Matius 22
22
“Ap mesik hwe wogugulat seni naumagoluk yo’go enebesi,” oluk ebam elitsogo mo’gulentesi wene
(Lukas 14:15-24)
1At Yesus ebe tenak po erlakma en, ukpegesema re, pobuk at en wene mesik ebam elitsogo aphwami ebano disogo mo’gulentesi,
2“At Allah en eragam enebasumu eba emin hegit e, ap ’gain onuk logo a’ge mesik omlogo ugwe wogogulat e, seni serigisa ’gela’geat o. 3Seni sorogulat aphwami yo’go enebesi a’ge naumagoluk, at eragam a’ge logon disogo mo’gulentesi,
Aphwami yo’go enebegi ebano wemagoluk wogenebi lit o, oluk, mo’gulentesi a’geat de, is yo’go enebesi a’ge ebano wom enebit en wom erlak mo egesa. 4Wom erlak mo egesema re, pobuk at eragam a’ge logon disogo mo’gulentesi,
Aphwami yo’go enebegi a’ge ebano wemagoluk wogenebi lit o. Laguptik e,
Nonue en e, disogo egei oluk ip o,
Wam sapi ugwa’buk a’ge emin, sapi emalik ebe op a’ge emin, modok perlengsogo wusogo arat sogo pegirik e, di a’ge yu a’ge ’berleksogo degelogo pegirik arat no hegit aga o. Holuk e, wemagoluk mo’gulentai lit o, oluk egeimu wege o, oluk peragenebesimu legesa. 5Legesa a’geat de, is yo’go enebesi a’ge ebano enede ’buk-’buk legesarik e, at agaikhen iabuk o’gwe ’bok lasukhwe, at agaikhen di a’ge yu a’ge o’go ’baligoluk lasukhwe, 6is nin pema re, at ’gain a’ge en eragam a’ge yo’go peragenebesi a’ge ebano enebe tenagonoboluk ’go’bu warenebegisarik e, enebe modogat ’be’gi waronobogulat, tigisa. 7Asogo tigisema re, at ap ’gain onuk logo a’ge ano esa’go hwelegeitik e, olot het a’bik agarik osi tentara a’ge peragenebesimu legesarik, at ap ’gain eragam a’ge warenebegisa a’ge ebano enebe modok wusogo hwigontogulat, onowi werik a’ge kota ebano modok wi tigisa. 8Arat asogo tigisema re, at ap ’gain onuk logo a’ge ano en eragam a’ge ebano disogo mo’gulentesi,
Seni arat onlogotma seregis a’geat de, is aphwami yo’go enebegi a’ge ebano nuam sogo pobuk nouwa modok erlak. Nebit o. 9Holuk e, his ebela lok a’ge adugalma eba loluk oruakma, aphwami muon lagai holuk,
Seni sogo na louwok o, oluk, yo’go enebemen o, oluk mo’gulentesimu re, 10is eragam a’ge ebano pobuk ebela lok a’ge adugalma eba legesarik oruakma, aphwami enebabut wiak a’ge, op a’ge, lagaimu re, enemin sarlok tigisa a’ge ’berlegat yo’go onobogwiam wegesema re, o pam enebe modok ’bete egei. 11Arat ’betesogo ’gwigisema re, at ap ’gain onuk logo a’ge ano il entaigoluk o pam ’gwegei ’gal e, ap mesik nak e, sum hwami wogonobogulat seni sogo nouwogoluk ’buktogwi a’ge ’buktak erlak oruakma il yethesirik e, disogo mo’gulesi,
12Eige, not! Hat e, sum hwami wogonobogulat seni sogo nouwogoluk ’buktogwi a’ge ai, ’buktak erlak ’gu e’gen yema re! ’Gesogo oluk ’gu egen, oluk mo’gulesi a’geat de, ap ano en iak modok u erlak mo egei. 13#Mat. 8:12; 25:30; Luk. 13:28Iak modok u erlak mo egeimu re, at ap ’gain onuk logo a’ge ano en eragam a’ge ebano disogo mo’gulentesi,
Ap ai e’gik oyuk modok herle wusogo re, o’borlma eniak ’gerlit marogulat nge togwi modok welagaimu o modok hiktakma eba lebigenebemit o, oluk mo’gulentesi. 14Ai ’gela’ge, Allah en aphwami enebe modok a’bik yo’go enebasu a’geat de, enebe wei nak en e, pebisogo onobouwa o,” oluk mo’gulentesi.
“Uang pemerintah paget ’gonu ogwiam, wogonto a? Erlak a,” oluk hin Yesus ebam wegesa wene
(Markus 12:13-17; Lukas 20:20-26)
15Pobuk e, is ap Farisi a’ge en,
“Nis Yesus il walsogo wene ebam hin wogwiam iak ua ano pam wene e’gen poluk wene ebam pouwok o,” oluk obok ’balugu legesa. 16Obok ’balugu legesarik e, ap is onosi eniak wogu legesa a’ge emin, is ap Herodes oruak o’gwe a’ge emin, Yesus ebam wene hin wouwagoluk peragonobou wegesema is ai wegesarik e, disogo mo’gulegisa,
“Yesus nue. Hat hebabut e, wene demat nak eselat, Allah ogola en,
Aphwami asogo togu lemak, oluk epasu a’ge demat mo’gulnentasu legen ai nis nenalugat o. Aphwami enebe hogorlok erlak welat onorogole pam nak yerontoluk e, logon holukhwema enebasulat, logon ho’borlma enebasulat, taga legen erlak hiogu lege. 17Holuk e, hat hede ’gesogo epegen. Nis Yahudi a’ge togwi hegitsogo re, uang pemerintah paget ’gain onuk logo a’ge Kaisar wogomok a? Erlak a,” oluk mo’gulegisema re, 18at Yesus en e, is ap ai enebabut wiak enagat ’balegeitik e,
“His henagap pam nak e, op ’gela’ge welat, henede ’biren a’ge yema re! Nopaget nebabut ’baluogoluk togu legep. 19Uang pemerintah paget po a’ge ano nil haik en onukniemit da,” oluk egeimu uang ano mesik wogegisema re, 20at en e,
“Yu sa ebe orogole hele’gik a’ge pam onuk pelal wogo oruak,” oluk mo’gulentesimu, 21is en e,
“Yu Kaisar at o,” oluk mo’gulegisema, at Yesus en e,
“Kaisar en a’ge holuk e, Kaisar at wogogulat, Allah en a’ge holuk e, Allah yat wogugulat, togu lomup o,” oluk, mo’gulentesimu re, 22is ebano enesa’go hweligisarik e,
“Eige! Nonogorlok o,” oluk, erliktoluk e, Yesus ukpoluk o momu legesa.
Ap Saduki a’ge en, aphwami warotluk enelaluk om paget Yesus ebam hin wegesa wene
(Markus 12:18-27; Lukas 20:27-40)
23 #
Per. 23:8
Is ebano arat legesema re, o ai erligeat, is ap Saduki a’ge en,
“Aphwami warotluk enelaluk ema modok erlak o,” oluk ogwi a’ge logon Yesus e’bek wegesarik e, disogo mo’gulegisa,
24 #
Ula. 25:5
“Nue. At Musa en disogo oluk mo’gulnentesi,
Ap mesik eiyagai owan dagonobu erlakma en ebe warago holuk e, ebalema malik mesik dagonobuagoluk, hwe sugwe ai ap ai orat wo yo,
oluk mo’gulnentesi. 25Asogo egeimu oruakma re, nis oruakma yema ap enebe sabiren enaik mesigat en dogo welegesa. Welat e, onue naduk a’ge ai ugwe wesirik eiyagai dagonobu erlakma en, waragama ot e’berlik a’ge ai en,
Hwe yu nue en sugwe an noboluk laga a’ge, oluk, wesi. 26Wesi a’geat de, at ai eiyagai dagonobu erlagat waraga. Pobukhwe sugwe a’ge ano onot ene’berlik a’ge ai en wesi a’ge re, asogoat eiyagai dagonobu erlakma en waragayat. Enebe sabiren ebano eneiyagai dagonobu erlakma en waretil legesa nak. 27Asogo waregesarikmu en, pobukhwe ano ebe warat aga. 28Holuk e, is ap enebe sabiren eria re, hwe mesigat a’ge ai wil wegesarikmu re, pobuk Allah en aphwami werak a’ge enelalugabonobua ai erlige re, hwe ai sa ’gela’ge ugwe ema epegen,” oluk hin wegesema re, 29at Yesus en e, disogo mo’gulentesi,
“His e, Allah iak pelal wogo ai emin, Allah anni ai emin, heneperlak welat, heniak dagansogo ogu legep aiat o. 30Ye, aphwami werak a’ge Allah en enelalugabonobua ano pam en, hwami wogonobogulat, is pema wogontugulat, togu lema modok erlak o. We, is malaikat ’bogorl pam a’ge welagai ai ’gela’geat welema o. 31-32#Kel. 3:6Ye, aphwami warema a’ge Allah en enelalugabonobua ai nak e, at en,
Abraham emin, Ishak emin, Yakub emin, enaik Allah anat o,
oluk egeimu, at iak pelal wogo oruak ano onuk mo’gulu erlakma en welegep no? Mo’gulogu legebat o. At Allah re, aphwami werak a’ge enaik puk o. At e, aphwami enelaluk a’ge enaigat o,” oluk mo’gulentesimu re, 33is aphwami a’bik ebano enesa’go hweligisarik e,
“Eige! Nonogorlok e,” oluk erliktigisa.
“Allah en nenesa’go weregei a’ge wene logo re,
’biren eriayat o,” oluk ap mesik mo’gulesi wene
(Markus 12:28-34; Lukas 10:25-28)
34At Yesus en asogo wene mo’gulentesimu re, aphwami en e,
“Yesus en is ap Saduki a’ge wene mo’gulentesimu, is en o’go u mia aga,” oluk egesema re, is ap Farisi a’ge enesa’go hweligisarik e, enebe odoktak poluk, 35ap mesik Allah iak mo’gulentasu laga a’ge en, Yesus ebabut ’baligoluk ebam hin wasulat e, disogo mo’gulesi,
36“Yesus nue. Wene Allah en nenesa’go weregei wene ano, wene ebe logo ’gela’ge re, ’gesogo egei epegen,” oluk mo’gulesimu, 37#Ula. 6:5at Yesus en e,
“Wene logo re, at Musa en,
Henede emin, henebabut emin, honogola emin, mesigat oroguptik,
nenaik ’gain Allah Onuk Logo a’ge ebe aiat henede hwedik welemis o,
oluk egei ai, 38wene ebe logo ’gela’ge re, aiat o. 39#Ima. 19:18Ye, wene ai emin hegit e, mesik yu,
His honu’gwarek henebe henede hwedik welegep ai ’gela’ge,
is aphwami logon henemin welegep a’ge ai henede hwedik welemis o,
oluk egei a’ge mesik logo a’ge re, ai o. 40#Luk. 10:25-28Ye, wene at Allah en,
Disogo tip, asogo tip, oluk nenesa’go weregei wene ’berlek emin, wene is ap Allah iak mo’gulontogu legesa a’ge en egesa wene ’berlek emin, wene logo re, edip ’biren eria pam erlelik oruak o,” oluk mo’gulesi.
“At Kristus ai, ebe sa epegep,”
oluk mo’gulentesi wene
(Markus 12:35-37; Lukas 20:41-44)
41At Yesus en asogo mo’gulentesirik e, is ap Farisi a’ge ebano odoktak oruakma, at en enebam hin wasulat e, 42disogo mo’gulentesi,
“His henede en, Kristus Allah en yo’go poluk perakpou weik egei ano, ebe sa opogu legep. Ye, eba sa en dogo’gwe a’ge opogu legep,” oluk mo’gulentesimu, is en e,
“At ai Daud en dogo’gwe a’ge o,” oluk mo’gulegisa. 43Asogo mo’gulegisema, at Yesus en e,
“Holuk e, Allah Arogun en Daud ede ’gagalegeimu, at en e,
44 #
Mzm. 110:1
Allah ’gain Onuk Logo a’ge en an nue ’gain Onuk Logo a’ge mo’guleselat e,
Aphwami hat heselei a’ge ebano hoyuk en al ’besilogo enebagun en,
an en owan he’bek onobou wom erlak oruakhwe,
hat an neragam ne’gik ’bekhit akhit hebe ’gain hweriogo wolorogun o,
oluk Allah en Kristus mo’gulesi, oluk Daud en egei ai re, nopaget egei epegep. 45At Daud u’gwarek en Kristus ebe paget,
An nue ’gain Onuk Logo a’ge, egei holuk e, his en e,
Kristus ai Daud en dogo’gwe a’ge o, oluk, no’gosogo u epegep. Asogo u mia o,” oluk mo’gulentesimu re, 46is en e, wene o’go ’gesogo u ’gela’geat agama re, hwerli ai hwerli en e, pobuk aphwami ’berlegat wene mesik hin wo onogorlok aga.
Currently Selected:
Matius 22: Wul
Highlight
Copy
Compare
Share
Want to have your highlights saved across all your devices? Sign up or sign in
