Markus 2
2
Ap e’gik oyuk soborak a’ge Yesus en
obaptegei wene
(Matius 9:1-8; Lukas 5:17-26)
1At Yesus agauwa wonogoat o eba welagarik e, pobuk togolik o Kapernaum ’gu aga. ’Gu agarik, o pam ’gwegeimu, aphwami en e,
“At ebe o pam oruak o,” oluk ogumu enesa’go hweligisa. 2Enesa’go holholuk e, aphwami enebe esanat odoktu egesa. Wegesema re, o pam ’betesogo, sorlo’bon o’gwe emin ’bete egeimu re, op wene ano mo’gulentesi. 3Mo’gulentasuam e, ap mesik e’gik oyuk soborak welaga a’ge ap enebe ugan en, e yesogo woluk Yesus e’bek wegesa. 4Woluk wegesarik e, Yesus e’bek woluk ’guogoluk tigisa a’ge re, aphwami ’beterak en, no’gosogo ’gu ’gela’ge agama o dum pam ligegesarik, Yesus ebe welaga hegitsogoat dum posogo ap e’gik oyuk soborak a’ge ano egerlis nogo ese laga a’ge ano pam demogo ’belakpegesa. 5Asogo ’belabu egesema, at Yesus il hesirik e, disogo egei,
“Ap yu enede an nebam he’berik pegesarik en woluk wegesa hegi o,” oluk, il enak a’ge entesirik e, ap e’gik oyuk soborak a’ge ano disogo mo’gulesi,
“Not o. Hat wiak taga legen a’ge re, an en erlagapsogo ukpegi o,” oluk mo’gulesi. 6Asogo mo’gulesimu, is ap Allah iak pelal wogo eiye a’ge logon eba hweriogo welat e, is-is ebano onogola en e,
7“Ap yu wene egei ai, nopaget egei. Nis aphwami wiak togu lege a’ge yema re, is aphwami a’ge en elirat erlagapsogo ukpo no? We, at Allah ematek en nak e, elirat erlagapsogo ukpasu a’geat de, at yu ogola en e, Allah mi-miarak pasulat onuk wiagariso,” oluk onogola epegesa. 8Asogo epegesema, at Yesus en is onogola epegesa a’ge enagat pobi enebegeitik e, disogo mo’gulentesi,
“His honogola asogo opogu legep ai re, nopaget. 9An en ap e’gik oyuk soborak a’ge yu, wene sesogo ’gela’ge mo’gulom e, ’geat epegep.
Hat wiak taga legen a’ge ai arat erlagapsogo ukpegi o, oluk mo’gulegis ai re, sesogo ’gela’ge mo’gulegis epegep a? Ye, at e,
Hebe inotluk e, hegerlis demogo nogo ese legen a’ge yu horloluk lak o, oluk mo’gulom ai re, se ’gela’ge epegep a? Erlak o. Hebe inoroguntik lak o, oluk mo’gulesimu e’ginat o. 10E’gin a’geat de, an abat daklau wegi ai, ’gwiangma yema welat, aphwami di wiak yu wiak togwi a’ge an enat erlagapsogo ukpasu lemagoluk, Allah en eiye taknebesi a’ge ai pobirak nebemit o,” oluk mo’gulentesirik, ap e’gik oyuk soborak a’ge ano disogo mo’gulesi,
11“Hebe inoroguntik e, hegerlis demogo nogo ese legen a’ge yu horloluk e, howi pam lak o,” oluk perakpesi. 12Asogo perakpesimu re, ap ano inagarik e, erianoat egerlis ano e’gil-o’gul is aphwami ’berlek enilem erianoat horloluk ’bok laga. Asogo tegeimu, is aphwami ebano ’berlek en e, disogo egesa,
“Eige! Nonogorlok e. Nis yema nadugat aphwami pema disogo mesik tugukhwe hogu lege erlak a’geat, tegei yu nonogorlok o,” oluk Allah erliktigisa.
Yesus en Lewi yo’go pesimu e’berlik laga wene
(Matius 9:9-13; Lukas 5:27-32)
13Asogo tegeirik pobuk e, at Yesus togolik ik omugwe ano esa’goma laga. Lasumu re, aphwami esan at e’bek odoktu egesema re, wene mo’gulentesi. 14Asogo mo’gulontoluk lasulat e, ap Alfeus omlogo onuk Lewi, kantor uang pemerintah a’ge paget ’gonu oluk wogumu ebano hweriogo oruakma il yetholuk e,
“An ne’berlik suk o,” oluk mo’gulesimu inagarik e, e’berlik laga. 15Lagarik e, at owi pam Yesus e’birek ’gwigisarik, aphwami a’bik, is ap uang pemerintah paget ’gonu oluk wogu legesa a’ge enebe logon esanat emin, is logon wiak togu legesa a’ge emin, Yesus e’berlik legesarikmu no oluk e, at Yesus ebe emin, at osi iak wogu legesa a’ge ebano emin, so’boru nouwogoluk huragaimu, is ogo enemin nouwogoluk hurat egesa. 16Asogo no’gwi oruakma, is ap Farisi Allah iak pelal wogo enaluk a’ge pema en enil ’gwelagentigisa. Is pema wiak togu legesa a’ge emin, is ap uang pemerintah paget ’gonu oluk wogu legesa a’ge emin, Yesus emin so’boru no’gumu enil ’gwelagontoluk, is ap Yesus osi iak wogu legesa a’ge ebano disogo mo’gulentigisa,
“At Yesus ap uang pemerintah paget ’gonu oluk wogwi a’ge emin, is logon wiak togwi a’ge emin, enemin mesikmu so’boru no’gwi eba nopaget,” oluk mo’gulentigisa. 17Asogo mo’gulentigisema, at Yesus esa’go hwelegeirik e, disogo mo’gulentesi,
“Is aphwami enebe enebam op welat ou erlak a’ge, dokter lak en ou obabonobuagoluk yo’go onobo no? Erlak o. We, enebam obotut oruak holugat dokter lak yo’go onobo yo. Ai ’gela’ge, an aphwami op togwi a’ge yo’go enebaigoluk wegi erlak o. We, aphwami wiak togwi a’ge ai yo’go enebaigoluk wegi o,” oluk mo’gulentesi.
Se’ban uogoluk so’boru ’bonuk welagai wene
(Matius 9:14-17; Lukas 5:33-39)
18Pobuk agauwa mesik pam, at Yohanes osi iak wogu legesa a’ge emin, is ap Farisi a’ge onosi eniak wogu legesa a’ge emin, se’ban uogoluk, so’boru no erlak weat welegesa. Asogo oruakhwe, is aphwami ado pema Yesus e’bek wegesarik e, disogo mo’gulegisa,
“Yesus o. Is Yohanes osi iak wogwi a’ge ogo, is ap Farisi a’ge onosi eniak wogwi a’ge ogo, se’ban uogoluk so’boru no erlak ’bonuk oruakhwe, hat hosi hiak wogwi a’ge eba nak e, asogo tu erlakma en so’boru no’gwi ai nopaget,” oluk mo’gulegisa. 19Asogo mo’gulegisema, at Yesus en e, disogo mo’gulentesi,
“Ap mesik ugwe hwerlasulat, at arilak orokhwi yo’go onobouwa a’ge enemin welat so’boru no erlak ’bonuk welat wolom no? Erlak o. Ap ai emin welat, asogo no erlakma ’bonuk welat wolom mia o. 20A’geat de, ap ai arilak orokhwi onoboluk ebe woluk louwa a’ge agauwa oruak o. Asogo woluk loma eria hegit nak e, is ai agauwa mesik so’boru no erlakma en ’bonuk welema ani o,” oluk mo’gulentesi.
21Asogo mo’gulentesirik mesik disogo mo’gulentesi,
“Aphwami en, sum naduk a’ge ’buktogwi a’ge derlep oso holuk, ’gain ’get a’ge pam terleben togwi erlak o. Ye, asogo terleben togwi holuk e, ’gain ’get a’ge dorlo’gok hai lasulat, sum ai logat derlep etil lo yo. 22Ai ’gela’ge, aphwami en anggur e’gen ’berelogo a’bosu ’get a’ge ik e’be domba agap a’ge pageat hele’gik a’ge ogola na’gogwi erlak o. Asogo na’gogo pogwi holuk e, a’bosu ’get a’ge ai en e, ik e’be ai supsogo re, a’bosu ’gwesalogo alemat agalat, ik e’be ogo harlok eselat, tuano oluk, anggur e’gen a’bosu ’berelogo a’bosu ’get a’ge ik e’be ’get a’ge pam na’gogwi o,” oluk mo’gulentesi.
Aphwami Yahudi a’ge Allah paget weat oruakhwe, Yesus osi gandum e’gen ’balogo nil legesa wene
(Matius 12:1-8; Lukas 6:1-5)
23 #
Ula. 23:25
Aphwami Yahudi a’ge agauwa sabit a’ge pam Allah paget weat welagai a’ge ano pam mesik erlige re, at Yesus ebe emin, osi iak wogu legesa a’ge ebano emin, enemin gandum yogo’gwe lagalat, osi en gandum e’gen ano ’bal ’bal legesa. 24’Balil legesema re, is ap Farisi a’ge en e, Yesus disogo mo’gulegisa,
“Yethemen! Is yu agauwa sabit a’ge pam Allah paget weat welat e,
Asogo togup, oluk wene ’belak oruak a’geat de, nopaget ’bal ’bal wegesa,” oluk wene yagegisa. 25Asogo wene yagegisema re, at Yesus en disogo mo’gulentesi,
“Ap Daud osi e’berlik legesa a’ge emin so’boru enede ’borok hesimu ebe erlak en e, at en tegei a’ge Allah iak pam pelal wogo ano his en onuk mo’gulik erlak welegep a? Mo’guligebat ani o. 26#Ima. 24:9#1Sam. 21:1-6At Daud en e, ap Abyatar is ap Allah eiye a’ge onue ’gain welat Allah owi werikmu Allah paget tisoma eba ’goluk e, so’boruroti a’ge Allah akhit pogwi a’ge modok yogunat no’gwi erlak o. We, is Allah eiye a’ge nak no yo, oluk wene ’belak a’geat de, at Daud en ne’geitik e, osi e’berlik legesa a’ge ebano wogentesimu ne’gesayat, oluk pelal wogo oruak ano onuk mo’gulik erlak welegep no?” oluk mo’gulentesirik wene mesik disogo mo’gulentesi,
27“Allah en e,
Agauwa sabit a’ge an nebaget weat wolomup o,
egei ai re, wene ai logo paigoluk aphwami enebe walentesi puk. We, aphwami enebe logo onoboluk e,
Agauwa sabit a’ge pam an nebaget weat wolomup o, oluk enebe enebaget egei ai o. 28Asogo egei ai en e, agauwa sabit a’ge pam Allah paget weat welagai ai, eiye re, an abat daklau wegi a’ge nebe yuat o,” oluk mo’gulentesi.
Currently Selected:
Markus 2: Wul
Highlight
Copy
Compare
Share
Want to have your highlights saved across all your devices? Sign up or sign in
