Matius 10
10
Yesus en ap enebe 12 yo’go enebesi wene
(Markus 3:13-19; Lukas 6:12-16)
1Agauwa mesik erlige re, at Yesus en osi iak wogu legesa a’ge enebe 12 ebano odoktumagoluk worlentasuam wegesema re, is en aphwami logon mu’gat enebabut wiak a’ge onogola ’gwigisarik oruakma henokho lebikpogulat, di ou yu ou enebam oruak a’ge obabonobogulat, enanni erlakmaben a’ge holuk enanniabonobogulat, til louwagoluk, anni wogentesi. 2Ap enebe 12 eriano, ononuk e, yu: naduk e, Simon onuk mesik Petrus ogu legesa a’ge ano ot Andreas e’birek emin, Zebedeus omlogo Yakobus ano ot Yohanes e’birek emin, 3Filipus Bartolomeus e’birek emin, Tomas Matius pemerintah paget uang ’gonu oluk wasu laga a’ge ano e’birek emin, Alfeus omlogo Yakub Tadeus e’birek emin, 4Simon,
“O Kanaan yema nonowirak a’ge nak wolomok o,” oluk ese laga a’ge ano emin, Yudas Iskariot Yesus woruagoluk pobuk yo’go laga a’ge ano emin, is ononuk eriayat o.
At Yesus en e, is osi 12 ano tugulom a’ge paget
enesa’go weregei wene
(Markus 6:7-13; Lukas 9:1-6)
5At Yesus en is osi enebe 12 en so’busogo peragenebaigoluk, enesa’go disogo weregei,
“Is aphwami o’borlma a’ge onowi pam e, lagup o. Ye, is aphwami o Samaria a’ge onowi pam laguptik e, ’gwi lagup no yo. 6We, is aphwami Israel a’ge wam domba wam ebela nal lagai ’gela’ge ebela nal egesarik oruak a’ge ano ene’bek ’gwelagentil entil lu o. 7Lagalat e, disogo mo’gulentil lu,
Nenaik Allah ’bogorl pam a’ge en eragam nonobouwa ano re, yogodak arat nonobouwa o, oluk, mo’gulentil lu o. 8Is aphwami ou enebam oruak holuk obabonobogulat, waragai holuk enelalugabonobogulat, hwena’go ’gela’ge onogorlok a’ge ebano enebam oruak holuk obabonobogulat, mu’gat ebabut wiak a’ge onogola ’gwigisarik oruak holuk henokho lebikpogulat, til no’gu lomup o. An en o’go erlak wokhentegis ai ’gela’ge re, his asogoat o’go erlak wogentil laga lomup o. 9-10#1Kor. 9:14; 1Tim. 5:18Aphwami yabuk urontogwiam, onso’boru wogontogwi ai ’gela’ge, his en tagenebil lagaihwe re, is en wokhonto ’galatma re, uang lok a’ge emas emin, perak emin, wei a’ge tembaga emin, henauwak o’gwe yagasogo woluk lagup o. Ye, sum so’boru yagathorlo a’ge emin, honosum ’bukhorlo a’ge ’biren emin, honoyuk olukhwe’gwe ’buktu a’ge emin, ’bouwa’gun emin, woluk lo erlakma en e, we, henebe nagat lu o. 11His en o seli wei o’gwe, lok o’gwe, ’gwi lagup ’gal e, ap sa en hau wusogo henebe wokhonobogwi holuk, ebabut ’balholuk, at ap ano emin woloroguptik e, o momu louwogoluk holuk e, liplau woroguptik lu o. 12Ye, is logon onowi pam ’gogup ’gal e, is ap onowirak a’ge ebano hau warenebip o. 13Ye, is aphwami ebano enebabut op en wokhonobogwi holuk e, hau heniak lebeksogo waronobogup ano pam, Allah en ogo hau lebeksogoat waronobua o. Asogo a’geat de, enebabut wiak holuk e, hau waronobogup a’ge ano heniak uak wokho horlomup o. 14#Per. 13:51Ye, is eba en henebe wokhonobogwi erlak welat en de, heniak hologwi erlak ukhonobogwi holuk e, o eba ukpoluk togolik liplau wagalat, honoyuk ollong a’ge hosogo ’belakpoluk liplau manup o. 15#Kej. 19:24-28; Mat. 11:24; Luk. 10:4-12 Yogodak e, an niak demat mo’gulhentaik o. Pobuk nenaik Allah ’bogorl pam a’ge en wene enebam pasulat, no’gorliselat, tua ai erlige re, is aphwami o Sodom Gomora a’ge eba re, wene enebam poluk wiagabonobua a’geat de, se ’gela’geat o. A’geat de, is aphwami o seli his wokhonobu erlakma en, ukhonobouwa a’ge ai nak e, wene e’gin a’ge enebam poluk modok wiagabonobua o,” oluk mo’gulentesi.
Aphwami en wiagabonobogukhwe,
“An Yesus ot o,” oluk ogulom wene
(Markus 13:9-13; Lukas 21:12-17)
16 #
Luk. 10:3
Asogo mo’gulentesirik e, mesik disogo mo’gulentesi,
“An en, his yu re, henebabut wam domba wam ebabut a’ge ’gela’ge, is aphwami enebabut mene orlomene ebabut wiak a’ge ’gela’ge ene’gerlak hialogo perakhenebaikmu ai re, henebabut ’gosu ebabut hi-hebeksogo tago ai ’gela’ge tugulat, sue ’berl ebabut op a’ge enago welago ai ’gela’ge welat, togu lomup o. 17#Mrk. 13:9-11; Luk. 12:11-12; 21:12-15Aphwami en is ap wene edip ’belo’gogumu ene’bek wokhonoboluk lagalat, o se’ban ogumu ebano en ’go’bu wathonobogulat, tua ano re, henebabut heberlogo wolomup o. 18Asogo takhonobouwa ai, edip an nebe nebagerat, ap ononuk logo a’ge emin, ’gain a’ge emin, ene’bek wokhonoboluk lagaiam e, his en is ap ai enil an tagokhwe henil niogu legep a’ge ano ’baksogo is mo’gulontogulat, aphwami o’borlma a’ge mo’gulontogulat, mo’gulontouwagoluk panoasuak henemdema wouwa ani o. 19Asogo henemdema wouwagoluk wokhonoboluk lagai holuk e, his en o’go mo’gulentagup a’ge ai erlige, at Allah enat honogola ’gagalua. Holuk e, o’go ’gesogo mo’gulontul oluk henede perogup o. 20Wene o’go mo’gulentagup ai re, his honogola en ’gagalogo ogup puk. We, henaik Allah Arogun honogola welat,
Disogo ip o, oluk mo’gulhentasukhweat ogup ani o. 21#Mrk. 13:12; Luk. 21:16Are mesik en e, at u’gwarek are mesik woruagoluk woluk lasulat, aik en e, omlogo woruagoluk woluk lasulat, eneiyagai en e, enialak enaiklak enebirabonoboluk, waronobuagoluk onobok ’balugulat, tua ani o. 22#Mat. 24:9,13; Mrk. 13:13; Luk. 21:17Ye, aphwami ’berlegat en an nonuk oluk,
His e, at osi o, oluk e, enebit modogat hontouwa ani o. A’geat de, sa en epe mosogo welema holuk e, o ologun pam Allah en agap delua o. 23O seli agaikhen en wiagaphonobuogoluk togwi holuk, hweiye o seli momu lu o. Is aphwami Israel a’ge onowi seli ado pema owan wene mo’gulonto erlak oruakhwe, an abat daklau wegi ano pobuk weik o, oluk, niak demat mo’gulhentegis o.
24 #
Luk. 6:40; Yoh. 13:16; 15:20 Is guru lak wene mo’gulontogwi a’ge sebelak ’gela’ge oruakhweat de, is eneiyagai mo’gulontogwi a’ge ai adia ’gela’ge logo welagai modok erlak o. Ai ’gela’ge re, is ap ’gain sebelak ’gela’ge oruakhwe, eneragam a’ge ai re, adia ’gela’ge logo welagai modok erlak o. 25#Mat. 9:34; 12:24; Mrk. 3:22; Luk. 11:15A’geat de, is malik ai enaiklak guru ebano enemin hegit agalat, ye, is eneragam a’ge ai enaiklak ebano enemin hegit agalat, tumu re, elirat o. Is aphwami onue o eiye a’ge ai wiak oluk onuk Beelzebul ogwi holuk, is at osi enemin mesikmu a’ge ai, asogoat ononuk wiak logat ogu lema o,” oluk mo’gulentesi.
“Allah en e, honogorloksogo wolom o,”
oluk mo’gulentesi wene
(Lukas 12:2-7)
26 #
Mrk. 4:22; Luk. 8:17 Asogo mo’gulentesirik e, mesik disogo mo’gulentesi,
“Pobuk Allah en, di a’ge yu a’ge sebelak a’ge ai enemak pasulat, hisogo a’ge ai ’bageselat, asogo tua ai en e, his en, is aphwami a’ge ai re, honogorloksogo wolorogup o. 27Ye, an en his o hiktakma mo’gulhentegis a’ge, his en o dakharakma ogu lomup. Ye, henesa’go lo’gwe niak ngorluksogo mo’gulhentegis a’ge ai, his en o dum pam ligoroguptik heniak ’baksogo mo’gulontogu lomup o. 28Aphwami en henarogun wathonobu re, mia. We, henagap o’borl petne nagat wathonobua ai paget e, honogorloksogo wolorogup o. A’geat de, at Allah nak e, henarogun emin, henagap o’borl petne emin, modok elirat wusogo odouk orloukmu perakhonobo ebelerak ai en e, at Allah at honogorloksogo wolomup o. 29Sue wulue ai o’go re, meren ’balogwi no. Ebe ’biren a’ge re, o’go uang sen modok wei a’ge mesigat pam wogwi ani o. Asogo a’geat de, henaik Allah ’bogorl pam a’ge en,
Sue ai dung ’bi louwak o, oluk owan u erlak oruakhwe, mesik ’gwiangma dung ’bi lasu erlak o. 30His e, henasu hena’gul pam ’berlegat Allah en e’gik modok wonogo welago yo. 31Allah en sue wulue ai ebe a’bigat a’geat de, logo ’gela’ge epasu puk o. Ye, his henebe ai nak e, logo ’gela’ge epasu o. Ai en e, honogorlok erlaksogoat welemis o,” oluk mo’gulentesi.
Aphwami enilem, “Yesus an nue,”
oluk eniak ’baksogo u wene
(Lukas 12:8-9)
32Asogo mo’gulentesirik, mesik disogo mo’gulentesi,
“Sa en,
Yesus ai an nue o, oluk aphwami enilem iak ’baksogo oso holuk e, an ogo re,
At ai an norat o, oluk naik ’bogorl pam a’ge ilem, niak ’baksogo igat o. 33#2Tim. 2:12Asogo a’geat de, sa en,
Yesus ai an neperlak o, oluk aphwami enilem elabe tago holuk e, an ogo re,
At ap ai an neperlak o, oluk naik ’bogorl pam a’ge ilem ’baksogoat ik o,” oluk mo’gulentesi.
Yesus en, “Aphwami is-is il ’balemagoluk wegi o,”
oluk mo’gulentesi wene
(Lukas 12:51-53; 14:26-27)
34-35 #
Mik. 7:6
Asogo mo’gulentesirik e, mesik disogo mo’gulentesi,
“His honogola en e,
At waga ai re, ’gwiangma yema weim lialigoluk waga oluk epagup o. An wegi ai re,
aik omlogo e’birek il ’balogulat, ia emalik e’birek il ’balogulat, iemalhwe-iemalhwe e’birek il ’balogulat, is-is enemin il ’balil louwagoluk wegi o.
36Aphwami enemin il ’belak wolom ’gela’ge re, onowi mesikmu a’geat enemin hwerli tua o.
37Ye, an e, henebit ’gela’ge taknobogulat e, henaiklak henialak henedesogo welegep holuk e, an nosi om erlak o. Ye, an henebit ’gela’ge welat heneiyagai emin, honogulani emin, henede welegep holuk e, an nosi om erlagat o. 38#Mat. 16:24; Mrk. 8:34; Luk. 9:23E pam edikpoluk waronobogwi a’ge ano, henagan domok henemarlo pam woluk an ne’berlik woluk wagai erlak holuk, an nosi om erlagat o. 39#Mat. 16:25; Mrk. 8:35; Luk. 9:24; 17:33; Yoh. 12:25Ap sa en u’gwarek ebe erlele hwerlasu holuk e, ebe warotluk nal ema o. A’geat de, ap sa en an nebaget warema holuk e, ebe erlele horlouwa o,” oluk mo’gulentesi.
“Aphwami enebabut togwi hegitsogoat,
Allah en o’go wogontouwa o,”
oluk mo’gulentesi wene
(Markus 9:41)
40 #
Mrk. 9:37; Luk. 9:48; 10:16; Yoh. 13:20 Asogo mo’gulentesirik e, mesik disogo mo’gulentesi,
“Ap sa en henebe wokhonobua holuk e, an nebeat woknobua o. Ye, an nebe woknobua ai re, an naik peraknobou waga a’ge ano ebeat wouwa o. 41Ye, ap sa en,
Ap yu Allah iak mo’gulentasu a’ge, oluk ebe wouwa holuk e, is ap Allah iak mo’gulontogwi a’ge o’go horlogwi hegitsogoat horlouwa o. Ye,
Ap yu hegitsogo tago a’ge, oluk ebe wouwa holuk e, is hegitsogo togwi a’ge o’go horlogwi ’gela’geat, horlouwayat o. 42Ye, sa en,
Malik wei a’ge yema Yesus iak wogwi a’ge, oluk ik horl a’ge mesik na’gogo wogema holuk e, Allah en o’go wogontouwa a’ge ano, horlo erlakma en, nal ema erlak o. Wogontouema re, horlouwayat o, oluk demat mo’gulhentegis o,” oluk mo’gulentesi.
Currently Selected:
Matius 10: Wul
Highlight
Copy
Compare
Share
Want to have your highlights saved across all your devices? Sign up or sign in
