Mikha 6
6
Nenaik ’gain Onuk Logo a’ge en e, “His wiak togu legep,” oluk aphwami Israel a’ge wene enebam pesi wene
1His aphwami Israel a’ge yu. Nenaik ’gain Onuk Logo a’ge en e, wene henebam pasu ai, henesa’go hwelip o. Naik ’gain Honuk Logo a’ge, naik. Hat en aphwami Israel a’ge wiak togwi ai en wene enebam paigoluk e’gen ai pemen o. Asogo enebam pasuam, dom lok a’ge wei a’ge hiak enesa’go holuak o.
2His dom emin, ’gwiang maben duelak a’ge emin, Nenaik ’gain Onuk Logo a’ge en e,
“His wiak togu legep,” oluk wene eiyagai enebam paigoluk oso ai iak henesa’go hwelip o. Allah en wene eiyagai Israel a’ge enebam paigoluk oso ai o. 3Nenaik ’gain Onuk Logo a’ge en wene asogo enebam pasulat, disogo oso yo,
“Neiyagai o. An en his no’gosogo takhenebegi no? Wene edip ’ge pam his wiagap henebegis no? Wene o’go mo’gulnemis o. 4#Kel. 4:10-16; 12:50-51; Kel. 15:20An en his hena’balak aphwami Mesir a’ge en eneragam a’ge ’gela’ge tenentarok oruakma, delenebegistik, Musa emin, Harun emin, hwe Miryam emin, enemin en wogonoboluk wemagoluk yo’go enebegi ai o. 5#Bil. 22:2–24:25; Yos. 3:1–4:19Neiyagai o. Aphwami Moab a’ge onue ’gain onuk Balak en hene’balak wiak emagoluk tagenebaigoluk egei a’ge, at ap Beor omlogo Bileam en o’go mo’gulesi a’ge ai henede eberak modok wolomup o. Ye, o Sitim o sum owi a’ge werikmu welegesarik en pobuk o Gilgal sum owi wosumogoluk ’burl eba wagalat, tigisa a’ge ai, henede eberak wolomup at o. Asogo eberak wolorogup holuk, an en delhenebigoluk taga legi a’ge ai pobi togup ani o,” oluk egei.
“Nenaik ’gain Onuk Logo a’ge en, agai e, no’gwe a’ge obo no?” oluk egei wene
6Nis en nondogorlu pam hurotluk e, Nenaik ’gain Onuk Logo a’ge paget tuogoluk e, no a’ge wogoum no? Allah paget wam sapi emalik op a’ge wusogo narlosuom no? 7Nis en wam domba modok a’bik di deng yu deng emin, minyak e zaitun e’gen a’bosu modok a’bik wenaru modok mia a’ge emin, at ebaget pogwiam at ede op om no? Nis wiak togu lege a’ge sagalogo ukpoluk erlagap pou wagoluk, nis neneiyagai naduk a’ge Allah ebaget wusogo wogoum no? 8Erlak o. At Nenaik ’gain Onuk Logo a’ge en nis op togulom a’ge paget mo’gulnentesi re, yu. Aphwami logon enebaget hegitsogo togulat, enebe enedeap onobogwi ai a’ge logap pogulat, nenede sebel horlogulat, nenaik Allah nenemin hwedik welat, togulom aiyat o.
Aphwami Israel wiak togwi o’go tagonobo wene
9“Is ap enede oruak a’ge nak welagai a’ge en at Allah onuk hologwi holuk e, onogorlok hogwimu re, at Allah en o kota ano mo’guloso a’ge ai henesa’go opsogo hologu lemis o. At Allah en o kota ano mo’guleselat, Hat wiak o’go takhebaik ’goluk, at wene’belak e’gikmu tenak oruak a’ge ano, perak pou wagama wagoma re, hede en pobirak pasu lomup o. 10O Kota wiak togumu hat yu o, is ap wiak a’ge en wiagap enebi lagalat, ena’ge-a’ge ene’gikmu a’ge o’go lok a’ge howi pam pagathwerlegesema oruak a’ge ebano eneperlagapsogo pasulat, ye kilo walhogwi a’ge sogoluak elit erlakhweat de, elit a’ga o, oluk, wogontogwi a’ge ano pam hweim ebam a’ge ano an en neperlagapsogo pasulat, tu op epegen a? 11Ap lalonobogwi a’ge en walhegeik helep wei-wei a’ge emin, woluk wotluk e’gin ebano emin hegit erlakhweat de, hegit aga o, oluk, ogwi a’ge ano togukhwe ugonobo op epegen a? 12Is ap ene’gikmu oruak a’ge o kota hat hemin welagai a’ge ebano eniak anni pam aphwami sebelak onoboluk ena’ge-a’ge wogulat, aphwami hat hemin welagai a’ge en, eniak esei a’ge nak il no’gulat, aphwami lalonobogulat, eniak esei nak il no’gulat, togumu re, 13An en hat wathebik oluk tagalat, hat wiak taga legen ai en ha’guluak erlagapsogo hebaik oluk, taga legi o. 14Hoso’boru nagunat a’geat de, hogum ago erlakma enat welat, so’boru nele en hede ’borok tago modok nak takhebasulat, tua o. Hat en di a’ge yu a’ge odoksogo agathwerlasu legen, a’ge ebano an en is wa’gun pangsogo wagai a’ge ebano wogentaikmu re, di a’ge yu a’ge odoksogo pagathwerlagun a’ge ebano ding-dengtak paik ani o. 15Hat en e’gen owi pelogun a’geat de, e’gen ’balhwerlasulat, e Zaitun e’gen a’bosu na’gogo Pagun a’geat de, togolik a’bosu hebam egelik pasulat. Anggur e’gen a’bosu na’gogun a’geat de a’bosu na’gogo nasulat, tu erlakma enat wolorogun ani o. 16#1Raj. 16:23-34; 21:25-26Hat en ap onuk logo a’ge Omri en wene le’gelogo Pesi a’ge ano motluk Lasulat, Ap, Ahab eiyagai weiyelak a’ge enebe ’berlegat en til laga legesa ano ’gela’geat til lasulat, Is en tul oluk pulogo pogwi a’ge ebano heneminat til lasulat, asogo tise legenma re, hebe erlagap hobogulat, hemalik en aha! Oluk, eidarak hobogulat, Di aphwami yu aphwami ’berlegat en mi-miarak hobogulat, tuak oluk, takhebaik o,” oluk, mo’gulhoso a’ge ebano hesa’go hwelise lomup o.
Currently Selected:
Mikha 6: Wul
Highlight
Copy
Compare
Share
Want to have your highlights saved across all your devices? Sign up or sign in
