Matius 16
16
Ap Farisi a’ge en e, “Nis en pobi hobuogoluk elalin a’ge mesik tin da,” oluk Yesus
mo’gulegisa wene
(Markus 8:11-13; Lukas 12:54-56)
1 #
Mat. 12:38; Luk. 11:16 Liplau wagarik oruakma, is ap Farisi a’ge emin, is ap Saduki a’ge emin, Yesus ebabut ’baluogoluk e’bek wegesarik e, disogo mo’gulegisa,
“Hat hebe haik Allah ’bogorl pam a’ge en ’belakhobou wagama wegen holuk e, nis en pobi hobuogoluk nenilem elalin a’ge mesik tin da,” oluk mo’gulegisa. 2Asogo mo’gulegisema at Yesus en e,
[“O mo obuk osokhwe, ’bogorl pam o lim pasu holuk, his en e,
O hebi ema, opogu legep ani o. 3Ye, hubet dakhasogo o homuk hasulat hikhasu holuk henil yetholuk e,
Moru lok a’ge nouwa, oluk ogu legep ani o. ’Bogorl orogole pobirak poluk,
Asogo tua, oluk henede we’gerlak welat, ebabut enagat ’balogwi henaluk a’geat de, di a’ge yu a’ge o yogodak tago a’ge ai, his henaluk emagoluk tagokhwe hogu legep a’geat de, pobirak erlak welegep yema re!] 4#Mat. 12:39; Luk. 11:29His aphwami yogodak ya welegep a’ge yema re, henebabut modok wiak til no’gulat, Allah emin lo’boksogo wolom puk yema re! Asogo welat, his en e,
Nis en pobi hobuogoluk e, hat en elalin a’ge mesik tin da, oluk mo’gulnogu legep a’geat de, an nebe pobi nobuagoluk an en elalin mu a’ge mesik tik erlak o. We, at Yunus en aphwami pema pobi tuagoluk elalinat tegei ai ’gela’ge nak e, an en pobuk mesik tisokhwe henil niagup ani o,” oluk asogo mo’gulentesirik, is ap ebano eba ugonoboluk e, o momu laga.
“Aphwami Farisi a’ge Saduki a’ge enemin onowene re, so’boru roti poruagoluk e’gen ano ogola ’gwelabogwi ai ’gela’ge o,”
oluk mo’gulentesi wene
(Markus 8:14-21)
5At Yesus osi iak wogu legesa a’ge ebano en emin ik ye’gelak ano ik etle akhit o’gwe lebegesarik, osi enil yethegesa ’gal e, so’boru roti a’ge memerak poluk legesema re, 6#Luk. 12:1at Yesus en e, disogo mo’gulentesi,
“Is ap Farisi a’ge emin, ap Saduki a’ge emin, e’gen so’boru roti poruagoluk ogola ’gwelabogwi ai ’gela’ge tenakho oruak a’ge ano pam wiagaphonobuano oluk, henebabut heberlogo welemis o,” oluk mo’gulentesi. 7Asogo mo’gulentesimu, is-is nak ogulat e, disogo egesa,
“So’boru roti a’ge mesik woluk wom erlak ai en egei hegi,” oluk ogwiam 8at Yesus en enagat pobirak enebesirik e, disogo mo’gulentesi,
“Henede nebam he’berik po puk a’ge yema re! His-his nak ogulat,
So’boru roti a’ge erlak, oluk ogu legep ai nopaget. 9#Mat. 14:17-21Henede dokhumsogo pobi togu legep erlak yema re! So’boru roti a’ge ebe huaben a’geat de, ap enebe 5.000 ne’gesa a’ge ano memerak pegep? Asogo ne’gesarik dedilogo pegesema, mul sum egeik a’ge meren ’gela’ge ogola yagasogo pegep no. 10#Mat. 15:34-38Ye, agaikhe so’boru roti a’ge ebe sabiren a’geat de, ap enebe 4.000 a’ge ne’gesarik dedilogo pegesa a’ge, mul sum egeik a’ge meren ’gela’ge ogola yagasogo pegep no. Henede eberak erlak welegep yema re! 11An en so’boru roti a’ge paget mo’gulhentegis erlak a’geat de, nopaget pobitu erlak welegep. E’gen so’boru roti a’ge poruagoluk ogola ’gwelabogwi a’ge ai ’gela’ge, is ap Farisi a’ge emin, Saduki a’ge emin, pekharok oruak ai en henebabut heberlogo welemagoluk mo’gulhentegis o,” oluk mo’gulentesi. 12Asogo mo’gulentesimu, is ebano pobi tigisarik e, disogo egesa,
“I. Wene egei ai re, we, e’gen so’boru roti a’ge poruagoluk ogola ’gwelabogwi a’ge ai paget mo’gulnentesi erlak o. At e, is ap Farisi a’ge emin, Saduki a’ge emin, onowene mo’gulontogwi a’ge ebano pam wiagapnonobuano oluk, nenebabut heberlogo welemagoluk mo’gulnentesi ani o,” oluk pobi tigisa.
At Petrus en, “Hat hebe Kristus at o,”
oluk ’baksogo Yesus mo’gulesi wene
(Markus 8:27-30; Lukas 9:18-21)
13O eba en, at Yesus o kota Kaisarea ap ’gain Filipi en logap tegeimu eba orlu agarik e, at osi iak wogu legesa a’ge ebano hin wogentasulat e, disogo mo’gulentesi,
“Is aphwami en, an abat daklau wegi a’ge ano an nebaget ogulat e, sa oluk ogwi no,” oluk mo’gulentesimu, 14#Mat. 14:1,2; Mrk. 6:14,15; Luk. 9:7,8is en e, disogo egesa,
“Is aphwami nin pema en e,
At ebe re, Yohanes ik olomu ’belabenebise laga a’ge ano de o, ogulat, is nin pema en e,
At ebe re, Elia de o, ogulat, is nin pema en e,
At ebe re, Yeremia de, hwi a, ap Allah iak mo’gulontogu legesa a’ge ebano mesik hwi a? ogulat, ogwi o,” oluk mo’gulegisa. 15Asogo mo’gulegisema, at Yesus en e,
“Is en asogo ogwi a’geat de, his en nak e, an nebaget e, sa opogu legep no,” oluk mo’gulentesimu, 16#Yoh. 6:68,69at Simon Petrus ano en e,
“Hat hebe re, Kristus Allah elaluk modok welago a’ge omlogo, nis delnonobuagoluk at en perakpou weigoluk obok mo’gulnentesi a’ge anoat o,” oluk mo’gulesi. 17Asogo mo’gulesimu, at Yesus en e,
“Simon Yona omlogo not o. Aphwami en mo’gulhegisema e’gen erlak o. We, an naik ’bogorl pam a’ge en mo’gulhesimu e’gen ani o. Holuk e, hogola hagai hasu lemen o. 18Ye, mesik emin mo’gulheik. Hat honuk helep u ’gela’ge, Petrus o. Ye, helep ia yu pam he’bisogo re, an nosi odoksogo onoboluk o ’gela’ge wusogo enebaik holuk e, at opma ogodima eiye a’ge ano en ningsogo tenentarok welema erlak o. 19#Mat. 18:18; Yoh. 20:23At Allah en eragam enebasuam ’gogumu eba, ’goduk horogwi a’ge kunci hat wokheik o. Hat en, ’gwiangma yema a’ge paget togup no yo o, oluk, wene ’balogun holuk e, ’bogorl pam a’ge en ogo wene ’balegei ’gela’geat ua o. Ye, hat en ’gwiangma yema tu op oluk ogun holuk e, ’bogorl pam a’ge en ogo op egei ’gela’geat ua o,” oluk Petrus mo’gulesi. 20Asogo mo’gulesirik, osi ebano ’berlegat disogo mo’gulentesi,
“His en e, an nebaget e,
At ai Kristus, Allah en delnonobuagoluk perakpou weik, oluk obok mo’gulnentesi a’ge anoat o, oluk aphwami ado pema modok mo’gulentagup o,” oluk enesa’go weregei.
At Yesus en e, “Di obotut yu obotut nebam poluk watnobua ani o,” oluk naduk mo’gulentesi wene
(Markus 8:31–9:1; Lukas 9:22-27)
21Hwerli ai hwerli en e, at Yesus en osi iak wogu legesa a’ge ebano at pobuk tua a’ge disogo oluk, ’baksogo mo’gulentesi,
“An o Yerusalem eba lo nedetak welegi o. Laikmu re, is ap enarlue a’ge ebano emin, Allah eiye a’ge onuelak ’gaindek emin, Allah iak pelal wogo eiye a’ge emin, enemin en, di obotut yu obotut a’bigat taknoboluk an nebe watnobua ani o. Watnobuema, nebe werak agauwa ’biren weleiktik e, agauwa henaganak a’ge en e, Allah en nelalugapnobua o,” oluk ’baksogo mo’gulentesi. 22Asogo mo’gulentesimu at Petrus en e, Yesus woluk ematekma lagarik disogo mo’gulesi,
“Hat wene e’gen ai asogo takhobouwano oluk, Allah en delhobuak o,” oluk esa’go weregei. 23Esa’go weregeimu, at Yesus epema hebeksogo Petrus ’gwelakholuk disogo mo’gulesi,
“Hat Iblis hegi o. Allah ede epasu hegitsogo eberigen erlak, we aphwami en opogwi hegitsogo eberak poluk ne’gebela ’balise legen yu, nologotma yema enat ’bok lak o,” oluk mo’gulesi. 24#Mat. 10:38; Luk. 14:27Asogo mo’gulesirik e, at osi iak wogu legesa a’ge ebano mesik disogo mo’gulentesi,
“At ap sa en an ne’berlik nese leigoluk holuk e, ebabut u’gwarek paget ede ’burl welat tiso a’ge ai,
Nebit, oluk ukpoluk, e pam edikpoluk warenebiso a’ge ai agan a’geat woluk ne’berlik nese leigoluk wemak o. 25#Mat. 10:39; Luk. 17:33; Yoh. 12:25Ye, ap sa u’gwarek en,
An nebe nelaluk wolom nagai yo, oluk ebe erlele hwerlasu holuk e, waremarik e, nal ema o. A’ge re, ap sa en ebe erlele hwerlasu erlak an nebaget warago holuk e, ebe erlele horlouwa o. 26Ap sa en di a’ge yu a’ge ’gwiangma a’ge ’berlegat eiye ema a’geat de, pobuk ebe nal emarik holuk e, at en e,
An mesik elit sabusogo pagathwerlegi, oluk u no? Modok erlak o. Ebe nal ema ai ebalema re, no’gwe a’ge e’birek o’go dip tu no. Mia o. 27#Mzm. 62:12; Mat. 25:31; Rom. 2:6An abat daklau wegi ano re, pobuk naik erliktogwi modok welagai ai ’gela’geat takpoluk, is malaikat Allah ’bogorl pam en yo’go ’belagonobou ago a’ge ebano nenemin womultik, ai erlige re, aphwami ’berlegat enebabut lo’bok togwi a’ge hegitsogoat o’go wogentauma o. 28Ye, his edik welegep a’ge yema ado pema warom erlak welat, an abat daklau wegi ano ’gain Nonuk Logo a’ge weleigoluk aphwami ’berlegat neragam onobou agoam henil niagubat o, oluk demat mo’gulhentegis o,” oluk mo’gulentesi.
Currently Selected:
Matius 16: Wul
Highlight
Copy
Compare
Share
Want to have your highlights saved across all your devices? Sign up or sign in
