Markus 12
12
“Ap pema anggur yabuk ’gwelakharok welegesa,” oluk, ebam elitsogo mo’gulentesi wene
(Matius 21:33-46; Lukas 20:9-19)
1 #
Yes. 5:1-2
At Yesus en wene asogo mo’gulentesirik e, pobuk wene mesik ebam elitsogo re, disogo mo’gulentesi,
“Ap mesik iabukmu anggur owi yeregei. Yeregeitik e, leget wasulat, e’gen ’berelogo a’bosu na’gogulomma ’gwiang patle deliselat, enil wolomma e ’berla tiselat, tegei. Tegeitik e, ap logon yabuk ebano pekharok welemagoluk onoboluk e, ebe o momu eba laga. 2Lagarik oruakhwe, e’gen egesisoam ’balogwi eriano hegit lau wagama re, ap iabuk eiye a’ge ano en is ap pekharok welemagoluk enebesi a’ge ebano en anggur e’gen logon ’balogo wogontouwagoluk, eragam a’ge mesik ene’bek perakpou waga. 3Perakpou wagama, is ap ebano ene’bek waga ’gal e, ebe ’go’bu wusogo anggur e’gen logon daganum erlakma en, weat togolik perakpegesa. 4Perakpogwiam lagama re, pobuk eragam a’ge agaikhen ene’bek perakpou wagama waga ’gal e, is en e’gerli wusogo ’go’bu a’gul hwerik di-diaksogo werigisa. 5Asogo tigisema re, pobuk eragam a’ge agaikhen perakpou wagayat. Wagama re, ebe modogat ’be’gi werigisa. Werigisema re, pobuk at eragam a’ge logon enebe esanat, is ap ebano ene’bek peragonobou wagama re, waga legesa a’ge is en e, pema ’go’bu wusogo onobogulat, pema enebe modok ’be’gi waronobogulat, tigisa. 6Asogo perlengsogo warenebegisema re, at iabuk eiye a’ge ano omlogo ede hwedik a’ge mesik nak agama re, at en e,
An nomlogo yuat ene’bek perakpouema re, hau do’goksogo wusogo wouwa o, oluk epesirik e, ebe pobuk ene’begat perakpou waga. 7Perakpou wagoam wagama, is ap yabuk tenak welegesa a’ge ebano en, is-is nak ogulat e, disogo egesa,
Ap ai aik ebelema yabuk eiye ema a’ge ano ebe waga etle o. Holuk yabuk yu nisat eiye wolomogoluk ebe woruok o, oluk egesarik, 8ebe tenak poluk werigisarik e, werak ano anggur yabukmu en leget o’borl akhit hwikhai legesa. 9Asogo tigisa ai en e, ap ’gain yabuk eiye a’ge ano en e, no’gosogo tua epegep. At ebe wemarik e, disogo tua. Is ap ai enebe modogat wusogo hwigontoluk e, enebalema yabuk anggur yabuk ano pekharok welemagoluk ap mu a’ge edigonobouwayat o. 10#Mzm. 118:22-23His en Allah iak pelal disogo wokho pegesa a’ge onuk mo’gulik erlak welegep no? Is en e,
Is ap tukang o helep pam worogwi a’ge en e,
o ebe worugulat e,
Helep yu wiak, oluk ukpegesa a’ge ano
wa’giat dalagama o.
11Asogo aga ai,
nenaik Allah ’gain Onuk Logo a’ge enat tegei o,
oluk nenil hegerik e,
Eige! oluk erliktogu lege,
oluk pelal wokho pegesa a’ge ai onuk mo’gulogu legep erlak no? Mo’gulogu legebat o,” oluk mo’gulentesi. 12Asogo mo’gulentesimu, is en e, disogo mo’gulegisa,
“Wene ebam elitsogo egei ai, nis nenebagerat mo’gulnentesi hegi,” oluk, pobi tigisa. Pobi tigisarik e, Yesus ebe tenak pouwogoluk tigisa a’geat de, aphwami esan ebano onogorlok en ukpoluk ’bogoligisa.
“Uang pemerintah paget ’gonu ogwiam wogonto a? Erlak a,” oluk Yesus ebam hin wegesa wene
(Matius 22:15-22; Lukas 20:20-26)
13Pobuk e, is ap ’gaindek ebano en e, Yesus il walsogo iak ua a’ge ai pam e’gen poluk en de, wene ebam pouwogoluk, is en is ap Farisi a’ge logon emin, is ap Herodes oruak o’gwe a’ge logon emin, enemin en Yesus emdema wouwagoluk e’bek peragonobou wegesa. 14Peragonobou wegesema, wegesarik e, disogo mo’gulegisa,
“Nue. Hat hebabut e, wene dem a’ge nak eselat, aphwami onorogole pam nak yerontoluk, logon holukhwema enebasulat, logon ho’borlma enebasulat tago erlak. We, enebe hogorlok erlaksogoat welat e, Allah ogola en,
Aphwami disogo togu lemak, oluk epasu a’ge demat nak mo’gulnentasu legen ai nis nenaluk o. Holuk e, nis Yahudi a’ge togwi hegitsogo, uang pemerintah paget, ’gain onuk logo a’ge Kaisar wogoum e, elit a? Mia a. Wogogu lomok a? Ye, ugobogu lomok a,” oluk hin wegesema, 15at Yesus en e,
“Eniak lalogo mo’gulnegisa ani o,” oluk enebabut enak a’ge ’balegeitik e, disogo mo’gulentesi,
“An nebabut ’baluogoluk egep ai nopaget. Uang perak yabuk agauwa mesik paget togwiam ene’gik o’go wogontogwi ano a’ge mesik nil haik en e, wai lit o,” oluk mo’gulentesimu, 16woluk wegesema, at Yesus en e, disogo mo’gulentesi,
“Yu sa orogole hele’gik a’ge pam onuk pelal wogo oruak epegep,” oluk mo’gulentesimu is en e,
“Ai Kaisar at o,” oluk mo’gulegisema, 17at Yesus en e, disogo mo’gulentesi,
“Kaisar en a’ge holuk e, Kaisar at wogugulat, Allah en a’ge holuk e, Allah at wogugulat, togu lemis o,” oluk mo’gulentesimu is en e,
“Eige! Nonogorlok e,” oluk erliktigisa.
Ap Saduki a’ge en, aphwami warotluk enelaluk om a’ge paget Yesus ebam hin wegesa wene
(Matius 22:23-33; Lukas 20:27-40)
18 #
Per. 23:8
Pobuk e, is ap Saduki a’ge en,
“Aphwami warotluk enelaluk ema erlak,” oluk ogwi a’ge logon Yesus e’bek wegesa. Wegesarik at ebam hin wokhogulat e, disogo mo’gulegisa,
19 #
Ula. 25:5-6
“Nue. At Musa en disogo mo’gulnentesi,
Ap mesik eiyagai dagonobu erlakma en ugwe sugwe ukpoluk ebe warago holuk e,
ebalema emalik logon dagonobuagolukhwe sugwe ai ap ai orat wo yo,
oluk mo’gulnentesirik, pelal wogo pesimu oruak o. 20Asogo egei a’ge oruakma re, ap enebe sabiren a’ge de, enaik mesigat en dogo welegesa. Welat, onue naduk a’ge ai ugwe wesirik, emalik dagonobu erlakma en waragayat. 21Waragama re, ot e’berlik a’ge ano en hwe sugwe ano wesirik emalik dagonobu erlakma enat waraga. Waragama re, pobuk onot ene’berlik a’ge ano en ogo asogoat tegei. 22Asogo is ap enebe sabiren en enemalik dagonobu erlakma en waretil nak wegesema re, pobuk ologun ’goboksogo re, hwe ai ebe waragayat. 23Holuk e, is ap enebe sabiren ai, hwe mesigat a’ge aiat wil wegesarikmu re, pobuk Allah en aphwami werak a’ge enelalugabenebisoam is ebano enelaluk agalat, hwe ai sa ’gela’ge ugwe ema epegen,” oluk Yesus ebam hin wokhegesema, 24at en e, disogo mo’gulentesi,
“His e, Allah iak pelal wogo ai emin, Allah anni ai emin, heneperlagat welat, heniak dagansogo egep ai o. 25Aphwami werak a’ge Allah en enelalugabonobua hwerli en, hwami horlogulat, is nin pema wogontugulat, togu lema modok erlak o. We, is malaikat ’bogorl pam a’ge welagai ai ’gela’geat welema o. 26#Kel. 3:6Aphwami waragaiam Allah en enelalugabonobua, oluk wene Musa en pelal wesi a’ge ano onuk mo’gulik erlak welegep no? At Musa ano e hourak a’ge mesik edipmu lagarik oruakma re, at Allah en disogo mo’gulesi,
Abraham o, Ishak o, Yakub o, enaik Allah anat o,
oluk mo’gulesimu pelal wesi a’ge ano onuk mo’gulik erlak welegep no? Onuk mo’guligebat ani o. 27At Allah re, aphwami werak a’ge enaik puk. Enelaluk a’ge enaigat o. Asogo a’geat de, his heniak dagansogo modok egep ai o,” oluk mo’gulentesi.
“At Allah en nenesa’go weregei wene logo re, ’biren eriayat o,” oluk mo’gulesi wene
(Matius 22:34-40; Lukas 10:25-28)
28Wene asogo emin ogukhwe re, is ap Allah iak pelal wogo eiye a’ge ebano mesigat a’ge wegesarik esa’go hwelak welagarik, ogola en e, disogo epesi,
“Is ap yema Yesus ebam hin wokhegesema re, at en e, wene o’go hegitsogo mo’gulentesi hegi,” oluk ogola epesirik disogo mo’gulesi,
“Nue. Wene Allah en nenesa’go weregei wene ano wene ebe logo a’ge re, ’ge egei epegen,” oluk Yesus ebam hin wesi. 29#Ula. 6:4-5Ebam hin wesimu, at Yesus en disogo mo’gulesi,
“Wene ai logo re, Musa en disogo egei,
His ap Yahudi a’ge yema henesa’go hwelit o!
Nenaik ’gain Onuk Logo a’ge re, Allah emategat o.
30Holuk e, henede emin, henebabut emin, honogola emin, henanni emin, mesigat otluk
nenaik ’gain Allah Onuk Logo a’ge ebe aiat henede hwedik welemis o,
oluk mo’gulentesi a’ge, wene logo re, aiat o. 31#Ima. 19:18Ye, wene ai e’berlik a’ge ’gela’ge re, disogo egei ani o,
Honu’gwarek henebe henede hwedik welegep ai ’gela’ge re,
is aphwami logon enemin welegep a’ge ai henede hwedik wolomup o,
oluk wene ’biren egei eriayat logo yo. Wene nenesa’go weregei a’ge logon oruak a’geat de, abel akhit a’ge ’gela’ge nak o,” oluk mo’gulesi. 32#Ula. 4:35Asogo mo’gulesimu, at Allah iak pelal wogo eiye a’ge ano en e, disogo mo’gulesi,
“I nue. Wene hegirat e’gen hegi.
At Allah ebe mesigarat o, ’biren erlak o,
oluk demat egen. 33#Hos. 6:6Holuk e, at Allah uam wusogo ebe ebesik odouk olomu narlogulat, di a’ge yu a’ge at akhit pogulat, tugulom mia ’gela’ge a’geat de, nenede emin, nonogola emin, nenanni emin, mesigat otluk, at Allah ebe nenede hwedik welat e, is aphwami pema enemin welege a’ge nonu’gwarek nenebe ’gela’ge nenede hwedik wolom aiat logo yo,” oluk mo’gulesimu, 34#Luk. 10:25-28at Yesus ogola en e,
“Ap yu ede oruak a’ge en egei hegi,” oluk epesirik e, disogo mo’gulesi,
“Hat e, Allah eragam horoksogo ’gwilo ebelerak welegen hegi o,” oluk mo’gulesimu is aphwami ebano en e, pobuk Yesus ebam wene hin wo onogorlok aga.
“At Kristus ai, ebe sa epegep,”
oluk mo’gulentesi wene
(Matius 22:41-46; Lukas 20:41-44)
35Asogo tigisema re, pobuk at Yesus en Allah owi werikmu wene mo’gulentasulat disogo mo’gulentesi,
“Is ap Allah iak pelal wogo eiye a’ge ebano en e,
Kristus Allah en yo’go poluk perakpou weik egei ano, ebe Daud en dogo’gwe a’ge o, oluk ogwi ai re, ’gesogo oluk ogwi epegep. 36#Mzm. 110:1At Daud Allah Arogun ogola welat, u’gwarek en disogo egei,
Allah ’gain Onuk Logo a’ge en an nue ’gain Onuk Logo a’ge mo’guleselat e,
Aphwami hat heselei a’ge ebano hoyuk en al ’besilogo enebagun en,
an en owan he’bek onobou wom erlak oruakhwe,
hat an neragam ne’gik ’bekhit akhit hebe ’gain hweriogo wolorogun o,
oluk Allah en Kristus mo’gulesi, oluk Daud en egei. 37At Daud u’gwarek en Kristus ebe paget,
An nue ’gain Onuk Logo a’ge,
oluk egei a’geat de, his en,
Kristus ai Daud en dogo’gwe a’ge o, oluk no’gosogo u epegep. Asogo u mia o,” oluk mo’gulentesi. Wene asogo mo’gulentasuam e, is aphwami esan ebano, at iak holugulat e, onogola enagai hogu legesa.
“Is ap Allah iak pelal wogo eiye a’ge en wiagaphonobuano,” oluk mo’gulentesi wene
(Matius 23:1-36; Lukas 20:45-47)
38Aphwami a’bik ebano onogola enagai a’bik hogukhwe re, at Yesus en wene mesik disogo mo’gulentesi,
“Is Allah iak pelal wogo eiye a’ge ai en wiagaphonobuano oluk, his henebabut heberlogo welemis o. Is onogola enagai en togwi ano re, yuat o. Onosum yat a’ge ’buktak poluk pasar o’go wogumu ebano aphwami en hau sakhosogo waronobuagoluk lagalat, 39o aphwami Yahudi a’ge se’ban ogumu ebano ap ’gain huragaimu enemin ’golokho hutla ’gugulat, aphwami seni lok sakho no’gumu is ap ’gaindek huragaimu ebano ’golokho hutla ’gugulat, tugulom enagai welagai ai o. 40Asogo welat, hwami sugwe a’ge onowi werik emin, ena’ge emin, sebelhorlugularat de, aphwami en enesa’go holugulat,
Is op, opou wagoluk se’ban yat wiak litil-latil lagai ai asogo tugullep erlak wellepma re, Allah en wene weiyat enebam poluk wellep. A’ge re, asogo togwi ai en, wene e’gin a’ge enebam poluk wiagabonobua o,” oluk mo’gulentesi.
Hwe sugwe a’ge mesik en uang
Allah akhit pesi wene
(Lukas 21:1-4)
41Wene asogo mo’gulentesirik e, at Yesus ebe huragarik hweriogo welat, peti uang Allah paget ogola pogwi a’ge abel pema akhit oruakma re, aphwami esan ebano en uang yagarak pil-pil legesa. 42Asogo yagarak pil legesa a’geat de, at hwe sugwe a’ge ilmu erlak a’ge mesik wagarik e, uang sen a’ge mesik po ’gela’ge re, uang sen tembaga a’ge wei a’ge ’biren nak poluk laga. 43-44Asogo poluk lagama re, at Yesus en e, osi iak wogu legesa a’ge ebano worlentasuam wegesema re, disogo mo’gulentesi,
“Is aphwami ’berlegat ai ena’ge a’bikmu re, e’gerlakma a’ge hialogo pei legesa ai, weisogoat o. A’geat de, at hwe sugwe ilmu erlak a’ge ai nak e, oso’boru o’go ’balogo no a’ge ’berlegat pesi ai nak e, modok a’bik ’gela’ge pesi o, oluk demat mo’gulhentegis o,” oluk mo’gulentesi.
Currently Selected:
Markus 12: Wul
Highlight
Copy
Compare
Share
Want to have your highlights saved across all your devices? Sign up or sign in
