Mikha 3
3
Mikha en e, “His wiak modok togu legep o,” oluk aphwami Israel a’ge onuelak ’gaindek ebano wene yagentesi wene
1His ap Yakub en dogo ’gwe a’ge Israel a’ge onuelak ’gaindek yu, logwe! An en wene ik a’ge ai henesa’go opsogo hwelip o. His en e, aphwami logon wene hegitsogo hwalonto henaluk a’geat de, 2hegitsogo togwi a’ge ai henebit modok welat e, wiak togwi a’ge ai henagai welegep ai o. His en e, aphwami asu an a’ge enebe enelaluk oruakhwe, lebil-dorluksogo waronobu ’gela’ge, wik-wiaksogo modok tagonobogu legep ai o. 3Enebe lebil-dorluksogo waronobogulat, onuak damuk-demaksogo waronobogulat, tu ’gela’ge wiagap onobogu legep ai o. His en is enebe wam se’gerlogo panci pam soruogoluk se’gerlogwi ai ’gela’ge tagonobogu legep ai o. 4His en e, Nenaik ’gain Onuk Logo a’ge mo’gulogulat,
“Naik, delnenebin o,” oluk heniak loksogo mo’gulogwiam, at en e, heniak esa’go holua a’geat de, o’go mo u a’ge oruagat o. His henebabut wiak modok togu legep ai en e, at ebe hisak ema ani o.
5Aphwami an na’gul onuk a’ge ap Allah iak mo’gulontogwi a’ge ’gela’ge eniak eseiat lalonobogulat, is logon en enemdema pogwi a’ge holuk,
“Pobuk op lai louwa,” oluk mo’gulontogulat, is logon enemdema pogwi erlak a’ge holuk, enemin wiak welat onogola mi-miarak onobogwi ai. Is ap Allah iak mo’gulontogwi a’ge ’gela’ge asogo mo’gulontogwi a’ge ai paget, Nenaik ’gain Onuk Logo a’ge en disogo egei,
6“His en asogo togu legep ai en, his henebaget o arat hik ua o. Asogo hik osoam, modok ’bin otluk e, an nogola epasu legi a’ge henabi ’gela’ge pam ho erlakma en modok mia agalat, ye, his henebabut dong-pong osoam henede we’gerlemagoluk di a’ge yu a’ge togu legep a’ge ’berlegat mia agalat, tua o,” oluk egei. 7Is ap logon wene pobuk om a’ge paget mo’gulontogwi a’ge ai emin, enebabut dong-pong osoam enede we’gerlemagoluk lu’gwa sorogwi ’gela’ge, di a’ge yu a’ge pam walhogwi a’ge ai emin, pobuk Allah en o’go mo’gulontouwa erlak ai en e, ene’gerli otluk onorogole ene’gik en orlomu tua o.
8Asogo a’geat de, an nak e, naik ’gain Onuk Logo a’ge en anni wokneselat, Arogun nogola ’betesogo pasulat, tegeimu welegi o. Asogo woknesirik, aphwami en is logon wene hegitsogo hwalontogulom a’ge paget mo’gulentasu lemagoluk, taknebasulat, aphwami Israel a’ge wiak togwi a’ge ai nogorlok erlaksogo wene yagentasu lemagoluk taknebasulat, tegeimu welegi o. 9His ap Israel a’ge onuelak ’gaindek yu. An niak ik a’ge henesa’go opsogo hwelip o. His e, aphwami logon wene hegitsogo hwalontogwi ai a’ge ukpoluk, hegitsogo togwi a’ge heniak agamsogo wiak togu legep ai o. 10His en e, o Yerusalem Allah u’gwarek owi kota woru ’gela’ge, aphwami enebe waronobogulat, aphwami wene hegitsogo hwalontogwi erlakma en, wiak-wiak hwalontogulat, togu legep ai o. 11His en e, aphwami wene hwalontouwogoluk o’go uang wokhontogwi holuk wene enebam a’ge hwalontogu legep ai o. Ye, his ap Allah eiye a’ge en ogo re, asogoat aphwami logon en,
“Allah iak mo’gulnentemit o,” oluk o’go ’balogwi holugat wene Allah en nenesa’go weregei wene ai mo’gulontogu legep ai o. Ye, his ap Allah iak ’gela’ge mo’gulontogu legep a’ge ogo re, aphwami logon en uang wokhontogwi holugat wene pobuk ema a’ge mo’gulontogu legep ai. His ’berlegat en e,
“Nenaik ’gain Onuk Logo a’ge ebam he’berik welege. At ebe nis nene’gerlakma oruakma re, nis modok wiak a’ge nenebam ema modok erlak o,” oluk ogu legep ai o.
12 #
Yer. 26:18
Asogo wiak modok togu legep ai en, o Sion yema yabuk wogwi ai ’gela’ge wogulat, o Yerusalem modok moluk-melaksogo ’bo pogulat, tua o. Asogo tuama, dom Nenaik ’gain Onuk Logo a’ge owi werikmu yema e a’bik ’baktua o.
Currently Selected:
Mikha 3: Wul
Highlight
Copy
Compare
Share
Want to have your highlights saved across all your devices? Sign up or sign in
