Mikha 5
5
Allah en e, at eiyagai onue ’gain onuk logo a’ge en o o Betlehem a’ge wogentaigoluk wene warenebegei wene
1Nenaik ’gain Onuk Logo a’ge en e, disogo egei,
“His aphwami o Betlehem Efrata a’ge yu. O Yehuda yema di kota yu kota lok a’ge oruakhwe, his honowi pam kota Betlehem modok wei a’geat de, an en ap asu hene’balak page welegesa ai a’ge en aphwami Israel a’ge tenentarok welemagoluk mesik edikpaik ani o,” oluk egei.
2 #
Mat. 2:6; Yoh. 7:42 At Nenaik ’gain Onuk Logo a’ge en pobuk asogo tagenebaigoluk, yogodak ya lodu paget is eneselei a’ge en ene’gik pam tenentarok welemagoluk ugenebaikmu welema ai o. Asogo tenentarok oruakma en, hwerli ap ’gain Onuk Logo a’ge ai ia en dorua, oluk Allah en epesi a’ge hegitsogo arat dagago holuk, aphwami at a’gul onuk a’ge herle wusogo wogonoboluk legesa a’ge ai pobuk is aphwami Israel a’ge logon enebam la’buk lauma ani o. 3Ap ’gain Onuk Logo a’ge anni a’bik a’ge ai pobuk arat wago holuk e, nenaik Allah ’gain Onuk Logo a’ge erliktogwi a’ge ano anni pam at domba oluk esan a’ge tenentarok welema. Asogo tenentarok oruakma, aphwami ena’gul onuk lo’bok o di owi yu owi welagai a’ge en e,
At anni modok a’bik ai nogorlok o, oluk eniak ’baksogo ogu lema ai en e, at eiyagai opsogo lialogo welema o. 4-5At en aphwami opsogo lialogo welemagoluk tagonobouwa ani o.
Aphwami Israel a’ge enebe delenebiselat, wene enebam pasulat, tua wene
Ap tentara Asyur a’ge watnonobumarik, o yat ningsogo werik a’ge sebelo ’gu agaiam, nis nonuelak enanni a’bik a’ge is waronobuagoluk enebe elitsogo pulhegeik edigonobul o. Asogo edigonoboma is en e, nis nenebe is ap Asyur a’ge ene’gik pam en delnonoboluk, enesegen onua’gun pam is ap Asyur a’ge onowi pam eba mabenap onobua at o.
6 #
Kej. 10:8-11
Nenaik ’gain Onuk Logo a’ge en e, di a’ge yu a’ge yogoma lil a’bosu takpasulat, moru ’belakpou wagalat, tisoam op ago ai ’gela’ge, aphwami Israel a’ge ado logon enelaluk oruak a’ge ai, aphwami ena’gul onuk lo’bok ene’gerlak o’gwe welat, aphwami a’ge enebam he’berik wolom erlakma en, Allah pam he’berik oruakhwe, Allah en aphwami ai obap enebasu lema ani o.
7Aphwami Israel a’ge ado enelaluk oruak a’ge ai, aphwami ena’gul onuk lo’bok ene’gerlak o’gwe-ene’gerlak o’gwe eba welagai a’ge ai, enebe singa en e’gelema ’baik weriselat, olema domba weriselat, tago ai ’gela’ge togu lema. At singa ai en e, wam domba ebano oyuk en al ’besilogo ’bo pasulat, iak en lebil-lebalsogo nasulat, tisoma aphwami logon en emdema a’ge delu modok mia ago ai ’gela’geat o. 8Pobuk aphwami Israel a’ge en eneselei a’ge mabenap onoboluk enebe ’berlegat modok erlagap onobua ani o.
9Nenaik ’gain Onuk Logo a’ge en e, disogo egei,
“Eria hegit e, an en his honuam kuda ’berlegat erlagap pasulat, ’gwiangso ’gela’ge pam ligotluk weim obogu legep a’ge ai modok erlagap pasulat, tik ani o. 10Asogo erlagap pasulat, honowi kota da ya ’berlegat werik a’ge ai wiagapsogo ukpasulat, heneselei a’ge ’guma no oluk o yat a’ge pam werik a’ge ai moluksogo ’bo pasulat, tigat o. 11Asuagun en hwarl e’gen pam elalin togwi a’ge ai onohwarle’gen ai erlagap pasulat, is hin wok a’ge en,
Disogo ema, oluk ogwi a’ge ai enebe hene’gerlakma en lebigenebasulat, tik o. 12An en pobuk dogwi asua emin, aphwami-aphwami onogut heli’gogo poluk erliktogu legep a’ge ai emin, erlagap paik o. Asogo erlagap poma, his en e, hene’gik en heli’gogo poluk erliktogu legep a’ge ai pobuk erliktogu lorogup erlak o. 13His en honodogwi,
Nene’bia Asyera aiat o, oluk erliktogu legep a’ge ai moluksogo ’bo pasulat, honowi kota ’berlegat leget pakleget ningsogo werik a’ge, ai wiagapsogo ’bo pasulat, tik o. 14An nolot het modok egeimu re, aphwami ena’gul onuk lo’bok an niak hologo togwi erlak wiak togwi a’ge ai wiagap at enebik ani o,” oluk egei.
Currently Selected:
Mikha 5: Wul
Highlight
Copy
Compare
Share
Want to have your highlights saved across all your devices? Sign up or sign in
