Matius 14
14
Yohanes ik olomu ’belabenebise laga a’ge ano
ebe werigisa wene
(Markus 6:14-29; Lukas 9:7-9)
1O eria hegit e, at Herodes o Galilea do’go ’gain onuk logo a’ge welaga a’ge ano, Yesus en taga laga a’ge ano obok hwelegeitik e, 2at osi disogo mo’gulentesi,
“Yohanes ik olomu ’belabenebise laga a’ge ebe weregismu waraga a’ge ano pobuk elaluk aga ai en e, elalin tu puk a’ge til denago ai o,” oluk ebe Yesus taga laga a’geat egei o. 3-5#Ima. 18:16; 20:21; Luk. 3:19,20At Herodes en Yohanes pageat weregei ai re, wene disogo oluk. At ’gain Herodes en e, ot Filipus ugwe Herodias ai delogo wesi ai en e, at Yohanes en e, Herodes disogo mo’gulesi,
“Hwe Herodias wo pukmuat wegen ai, wogo wolom mia o,” oluk mo’gulesi ai en e, Yohanes ebe e’gik herle wusogo re, o ene’gik herle wusogo onobugumu ’gwelakpesirik werigoluk tegei a’geat de, is aphwami en e,
“Yohanes ai Allah iak mo’gulentasu a’ge,” oluk ogumu re, woru ogorlok aga.
6A’geat de, agauwa at Herodes ai ebe dagaga hegit lau wagama re, seni sorogulat e, at hwe Herodias agalogo salisik a’ge ai, aphwami a’bik ene’gerlakma en darlik tagalat da horlok ya horlok til denagoma re, at ’gain Herodes ai ogola agai a’bik hesi. 7Agai a’bik en Allah onuk ho’buk ’balogo, hwele ano mo’guleselat e,
“Hat no ’gonu mo’gulnorogun holuk, wokheigat o. Holuk e, mesik ’gonu mo’gulnemin da,” oluk mo’gulesi. 8Asogo mo’gulesimu, hwele salisik a’ge ano ia en arat esa’go weregeimu no oluk e, disogo mo’gulesi,
“Naik, at Yohanes ik olomu ’belabenebiso a’ge ano a’gul ’balogo re, piring lok a’ge pam dalogo woknemin o,” oluk mo’gulesi. 9Asogo mo’gulesimu, at ’gain Herodes ano ede wiak aga a’geat de,
“An en Allah onuk ho’buk ’balogo obok mo’gulosokhwe aphwami a’bik seni sakho nouwogoluk odoktu egesa a’ge yema arat enesa’go hweligisarikmu re,” oluk, osi en hwele ano egei hegitsogoat a’gul ’balogo wogesi louwagoluk mo’gulentesi. 10Asogo mo’gulentesimu legesarik e, at Yohanes ano aphwami ene’gik herle wusogo onobugumu ebano oruakma ’goluk e, o’gorlop ’baligisa. 11O’gorlop ’balogo a’gul ’belak ano piring pam dalogo poluk hwele salisik a’ge ano wogosu wegesema re, at en e, ia wogesi laga. 12Asogo tigisema re, at Yohanes osi iak wogu legesa a’ge wegesarik e, ebe werak ano ’gwiangma selak poluk e, obok nak Yesus mo’gulesi legesa.
Asogo takpoluk welat, at Herodes en Yesus obok hwelegeitik,
“Yohanes elaluk agarik denago hegi,” oluk egei ai o.
Yesus en aphwami enebe 5.000 a’ge
so’boru eseik-’beseiksogo wogentesi wene
(Markus 6:30-44; Lukas 9:10-17; Yohanes 6:1-14)
13Aphwami pema en e,
“Herodes en Yohanes ano weregei o,” oluk egesema Yesus esa’go hwelegeitik e, o eba ukpoluk e, ik so wusogo omuat ’geksogo o aphwami enareng erlakma eba lagama, aphwami enebe modok a’bik enesa’go holholuk e, onowi seli lo’bok en, ik esa’go’gwe en e’berlik legesa. 14Is naduk legesarik oruakma, at Yesus pobuk ik so wusogo lagarik, so ogola en ene’bek libagarik, il yerontoluk edeabenebegeitik e, is pema ou wiak a’ge ebano obabenebegei. 15Asogo obabenebisokhwe, o arat hup agama re, at iak wogu legesa a’ge ebano Yesus e’bek wegesarik e, disogo mo’gulegisa,
“Nis o yema aphwami enareng erlak en oruakhwe, o arat lobuk egei yema re, aphwami a’bik yema onso’boru o’go ’baluagoluk e, o yema esa’go esa’go seli wei o’gwe peragenebemen o,” oluk mo’gulegisema, 16at Yesus en e,
“Is ai lo puk o. His enat wogentemit o,” oluk mo’gulentesi. 17Asogo mo’gulentesimu, is en e,
“Nis e, so’boru roti a’ge nak e, huaben oruak. Ye, hiane re, ’biren oruak. We, eria nak de, tenak welege o,” oluk mo’gulegisa. 18Asogo mo’gulegisema, at Yesus en e,
“Eriayat woknosu manis o,” oluk mo’gulentesi. 19Asogo mo’gulentesimu re, e’gigem pou wegesema, at Yesus en aphwami a’bik ebano disogo mo’gulentesi,
“’Bugubugu petne eba huretil lit o,” oluk mo’gulentesimu huretil legesema re, so’boru roti a’ge huaben eriano emin, hiane ’biren eriano emin, e’gikmu wesirik e, il ’bogorl akhit likharok welat, Allah hau werak poluk ’gusogo re, osi iak wogu legesa a’ge ebano en so’burontouwagoluk ene’gigem pesimu so’burentigisa. 20Asogo so’burentigisema, is enebe ’berlegat onogumsogo ne’gesarik dedilogo re, mul sum 12 emde lorophegeik yagasogo pegesa. 21Aphwami enebe ’berlegat ne’gesa a’ge ai, malik emin, hwami emin, wenagonobu erlak. We, ap enarlue nak e, enebe 5.000 wenagenebigisa.
Yesus oyuk ik ogum petne dasobut laga wene
(Markus 6:45-52; Yohanes 6:16-21)
22Asogo arat ne’gesema en e, at Yesus en at osi iak wogu legesa a’ge ebano disogo mo’gulentesi,
“An aphwami esan yema peragenebaik en e, his naduk ik so ogola ’gwi laguptik e, ik etle akhit libaga lemis o,” oluk iak ningsogo mo’gulentesi. 23Asogo mo’gulentesimu, libagaihwe, at Yesus en aphwami esan ebano arat peragonoboluk e, at omu nak duk pam se’ban iogoluk ligagarik osoma re, o hik egeimu re, omuat eba welaga. 24Oruakhwe, osi ebano ik so wusogo walegat ik ede ’burl lai wegesarikmu en, yasobu annisogo onorogole’gwe en punhau wagama, ik erliak-’gwerliak hasulat a’bik ligagokhwe, ik so ano abel eden-peden hasu laga. 25Asogo tagokhwe, o dakha iogoluk ede we’gerlisokhwe, at Yesus oyuk ik ogum o’gwe pil-pil ene’bek waga. 26Asogo oyuk ik ogum petne pil-pil wagoma, is osi iak wogu legesa a’ge ebano enil yetholuk e, modok yuk egesarik onogorlok en e,
“Eige! Mu’gat wago yo!” oluk, eniak ngai-wai egesa. 27Asogo ogumu erianoat at Yesus en e,
“Nosi, yuk ogup. An nebeat waga legi o. Holuk, honogorlok hagup o,” oluk mo’gulentesimu re, 28at Petrus en e,
“Nue. Hat hebeat waga legen holuk e, an ik ogum petne toluk he’bek weik en,
Suk o, oluk mo’gulnemin o,” oluk mo’gulesimu, 29at Yesus en e,
“Suk o,” oluk mo’gulesimu, at Petrus ano so ogola en libagarik e, ik ogum petne toluk Yesus e’bek laga. 30Lasumu re, yasobu punhau wagama, il holuk ogorlok agarik e, ik ogola obuksogo ’biogoluk iak ngai eselat,
“Eiga! Nue a! Delnebi suk a,” oluk osokhwe erianoat, 31Yesus en e’gik tenakho edikpasulat e,
“Hat hede nebam he’berik erlak welegen yu re! Hede ’biren welegen ai nopaget,” oluk mo’gulesirik e, 32at emin so ogola ’gwigisema re, yasobu ano ’garok egei. 33’Garok egeimu re, is ap so ogola welegesa a’ge ebano en Yesus erliktugulat e,
“Hat demat Allah omlogo hiege o,” oluk mo’gulegisa.
Yesus en aphwami o Genesaret a’ge
ou obabenebegei wene
(Markus 6:53-56)
34Asogo toluk, ik so wusogo liplau wegesarik e, o Genesaret eba hegit lau wegesa. 35Wagaimu re, is aphwami eba a’ge en Yesus ebe arat pobi tigisarik e, at obok o seli lo’bok mo’gulentil legesa. Mo’gulentil legesema re, aphwami ou werak a’ge ’berlegat wogonoboluk Yesus e’bek wegesema re, 36is en e,
“Yesus, hosum we ologun nak nene’gik tenhul a?” oluk eniak erlagaik ’gusogo mo’gulegisarik, is at osum tenhegesa a’ge ogo enebe ’berlegat op egesa.
Currently Selected:
Matius 14: Wul
Highlight
Copy
Compare
Share
Want to have your highlights saved across all your devices? Sign up or sign in
