Matius 25
25
Wene hwelani enede oruak a’ge emin, enede erlak a’ge emin, enebam elitsogo mo’gulentesi wene
1 #
Luk. 12:35
At Yesus en asogo mo’gulentesirik e, wene mesik disogo mo’gulentesi,
“Nenaik Allah en eragam enebasumu eba emin hegit e, hwelani enebe 10 en lampu ’gwialogo woluk ap mesik ugwe waigoluk wagoma ologotma legesa ai ’gela’geat o. 2Is enebe 10 a’ge re, nin pema huaben, enede oruak. Ye, nin pema huaben e, enede erlak a’ge welegesa. 3Is enede erlak a’ge ai lampu woluk legesa a’geat de, minyak erlak agoam na’gul a’ge oluk ebaget mesik na’gogo woluk lo erlak. 4Ye, is enede oruak a’ge eriano nak e, lampu emin, sogoluak mesik minyak ne’gak welago a’ge emin, woluk legesa. 5A’geat de, at ugwe waiyogoluk tago a’ge ano wom erlakma en aregen tiso en e, is ebano enebe ’berlek nogo enil agama eba nogogisa. 6Asogo nogogukhwe, hup ede ’burl is aphwami en e,
Ap ugwe wo a’ge ano ebe waga ai o. Ologotma manis o, oluk, eniak loksogo egesema, 7is hwelani ebano enelaluk egesarik e, lampu egerle ebelogo ’gwialil legesa. 8Is enede erlak a’ge ebano en, is enede oruak a’ge ebano mo’gulontogulat e,
Lampu nis ena’ge nekhi oso yo. Holuk e, minyak his ena’ge logon woknentemit o, oluk, ’gonu mo’gulentigisema, 9is hwelani enede oruak a’ge ebano en e,
Erlak o. Ado me’gisogo his wokhontugulat, pema nis horlogulat, tulmu re, erlak ema o. Holuk e, o’go ’balugumu eba logon o’go ’bali lit o, oluk mo’gulentigisema, 10o’go ’balhwerlil legesema re, at ap ugwe wo a’ge ano arat wagarik e, is hwelani enede oruak a’ge degelogo pagathorloluk welegesa a’ge ebano enemin seni sakho nouwogoluk wogonoboluk ogola ’gwegeitik e, ’goduk laregei. 11#Luk. 13:25’Goduk lasogo ’goluk oruakma, is hwelani nin pema ebano wegesarik e,
Nenaik, ’goduk hutnentemen o, oluk mo’gulegisema, 12at en e,
His eba salak. Henebe an neperlak o, oluk, demat mo’gulhentegis o,” oluk mo’gulentesi. 13At Yesus en asogo mo’gulentesirik e,
“Ai ’gela’ge, an weik eria hegit e, his en,
O ai erlige jam eria hegit wema, oluk, heneperlak ai en e, henebabut heberlogo welat yetniarok welemis o,” oluk mo’gulentesi.
“Ap mesik en, uang ene’gigem poluk laga o,”
oluk, ebam elitsogo mo’gulentesi wene
(Lukas 19:11-27)
14 #
Luk. 19:11-27
At Yesus en asogo mo’gulentesirik e, mesik disogo mo’gulentesi,
“’Bogorl pam Allah en eragam enebasumu eba, emin hegit e, ap mesik o walegat momu laigoluk eselat, at eragam a’ge worlentesimu wegesema re, at ena’ge di a’ge yu a’ge is tenak welemagoluk ene’gigem poluk laga ai ’gela’geat o. 15Is enebabut ’balogo enebe lo’bok wogonto hegitsogoat wogontil laga. Ap mesik 5 juta wogoum ’gela’ge uang lok emas a’ge 5 wogeselat, ye, ap mesik 2 juta ’gela’ge wogeselat, ye, ap mesik 1 juta ’gela’ge wogeselat, tegei. Asogo wogontoluk e, o momu walegat laga. 16Lagama re, ap uang emas 5 juta ’gela’ge wesi a’ge ano uang ai pam di a’ge yu a’ge o’go ’baliselat e, pobuk 5 juta mesik emin mangnosogo pesi. 17Ye, ap mesik 2 juta ’gela’ge wesi a’ge ano asogoat pobuk 2 juta mesik emin mangnosogo pesiat. 18A’geat de, ap mesik 1 juta ’gela’ge wesi a’ge ano en nak e, woluk lagarik e, uang ue ’gain a’ge ano en a’ge, ’gwiang palholuk hisogo pei laga. 19Asogo ’gwiangma selak poluk oruakma re, onue ’gain ano welagarik e, pobuk wagarik,
Uang wogentegis a’ge ebano, is en pobuk meren mangno tigisa, oluk, worlentesimu wegesema re, 20ap uang lok emas a’ge 5 juta ’gela’ge wesi a’ge ano pobuk 5 juta at mangno tegei a’ge woluk wagarik e,
Nue. Hat en 5 juta woknigen ano re, ’gwelakhemen o. An en pobuk 5 juta logon emin ebam mangnosogo pegimu ani o, oluk mo’gulesimu, 21at ue ano en e,
Not o! Op modok tigen o. Hat hebabut he’berik ano en, hegitsogo modok taga legenma hegi o. Wei nagat wokhegis a’geat de, hede he’bisogo tenak welegen ai en e, pobuk modok loksogo tenak wolorogun en, edikhoboluk wokheik o. An hue nogola nagai hasu legi ai ’gela’ge, ne’biregat nenagai hul en, ’gwi suk o, oluk mo’gulesi. 22Asogo mo’gulesirik oruakma, pobuk ap uang emas a’ge 2 juta ’gela’ge wesi a’ge ano e’bek wagarik e,
Nue. Hat en 2 juta woknigen ano re, ’gwelakhemen. An en pobuk 2 juta mesik eminat ebam mangnosogo pegimu ani o, oluk mo’gulesi. 23Mo’gulesimu at ue ano en e,
Not o! Op modok tigen o. Hat hebabut he’berik ano en, hegitsogo tigenma hegi o. Wei nagat wokhegis a’geat de, hede he’bisogo tenak welegen ai en, pobuk modok loksogoat tenak wolorogun en, edikhoboluk wokheik o. An hue nogola nagai hasu legi ai ’gela’ge, ne’biregat nonogola nenagai hul en, ’gwi suk o, oluk mo’gulesi. 24Asogo mo’gulentesirik oruakma, ap mesik uang emas a’ge 1 juta ’gela’ge wesi a’ge ano e’bek wagarik e,
Nue. Hat e, hebabut modok wiakma oluk e, is pema en owi peligisa a’geat de, e’gen he’gik abusak ’balhwerlasulat, is muon en owi yerigisa a’geat de, e’gen he’gik abusagat hwerlasulat, taga legen ebano re, an hebabut nalugat o. 25Asogo taga legen ai re, an nogorlok en e, uang hat en a’ge 1 juta ’gela’ge ano ’gwiang palogo hisasi legi o. Woknigen a’ge ano ebe yu o! Hwerlemen o, oluk mo’gulesimu, 26at ue ano en e,
Hat hebabut modok wiak hosorli ogo wiak a’ge yu re! An en e, is muon pelogwi a’ge e’gen ’balhwerlasulat, is pema yerogwi a’ge e’gen hwerlasulat, tiso a’ge nebabut ai hat halugat ani o. 27Asogo haluk welat holuk e, an nouang ai is aphwami muon uang tenak welat sabusogo, mesik emin ebam louksogo pogwi a’ge ene’gigem pelenma re, an pobuk weiktik e, nouang ebe emin, ebam louksogo mangno togwi a’ge emin, hwerlaimagoluk wogonto a’ge tigen, oluk mo’gulesirik e, 28-29#Mat. 13:12; Mrk. 4:25; Luk. 8:18at osi pema disogo mo’gulentesi,
Is aphwami pema ena’ge oruak a’ge ai, pobuk logon eminat ebam louksogo wogontogwiam ena’ge a’bigat ema o. Ye, is pema ena’ge erlak a’ge ai wei nak welema a’ge ano ene’gikmu a’ge delogo horlouwa ai en e, ap ai asogo tegeimu ai re, uang 1 juta ’gela’ge ai e’gikmu a’ge delogo ap agaikhe 10 juta ’gela’ge wesi a’ge ai wogomis o. 30#Mat. 8:12; 22:13; Luk. 13:28Holuk e, at ebe an neragam welema erlak a’ge yu re, leget o’borlma o modok hiktakma eniak ’gerlit marogulat, lo’gu marogulat, tugumu eba lebikpemit o, oluk mo’gulentesi,” oluk Yesus en mo’gulentesi.
Aphwami ena’gul onuk lo’bok wene enebam
pasulat, no’gorliselat, tua wene
31 #
Mat. 16:27; 19:28 At Yesus en asogo mo’gulentesirik e, wene mesik disogo mo’gulentesi,
“An abat daklau wegi ano, aphwami en erliknobugukhwe, is malaikat Allah ’bogorl pam en yo’go peragonobou wago a’ge ebano ’berlegat nemin womultik e, an erliknobugukhwe ’gain Nonuk Logo a’ge welagoma welat, 32ap mesik uam eiye a’ge en, domba wam holuk momu degelogo pasulat, kambing wam holuk momu degelogo pasulat, degelenebiso ai ’gela’ge, is malaikat ai en aphwami ena’gul onuk lo’bok an nil pam odoksogo onobou agaihwe, an en asogoat degelenebik o. 33Degelenebiselat e, is aphwami domba wam ’gela’ge holuk e, ne’gik ’bekhit akhit enebasulat, ye, kambing wam ’gela’ge holuk e, ne’gik hware akhit enebasulat, tik o. 34-36Asogo degelogo onoboluk e, an nebe ’gain Nonuk Logoatma re, is ne’gik ’bekhit akhit enebaik a’ge ai, wene disogo mo’gulentaik o,
An naik en obaphenebegeimu welegep. Holuk, manis o. An so’boru nele oruakma his en woknogulat, ik nele oruakma his en nangnogulat, an ap ’bok ’gela’ge oruakma his en woknobugulat, nosum ’buktak erlak oruakma his en ’buktak nobugulat, ou werak oruakma his en ’gwelakniau wagalat, herle werak oruakma niau wagalat, tigep ano en e, an naik en ’bogorl ’gwiang owan walho erlak welat, his ’gain hononuk logo a’geat welemagoluk, polikhenebesi a’ge yu hwerlau manis o, oluk mo’gulentasuam, 37is Allah iak hologo togu lema a’ge ai en e,
Eige, nue o! Nis en hat so’boru nele oruakma wokhogulat, ik nele oruakma nanghogulat, tige ai re, metne erlige tige no. 38Ye, hat ap ’bok ’gela’ge oruakma wokhobugulat, hosum ’buktak erlak oruakma ’buktak hobugulat, tige ai, metne erlige tige no. 39Ye, hat ou werak oruakma, hiai lagalat, herle werak oruakma, hiai lagalat, tige ai re, metne erlige tige no, oluk mo’gulnogwiam, 40an ap ’gain Nonuk Logo a’geatma re, is aphwami ebano disogo mo’gulentaik,
His en an nosi ononuk erlak a’ge logon oruakma asogo tagonobogu legep ai, anat taknobogu legep o, oluk, demat mo’gulhentegis, oluk mo’gulentaik o.
41-43Ye, is ne’gik hware akhit enebaik a’ge ai disogo mo’gulentaik,
An naik en his heman henebesi a’ge yu re! An so’boru nele oruakma, his en woknom erlak, ik nele oruakma, his en nangnum erlak, ap ’bok ’gela’ge oruakma his en woknobu erlak, sum ’buktak erlak oruakma his en mesik ’buktak nobo erlak, ou werak oruakma emin, ne’gik herle hettak oruakma emin, ’gwelaknio erlak togu legep o. Holuk e, an naik en, at Iblis osi enebe a’bik enemin, odouk orloukmu welemagoluk enebale heli’gogo enebesimu eba lit o, oluk mo’gulentaik. 44Asogo mo’gulentasuam, is en e,
Eige! Nue! Hat so’boru nele oruakma, ik nele oruakma, ap ’bok ’gela’ge oruakma, hosum ’buktak erlak oruakma, ou werak oruakma, he’gik herle hettak oruakma, o metne erlige en lethio erlakma en mo ogu lege no, oluk, mo’gulnogukhwe, 45an en e,
His en aphwami pema ononuk erlak a’ge yekherak onobogu legep ano re, anat yekherak nobogu legep o, oluk mo’gulontoluk e, 46#Dan. 12:2is aphwami ai di obotut yu obotut hogulomma eba modok welemagoluk peragenebaik o. A’geat de, is Allah iak hologo togu lema a’ge ai enelaluk modok wolomma eba enebaik o,” oluk mo’gulentesi.
Currently Selected:
Matius 25: Wul
Highlight
Copy
Compare
Share
Want to have your highlights saved across all your devices? Sign up or sign in
