Mikha 2
2
Aphwami ena’ge erlak enerlagaik a’ge di obotut yu obotut tagenebasu a’ge ai, enebam ema wene
1Is aphwami logon, is logon wiagap onobouwogoluk, huba’go nogo nogogumu welat enede eberogulat, is asogo tu ebele enanni oruak ai en e, o dakha osoam ebetil lagai ai, eige! Nede e. Wiagap onobua o. 2Is en onogola asogo eberogulat, aphwami logon eniabuk a’ge enagai holuk, yabuk ai sebelogwi ai o. Ye, o werik enagai holuk, sebelogwiat ai o. Asogo ’goluk, enebe wiagap onobogulat, enaik enemining a’ge di a’ge yu a’ge ene’gik abusak horlogulat, togwiat ai o.
3Asogo togwi ai en, Nenaik ’gain Onuk Logo a’ge en disogo egei,
“An en modok wiak a’ge henebam perakpou weigoluk epegi o. Asogo perakpou wagoam his hweiye libom modok mia ema o. Holuk e, henebam arat perakpou weik holuk, his henebe hena’gul e’gen yat otluk no’gu lorogup modok erlak o. 4Eria hegit e, aphwami logon en eniak esegen wokhontogulat, weni e’gerlem pam eniak muk yagontogulat ogwi ai ’gela’ge, disogo ua,
Hat en e, nis wiagap nenebigen a’ge ano re,
nis nenaiklak enemining nis horlo a’ge ai,
elira’ge walsogo re, is logon hwerlegesa o.
Pobuk togolik wo mia ema o.
Nis neniabuk o’gwe a’ge nenselei a’ge so’burentigisa o,
oluk weni pam mo’gulontouwa o,” oluk egei.
5Asogo togu legep ai en e, Nenaik ’gain Onuk Logo a’ge en o eba togolik eiyagai wogontouwa a’ge lau wago holuk, is en enede we’gerlogo helep e’gen hwikhai lagalat, hwikhau wagalat, elira’ge walsogo,
“O eba hat eiye omup,” oluk his a’ge logon mo’gulhontouwa modok erlak o.
6Asogo ogwiam aphwami logon en an mo’gulnogulat e,
“Aphwami logon en wene asogo logon mo’gulontogwi modok erlak a’ge mo’gulnentasu legen o. Holuk e, hat en wene asogo mo’gulnosolom modok erlak o. Allah en nis nene’gerli emagoluk nis wiak nenebam pouwa erlak o. 7Nis aphwami Israel a’ge Nenaik ’gain Onuk Logo a’ge en heman nenebesimu welege no? At Allah en e, asogo tagenebasu no? Erlak o. At ebabut e, epe mosogo welago a’ge ai erlak ago no? Allah en e, aphwami hegitsogo togwi a’ge iak lioksogo mo’gulentasu erlak no? Lioksogo mo’gulentasu epegi o,” oluk mo’gulnogwi.
8Asogo egesema at Nenaik ’gain Onuk Logo a’ge en e,
“His enat an neiyagai enebe heneselei a’ge ’gela’ge takpoluk, waronobuogoluk togu legep o. An neiyagai a’ge henarilak logon weim ebi loluk togolik onowi pam obat oruakma wema oluk oruakma re, his arat onosum o’borl o’gwe a’ge no’gorlogo hene’gik abusak horlouwogoluk oruakma wagai ai o. 9His en e, an neiyagai a’ge logon onugwami onowi pam enede hwedik a’ge pam oruakma mukho lebikpoluk, is eneiyagai an en di a’ge yu a’ge wogentaigoluk epegi a’ge his en delogo modok-modok horlogulat, togu legep ai o. 10O yema his op wolomma puk. An nemelmel a’ge togu legep ai pam, o yema op wolom mia. Modok wiagapsogo togu legep ai en, wiak ema ai en e, siaksogo inotluk e, ’bok lit o.
11His henebabut e, ap Allah iak mo’gulontogwi a’ge ’gela’ge, eniak eseiyat lalhonobogulat,
Pobuk ik anggur a’bosu emin, ik logon no’gwiam honuk-honuk togwi a’ge ai emin, ebam louksogo no’gu lorogup, oluk mo’gulhontogulom a’ge nenagai, opogu legep ai o,” oluk mo’gulentesi.
Delonobua a’ge paget wene weragenebesi wene
12Nenaik ’gain Onuk Logo a’ge en asogo egeitik, mesik disogo egei,
“His aphwami Israel a’ge ado henelaluk welegep a’ge yu. Aphwami en domba wam la’buksogo owi pam togolik wogonoboluk wagai ai ’gela’ge, an en his henebe mesikmu odoksogo honoboma, o leimu domba wam modok a’bik welago ai ’gela’ge, his honowi pam eba henebe modok a’bik wolorogup ani o.
13An en his hono’godouk hwerik poluk e, herle wusogo wokhonoboluk legesema o welegepma eba en wokhonoboluk liplau weik o. Asogo wokhonoboluk liplau wagoam, his en ’goduk emde ’belak a’ge moluksogo hwikholuk e, liplau worogup ani o. Henaik ’gain Nonuk Logo a’ge an enat naduk otluk wokhonoboluk liplau weik o,” oluk egei.
Currently Selected:
Mikha 2: Wul
Highlight
Copy
Compare
Share
Want to have your highlights saved across all your devices? Sign up or sign in
