Matius 24
24
“Allah owi werik aphwami muon enat modok
moluktua ani o,” oluk mo’gulentesi wene
(Markus 13:1-2; Lukas 21:5-6)
1At Yesus Allah owi werikmu en libagarik lasumu re, at osi iak wogu legesa a’ge ebano e’bek wegesarik e, disogo mo’gulegisa,
“Allah owi werik a’ge etle hil yethemen,” oluk mo’gulegisa. 2Asogo mo’gulegisema, at en e,
“His o werik eba ’berlegat henil hegep a? Helep ebam louk-louk werik eba mesik ukpo erlakma en, we, modok perlengsogo en moluksogo hwikhouwa ani o, oluk, demat mo’gulhentegis o,” oluk mo’gulentesi.
“Naduk naduk disogo wiagaphonobua ani o,” oluk mo’gulentesi wene
(Markus 13:3-13; Lukas 21:7-19)
3Asogo mo’gulontoluk e, dom Zaitun duk pam ligagarik hweriogo oruakma, at iak wogu legesa a’ge ebano e’bek wegesarik onomu nak welat e, disogo mo’gulegisa,
“Hat en mo’gulnentigen ano re, metne erlige en ema o. Hat hebe wagalat, o ologun pam tagalat, tigoluk tagokhwe, ’ge a’ge naduk agoma nis nenede we’gerlema. Wene se’geksogo mo’gulnentemen o,” oluk mo’gulegisema, 4at Yesus en e,
“Aphwami en lalhonobuano oluk e, henebabut heberlogo welemis o. 5Aphwami enebe esan en ononuk an nonuk a’ge tualogo re, disogo il wema,
Kristus ano an nebe wegi yuat o, oluk, eniak demat ’gela’ge aphwami a’bigat lalenebil wema ani o. 6Asogo til wagaihwe, weim horogat obogumu eniak henesa’go holugulat, walegat obogumu onobok holugulat, tugulat e, henede o’borlogouk ogup o. Asogo ema a’geat de, o ologun pam ema a’ge ai owan o. 7Di aphwami yu aphwami ena’gul onuk lo’bok weim ’gagalugulat, ap ononuk logo a’ge onosi eneragam a’ge lo’bok weim ’gagalugulat, o di owi yu owi so’boru obuk agalat, mouk erlanghasulat, tua o. 8A’geat de, ai re, hwami malik dagonobuogoluk ono’borl serlem togwi ai ’gela’ge, naduk-naduk houwa re, aiat o.
9 #
Mat. 10:22
Ai erlige re, aphwami ena’gul onuk lo’bok en, an nonuk oluk,
His e, at osi, oluk henebe enebit modok takhonobogulat e, henebe tenakhonoboluk, is pema en ’go’bu wathonobogulat, henebe ’be’gi wathonobogulat, tuagoluk ene’bek wokhonoboluk laga lema ani o. 10Arugukhwe, is aphwami pema enede Allah ebam he’berik pegesa a’geat de, enebe esanat enede ’buk otluk ukpoluk libemarik e, at ap mesik enat mesik woruagoluk woluk lasulat, ap mesik en ap mesik olot het ebam pasulat, tua ani o. 11Ye, is nin pema eniak eseiyat Allah iak mo’gulontogwi a’ge ’gela’ge takpoluk hene’bek wemarik e, aphwami modok a’bigat lalonobua o. 12Asogo modok til wemma re, is aphwami enebabut modok wiak emarik e, is-is enedesogo welema a’ge ai pobuk enede horl etil wema o. 13#Mat. 10:22A’geat de, sa en epe mosogo modok welema holuk e, o ologun pam Allah en agap delua o. 14Ye, Allah en eragam onobouwa a’ge op wene yu, di aphwami yu aphwami modok enaluk emagoluk o di owi yu owi mo’gulentil lagup holuk e, o ologun pam arat ema o,” oluk mo’gulentesi.
“Modok wiaksogo houwa o,”
oluk mo’gulentesi wene
(Markus 13:14-23; Lukas 21:20-24)
15 #
Dan. 9:27; 11:31; 12:11 Asogo mo’gulentesirik e, pobuk mesik disogo mo’gulentesi,
“His en pelal wogo a’ge yu onuk mo’gulogulat e, opsogo pobi togu lomup o. Ap Daniel Allah iak mo’gulentasu laga a’ge ano en eselat e,
Aphwami en enemelmel a’ge togwiam ogoiyesogo ’bogolua a’ge o Allah u’gwarek owi edikpogwi holuk,
16aphwami o Yudea do’go a’ge ebano hweiye re, dom petne ligemak o. 17#Luk. 17:31Hweiye ligomogoluk holuk, aphwami pema o dum pam ligagarik wolomtik, togolik ’bu emarik en ena’ge di a’ge yu a’ge o pam wa ’gwilo erlakma en, we, hweiye ’bekhirat ligemak o. 18Ye, is aphwami pema yabuk o’gwe en, so’boru e’gela’gwe en, togolik o pam onosum wau wom erlakma en, we, eba enat hweiye ’bekhirat ligemak o. 19Asogo ligagalat e, is hwami malik onogola a’ge ai emin, enemalik ’get dogo agamu wogontogwi a’ge ai emin, wiaksogo houwa ai, eige! Nede o. 20His hweiye lagup ai, o wiak pam de a? Agauwa sabit pam se’ban ogukhwe de a, louwano oluk e, se’ban ogu lomup o. 21#Dan. 12:1; Wah. 7:14O ai erlige wiak ema ai re, naduk Allah en di a’ge yu a’ge walhesi ai hwerli en ’bekhit, o yogodak ya hwerli re, ai ’gela’ge mesik tu erlak. Ye, pobuk mesik modok tua erlak a’geat de, mesik erlige aiat wiak loksogo tisoma hagup o. 22Wiak tisoma hagup ai re, at Allah en e,
Hwerli ai hwerli arat o, oluk u erlakma en mo elipmu re, aphwami ’berlegat perlengsogo delonobu erlakma en wiagabenebelip o. A’geat de, at eiyagai poligenebesi a’ge ai enebaget nak e,
Yogo. Wiak ano arat hegep o, oluk hwerli pouwa oruak o. 23-24Ai erlige re, is aphwami pema enepenenat ogulat e,
Kristus ano nebe anat o, ogulat, ye, is pema en e,
Allah iak mo’gulhentasu a’ge ano nebe anat o, ogulat, il wema o. Wemarik e,
Aphwami Allah en poligenebesi a’ge ebano lalonobua hwi a? Erlak hwi a, oluk lalonobuogoluk e, eniak dem ’gela’ge opou wagoluk elalin tu puk a’ge til wema o. Is nin e,
Kristus ano yu waga yu hemit, ogulat, is nin pema en e,
Kristus ano etle waga etle yethemit, ogulat, ogukhwe his henedemu en e, demat oluk epagup o. 25Wene ai owan lailo erlak oruakhwe hwese’bi naduk mo’gulhentegis ai opsogo pobi togu lemis o. 26#Luk. 17:23,24Is aphwami nin pema en mo’gulhontogulat e,
Yethemit! At ano o leimu etleba oruak o, ogwi holuk e, henil yethai lagup o. Ye, is nin pema en e,
Yethemit! At ano o abel akhit eba hisogo oruak o, ogwi holuk e, henedemu en demat oluk epagup o. 27Ai re, an abat daklau wegi ano, weik e, o obinal o mo pou wago akhit etleba en mesik erlige yebeksogo, o mo obuk oso hegit perakpou wago ai ’gela’ge wema o,” oluk asogo mo’gulentesirik e,
28 #
Luk. 17:37
“Ap werak a’ge oruak holuk e, sue ap werak a’ge no’gwi ai eba odokti lagai o,” oluk mo’gulentesi.
“An abat daklau wegi ano pobuk weigoluk tagokhwe, disogo ema ani o,”
oluk mo’gulentesi wene
(Markus 13:24-27; Lukas 21:25-28)
29 #
Yes. 13:10; 34:4; Yeh. 32:7; Yoe. 2:10,31; 3:15; Wah. 6:12-13 At Yesus en asogo mo’gulentesirik, pobuk mesik disogo mo’gulentesi,
“Asogo wiak lok holukmu en agauwa a’bik wolom erlakma en e,
O mo hik eselat, dugwi yoru erlakma en mo eselat, hwesagal ’bogorl pam en lologo ’bu agalat, ’bogorl pam enanni a’bik welagai a’ge ebano Allah en ono’borlogouk hasulat, tua o.
30 #
Dan. 7:13; Zak. 12:10-14; Wah. 1:7 Asogo tisokhwe, an abat daklau wegi ano arat weigoluk, aphwami enede we’gerlogo pobi tuagoluk ’bogorl pam en mesik tisoam e, aphwami ena’gul onuk lo’bok nge tugukhwe nannisogoat o hena ogola ’bu agoma, enil nioluk a’bigat erliknobua o. 31Asogo wagalat e, an en is malaikat Allah en ’bogorl pam en yo’go peragonobou wago a’ge ebano peragonobou wagalat e, ne’bi’gong iak loksogoat ’baksogo osoam e, is en aphwami an en poligenebegi a’ge ebano, erabu akhit en, orogobu akhit en, etleba akhit en, yema akhit en, o ’bogorl edip-edip eba en modok odogonobua ani o,” oluk mo’gulentesi.
Wene e ara ebam elitsogo mo’gulentesi wene
(Markus 13:28-31; Lukas 21:29-33)
32At Yesus en asogo mo’gulentesirik e, pobuk mesik disogo mo’gulentesi,
“Wene e ara ebam elitsogo mo’gulhentaik a’ge yu pobi tip o. E’gela erlit sebeligoluk tiso a’ge ano ebam elitsogo mo’gulhentaik. E ara ai e’gela lologo ’bi lasuam pobuk esemis ’baktagalat, erlit sebeliselat, tagokhwe re, henil holuk henede en e,
Yogo. O arat hebi ema hegi o, oluk henede pobi togu legep ai ’gela’ge, an en,
33Disogo ema, oluk mo’gulhentegis ano, ebe ’berlegat tisokhwe henil holuk e,
Yogo. O ologun pam ema ano arat horok lau waga hegi o, oluk, henede opomup o. 34Disogo ema, yusogo ema, oluk mo’gulhentegis ai, aphwami o yogodak ya oruak a’ge enebe logon erlak om erlak owan oruakhweat, ebe ’berlegat ema o, oluk demat mo’gulhentegis. 35’Bogorl emin, ’gwiang emin, ai erlak ema a’geat de, an niak ai re, erlak ema modok erlak o,” oluk mo’gulentesi.
“Metne erlige en ema oluk nis ’berlegat neneperlak ai en, henebabut heberlogo welemis o,” oluk mo’gulentesi wene
(Markus 13:32-37; Lukas 17:26-30,34-36)
36At Yesus en asogo mo’gulentesirik e, e’berlik wene mesik disogo mo’gulentesi,
“An weik e, o ai erlige jam ai pam weik, oluk, aphwami modok eneperlak nak o. Ye, malaikat Allah ’bogorl pam en yo’go ’belagonobou wago a’ge ebano ogo eneperlagat. Ye, an nebe Allah omlogoat a’geat de, an ogo neperlagat. We, an naik Allah nak aluk o. 37#Kej. 6:5-8Is aphwami ap Nuh oruakhwe eria togu legesa hegitsogoat, an abat daklau wegi ano pobuk asogoat tugumu weik o. 38Ik lok owan ye’gelil ligom erlakhwe, is aphwami ebano en seni no’gulat, ap en hwami wogonobogulat, is nin pema en wogontugulat, tugukhwe re, at Nuh ano so ogola ’gwegei. 39#Kej. 7:6-24So ogola ’gwi lagarik oruakhwe, is aphwami ebano wongat oruakma, ik lok a’ge arat ye’gelil lasulat ik en perlengsogo warenebegei. Ai ’gela’ge re, an abat daklau wegi ano pobuk weik hegitsogo re, asogoat ema o. 40Ai erlige re, ap enebe ’biren yabuk wogumu re, mesik wasulat e, mesik ukpouwa o. 41Ye, hwami enebe ’biren so’boru gandum a’ge weraruogoluk sagalugumu, mesik wasulat e, mesik ukpouwa o. 42Asogo ema ai en e, his en e,
Nonue ’gain Onuk Logo a’ge metne erlige wema, oluk, heneperlak ai en e, henepe heberlogo yetniarok welemis o. 43#Luk. 12:39,40Ye, ap owi eiye a’ge mesik ede en e,
O yogo hup e, jam ai pam an nowi pam yema ap mesik yogorlia waigoluk ’guma ani o, oluk, aluk wellepma re, at ebe owi pam ’gagalak wellepma re, o hebat posogo yogorlia wa ’gu elep erlak o, oluk, henalugat ani o. 44Ai ’gela’ge re, his henede en e,
At ai erligeat wema, oluk, opogwi erlak wongat oruakhwe, an abat daklau wegi ano re, arat weikmu re, henebe degelak welemis o,” oluk mo’gulentesi.
Ap ’gain en eragam a’ge ebabut op a? wiak a, oluk, ebam elitsogo mo’gulentesi wene
(Lukas 12:41-48)
45At Yesus en asogo mo’gulentesirik e, pobuk mesik disogo mo’gulentesi,
“Ap ’gain a’ge mesik eiyagai tenentarok welat onso’boru wogonto hegitsogoat wogentasu lemagoluk, at eragam a’ge yo’go pasuam, at ede ’gagalak welat ebabut ue iak oso a’ge hegitsogo tiso ai sa epegep. At ai ue ai enat, edikpoluk lasu o. 46Edikpoluk lasuam, eragam a’ge ano asogoat hegitsogo tisokhwe il hauma ’gal e, at eragam a’ge ano ogola agai a’bik houwa o. 47Asogo op tisoma, hau wotluk, ue ano en e,
An na’ge yema perlengsogo hat he’gik pamat welemak o, oluk, edikhobouwa o, oluk demat mo’gulhentegis o. 48A’geat de, at eragam a’ge ai, ebabut wiak holuk e, ede en e,
Nue ano perlene wago erlak. Welemarik e, wema o, oluk 49arilak onue ’gain ano eragam a’ge pema ’go’bu waronobogulat, is ap anggur a’bosu enede ’balemagoluk no’gwi a’ge enemin la’bulik welat, so’boru emin, anggur a’bosu ai a’ge emin, no’gulat, 50tugulat e, at en e,
Nue ano o ai erlige, jam ai pam wema, oluk, modok eperlak wongat oruakma ue ’gain ano wema o. 51Asogo oruakma wemarik e, at eragam a’ge ano ebe ’garok pam modok wusogo re, is aphwami enagap pam nak op ’gela’ge enede ’biren welat togwi a’ge peragenebasumu ebano peragonoboma, eba welat e, iak ’gerlit mariselat, lo’gu mariselat, taga lema o,” oluk mo’gulentesi.
Currently Selected:
Matius 24: Wul
Highlight
Copy
Compare
Share
Want to have your highlights saved across all your devices? Sign up or sign in
