Markus 13
13
“Allah owi werik ai aphwami muon en modok moluktua ani o,” oluk mo’gulentesi wene
(Matius 24:1-2; Lukas 21:5-6)
1Wene asogo mo’gulentesirik e, at Yesus Allah owi werikmu en libagama, at osi iak wogu legesa a’ge ebano mesik en e, disogo mo’gulesi,
“Eige! Nue, nogorlok e. O helep op a’ge pam o op modok werik etleba yethemen!” oluk erliktegei. 2Erliktegeimu, at Yesus en e, disogo mo’gulesi,
“O lok werik etleba yethasu legen a? Helep pam louk-louk werik a’ge etleba mesik ukpouwa erlak modok moluksogo hwikhai louwa ani o,” oluk mo’gulesi.
“Naduk naduk disogo wiagaphonobua ani o,”
oluk mo’gulentesi wene
(Matius 24:3-14; Lukas 21:7-19)
3Wene asogo mo’gulentasu lagarik e, at Yesus Allah owi werik yu akhit ukpoluk e, etle akhit Zaitun duk pam ligegesarik Allah owi werik a’ge hegit yetharok welat enebe huregesa. Huregesarik e, Petrus o, Yakobus o, Yohanes o, Andreas o, Yesus emin enemategat welat, at ebam wene mesik hin wegesa. 4Hin wogulat e, disogo mo’gulegisa,
“Nue. Wene mo’gulnentigen ano re, metnerlige en de ema. Ebe tigoluk tagokhwe, ’ge a’ge naduk tagokhwe nis nenede we’gerlema epegen. Wene dokhumsogo mo’gulnentemen da,” oluk hin wegesa. 5Hin wegesema, at Yesus en e, disogo mo’gulentesi,
“Aphwami en lalhonobuano oluk e, henebabut heberlogo welemis o. 6Aphwami enebe a’bik en ononuk an nonuk a’ge tualogo re, disogo il wema ani o,
At wema egesa ano an nebe wegi yuat o, oluk eniak demat ’gela’ge aphwami a’bigat lalenebil wema o. 7Asogo til wagaihwe, weim horogat obugukhwe eniak henesa’go holugulat, walekma obogukhwe onobok holugulat, tugulat e, henede o’borlogouk ogup o. Asogo ema a’geat de, o ologun pam ema a’ge ai owanat o. 8Di aphwami yu aphwami ena’gul onuk lo’bok weim ’gagalugulat, ap onuk logo a’ge onosi eneragam a’ge lo’bok weim ’gagalugulat, tua ani o. Weim ’gagalogukhwe re, di owi yu owi mouk erlanghasulat, so’boru obuk agalat, tua a’geat de, ai re, hwami enemalik dagonobuogoluk ono’borl serlem togwi ai ’gela’ge, naduk-naduk hagup e, aiat o. 9#Mat. 10:17-20; Luk. 12:11,12Asogo hogulat, his e, henebabut heberlogo welemis o. Aphwami nin pema en e, hene’gik herle wusogo ap ’gaindek en henemdema wouwagoluk ene’bek wokhonoboluk lagalat, o aphwami Yahudi a’ge se’ban ogumu eba en ’go’bu wathonobogulat, tua o. Asogo tuarik e,
Is yu re, Yesus osiat o, oluk, is ap pemerintah a’ge ’gaindek emin, ononuk logo a’ge emin, wene henebam pou wagoluk onlogotma edikhonobouema, ai erlige panoasuak, an tagokhwe henil niogu legep a’ge ’baksogo mo’gulontomup o. 10A’ge re, wene op wene yu, di ap yu ap ena’gul onuk lo’bok mo’gulentil lagup holuk e, o ologun pam arat ema o. 11His hene’gik herle wusogo wene enebam pogulat, no’gorlogulat, tugumu eba wokhonoboluk louema his en e,
An en wene o’go no’gosogo ik, oluk henede porogup o. Wene o’go his en honogola ’gagalogo ogup puk. We, Allah Arogun enat,
Disogo ip o, oluk ai erlige mo’gulhontouwa a’geat mo’gulontomup o. 12Ye, are mesik en e, u’gwarek are woruagoluk woluk lasulat, aik en e, omlogo woruagoluk woluk lasulat, enemalik en e, enaiklak enialak enebirabonoboluk, waronobuagoluk onobok ’balugulat, tua ani o. 13#Mat. 10:22Ye, aphwami ’berlek enat an nonuk oluk,
His e, at osi o, oluk henebe enebit modogat hontouwa o. A’geat de, sa en epe mosogo welema holuk e, o ologun pam Allah en agap delua ani o,” oluk mo’gulentesi.
“Pobuk ologun pam wik-wiaksogo hagup ani o,” oluk mo’gulentesi wene
(Matius 24:15-28; Lukas 21:20-24)
14 #
Dan. 9:27; 11:31; 12:11 Wene asogo mo’gulentesirik e, mesik disogo mo’gulentesi,
“His en pelal wogo yu re, onuk mo’gulugulat e, opsogo pobi togu lomup o. Aphwami en enemelmel a’ge togwiam ogoiyesogo ’bogolua a’ge o wolom erlakma inago holuk e, aphwami o Yudea do’go a’ge eba hweiye dom petne ligemak o. 15#Luk. 17:31Hweiye ligomogoluk holuk, aphwami pema o dum pam ligotluk welemarik, togolik ’bu emarik e, ena’ge di a’ge yu a’ge o pam oruak a’ge hwerla ’gu erlakma en ’bekhirat ligemak o. 16Ye, is pema yabuk o’gwe en, so’boru e’gela’gwe en, togolik olema onosum wa ’gwilo erlakma en hweiye ’bekhirat ligemak o. 17Asogo ligagalat, is hwami enemalik onogola a’ge emin, enemalik ’get dogo a’ge enagamu wogontogwi a’ge ai emin, wiaksogo houwa ai, eige! Nede e. 18His hweiye ligorogup ai, o moru wiak a’ge pam lagup no oluk, se’ban ogu lemis o. 19#Dan. 12:1; Wah. 7:14O ai erlige wiagat ema ai re, naduk Allah en di a’ge yu a’ge walhesi ai hwerli en ’bekhit, o yogodak ya hwerli re, wiak lok ai ’gela’ge mesik om erlak a’ge, mesik erlige aiat emarik pobuk mesik ema modok erlak o. 20Wiak ema ai, nenaik Allah ’gain Onuk Logo a’ge en e,
Hwerli yu hwerli arat o, oluk u erlakma en mo elipmu re, aphwami ’berlegat perlengsogo delonobu erlakma en wiagat enebelip o. A’ge re, aphwami Allah en poligenebesi a’ge is enebaget nak e,
Yogo. Wiak ano arat hegep o, oluk hwerli pouwa oruak o. 21Ye, wiak asogo tagokhwe, is pema en e,
Kristus ano yu waga yu hemit, ogulat, is pema en e,
Kristus ano etle waga etle yethemit, ogulat, ogwiam his honogola en e, demat oluk epagup o. 22Is aphwami pema enepenenat ogulat e,
Kristus ano nebe anat o, ogulat, ye, is nin pema en e,
Allah iak mo’gulhentasu a’ge anat o, ogulat, il wema o. Wemarik e,
Aphwami Allah en poligenebesi a’ge ebano lalonobua hwi a? Erlak hwi a, oluk lalonobuogoluk e, eniak demat opou wagoluk elalin tu puk a’ge til wema ani o. 23Wene ai owan tu erlak oruakhwe hwese’bi naduk mo’gulhentegis ai henebabut heberlogo welemis o,” oluk mo’gulentesi.
“An abat daklau wegi ano, pobuk weigoluk tagokhwe, disogo ema,” oluk mo’gulentesi wene
(Matius 24:29-31; Lukas 21:25-28)
24 #
Yes. 13:10; Yoe. 2:10,31; 3:15; Wah. 6:12; Yes. 13:10; Yeh. 32:7 At Yesus en asogo mo’gulentesirik e, mesik disogo mo’gulentesi,
“Wiak lok houwa ai holukmu en pobuk e,
o mo hik eselat, dugwi yoru erlakma en mo eselat,
25 #
Yes. 34:4; Wah. 6:13; Yoe. 2:10 hwesagal ’bogorl pam en lologo ’bu agalat,
is ’bogorl pam enanni a’bik welagai a’ge ebano Allah en ono’borlogouk hasulat, tua o.
26 #
Dan. 7:13; Wah. 1:7 Ai erlige re, an abat daklau wegi ano nannisogoat o hena ogola ’bu agokhwe re, aphwami enil nioluk, a’bigat erliknobua o. 27’Bu agalat e, is malaikat Allah en yo’go peragonobou wago a’ge ebano, aphwami Allah en poligenebesi a’ge o orogobu akhit en, erabu akhit en, etleba’gwe en, yema’gwe en, welagai a’ge odogonobuagoluk, yo’go ’bogorl edip-edip o di owi yu owi eba peragonobouwa o,” oluk mo’gulentesi.
Wene e ara pam elitsogo mo’gulentesi wene
(Matius 24:32-35; Lukas 21:29-33)
28At Yesus en wene asogo mo’gulentesirik e, mesik disogo mo’gulentesi,
“Wene yu e ara pam elitsogo mo’gulhentaik a’ge yu pobi tit o. E ara ai e’gela lologo ’biselat e, pobuk esemis ’baktagalat, erlit sebeliselat, tisokhwe re, henil holuk honogola en e,
Yogo. O arat hebi ema hegi, oluk henede pobi togu legep ai ’gela’ge,
29Disogo tua ani, oluk mo’gulhentegis ano ebe tisokhwe, henil holuk e,
Yogo. O ologun pam ema ano arat horok lau waga hegi, oluk henede opomup o. 30Disogo ema, asogo ema, oluk mo’gulhentegis ai, aphwami o yogodak ya oruak a’ge enebe logon erlak om erlak owan oruakhweat, ebe ’berlegat ema ani o, oluk demat mo’gulhentegis. 31’Bogorl emin, ’gwiang emin, ai erlak ema a’geat de, an niak ai re, erlak ema modok erlak o,” oluk mo’gulentesi.
“Metnerlige en ema nis ’berlegat neneperlak ai en, henebabut heberlogo welemis,”
oluk mo’gulentesi wene
(Matius 24:36-44)
32 #
Mat. 24:36
At Yesus en asogo mo’gulentesirik wene mesik disogo mo’gulentesi,
“Ema ai, o ai erlige, jam ai pam ema oluk, nis aphwami ’berlegat neneperlak nak o. Ye, is malaikat Allah en ’bogorl pam en yo’go ’belagonobou ago a’ge ebano eneperlagat. Ye, an nebe at Allah omlogo a’geat de, an ogo neperlagat o. We, an naik emategat aluk o. 33Metnerlige en ema his heneperlagat welegep ai en e, henebabut heberlogo ’gagalak welemis o. 34#Luk. 12:36-38Wene yu emin hegit e, ap mesik owi pam en o walekma laigoluk e, eragam a’ge owi pekharok welemagoluk onoboluk lasu. Laigoluk, eragam a’ge ebano eniabuk lo’bok so’busogo wogentasulat e,
Hat mesik e, yu taga lomup.
Hat mesik e, yu taga lomup.
Hat mesik en e, nowi ’godukmu ’gagalak welegen a’ge yu, hil opsogo wolomup o, oluk so’busogo wogontoluk lasu ’gela’geat o. 35Ai ’gela’ge, his henil opsogo wolomup o, oluk mo’gulhentegis ai, honue ’gain Onuk Logo a’ge owi eiye a’ge ano togolik wema ai metnerlige wema. O sebek iogoluk tagokhwe wema ya? Hup ede ’burl wema ya. Sue iak naduk a’ge osokhwe wema ya? O dakha uema wema ya. His heneperlak. 36O eria pam wema oluk heneperlak ai en e, wongat nogogukhwe hentauma no oluk e, 37henebabut heberlogo wolomup o, oluk his mo’gulhentegis yu re, aphwami enebe ’berlegat enemin mo’gulhentegis o,” oluk mo’gulentesi.
Currently Selected:
Markus 13: Wul
Highlight
Copy
Compare
Share
Want to have your highlights saved across all your devices? Sign up or sign in
