Markus 10
10
“Ap en hwami wogo a’ge emin, hwami en ap wogo a’ge emin, ugonobo modok erlak o,”
oluk mo’gulentesi wene
(Matius 19:1-12; Lukas 16:18)
1At Yesus en wene asogo mo’gulentesirik e, o eba ukpoluk, o Yudea ’bi lagarik, ik Yordan etle akhit libaga. Libagama re, aphwami esanat pobuk at e’bek odoktu wegesema re, wene nin hwedik nan hwedik mo’gulentasu laga ’gela’geat mo’gulentesi. 2Mo’gulentasumu re, ap Farisi a’ge pema Yesus e’bek wegesa. Wegesarik e, disogo mo’gulegisa.
“Yesus. Ap en e, hwami wogo a’ge lologo ugonobo elit a? Mia ya,” oluk ebabut ’baluogoluk hin wegesa. 3Hin asogo wegesema, at Yesus en e, disogo mo’gulentesi,
“At Musa en e, wene no’gosogo henesa’go weregei no,” oluk egeimu, 4#Ula. 24:1-4; Mat. 5:31is en e, disogo mo’gulegisa,
“At Musa en, wene nenesa’go weriselat e, disogo mo’gulentesi,
Ap mesik en hwami wogo a’ge ukpaigoluk holuk e,
Hwe yu ebe nebit o. Arat ukhebegi o, oluk pelal wokho wogotluk en de, elirat ukpo yo,
oluk mo’gulentesi,” oluk Yesus mo’gulegisa. 5Asogo mo’gulegisema, at Yesus en e, disogo mo’gulentesi,
“At Musa en,
Asogo elirat tugulom o, oluk, enesa’go wusogo pelal wesi ai re, his henede modok ’buk welat mo’gulhontogwiam henesa’go holu modok mia ai en, ai enat mo’gulentesi o. 6#Kej. 1:27; 5:2Asogo mo’gulentesi a’geat de, edip pam Allah en aphwami walentesi ai paget e, pelal disogo oluk wogo oruak o,
Ap walhasulat, hwe walhasulat, walentesi o.
7 #
Kej. 2:24
Ai en, ap en e, aik ia ukpoluk ugwe emin obat welat e,
8is ai, enebe ’birenat a’geat de, mesik nagat otluk welemak o,
oluk egeimu pelal wogo oruak ai en e, pobuk is ai enebe ’biren puk. Mesik nagat egesarik oruak o. 9At Allah enat asogo e’birek dipsogo enebesirikmu re, is aphwami onu’gwarek en dedelu re, modok erlak o,” oluk mo’gulentesi. 10Asogo mo’gulentesirik e, at osi iak wogu legesa a’ge ebano emin olema ’gwi legesarik e, Yesus ebam hin wogulat disogo mo’gulegisa,
“Wene mo’gulentigen ai re, ebe no’gosogo oluk. Se’geksogo ai mo’gulnentemen o,” oluk ebam hin wegesa. 11#Mat. 5:32; 1Kor. 7:10,11Hin wegesema, at Yesus en, disogo mo’gulentesi,
“Ap sa en, ugwe wogo a’ge lologo ukpoluk e, hwe mu a’ge wasu holuk e, ugwe naduk a’ge ai il salogo, ugwe pobuk a’ge e’birek ’babiat tua o. 12Ye, is hwami sa en onogunlak wogo a’ge ukpoluk ap mu a’ge mesik wogenebi lasu holuk e, ’babiat tegeirik oruak o,” oluk mo’gulentesi.
“Malik wei a’ge ai ne’bek wemak o,”
oluk mo’gulentesi wene
(Matius 19:13-15; Lukas 18:15-17)
13At Yesus en, wene asogo mo’gulentesirik oruakma, is aphwami pema en malik wei a’ge Yesus en e’gik tenontouwagoluk e’bek wogonoboluk wegesa. Wegesema re, at osi iak wogu legesa a’ge ebano en e, wene yagentigisa. 14Asogo wene yagentigisema, at Yesus en il ontoluk olot het agarik e, disogo mo’gulentesi,
“Aphwami enebabut is malik eba enebabut ai ’gela’ge takpouwa holuk e, Allah en eragam enebasumu eba eiye ema ai en e, malik wei a’ge eba an ne’bek wemak o. Wene ’balogup o. 15#Mat. 18:3Sa en, malik wei a’ge Allah en eragam enebasu wene ai wik-wok ’gwi lagai ai ’gela’ge ’gwi lagai erlak holuk e, ’gwi louwa modok erlak o, oluk demat mo’gulhentegis o,” oluk mo’gulentesi. 16Asogo mo’gulentesirik e, malik wei a’ge ebano enebe lo’bok agaimu wogenebegeitik e, e’gik ena’gul sebelogo, aphwami en enede aganhan enebam pogwi ai ’gela’ge, at en e,
“Allah en obaphenebise lemak o,” oluk wogenebegeitik mo’gulentil laga.
Ap mesik a’ge a’bik a’ge en, Yesus e’bek
waga wene
(Matius 19:16-30; Lukas 18:18-30)
17Wene asogo mo’gulentesirik e, at Yesus o eba en e, ebela ’bekhit laigoluk lasumu, ap mesik pungtagat e’bek waga. Wagarik odogorlu pam huragarik e, disogo mo’gulesi,
“Guru nue. Wene mo’gulnentasu legen ai, hat obat o. An noburlal-hoburlal taknobouwak en e, an nebabut no’gosogo taga leik o,” oluk mo’gulesimu, 18at Yesus en e, disogo mo’gulesi,
“Hat op o, oluk mo’gulnigen ai re, no oluk en mo’gulnigen. At mesik op e, erlak o. We, nenaik Allah ematek nak e, op o. 19#Kel. 20:12-16; Ula. 5:16-20Wene at en,
Disogo tip, asogo tip, oluk nenesa’go weriselat, disogo egeimu oruak o,
Aphwami enebe waronobogup o.
’Babi tenentagup o.
Yogorlia wagup o.
Henepenenat onobok ’balogup o.
Lalonobogup o.
Henaik henia eniak hologo hau do’goksogo waronobogu lomup o,
oluk nenesa’go weregei wene ano hat halugat o,” oluk mo’gulesimu, 20at en e, disogo mo’gulesi,
“Nue. Wene mo’gulnigen ai, ’berlegat e, an nebe malik wei a’ge pam enat nesa’go hwelak poluk hegitsogo taga legi a’geat o,” oluk mo’gulesimu, 21at Yesus il ebam poluk ede agarik e, disogo mo’gulesi,
“Hat e, wene mesik nak tu erlak welegen o. Hat yema en laguntik e, ha’ge di a’ge yu a’ge ebano ’berlegat is pema enebam o’go ’bali lu o. O’go ’baloguntik e, o’go wokhema a’ge ai, is aphwami pema ena’ge erlak a’ge enerlagaik a’ge ai so’busogo wogontomup o. Asogo wogentagun holuk e, hat ’bogorl pam a’ge logat eiye takhobouwa o. Holuk e, asogo arat so’busogo wogontoluk e, an ne’berlik no’gulomok en manup,” oluk mo’gulesimu, 22wene ai esa’go hwelegeitik e, a’ge modok a’bikmu no oluk e, orogole orlouksogo welagarik e, ogola wiak agarik laga. 23Lagama, at Yesus en e, osi iak wogu legesa a’ge ebano il yerentil lagarik e, disogo mo’gulentesi,
“Aphwami ena’ge a’bik a’ge Allah en eragam enebasumu eba no’gosogo ’gwilo ’gela’geat o,” oluk mo’gulentesimu re, 24wene mo’gulentesi ai pam onogorlok a’bik egesa. Onogorlok a’bik egesema, at Yesus en pobuk disogo mo’gulentesi,
“Nosi. Allah en eragam enebasumu eba re, no’gosogo ’gwi lo ’gela’geat ani o. 25Wam unta ebe lok a’geat de, hin ele lo’gwe ’gwelabumu re, elit sollongsogo ’gwilo a’geat de, is aphwami ena’ge a’bik a’ge ai Allah en eragam enebasumu eba no’gosogo ’gwilo yo. Modok mia o,” oluk mo’gulentesi. 26Asogo mo’gulentesimu, is onogorlok a’bik egesarik, is-is nak ogulat e, disogo egesa,
“Holuk e, Allah en aphwami salak ’gela’ge nak e, elit delonobu hwe,” oluk egesa. 27Asogo egesema, at Yesus il enebam pesirik e, disogo mo’gulentesi,
“Aphwami en tu re, modok mia a’geat de, at Allah en tu re, mia puk. At en di a’ge yu a’ge tu re, elit nak o,” oluk mo’gulentesi. 28Asogo mo’gulentesimu at Petrus en e, disogo mo’gulesi,
“A’ge re, nis hat he’berlik no’gu lomogoluk di a’ge yu a’ge ’berlegat ukpoluk wegerik hemin no’gu lege a’ge yu nak e,
no’gorak no,” oluk mo’gulesimu, 29at Yesus en e, disogo mo’gulesi,
“Niak demat mo’gulhentaik o. Ap sa en, an ede en, wene op wene yu agai en, owi werik emin, ue ari emin, orokhwi emin, aik ia emin, eiyagai emin, iabuk siok emin, ukpoluk wago holuk e, 30ai ebe lo’bok ebalema re, yogodak ya owi werik emin, arilak emin, orokhwi emin, ia emin, eiyagai emin, iabuk siok emin, a’bigat 100 ’gela’ge wogosokhwe re, aphwami en wiagap pogu lemayat o. Wiagap pogwi oruakma, pobuk o ologun pam tua ai erlige tago holuk e, noburlal-hoburlal wogema o. 31#Mat. 20:16; Luk. 13:30Asogo a’geat de, is aphwami o yogodak ononuk oruak a’ge a’bigat e, pobuk ononuk erlak ema o. Ye, is pema yogodak ononuk erlak oruak a’ge ai, ononuk oruak ema o,” oluk mo’gulentesi.
“An watnobua o,” oluk e’gik ’birenam mo’gulentesirik en, pobuk henaganak a’ge mo’gulentesi wene
(Matius 20:17-19; Lukas 18:31-34)
32Pobuk e, at Yesus en asogo mo’gulontoluk e, osi iak wogu legesa a’ge emin o Yerusalem ’bi louwogoluk, ebela’gwe ’bugulat e, at Yesus ebela naduk lasumu, at osi ebano onogorlok agarik e, erliktigisa. Ye, is aphwami pema ogo ene’berlik ’bugulat onogorlok egesayat. Asogo onogorlok egesarik, ’bigisa ’bigisa is ap enebe 12 ebano enematekma ’geksogo wogonoboluk ’biselat e, at en e, disogo mo’gulentesi,
“An pobuk disogo taknobogulat, asogo taknobogulat, tua ani o,” oluk mo’gulentil ’bi laga. 33Asogo mo’gulentasulat e, disogo mo’gulentesi,
“Nosi o. Nis yogodak o Yerusalem ’bugu lege o. Arat ’bilulmu en e, an abat daklau wegi ano re, ap en yo’go louwarik, an nebe is ap Allah eiye a’ge onuelak ’gaindek emin, Allah iak pelal wogo eiye a’ge emin, ene’gik pam nobouema ap logon en watnobuagoluk wene nebam poluk e, is en is ap o’borl o’gwe a’ge ene’gik pam nobouwa o. 34Asogo nobouema re, is en eniak esegen yaknogulat, was nebam pogulat, ’go’bu lagal’bisok watnobugulat, tuarik e, nebe arat watnobua o. Watnobuema e, agauwa ’biren werak weleiktik en, henaganak a’ge en nelaluk eik ani o,” oluk mo’gulentesi.
Yakobus Yohanes e’birek Yesus
ebam mesik ’gonu mo’gulegisa wene
(Matius 20:20-28)
35Yesus en wene asogo mo’gulentesirik oruakma re, ap Zebedeus eiyagai Yakobus Yohanes e’birek Yesus e’bek horoksogo wegesarik e, disogo mo’gulegisa,
“Nue. Nis en mesik ’gonu mo’gulhomulmu re, hat en taknenebanogoluk he’bek wege o,” oluk mo’gulegisa. 36Asogo mo’gulegisema, at en e, disogo mo’gulentesi,
“An en no’gosogo takhonobouwagoluk henagai en wegep,” oluk mo’gulentesimu, 37is en e, disogo mo’gulentigisa,
“Hat pobuk ’gain Honuk Logo a’ge oroguntik tagoma, aphwami en erlikhobogu lema ai erlige re, nenemin ’gainat wolomul en e, nis mesik he’gik ’bekhit akhit, ye, mesik he’gik hware akhit, welemagoluk ediknenebanogoluk wege o,” oluk mo’gulegisema, 38#Luk. 12:50at en e, disogo mo’gulentesi,
“’Gonu mo’gulnigep ai re, wene ebe heneperlak welat mo’gulnigep o. An di obotut yu obotut taknobouwa ai re, his asogo takhonobo elit epegep?” u ’gela’ge re,
“An negeik ne’gak naik ai re, his elirat no epegep? Ye, ik olomu ’belabonobogwi ’gela’ge ’belapnobua ai re, his elirat ’belaphonobu epegep?” oluk ebam elitsogo mo’gulentesimu, 39is en e,
“Elit noat o,” oluk mo’gulegisema, at en e, disogo mo’gulentesi,
“An di obotut yu obotut taknobouwa ai ’gela’ge, his asogoat takhonobouwa o. Ye, ik olomu ’belabonobogwi ’gela’ge, an ’belapnobua ai re, his asogoat ’belaphonobuayat o. 40A’geat de, hat mesik en an ne’gik ’bekhit akhit, ye, hat mesik en ne’gik hware akhit nemin ’gainat wolomogoluk, an en edikhonobo re, mia o. We, pageat Allah ogola en e,
Is welemagoluk pulogo enebesi a’geat onobouwa o, oluk epesi a’ge ai oruak ani o,” oluk mo’gulentesi. 41Asogo mo’gulentesimu re, at Yesus osi iak wogu legesa a’ge ebano pema akhit enebe 10 enesa’go hweligisarik e, onolot het Yakobus Yohanes e’birek enebam pegesa. 42#Luk. 22:25,26Onolot het asogo enebam pegesema re, at Yesus en enebe ’berlegat odoktuagoluk worlentesimu odoktigisema disogo mo’gulentesi,
“Nosi. Is aphwami o’borlma a’ge onuelak pemerintah a’ge en,
Honuelak ’gaindek e, nisat o, oluk, mep lik-lagaksogo tagonobogulat, ye, is ap ’gaindek ai en, set e’gin-pe’ginsogo mo’gulontogulat, togwi ai henaluk. 43-45#Mat. 23:11; Mrk. 9:35; Luk. 22:26A’ge re, his en is togwi ai ’gela’ge asogo tugulom modok erlak o. An abat daklau wegi ano re, his aphwami en an neragam a’ge wolorogup en wegi erlak o. A’geat de, an his heneragam a’ge welat his henebe herle hettak ’gela’ge welegep a’ge ai henebe esanat herle hebilhenebigoluk anat watnobuagoluk wegi ai o. Ai en e, his agaikhen ap sa en,
An onue ’gainat eik o, oluk epasu holuk e, honorat emak o. Ye, his agaikhen ap sa en,
An nonuk logoat eik o, oluk epasu holuk e, at ebe his ’berlegat heneragam a’geat emak o,” oluk mo’gulentesi.
Bartimeus il hopnik a’ge obaptegei wene
(Matius 20:29-34; Lukas 18:35-43)
46At Yesus ebe emin, osi iak wogu legesa a’ge ebano emin, wene asogo il-il ’bi lagalat, o Yerikho seli eragam o’gwe ’bi legesarik e, ukpoluk libagaimu re, aphwami enebe pema esanat ene’berlik libegesa. Libagaimu re, ap Timeus omlogo onuk Bartimeus il hopnik a’ge di a’ge yu a’ge emde ’gonu wiak ese laga a’ge ai ebela pam hweriogo oruakma libegesa. 47Libegesema aphwami en e,
“Yesus owi o Nazaret a’ge ano wago yo,” oluk egesema re, at ap ano esa’go hwelegeitik e, iak loksogo Yesus disogo mo’gulesi,
“Yesus Daud en dogo’gwe a’ge nue a! Hede niemen a,” oluk mo’gulesimu, 48is aphwami esan ebano en e,
“Hiak o,” oluk wene yagegisa a’geat de, pobuk ebenagaikmu at iak loksogoat disogo mo’gulesi,
“Daud en dogo’gwe a’ge nue a! Hede niemenat a,” oluk mo’gulesimu, 49at Yesus ebe eriano inagarik e, aphwami ebano disogo mo’gulentesi,
“Ap ai wemagoluk worlhemit o,” oluk mo’gulentesimu, is en e, worlhugulat e, disogo egesa,
“Yesus en worlhiasu ai re, hogola hagai haguntik inemen o,” oluk mo’gulegisa. 50Asogo mo’gulegisema re, osum o’borloma ’buktak a’ge ano no’gorlogo ukpoluk e, uwarek perleneat inagarik e, Yesus e’bek waga. 51Wagama, at en e, disogo mo’gulesi,
“An en no’gosogo takhobouwagoluk mo’gulnigen,” oluk hin wesimu re, at ap il hopnik a’ge ano en e, disogo mo’gulesi,
“Nue. Nil obapnebinogoluk mo’gulhegis o,” oluk mo’gulesimu, 52at Yesus en e, disogo mo’gulesi,
“Hede nebam he’berigen ai en e, op e’gen o. Holuk e, lak o,” oluk mo’gulosokhwe erianoat, il hopnik a’ge ano op agarik e, Yesus ebela’gwe lasumu e’berlik eminat legesa.
Currently Selected:
Markus 10: Wul
Highlight
Copy
Compare
Share
Want to have your highlights saved across all your devices? Sign up or sign in
