualogo e’gela a’bik agoam e, sue darak noso a’ge wagalat e, ’gunmu eba owi elirat wosu ago ai ’gela’geat o,” oluk mo’gulentesi.
33Is aphwami en wene pobi togwi hegitsogo pobi tuagoluk, a’bigat di pam elit hasulat, yu pam elit hasulat, mo’gulentasu laga. 34Is aphwami pema mo’gulentaiyogoluk holuk e, wene ebam elit hasulat nak mo’gulentasu laga a’geat de, at osi iak wogu legesa a’ge ebano nak e, enemin enematekma welat, wene ebe selakma ’baksogo mo’gulentasu laga.
Yesus en yasobu emin, ik hererimtak wago a’ge emin, ha’bugaptegei wene
(Matius 8:23-27; Lukas 8:22-25)
35Asogo mo’gulentasu lagarik e, o hopmu akhit at Yesus en osi ebano wene disogo mo’gulentesi,
“Nis ik etle akhit libomok o,” oluk mo’gulentesimu, 36is en e, ik so Yesus welagama ebano oruakma e’bek ’goluk e, aphwami esan ebano eba onoboluk, at ebe woluk libegesa. Is libagaihwe re, aphwami pema ik so logon pam mesik erlige libegesa. 37Asogo libagaimu, yasobu annisogo punhau wagama re, ik ano hererimtak wagalat, ’gwesalogo so ogola ’gwegeimu emde lorop tiogoluk tegei. 38Asogo tisokhwe, at Yesus ebe so agema sum ena’gul ago togwi a’ge pam a’gul agosogo nogosoma osi ebano en elalugap pegesa. Elalugap pogulat e, disogo mo’gulegisa,
“Nue. Nis ik olomu lul yema nenebe hede erlak a?” oluk mo’gulegisa. 39Mo’gulegisema, at elaluk agarik e, yasobu ano wene yageselat e,
“Ho’borlogouk erlak emen,” egeitik e, ik ano mo’guleselat e,
“’Garok in,” oluk mo’gulesimu re, yasobu ’balagalat, ik ano ’garok eselat, tegei. 40Asogo tegeimu re, at Yesus en e, disogo mo’gulentesi,
“His nopaget honogorlok agama togu legep. Henede an nebam owan he’berik erlak welegep a,” oluk mo’gulentesimu re, 41onogorlok a’bik aga. Onogorlok a’bik agalat e, is-is ogulat e, disogo egesa,
“Eige! Ap yu sa epegep. Yasobu emin, ik hererimtak wago a’ge emin, at iak osoam hologo erlak aga ai, nonogorlok o!” oluk erliktigisa.
Currently Selected:
Markus 4: Wul
Highlight
Copy
Compare
Share
Want to have your highlights saved across all your devices? Sign up or sign in
