Markus 3
3
Allah paget weat oruakhwe, Yesus en ap mesik e’gik il ’gorlo a’ge obaptegei wene
(Matius 12:9-14; Lukas 6:6-11)
1Pobuk e, at Yesus o is aphwami Yahudi a’ge se’ban ogumu eba ’gwegei. ’Gwegei ’gal e, o eba ap mesik e’gik il pema ’gorlo a’ge welaga. 2Asogo oruakma ’gwegeimu re, is ap pema enede en e, disogo epegesa,
“Yogodak e, agauwa sabit a’ge Allah paget weat oruakhwe, at en ap ai hele’gua ya? Erlak a. Hele’giso holuk e,
Hat wiak tigen, oluk, wene ebam pouwok o,” oluk enil en wogu legesa. 3Asogo enil en wogukhwe, at Yesus en e, ap e’gik il ’gorlo a’ge ano disogo mo’gulesi,
“Hebe inotluk e, ’burl ya suk o,” oluk mo’gulesimu, 4inlai lagama re, aphwami ebano en disogo mo’gulentesi,
“Agauwa sabit a’ge pam Allah paget weat welat e, aphwami obabonobu a? Wiagabonobo a. Ye, delonobu a? Waronobu a,” oluk mo’gulentesimu re, eniak erlak mo egesa. 5Mo egesema re, at Yesus il yerentil lagarik ede en e,
“Enebabut lagorak yema re!” oluk olot het agalat enebe ede en e, ap ano disogo mo’gulesi,
“He’gik ’belinghemen o,” oluk mo’gulesimu re, e’gik ’belinghesi ’gal arat op aga. 6E’gik asogo hele’gegeimu re, is ap Farisi a’ge ebano libegesarik perleneat Herodes osi ene’bek legesarik e,
“Yesus ’gesogo wotul,” oluk enemin obok ’baligisa.
At Yesus ik Galilea esa’goma oruakma
aphwami a’bigat e’bek wegesa wene
7-8Asogo tigisarik e, pobuk, at Yesus osi iak wogu legesa a’ge ebano enemin e, ik Galilea omugwe ano esa’goma legesa. Legesema re, aphwami en e,
“Yesus disogo tago, asogo tago,” oluk obok ogukhwe, is aphwami o Galilea do’go a’ge enebe esanat enesa’go holholuk ene’berlik ene’berlik lagaimu, is aphwami o Yudea do’go a’ge emin, o Yerusalem a’ge emin, o Idumea do’go a’ge emin, o ik Yordan iak etle akhit a’ge emin, o Tirus Sidon a’ge emin, Yesus e’bek odoktigisa. 9-10#Mrk. 4:1; Luk. 5:1-3Asogo odoktigisema re, enebe a’bigat ou obabenebisokhwe re, is ou enebam a’ge ’berlek en, aphwami pema hial-hial Yesus ano ene’gik tenak pouwogoluk e’bek ’gwigisa ai paget, at Yesus en e, at osi iak wogu legesa a’ge ebano disogo mo’gulentesi,
“Aphwami a’bigatma re, an neragam o’gwe ’bun-’bun uano oluk e, ik so wei a’ge mesik noboluk welemis o,” oluk mo’gulentesi. 11Ou asogo obabenebasukhwe, is mu’gat enebabut wiak a’ge aphwami onogola ’goluk welegesa a’ge en Yesus ebe enil holuk e, onorogole sogup ’bou til legesarik e, eniak loksogo mo’gulugulat, disogo ogu legesa,
“Allah omlogo re, harat o,” oluk mo’gulogu legesa. 12Asogo mo’gulegisa a’geat de, at Yesus en disogo egei,
“An Allah omlogo, oluk nobok modok mo’gulentagup o,” oluk iak ningsogoat wene yagentesi.
Yesus en ap enebe 12 yo’go enebesi wene
(Matius 10:1-4; Lukas 6:12-16)
13Asogo wene yagontoluk e’berlik e, at Yesus ebe dom pam ligaga. Ligagarik e,
“Ap enebe eria ne’bek wemak,” oluk ede epesi a’ge nak worlentesimu, e’bek legesema re, 14-15enebe 12 eriano edigenebasulat e, disogo mo’gulentesi,
“His an nemin modok-modok wolomultik en e, op wene mo’gulontogulat, mu’gat enebabut wiak a’ge aphwami onogola ’goluk oruakma, an nanni wokhentaikmu henokho lebikpogulat, til denaga lorogup en perakhenebaik o,” oluk edigenebesi. 16Enebe 12 edigenebesi a’ge ebano, ononuk e, yu: Simon onuk mesik e, Petrus tualegei a’ge ano emin, 17Zebedeus eiyagai Yakobus ot Yohanes e’birek ononuk nis neniak pam orlolu iak oso oluk u ’gela’ge, is eniak pam Boanerges tualenebegei a’ge emin, 18Andreas emin, Filipus emin, Bartolomeus emin, Matius emin, Tomas emin, Alfeus omlogo Yakobus emin, Tadeus emin, Simon,
“O Kanaan yema nonowirak a’ge nak wolomok o,” oluk ese laga a’ge ano emin, 19Yudas Iskariot Yesus woruagoluk pobuk yo’go laga a’ge ano emin, enebe eriayat edigenebesi.
“At Yesus ai Beelzebul ebam louktakma til denago ai o,” oluk egesa wene
(Matius 12:22-32; Lukas 11:14-23; 12:10)
20Asogo edigonoboluk togolik owi pam ’bu agoma re, aphwami esanat pobuk e’bek odoktu egesema re, Yesus osi emin onso’boru no’gosogo no ’gela’geat aga. 21Asogo agama, aphwami nin pema en e,
“At ede ’balagarik oruak o,” ogwiam, at Yesus osi enesa’go hweligisarik e, at ebe wouwogoluk wegesa. 22#Mat. 9:34; 10:25Is wagaihwe, is ap Allah iak pelal wogo eiye a’ge o Yerusalem en orlu egesarik e, disogo egesa,
“Beelzebul mu’gat enebabut wiak a’ge onue ’gain ano Yesus ebam louk egeimu oruak o. Asogo oruakma no oluk e, at anni pam mu’gat at osi ’gela’ge enebabut wiak a’ge aphwami onogola ’goluk oruakma henokho lebigenebasu o,” oluk egesa. 23Asogo egesema, at Yesus en aphwami esan ebano worlontoluk e, wene ebam elitsogo re, disogo mo’gulentesi,
“Iblis aphwami onogola ’gwiselat e, u’gwarek en elit henokho lebikpo no? Modok mia o. 24Ye, ap ’gain onuk logo a’ge mesigat a’ge osi eragam tenentarok welago a’ge emin is-is hwerlirak poluk enemin il ’belak welema holuk, mesikmu welat enanni welegesa ’gela’ge welema erlak o. Enanni erlak ema o. 25Ye, ap mesik eiyagai enemin hwerlirak poluk enemin il ’belak welema holuk e, ap mesigat eiyagai enemin welat op welegesa ’gela’ge welema erlak o. Wiagat ema o. 26Ai ’gela’ge re, at Iblis u’gwarek osi mu’gat enebabut wiak a’ge enemin hwerlirak poluk enemin wiak elepma re, we welagai ’gela’ge enannisogo wellep erlak o. Arat erlak elep o. 27Ye, ap mesik anni a’bik a’ge e’gik herle wusogo po erlakma en e, owi pam a’ge di a’ge yu a’ge yogorlia wa ’gu mia o. At e, at e’gik herle wusogo poluk nak e, elirat wa ’gwilo yo,” oluk mo’gulontoluk e’berlik wene disogo mo’gulentesi,
28“An niak demat mo’gulhentaik o. Aphwami en di wiak yu wiak togwi a’ge emin, onogola en mi-miarak onobogulat, eniak pam en onobok wiaksogo ’balogwi a’ge emin, at Allah en elit erlagapsogo ukpo a’geat de, 29#Luk. 12:10Allah Arogun ai onogola en mi-miarak pogulat obok wiak ’balogwi holuk e, erlagapsogo ukpo mia o. We, wiak tua ai paget wene enebam mun-mun welema o,” oluk mo’gulentesi. 30Wene asogo mo’gulentesi ai re, is en e,
“Yesus mu’gat ebabut wiak a’ge ogola ’gwegeitik oruak,” oluk egesema en de, mo’gulentesi o.
Yesus ia emin osi emin e’bek wegesa wene
(Matius 12:46-50; Lukas 8:19-21)
31Wene asogo mo’gulentesirik oruakma, at Yesus ia emin, osi emin, wegesarik odipmu edik welat, Yesus liplaumagoluk aphwami enebam wene wusogo ’gwelabenebigisa. 32’Gwelabenebigisema re, is aphwami a’bik Yesus eragam hweriogo welegesa a’ge en disogo mo’gulegisa,
“Yesus, yethemen! Hat hia emin, hosi emin, palo hebil wegesarik odipmu oruak o,” oluk mo’gulegisa. 33Asogo mo’gulegisema at Yesus en e,
“An nia nosi ai salak no,” oluk mo’gulentesirik e, 34aphwami at eragam hweriogo welegesa a’ge ebano il yerentil lagarik e, disogo mo’gulentesi,
“An nia nosilak e, his yuat o. 35Sa en, at Allah ede epasu a’ge hegitsogo tiso holuk e, at ai an not, nerei, nia, oruak o,” oluk mo’gulentesi.
Currently Selected:
Markus 3: Wul
Highlight
Copy
Compare
Share
Want to have your highlights saved across all your devices? Sign up or sign in
