Matius 15
15
“Hena’bu hene’balak togu legesa hegitsogo
togu legep o,” oluk mo’gulentesi wene
(Markus 7:1-13)
1Asogo togwi oruakma, is ap Farisi a’ge ado pema emin, is ap Allah iak pelal wogo eiye a’ge ado pema emin, o Yerusalem en Yesus e’bek wegesarik e, wene disogo mo’gulegisa,
2“Is ap hat hosi hiak wogwi a’ge yema en, nena’bu nene’balak togu legesa hegitsogo togwi erlak sagalogo ukpoluk ene’gik petne emerogwi erlak welat en de, so’boru no’gwi ai nopaget,” oluk mo’gulegisa. 3Asogo mo’gulegisema, at Yesus en e,
“Holuk e, his ogo re, Allah en e,
Disogo tip, asogo tip, oluk nenesa’go weregei wene ano sagalogo ukpoluk, hena’bu hene’balak en togu legesa a’ge hegitsogo nak togu legep ai nopaget. 4#Kel. 20:12; Ula. 5:16; Kel. 21:17; Ima. 20:9At Allah en eselat e,
Henaiklak henialak hau do’goksogoat waronobogu lemis o,
oluk egeitik e, mesik disogo egei,
Sa en aik ia obok wiak ’baliso holuk e, at ai ebe modok woru o,
5oluk nenesa’go weregei a’geat de, his en e, disogo mo’gulontogu legep,
Sa en ia de a, aik de a, mo’gulontogulat e,
An en a’ge di a’ge yu a’ge hat wokhoum a’geat de, Allah akhit pegirikmu o, oluk mo’gulontogu lemagoluk mo’gulontogu legep ai o. 6Asogo mo’gulontogu legep ai en e, is asogo tugumu, is enaiklak enialak hau do’goksogo waronobogwi erlak ai o. Asogo ogu legep ai pam, his hena’bu hene’balak togu legesa wene ano tenakho welat e, Allah iak sagalogo ukpogu legep ai o. 7His henagap pam nak op ’gela’ge welat henede ’biren yema re! At Yesaya en Allah iak mo’gulentasulat wene disogo egei ai, his henebaget hegitsogo egei ani o.
8 #
Yes. 29:13
Allah en e,
Is aphwami yema re, we, enemde pam en nak, an erliknobugulat, enede an nebam eberogwi erlak welat e, momu ebesi lagai o.
9Wene aphwami eniak a’geat de, an en egi a’ge ’gela’ge mo’gulontogwi ai en e, we ’burlat an erliknobogwi o,
oluk egeimu, Yesaya en pelal wokho pesimu oruak ano, his henebaget hegitsogoat egei yo,” oluk mo’gulentesi.
“Aphwami wene onogola en ’gagalogo orlu agoam ogwi ai en, wiagabenebiso ebe aiat o,”
oluk mo’gulentesi wene
(Markus 7:14-23)
10Asogo mo’gulentesirik e, pobuk at Yesus en aphwami a’bik ebano worlentesimu wegesema re, wene mesik disogo mo’gulentesi,
11“An wene ik a’ge yu his pobi togup en henesa’go opsogo hwelit o. Di a’ge yu a’ge enemde lo’gwe ’gwelabogwi ai en enebe wiagabenebiso erlak o. A’ge re, enemde pam en wene ogwi ai pamat wiagabenebiso yo,” oluk mo’gulentesi. 12Asogo mo’gulentesimu at osi iak wogu legesa a’ge ebano e’bek wegesarik e, disogo mo’gulegisa,
“Wene mo’gulnentigen ano, is ap Farisi a’ge en enesa’go hweligisarik e,
At wiagat egei yo, oluk enebit hepegesa ai re, pobi tigen a? Erlak a,” oluk mo’gulegisa. 13Asogo mo’gulegisema at Yesus en e,
“Di a’ge yu a’ge an naik ’bogorl pam a’ge en owi yoru erlak a’ge holuk e, modok henokhoat hwikhouwa o. 14#Luk. 6:39Enil hopnik welat e, ebela ene’gik tenakho wogonoboluk lagai ai re, ukpemit o. At agaikhen il hopnik a’ge en, at agaikhen asogoat il hopnik a’ge mo’guleselat e,
Ebela ’go yu lul, oluk e’gik tenakho woluk louwa holuk e, e’biregat ’galok wogoma e’gerlik ’bilo yo,” oluk mo’gulentesi. 15Asogo mo’gulentesimu, at Petrus en e, disogo mo’gulesi,
“Nue. Wene ebam elitsogo mo’gulnentigen ai re, ebe ’baksogo mo’gulnentemen o,” oluk mo’gulesi. 16Asogo mo’gulesimu at Yesus en e,
“His ogo re, is enemin hegirat wene ai owan pobitu erlak welegep a? 17Di a’ge yu a’ge no’gwiam, enemdema en ’bekhit onogum pam ’biselat e, pobuk enemieat wesi lagai o, oluk his pobi togu legep erlak a? 18#Mat. 12:34A’ge re, wene enemde pam en libago ai re, enedemu en ’gagalogo orlu ago ai enat enebe wiagabenebiso yo. 19Onogola en wene wiak a’ge eberugulat, aphwami waronobogulat, hwami ap onugwami a’ge ’babi tenontogulat, hwelani ’babi tenontogulat, yogorlia wogulat, enepenenat is agaikhe wene enebam pogulat, onobok wik-wiaksogo ’balugulat, togwi ai re, onogola enat ’gagalogo orlu agoam libago yo. 20Wene onogola en ’gagalogo orlu ago ai en enebe wiagabenebiso ai o. A’ge re, ene’gik petne emerak erlak so’boru no’gwi ai en wiagabenebiso erlak o,” oluk mo’gulentesi.
Hwe o Kanaan a’ge en ede Yesus ebam
he’berik pesi wene
(Markus 7:24-30)
21At Yesus en wene asogo mo’gulentesirik e, o eba ukpoluk o Tirus Sidon eba orlu aga. 22Orlu agama re, hwe mesik o Kanaan eba owirak a’ge Yesus e’bek wagarik e, iak loksogoat disogo mo’gulesi,
“Daud en dogo’gwe a’ge nue. An nagalogo mu’gat ebabut wiak a’ge ogola ’gwegeirik wiagat oruak o. Holuk e, hedeapnebemen o,” oluk mo’gulesi a’geat de, 23at Yesus en e, o’go modok mo’gulom erlak mo egeimu re, is ap at iak wogu legesa a’ge ebano wegesarik e,
“Hwe yu nene’berlik wagalat iak eli a’bik yu, ’bok louwagoluk perakpemit,” oluk mo’gulegisa. 24Asogo mo’gulegisema re, at Yesus en e, disogo mo’gulentesi,
“Allah en,
Is aphwami Israel a’ge enebe wam domba wam nalago ai ’gela’ge oruak ai en, is nak entai lak oluk peraknobou waga o,” oluk mo’gulentesi. 25Asogo mo’gulentesimu oruakhwe, at hwe ano Yesus e’bek wagarik e, odogorlu pam hweriogo welat hau weriselat e, disogo mo’gulesi,
“Eige! Nue. Letniemen da,” oluk iak erlagaik ’gusogo mo’gulesimu, 26at Yesus en e,
“Malik onso’boru a’ge wik-wok, mene nouwagoluk emdema hwikhai loma re, mia o,” oluk mo’gulesi. 27Asogo mo’gulesimu, at hwe ano en e,
“I, nue. Demat e’gen a’geat de, at mene eiye a’ge ai so’boru e delak pam nasumu, e’gen ’gwiangma ’belabisoam e, mene ai enat nasu o,” oluk mo’gulesi. 28Asogo mo’gulesimu, at Yesus en eselat,
“Hwe yu nerei yo. Hat en e,
At en tua o, oluk hede nebam modok he’berik pegen ai en e, hede eberigen ai ’gela’geat hegitsogo obaphebaik o,” oluk osokhwe erianoat, agalogo ano op aga.
At Yesus en aphwami a’bigat ou
obabenebegei wene
29Yesus en asogo takpoluk, o eba en ’begeitik e, ik Galilea ye’gelak ano esa’go’gwe lasu lagarik e, duk pam ligagarik eba huraga. 30Huragarik oruakma re, aphwami enebe a’bik at e’bek wagalat e, onoyuk soborak a’ge emin, enil hopnik a’ge emin, ene’gik onoyuk edenak a’ge emin, eniak erlak a’ge emin, is pema enebam ou a’ge a’bigat, wogonoboluk Yesus e’bek wegesarik at eragam onobou wegesema re, at en modok obabenebegei. 31Asogo obabenebegeimu re, is aphwami ebano eniak erlak a’ge eniak ogulat, ene’gik onoyuk edenak a’ge op agalat, onoyuk soborak a’ge op otluk ebela lagalat, enil hopnik a’ge dek otluk yerontugulat, tugumu entigisarik e,
“Eige! Nis aphwami Israel a’ge nenaik Allah nonogorlok o,” oluk erliktigisa.
At Yesus en aphwami esan mesik ap nak enebe 4.000 so’boru eseik-’beseiksogo wogentesi wene
(Markus 8:1-10)
32Asogo tigisema e’berlik e, at Yesus en at iak wogu legesa a’ge ebano worlentesi. Worlentesimu wegesema re, at en e,
“Nosilak logwe. Is aphwami a’bik yema nenemin modok welat agauwa henaganat nogogerikmu re, onso’boru modok erlak agama no’gwe no ’gela’geat oruak ai re, nede en nede heseliso yo. So’boru modok no erlakma ai re, ebela lagaihwe dawat hwerlil yawat hwerlil louwano oluk, an en peragonobo re, nebit ’gela’ge o,” oluk mo’gulentesimu re, 33at osi iak wogu legesa a’ge ebano en e, disogo mo’gulegisa,
“O leimu aphwami onowi werik modok erlakma yema aphwami a’bik odoktak a’ge yema so’boru roti a’ge onogumsogo nouwagoluk, ebe ’geba a’ge wogontul o,” oluk mo’gulegisa. 34Asogo mo’gulegisema at Yesus en e,
“His so’boru roti worogo a’ge meren tenak welegep,” oluk hin wesimu, is en e,
“We, ebe sabiren nak. Ye, hiane emalik a’ge, we, wei nak oruak o,” oluk mo’gulegisa. 35Asogo mo’gulegisema, at en e, aphwami a’bik odoktak welegesa a’ge ebano ’gwiang o’gwe huremagoluk mo’gulentesi. 36Mo’gulentesirik e, so’boru roti a’ge sabiren eriano emin, hiane eriano emin, e’gigem wesirik, Allah hau wusogo re, so’boru roti a’ge eriano ’gusogo aphwami a’bik ebano so’burontouwagoluk, at osi iak wogu legesa a’ge ebano wogentesimu, so’burentigisa. 37So’burentigisema onogumsogo ne’gesarik, dedilogo pegesema re, mul sum sabiren emde lorophegeik yagasogo pegesa. 38Is so’boru ne’gesa ai re, hwami malik enemin wenagonobu erlak. We, is ap enarlue a’ge nak e, enebe 4.000 at wenagenebigisa. 39Ye, so’boru noluk e, at Yesus ano aphwami a’bik odoktak ebano onowi lo’gwe lo’bok
peragonoboluk e, at ebe ik so ogola ’gwegeitik ik so wusogo re, o Magadan liplau waga.
Currently Selected:
Matius 15: Wul
Highlight
Copy
Compare
Share
Want to have your highlights saved across all your devices? Sign up or sign in
