Markus 11
11
At Yesus erliktugukhwe o Yerusalem
’gwi laga wene
(Matius 21:1-11; Lukas 19:28-40; Yohanes 12:12-19)
1Asogo legesarik e, at Yesus osi iak wogu legesa a’ge ebano emin, o kota Yerusalem ’guogoluk horogat lai legesarik, dom Zaitun edipmu o seli onuk Betfage, agaikhen onuk Betania eba hegit lai legesarik e, at Yesus osi iak wogu legesa a’ge ebano enebe ’biren wene wusogo naduk peragenebesi. 2Asogo peragenebasulat e,
“O seli honlogotma etleat lit o. Arat laguptik holuk e, owan ’gugulat wam keledai emalik a’ge owan aphwami o’borl pam huragaiam wogonoboluk lasu erlak a’ge herle ’go’bi erlelik oruakma henil hagup ani o. Ye, arat henil haguptik holuk e, ’go’bi erlelik oruak a’ge ai hebilogo woluk manup o. 3Asogo herle hebelogumu re, is aphwami eba a’ge ado en e,
Wam ’go’bi hebelogu legep ai, nopaget, oluk wene ’balogwi holuk e, disogo mo’gulontomup,
Nonue ’gain Onuk Logo a’ge ano en e, keledai yu a’ge erlak en woluk louwogoluk hebelogu lege o. At en keledai yu togolik perleneat perakpouma ani o, oluk mo’gulontomup o,” oluk wene wusogo peragenebesi. 4Peragenebesimu legesa ’gal e, keledai egei a’ge ano emalik a’ge mesik o agaikhen ebela pam werikmu ’goduk olema ’gogumu, ebela esa’goma, emde ’go’bi erlelik oruakma hai legesarik e, ’go’bi hebeligisa. 5Hebelogumu re, is aphwami eba edik welegesa a’ge en e, disogo mo’gulentigisa,
“Wam keledai emalik a’ge ai nopaget ’go’bi hebelogu legep,” oluk wene ’baligisema, 6is en e, at Yesus en,
“Wene disogo mo’gulontomup o,” oluk egei ’gela’geat mo’gulentigisema, is en e,
“I o,” oluk ukpegesa. 7Ukpegesema re, wam keledai emalik a’ge ano Yesus e’bek woluk wegesarik e, onosum o’borloma a’ge no’gorlogo keledai o’borl pam dalogo pegesema re, Yesus ebe keledai o’borl pam huraga. 8O’borl pam huragarik lasumu re, is aphwami esanat pema akhit ebano onosum o’borlma a’ge no’gorlogo ebela pam dalogo pil lagalat, is pema akhit en e’gela yabukmu a’ge ’balogo ebela’gwe dalogo pil lagalat, tigisa. 9#Mzm. 118:25,26Asogo pil lagalat, at Yesus ebe ’burlmu poluk, is pema naduk lagalat, is nin pema e’berlik pobuk lagalat, til legesarik e, eniak loksogoat disogo il-il legesa,
“Nue wa! Nue wa! Nue wa!” oluk u ’gela’ge,
“Hosana!” il-il lagalat e,
“Nenaik ’gain Onuk Logo a’ge Allah en perakhobou wagama wegentik yu, at enat obaphobuak o.
10Pageat nene’ba Daud eragam welegesa ’gela’ge, Allah en nonue yu eragam nonobouwarik obapnonobuak o. Allah modok logo ’bogorl pam welago a’ge, naik wa!” u ’gela’ge re,
“Hosana!” oluk amitmit supsogo il il, 11o Yerusalem ’gwi legesa. ’Gwi legesarik e, at Yesus ebe Allah owi werikmu ’gwi lagarik di a’ge yu a’ge ’berlegat il pobi tagokhwe re, o arat hup agama, osi enebe 12 ebano enemin o Betania liplau wegesa.
Yesus en e ara edip mesik heman pesi wene
(Matius 21:18-19)
12O Betania liplau wegesarik nogoluk, hubet o’gwe togolik ebela’gwe lagalat, Yesus so’boru nele aga. 13So’boru nele agama re, e ara edip mesik e’gela muli oruakma il walekma en yethesi. Il yetholuk e,
“E’gen egesik a? Erlak a,” oluk, ’gwelakhai laga ’gal, agauwa eria hegit e, e ara e’gen egesiso erlakma oluk e, e’gela nak muli oruakma hai laga ’gal e, e’gen mesik egesik erlak. We, e’gela nak muli oruakma hai lagarik, 14disogo mo’gulesi,
“Hat e yu re, hwerli yogodak ya en ’bekhit pobuk e, he’gen aphwami pema en no’gumuno. Ikhagun,” oluk mo’gulosokhwe is osi iak wogu legesa a’ge ebano enesa’go hweligisa.
Yesus Allah owi werikmu ’goluk degelegei wene
(Matius 21:12-17; Lukas 19:45-48; Yohanes 2:13-22)
15At Yesus lak o eba en o Yerusalem ’gwigisa. ’Gwigisarik e, at Allah owi werikmu ’gwegei ’gal e, is aphwami ’goluk welat e, o’go wogulat, ’balugulat, togu legesa a’ge ebano mukho-makho lebigenebasulat, is pema uang e delak a’ge pam poluk agam-pagam hogu legesa a’ge emin, is pema e dalogo enebe hweriogo welat sue ’berl ’gela’ge o’go wogu legesa a’ge emin, e delak a’ge ai abel eden-pedensogo hwikhai lasulat, til laga. 16Asogo tegeitik e, aphwami pema en di a’ge yu a’ge woluk Allah owi werik seli ede ’burl o’gwe lak-wak ogu lorogup o, oluk wene ’balegei. 17#Yes. 56:7; Yer. 7:11Wene ’balegeitik, is aphwami ebano enesa’go weriselat, disogo mo’gulentesi,
“At Allah en eselat e,
An nowi werik a’ge yu paget is aphwami en ogulat e,
Di aphwami yu aphwami ena’gul onuk lo’bok se’ban ogulomma o, oluk ogu lema ani o,
egei a’ge pelal wogo oruak ano erlak no? Asogo oluk pelal wogo oruak a’geat de, his en e, is ap aphwami ena’ge ene’gik abusak delogo horlogwi a’ge onowi ’gela’ge wusogo pogu legep yema re!” oluk ene’gerli wusogo enesa’go weregei. 18Enesa’go worugumu, is ap Allah eiye a’ge onuelak ’gaindek emin, Allah iak pelal wogo eiye a’ge emin en wene ano enesa’go hweligisarik e, Yesus woruogoluk obok ’baligisa. Obok ’baligisa ai re, Yesus en wene mo’gulentasukhwe aphwami esanat at iak hwelak poluk erliktogu legesa ai en, at ebe onogorlok egesarik e, woruogoluk tigisa ai o. 19Asogo ogukhwe, o arat hup agama re, Yesus osi enemin o Yerusalem en liplau wegesa.
Yesus en e ara ebam elitsogo mo’gulentesi wene
(Matius 21:20-22)
20Yesus osilak enemin asogo liplau wegesarik nogoluk loruk o’gwe huberat togolik e ara ano edip hegit ’gugulat e, enil ’gwelakhegesa ’gal e, eme’en emin modok ’buk agama hegesa. 21Hegesarik, Yesus en e ara mo’gulesi a’ge ano, at Petrus ede eberegeitik e, disogo mo’gulesi,
“Nue. E ara heman pegen ano arat ’buk agama yu hil hemen o,” oluk mo’gulesimu, 22at Yesus en e, is ebano disogo mo’gulentesi,
“His e, henede Allah pam he’berik wolomup o. 23#Mat. 17:20; 1Kor. 13:2Ap sa en ede wenemennei yat horok eberak erlak, we,
An ik a’ge yu hegitsogoat ema, oluk ede Allah ebam he’berik poluk,
Dom yu henokho ik laut omugwema ’golokho lak o, oluk oso holuk e, at ua a’ge hegitsogoat Allah en tua o, oluk demat mo’gulhentegis. 24Asogo tiso ai en e, his en di a’ge yu a’ge Allah ’gonu mo’gulogulat, henede en,
Arat woknesi, oluk epagup holuk e, wokhontouwayat ani o, oluk mo’gulhentegis o. 25#Mat. 6:14,15Ye, his en inotluk se’ban ogulat e, wiak tigep a’ge nenaik Allah ’bogorl pam a’ge en erlagapsogo ukpou wagoluk, aphwami en his wiagap henebegesa a’ge his en wene e’gen enebam poluk welegep holuk e, ai erlagapsogo ukpomup o. [ 26Asogo a’geat de, his en wene e’gen enebam poluk welegep a’ge ai erlagapsogo ukpogwi erlak honogola wiak welegep holuk e, his wiak tigep a’ge ai nenaik Allah ’bogorl pam a’ge en erlagapsogo ukpouwa erlagat o,”] oluk mo’gulentesi.
“Yesus, hat e, no a’ge eiye egentik taga legen,” oluk emdema wegesa wene
(Matius 21:23-27; Lukas 20:1-8)
27At Yesus en wene asogo mo’gulontoluk e, pobuk o Yerusalem ’gwigisa. ’Gwigisarik e, at Yesus Allah owi werikmu ano o seli’gwe lak-wak osoma re, is ap Allah eiye a’ge onuelak ’gaindek ebano emin, Allah iak pelal wogo eiye a’ge ebano emin, enarluedek ebano emin, enemin e’bek wegesa. 28Wegesarik e, disogo mo’gulegisa,
“Hat no a’ge eiye egentik, di tagalat, yu tagalat, tise legen. Ye, ap sa en,
Disogo taga lemen, oluk eiye welemagoluk edikhebesimu taga legen,” oluk mo’gulegisema, 29at Yesus en e,
“An ogo logon hin wokhentaigat o. Hin waikmu his en se’geksogo mo’gulnorogup holuk e, an en ogo re, ai a’ge eiye egirik taga legi o, oluk, ’baksogo mo’gulhentaigat o. 30Holuk e, at Yohanes en aphwami ik olomu ’belabenebise laga a’ge ano re, Allah ’bogorl pam a’ge en mo’gulesimu ’belabenebise laga ya? At e, aphwami ’gwiang a’ge en mo’gulegisema ’belabenebise laga ya. Mo’gulnemis da!” oluk mo’gulentesimu, 31is-is en nak ogulat e, disogo egesa,
“Nis en e, Allah ’bogorl pam a’ge en mo’gulesimu ’belabenebise laga, oluk mo’gulomma re, at en e,
Holuk e, his en Yohanes iak demat oluk eberak erlak welegep ai nopaget, oluk nis mo’gulnontouwano,” oluk egesarik e, 32is aphwami ’berlek en,
“Yohanes ai Allah iagat mo’gulnentasu laga o,” oluk ebe pobi togu legesarikmu no oluk e, aphwami onogorlok en disogo egesa,
“Nis en e,
Aphwami en mo’gulegisema ’belabenebise laga, oluk mo’gulummu re, miayat o,” oluk egesarik e, 33pobuk Yesus disogo mo’gulegisa,
“Wene ai nis neneperlak o,” oluk mo’gulegisema, at Yesus en e, disogo mo’gulentesi,
“Holuk e, an en ogo re,
Ai a’ge eiye egirik taga legi, oluk his mo’gulhentaik erlagat o,” oluk mo’gulentesi.
Currently Selected:
Markus 11: Wul
Highlight
Copy
Compare
Share
Want to have your highlights saved across all your devices? Sign up or sign in
