Matius 17
17
Yesus dom pam ligagarik oruakma
orogole muat aga wene
(Markus 9:2-13; Lukas 9:28-36)
1At Yesus en asogo mo’gulentesirik e, agauwa hebarligen nogoluk e, Petrus emin, Yakobus emin, ot Yohanes e’birek emin, enemategat wogonoboluk dom yat a’ge pam ligaga. 2Ligagarik oruakma, at ebe is enil pam, muat agalat e, orogole mo il ’gela’ge agalat, sum ’buktak a’ge ’gut modok amulit a’bik agalat, tegei. 3Asogo agama, at osi eriano en enil yethegesa ’gal e, Musa emin, Elia emin, hebarligen egesarik Yesus emin weneane ogumu entigisa. 4Asogo entigisarik e, at Petrus en Yesus disogo mo’gulesi,
“Nue. Nis o yema obat welege hegi o. Hat en elit epegen holuk e, yema orabo henagan, hat hebaget mesik, Musa ebaget mesik, Elia ebaget mesik, uthentaik o,” oluk mo’gulesi. 5#Kej. 22:2; Ula. 18:15; Mzm. 2:7; Yes. 42:1; Mat. 3:17; 12:18; Mrk. 1:11; Luk. 3:22 #2Pet. 1:17-18Asogo mo’gulesimu erianoat, o hena ’gut a’ge sebelonobou wagarik e, Allah iak o hena ano ogola en disogo mo’gulentesi,
“An nomlogo nede hwedik a’ge. At ebaget nogola nagai hasu legi o. Holuk, at iak hwelak wolomup o,” oluk mo’gulentesimu, 6Yesus osi enemin ligegesa a’ge ebano enesa’go hweligisarik, onogorlok en e, ondogorlu pam hweriogo welat onorogole ’gwiangma sakhunsogo oruakma 7at Yesus ene’bek wagarik e, enebe e’gik tenagonoboluk e,
“Honogorlok erlaksogo inemis o,” oluk mo’gulentesimu, 8ena’gul lekholuk enil yethegesa ’gal e, is pema re, erlak. We, at Yesus ematek nak oruakma hegesa.
9Asogo toluk e, dom pam ebano en ’bu agalat, at Yesus en disogo mo’gulentesi,
“An abat daklau wegi ano re, nebe watnobogwiam warotluk oruakma, Allah en nelalugapnobo erlak oruakhwe, an nebe takpasukhwe henil niegep a’ge ano aphwami pema modok mo’gulentagup o. We, pobuk Allah en nelalugapnebiso holuk en, mo’gulonto yo,” oluk enesa’go wetil-wetil ’bu aga. 10#Mal. 4:5Enesa’go weregeimu, is osi ebano en e, disogo mo’gulegisa,
“Holuk e, is ap Allah iak pelal wogo eiye a’ge ebano en e,
Elia naduk wema o, oluk ogwi ai no’gosogo en,” oluk hin wegesema, 11at en e, disogo mo’gulentesi,
“Elia naduk wemarik e, at en di tagalat, yu tagalat, degelil wema, ogwi ai, demat a’geat de, 12#Mat. 11:14an wene demat mo’gulhentaik. At Elia ebe arat waga a’geat de, is aphwami en modok pobitu erlak nelak pogulat e, asogo tu enagai en, at ebe wiagap pegesa ’gela’geat, an abat daklau wegi ano re, nebe asogo wiagapnobuayat o,” oluk mo’gulentesimu re, 13is osi ebano en e, disogo egesa,
“Ai at Yohanes ik olomu ’belabenebise laga a’ge ano ebaget mo’gulnentesi o,” oluk pobi tigisa.
At Yesus en mu’gat ebabut wiak a’ge malik mesik ogola ’gwegeirik oruakma henokho
lebikpesi wene
(Markus 9:14-29; Lukas 9:37-43)
14Asogo toluk aphwami a’bik ebano ene’bek ’bu egesema re, ap mesik Yesus e’bek wagarik eragam odogorlu pam huragarik hau weriselat e, disogo mo’gulesi,
15“Nue. An nomlogo yu hedeap pemen o. Il purluk tagalat, ebe waragalat, elaluk agalat, tagalat e, nin erlige nan erlige odouk olomu ’gwiselat, ik olomu lasulat, tiselat wiaksogo oruak ai en e, 16hat hosi hiak wogwi a’ge ene’bek woluk wegi a’geat de, is en tu re, mia aga,” oluk mo’gulesi. 17Asogo mo’gulesimu, at Yesus en e, disogo mo’gulesi,
“His aphwami o yogodak welegep a’ge yema re, henede nebam he’berik erlak welat nal aga legep yema re! An his henemin agauwa merenam wolomul no. His disogo tugukhwe nepe mosogo agauwa meren weleik,” oluk mo’gulentesirik e,
“Malik ai an ne’bek woluk manis o,” oluk mo’gulentesimu 18malik ano woluk wegesema mu’gat ebabut wiak a’ge ogola ’gwegeirik oruakma Yesus en wene yagosoam e, henokho libagama erianoat op aga. 19Op agama re, is Yesus osi iak wogu legesa a’ge ebano e’bek wegesarik emin enemategat welat e, disogo mo’gulegisa,
“Nis en e, at mu’gat ebabut wiak a’ge ai henokho lebikpo mia ai no oluk,” oluk ebam hin wokhegesema, 20-21#Mat. 21:21; Mrk. 11:23; 1Kor. 13:2at Yesus en e,
“His henede pobisogo nebam he’berik pogu legep erlak ai en o. ’Gebi e’gen wei a’ge pelogwi ai ’gela’ge, henede an nebam wei nak he’berik poluk e, dom ai mo’gulogulat,
Eba en hegilogo momu eba lai lak o, oluk mo’gulorogup holuk e, eba en momu eba lai loat o. His en e, di a’ge yu a’ge tumu re, agaikhen mia om erlak op nak ema o, oluk demat mo’gulhentegis. [A’ge re, mu’gat ebabut wiak a’ge yu ’gela’ge onogola ’gwegeirik oruakma re, so’boru no erlakma en se’ban umu en nak e, elit henokho libom o,”] oluk mo’gulentesi.
At Yesus en, “An watnobuayat o,” oluk naduk mo’gulentesirik, pobuk mo’gulentesi wene
(Markus 9:30-32; Lukas 9:43-45)
22Pobuk e, at Yesus osi enemin o Galilea eba odoktigisarik welat e, disogo mo’gulentesi,
“An abat daklau wegi ano re, ap en yo’go louwarik is muon ene’gigem nobouema, 23watnobua o. Watnobuema re, nebe werak agauwa ’biren weleiktik en, agauwa henaganak a’ge re, naik Allah en nelalugapnobua o,” oluk mo’gulentesimu re, onogola modok wiak etil legesa.
At Yesus en Allah owi werik a’ge paget
uang pesi wene
24 #
Kel. 30:13; 38:26 Asogo toluk, o Kapernaum wegesema re, is Allah owi werik a’ge paget uang ’gonu oluk wogu legesa a’ge ebano en, at Petrus e’bek wegesarik e, disogo mo’gulegisa,
“Honue Allah iak mo’gulhentasu a’ge ai en Allah owi werik a’ge paget uang po ’gogwi a’ge ano mesik pasu a? Erlak a,” oluk mo’gulegisema re, 25at Petrus en e,
“Pasuat o,” oluk mo’gulentesi. Mo’gulontoluk olema ’gwi lagarik e, at en owan u erlak oruakhwe, at Yesus en naduk disogo mo’gulesi,
“Simon. Hat e, ’gesogo epegen. Is ap ’gwiangma a’ge ononuk logo ai paget, aphwami salak en uang pogwi. Onu’gwarek onosi en pogwi epegen a? Ye, at e, is muon en pogwi epegen a,” oluk mo’gulesimu re, 26at Petrus en eselat e,
“Is ap mu a’ge en pogwi o,” oluk mo’gulesimu, at Yesus en e,
“Holuk e, is onu’gwarek onosi ai en e, po puk epegi. 27A’ge re, is en enapseriap watnontouwano oluk, ik ye’gelakma lorik hiane worogwi a’ge herle ano ik olomu ’belabugumu naduk-naduk wa’gun a’ge ano he’gikmu wa’guntik emde larak pasuam e, uang emde elema oruakma hagun o. Holuk e, aiat wik-wok hat hebaget emin, an nebaget emin, is ap ai wogontomup o,” oluk mo’gulesi.
Currently Selected:
Matius 17: Wul
Highlight
Copy
Compare
Share
Want to have your highlights saved across all your devices? Sign up or sign in
