Matius 13
13
“Ap mesik e’gen owi hwik ’belabil laga,”
oluk ebam elitsogo mo’gulentesi wene
(Markus 4:1-9; Lukas 8:4-8)
1Agauwa ai erlige re, at Yesus olema en liplau wagarik e, ik Galilea omugwe ano esa’goma hweriogo oruakma, 2#Luk. 5:1-3ap ’gerelak lok mesik Yesus e’bek wegesema re, is enebe ik esa’goma edik oruakhwe onoboluk e, at ebe ik so pam hutlau ’gwegei. 3Hutlau ’gwegeirik, di pam yu pam elit hasulat wene a’bigat mo’gulentasu laga. Mo’gulentasulat e, mesik disogo mo’gulentesi,
“Ap mesik yabuk wokho owi yeriso a’ge owi peligoluk libaga. 4Libagarik, owi hwik ’belabil lasumu re, owi mesik e, ebelema ’belabegei. ’Belabegeimu, sue wagarik ’berlek perlengsogo ne’gesa. 5Ye, e’gen owi mesik e, helep pam ’gwiang weiyatma ’belabegei a’ge re, ’gwiang weiyatma oluk e, perleneat ’baktegei. 6A’geat de, o mo waga ’gal e, eme’en yoru erlakma oluk e, sawet-sawet e, ’bugat aga. 7Ye, owi mesik e, molip salma ’belabegei a’ge re, molip ano lok agalat e, owi op a’ge yogo ano obuk hesimu re, ’gen-’gen agarik e, weiyat aga. 8Ye, owi mesik e, ’gwiang mulimu ’belabegei a’ge re, ’baktegeirik ebe logat agarik e, e’gen a’bigat egesegei. Edip mesik pam en e, e’gen 100 egesegei. Edip mesik pam en e, e’gen 60 egesegei. Ye, edip mesik pam en e, e’gen 30 egesegei. 9Henesa’go oruak holuk e, opsogo hwelit o,” oluk mo’gulentesi.
Yesus en e, “Wene ebam elitsogo mo’gulhentasu legi ai re, ebe ai paget,” oluk mo’gulentesi wene
(Markus 4:10-12; Lukas 8:9-10)
10At Yesus en asogo mo’gulentesimu re, at osi iak wogu legesa a’ge ebano e’bek wegesarik e, disogo mo’gulegisa,
“Hat en aphwami yema wene di pam yu pam elit hasulat mo’gulentigen ano nopaget,” oluk mo’gulegisema re, 11at Yesus en e,
“Allah en eragam enebasu wene ai, at ogola hisogo welago a’ge, his nak e, henaluk emagoluk, ’baksogo mo’gulhonto epesi a’geat de, is aphwami muon eba nak de, ’baksogo mo’gulonto erlak epesi. 12#Mat. 25:29; Mrk. 4:25; Luk. 8:18; 19:26Ap sa en tenak oruak holuk, Allah en pobuk ebam louksogo wogemma re, at a’bigat eiye ema o. Ye, ap sa en tenak erlak holuk e, wei nagat welema a’ge eriano, Allah en togolik delogo horluema re, erlagaik ema o. 13Asogo tua ai en e, an wene ebam elitsogo is eba mo’gulentegis o. Is aphwami ai re, enil hogwi a’geat de, dokhumsogo hogwi erlak o. Ye, enesa’go hologwi a’geat de, dokhumsogo hologwi erlagat o. 14#Yes. 6:9,10Is aphwami enebabut ategenik a’ge ai paget e, at Yesaya en e, disogo egei,
Henesa’go hwelak wolorogup a’geat de, dokhumsogo pobi togup erlak o.
Ye, henil yetharok wolorogup a’geat de, dokhumsogo pobi togup erlagat o.
15Is aphwami yu enil hogulat, enesa’go holugulat, enede oborogulat, toluk en,
enepe heberlomma pobuk an en obabenebikno oluk e,
is en enede ’buk agalat, enesa’go lathogulat, enil hopnik a’ge uagoluk, enepenenat enil hopnik pogulat, tigisa o,
oluk Allah en egeimu Yesaya en pelal wokho pesi ai hegit emagoluk mo’gulentasu legi o. 16#Luk. 10:23,24A’geat de, his nak e, henil hogulat, henesa’go holugulat, togu legep ai en e, honogola henagai opogu lemis o. 17His henil hogu legep a’ge ai re, is ap Allah iak mo’gulontogu legesa a’ge emin, enebabut hegit a’ge emin, enebe esan en e,
Eige! Nenil holo yo, ogu legesa a’geat de, enil hogwi erlagat welegesa. Ye, henesa’go hologu legep a’ge ai, is eba en,
Nenesa’go hollu o, ogu legesa a’geat de, enesa’go hwelak erlagat welegesa, oluk demat mo’gulhentegis o,” oluk mo’gulentesi.
At Yesus en, “Ap mesik owi hwik ’belabil laga o, oluk mo’gulhentegis ano re, ebe disogo,”
oluk mo’gulentesi wene
(Markus 4:13-20; Lukas 8:11-15)
18Asogo mo’gulentesirik, mesik disogo mo’gulentesi,
“Wene ap mesik owi hwik ’belabil laga, oluk ebam elitsogo mo’gulhentegis ano, ebe mo’gulhentaik a’ge yu pobi tit o. 19Owi mesik ebela pam ’belabegei ai ebe re, is aphwami pema Allah eragam enebasu wene ai enesa’go holugularat de, ebe dokhumsogo pobi togwi erlak holuk, at mu’gat ebabut wiak a’ge ano wagarik e, wene enedemu owi yogo a’ge ano henokho horloluk lasu aiat o. 20Ye, owi mesik helep pam ’belabegei ai ebe re, is aphwami pema Allah iak ai enesa’go holugulat e, onogola enagai opogulat perleneat wogularat de, 21wene ai enedemu eme’en yogo erlak en e, weiyat oruakma re, aphwami pema en Allah iak ai paget di e’gin yu e’gin enebam pogulat, wiagabonobogulat, tugukhwe re, perleneat enede ’buk otluk e, wene ai ’goboksogo ukpoluk lebagai aiat o. 22Ye, owi mesik molip salma ’belabegei ai ebe re, is aphwami pema Allah iak ai enesa’go holugulat enat de, onogola en,
Yogodak ya paget no’gosogo tik logwe, oluk, wenemennei yat horok eberugulat,
Na’ge a’ge a’bik wellep e, oluk enede eberak poluk, onu’gwarek en lalhorlugulat, togwi ai en e, wene ai edip ’gen-’gen agarik e, e’gen egesiso erlak aiat o. 23Ye, owi mesik ’gwiang mulimu ’belabegei ai ebe re, is aphwami pema Allah iak ai enesa’go holugulat e, ebe dokhumsogo pobi togwiam, wene ai e’gen egesiso yo. Edip mesik pam en e, e’gen 100 egesiselat, edip mesik pam en e, e’gen 60 egesiselat, edip mesik pam en e, 30 egesiselat, egesiso aiat o,” oluk mo’gulentesi.
“Owi wiak a’ge emin, op a’ge emin, mesikmu en ’baktogwi,” oluk wene ebam elitsogo
mo’gulentesi wene
24At Yesus en wene asogo mo’gulentesirik e, wene mesik ebam elitsogo disogo mo’gulentesi,
“Allah en eragam enebasumu ai ebe re, ap mesik owi op a’ge yeregei ai ’gela’geat o. 25Asogo yeregei a’geat de, is aphwami nogo ogukhwe, ap mesik ap owi yeregei a’ge ai e’birek il ’belak a’ge wagarik e, gandum owi op a’ge yeregeimu ebano e’gerlakma owi wiak a’ge yogo poluk laga. 26Asogo yogo poluk lagama re, gandum owi ano ’baktegeirik e, e’gen osokhwe, wiak a’ge owi ano ’baksogo e’gela selakma aga. 27Selakma agama re, at ap yabuk eiye a’ge ano enat eragam a’ge ebano e’bek wegesarik e, disogo mo’gulegisa,
Nue! Hat hiabukmu ebano owi op a’ge yerigen epegi. I a? Erlak no a. E’gela wiak a’ge eba ’ga en wagarik ’baktegei o, oluk mo’gulegisema re, 28at en e,
Erlak o. Ai, at ap ne’birek il ’belak a’ge ano en yeregeimu hegi o, oluk mo’gulentesimu re, is at eragam a’ge ebano en e,
Holuk e, henokho mesikmu poluk lebikpo epegen a? oluk mo’gulegisema re, 29at en e,
Erlak o. E’gela wiak a’ge ai honumu re, gandum op a’ge ai ogo henema no oluk e, heni lagup o. 30Gandum e’gen owan ’balu erlakma re, emin saplisogoat ligaga lemak o. Ye, e’gen ’balu hegit ago holuk e, an en is ap e’gen ’balogwi a’ge mo’gulentasulat e,
E’gela wiak a’ge ai odouk narlul en e, ai naduk henokho herle hasogo poluk en, op a’ge ai odoksogo pogumu ebano pemit o, oluk mo’gulontouwa o, oluk eragam a’ge ebano mo’gulentesi,” oluk Yesus en mo’gulentesi.
’Gebi owi ebam elitsogo mo’gulentesi wene
(Markus 4:30-32; Lukas 13:18-19)
31-32At Yesus en asogo mo’gulentesirik, pobuk wene mesik ebam elitsogo disogo mo’gulentesi,
“At Allah en eragam enebasu ai ebe re, ’gebi e’gen owi ’gela’ge o. Ap mesik en ’gebi iabukmu pelegei. Di a’ge yu a’ge owi ai weiyat a’geat de, ’gebi owi ai nak e, modok weiyat o. A’ge re, sawi emin, wudat emin, agaikhe a’ge emin, ’baktiselat e, ebagase weiyat ’gela’ge ligago. A’geat de, ’gebi owi ai nak e, modok logat ligotluk, e ’gela’ge agoam e, sue dasogo denago a’ge wotluk e, ’gebi ano e’gik petne owi wosu ago ai ’gela’geat o,” oluk mo’gulentesi.
So’boru roti e’gen periso a’ge pam elitsogo
mo’gulentesi wene
(Lukas 13:20-21)
33Asogo mo’gulentesirik e, wene mesik ebam elitsogo mo’gulentesi,
“Allah en eragam enebasumu ai ebe re, e’gen so’boru roti a’ge ogola ’belabogwiam periso ai ’gela’geat o. Ye, hwe mesik en gandum sagalak tepung ul ’gela’ge 40 kilo lu’gweasogo wik-wok, e’gen ano a’ge roti poruagoluk ogola ’belakpoluk ne’garlok-he’garlok takpesimu re, ebe ’berlek ano modok peregei ai ’gela’geat o,” oluk mo’gulentesi.
“At Yesus en nopaget wene ebam elitsogo nak
mo’gulentasu laga,” oluk mo’gulentesi wene
(Markus 4:33-34)
34Aphwami esan ebano mo’gulentasulat e, wene mesik ’baksogo re, mo’gulentasu laga erlak. We, ebam elit holuk nak mo’gulentasu laga. 35#Mzm. 78:2Asogo taga laga ai re, ap mesik Allah iak mo’gulentasu laga a’ge en eselat e,
“An wene mo’gulentasulat e, ebam elitsogo nak mo’gulentasu leik ani o.
Allah en ’gwiang yu walhesi hwerli en wene hisogo modok welaga a’ge ’baksogo mo’gulentaik o,”
oluk egei ai hegitsogoat, Yesus en asogo mo’gulentasu laga o.
Owi wiak a’ge ebam elitsogo mo’gulentesi ano,
ebe ’beli’gogo mo’gulentesi wene
36Asogo mo’gulontoluk e, aphwami a’bigat ebano oruakhwe, at Yesus ebe olema ’gwi lagama re, at osi iak wogu legesa a’ge ebano e’bek ’gwi legesarik e, disogo mo’gulegisa,
“Owi wiak a’ge yabukmu ’baktegei oluk ebam elitsogo mo’gulentigen ano ebe ’beli’gogo mo’gulnentemen o,” oluk mo’gulegisa. 37Asogo mo’gulegisema, at Yesus en e,
“Ap mesik en owi op a’ge yeregei egi ano ebe re, an abat daklau wegi ano nebe yuat o. 38Ye, yabuk ai ebe re, o ’gwiangma di owi yu owi ’berlek aiat o. Ye, owi op a’ge ai ebe re, aphwami Allah eragam welagai a’ge enebe aiat o. Ye, owi wiak a’ge ai ebe re, at mu’gat ebabut modok wiak a’ge eiyagai aiat o. 39At ap yabuk eiye a’ge e’birek il ’belak welat, owi wiak a’ge yeregei ai ebe re, at Iblis aiat o. E’gen ’balua hegit ai ebe re, o ologun pam pagerat o. Ye, is ap e’gen ’balogwi a’ge ai ebe re, is malaikat Allah en ’bogorl pam en yo’go ’belagonobou ago a’ge aiat o. 40Ye, is aphwami en e’gela wiak a’ge odoksogo poluk e narlogwi ai ’gela’ge, o ologun hwerli pam asogoat tua o. 41An abat daklau wegi ano en nosi malaikat yo’go peragenebaikmu, is en e, Allah eragam enebasumu ebano en, di a’ge yu a’ge aphwami en wiak tuagoluk tagonobogwi a’ge ogo, di aphwami yu aphwami wiak togwi a’ge ogo, odoksogo onoboluk, 42’berlegat odoukmu peragonoboma welat, eniak ’gerlit marogulat nge togwi modok welema o. 43Ye, is Allah ogola epasu a’ge hegitsogo togwi a’ge ai nak e, enebe o mo dakhasogo yeriso ai ’gela’ge, enaik Allah eragam welema o, oluk henesa’go oruak holuk, opsogo hwelit o,” oluk mo’gulentesi.
“Ap mesik en o’go a’bik a’ge hisogo oruakma hwiakhwerlesi o,” oluk ebam elitsogo mo’gulentesi wene
44Asogo mo’gulentesirik e, mesik disogo mo’gulentesi,
“At Allah en eragam enebasu ai ebe re, disogo ’gela’ge. Op a’ge o’go a’bik a’ge yabukmu ’gwiangma hisogo sebelogo oruakma re, ap mesik en hwiakhorloluk ogola agai holuk togolik ’gwiangma sebelogo pagathorloluk owi pam lagarik e, at en a’ge di a’ge yu a’ge is muon enebam o’go ’balogo woluk, op a’ge ano hwerlaigoluk togolik wagarik yabuk ano o’go ’balegei ai ’gela’geat o,” oluk mo’gulentesi.
“Ap mesik en mutiara sale’gen ’gela’ge o’go a’bik a’ge hwiakhwerlesi,” oluk ebam elitsogo mo’gulentesi wene
45Asogo mo’gulentesirik, mesik disogo mo’gulentesi,
“At Allah en eragam enebasu ai ebe re, disogo ’gela’ge. Ap mesik di a’ge yu a’ge o’go ’baliso a’ge en mutiara sale’gen ’gela’ge op a’ge heratil neselat e, 46ebe o’go lok a’ge mesik hwiakhwerlesirik, owi pam lagarik at a’ge di a’ge yu a’ge is muon enebam o’go ’balogo woluk e, pobuk mutiara sale’gen ’gela’ge op a’ge wesi ai ’gela’geat o,” oluk mo’gulentesi.
Sum egeik a’ge pam hiane wogwi a’ge
ebam elitsogo mo’gulentesi wene
47Asogo mo’gulentesirik e, mesik disogo mo’gulentesi,
“At Allah en eragam enebasu ai ebe re, disogo ’gela’ge. Hiane wouwogoluk sum egeik a’ge ik laut lok ano ye’gelak ogola ’belabogwiam di hiane yu hiane a’gul onuk lo’bok modok ogola yagarago holuk, 48sum egeik a’ge ai ogola ’betesogo emde lorop osoam, ik esa’goma liplau wotluk hweriogo welat e, hiane op a’ge holuk degelogo sogoluak ogola yagarogulat, wiak a’ge holuk hwikhabugulat, togwi ai ’gela’ge, 49o ologun pam asogoat ema o. Is malaikat Allah en ’bogorl pam yo’go peragonobou wago a’ge ebano wemarik e, aphwami enebabut wiak a’ge ebano is aphwami Allah ogola epasu a’ge hegitsogo nak togwi a’ge enemin mesikmu oruakma ene’gerlakma en ’gegilogo lebigonobogulat, 50odouk orloukmu peragonoboma eniak ’gerlit marogulat nge togwi modok welema o,” oluk mo’gulentesi.
“Ap ’gain mesik a’ge ’get a’ge, naduk a’ge,
lebikpou wago,” oluk mo’gulentesi wene
51Asogo mo’gulentesirik e, mesik disogo mo’gulentesi,
“Wene ai arat pobi tigep a? Erlak a,” oluk mo’gulentesimu re, is en e,
“I o. Pobi tigeat o,” oluk mo’gulegisa. 52Asogo mo’gulegisema, at Yesus en e,
“Holuk e, is ap Allah iak pelal wogo eiye a’ge ebano en, Allah eragam enebasumu ano wene mo’gulogwi holuk e, ai disogo ’gela’ge tu a’ge o. Ap ’gain mesik a’ge ede hwedik a’ge pagathwerlasulat e, ’get a’ge lebikpou wagalat, page a’ge lebikpou wagalat, pobuk naduk lebikpou wago ’gela’geat o,” oluk mo’gulentesi.
Aphwami o Nazaret a’ge en,
Yesus onogola en mi-miarak pegesa wene
(Markus 6:1-6; Lukas 4:16-30)
53At Yesus en wene ebam elitsogo arat mo’gulentesirik e, o ebano ukpoluk e, 54at u’gwarek owi edipmu lagarik e, o aphwami Yahudi a’ge se’ban ogumu ebano ’goluk wene mo’gulentasuam, is aphwami enesa’go hweligisa a’ge en e, disogo egesa,
“Eige! Nogorlok o. Ap yu ede modok ’gagalak ai, wene ’ga en mo’gulegeitik waga. Ye, di a’ge yu a’ge elalinat til denago ai, ’ga en mo’gulegeitik til denago. 55Ap yu re, ap o weriso a’ge ano omlogo erlak no? Ye, ia onuk Maria ano erlak no? Ye, osi e’berlik a’ge re, Yakobus emin, Yusuf emin, Simon emin, Yudas emin, ebano erlak no? 56Ye, at orokhwi nis nenemin ’berlegat welege yema erlak no? Wene ai ’ga en woluk wagarik oso,” oluk onogola en mi-miarak pegesa. 57#Yoh. 4:44Mi-miarak pegesema re, at Yesus en disogo mo’gulentesi,
“Is ap Allah iak mo’gulontogwi a’ge ai re, o di owi yu owi lagaiam e, aphwami muon ebano en e, hau modok do’goksogo waronobogwi a’geat de, onu’gwarek onowi pam ebano lagaiam e, onuelak enarilak enemin mesikmu welagai a’ge nak e, hau do’goksogo waronobogwi erlak o,” oluk mo’gulentesi. 58Asogo mo’gulentesi ai re, is aphwami o Nazaret a’ge eba en, enede Yesus ebam he’berik pogwi erlak welat, onogola en mi-miarak pogu legesa ai en e, at o eba welat elalin tu puk a’ge loksogoat tu erlak, we, wei nak tegei ai en o.
Currently Selected:
Matius 13: Wul
Highlight
Copy
Compare
Share
Want to have your highlights saved across all your devices? Sign up or sign in
