Matius 11
11
1Is ap Yesus iak wogu legesa a’ge enebe 12 ebano enesa’go asogo wusogo onoboluk e, aphwami onowi seli lo’bok horogat a’ge wene op wene ano mo’gulontogulat, enesa’go worugulat, tiogoluk e, o eba enat laga.
Yesus en Yohanes ik olomu ’belabenebise laga
a’ge ano paget mo’gulentesi wene
(Lukas 7:18-35)
2At Yohanes ik olomu ’belabenebise laga a’ge ano e’gik herle werak oruakma, aphwami en e,
“Kristus asogo tiso,” oluk ogukhwe esa’go hwelegeitik e, at osi iak wogu legesa a’ge Yesus ebam hin wouwagoluk peragonobou waga. 3Peragonobou wagama wegesarik e,
“Ap agaikhen wema oluk ogu legesa ano re, harat a? Ye, at e, mu a’ge on yetharok wolomul a?” oluk mo’gulegisema, 4at Yesus en e, disogo mo’gulentesi,
“His e, an disogo yusogo tisokhwe henil niogulat, wene osokhwe henesa’go holugulat, tigep a’ge ai, at Yohanes dokhumsogo mo’gulesi lit o. 5#Yes. 35:5-6; Yes. 61:1Enil hopnik a’ge dek otluk op agalat, enawe edenak a’ge op otluk ebela lagalat, enebam hwena’go ’gela’ge onogorlok a’ge oruakma obabenebisoam op agalat, enesa’go lerak a’ge enesa’go husogo holugulat, werak a’ge enelalugabenebiselat, is pema ena’ge erlak a’ge op wene mo’gulontogulat, tisokhwe henil niegep ano dokhumsogo mo’gulesi lit o. 6Mo’gulotluk e, ap sa en an tago a’ge ano ebirapsogo uknebasu erlak welema holuk e, ogola agai hasu lema o, oluk mo’gulesi lu o,” oluk peragenebesi.
7Asogo peragenebesimu, is Yohanes osi ebano legesema re, at Yesus en aphwami a’bik ebano Yohanes obok disogo mo’gulentesi,
“His e, o leimu aphwami erlakma eba no’gwe on henil houwogoluk laga legep no. ’Bide e’gela ’bare e’gela yasobu en pusogo lak-wak tisoma dim tuogoluk laga legep a? 8Ye, at e, no’gwe houwogoluk legeptik. Ap mesik osum op a’ge ’buktakma houwogoluk legeptik a? Yethemit! Onosum op a’ge ’bukhorlogwi ai re, ’gaindek ononuk logo a’ge onowi pam welat holugat ’bukhorlogwi o. 9Holuk e, no’gwe houwogoluk legeptik. Ye, at e, ap Allah iak mo’gulentasu a’ge mesik oruakma henil houwogoluk legeptik a? Demat, aiat o. An en mo’gulhentaik. Is ap Allah iak mo’gulontogu legesa a’ge logon welegesa a’geat de, is ai re, mia ’gela’ge. At Yohanes ai nak e, onuk oruak a’ge logoat o. 10#Mal. 3:1At Allah en e, disogo egei,
Nomlogo yo. Hat pobuk ebela lagun o’gwe, he’gebela yakhese lemagoluk, ap mesik yo’go poluk naduk perakpaik ani o,
oluk egeimu pelal wokho pegesa ai ebe re, at Yohanes pagerat egei o. 11Holuk e, an niak demat mo’gulhentaik o. Aphwami ’berlegat enialak en dagenebil wegesa a’geat de, ononuk e, erlak nak o. A’geat de, at Yohanes ik olomu ’belabenebiso a’ge ai nak e, onuk oruak o. Asogo a’geat de, at Allah eragam enebasumu eba, at Yohanes ano onuk erlak ’gela’ge a’geat de, is aphwami logon ononuk erlak a’ge ai, ononuk oruak ’gela’geat o. 12#Luk. 16:16At Yohanes ik olomu ’belabenebise laga ai hwerli en e, yogodak ya pam e, is enebabut wiak asial polongnutak a’ge en, nenaik Allah eragam enebasumu ebano enebit en mabenap pouwogoluk enannisogo walhogwi. 13At Yohanes ebe owan wom erlak oruakhwe, wene Allah en nenesa’go weregei wene ano pam emin, is Allah iak mo’gulontogu legesa a’ge ano pam emin, pobuk ema ano a’ge ’baksogo mo’gulontogu legesa ano 14#Mal. 4:5; Mat. 17:10-13; Mrk. 9:11-13henedemu pobisogo wagup holuk e, ap Elia ebe wema, oluk obok egesa ano re, ebe Yohanes at waga ai o. 15Henesa’go oruak holuk e, opsogoat hwelit o.
16Aphwami o yogodak oruak ya re, no pam elit haik. Yu pam elitsogo ik o. Is ai re, malik pasar o’go wogumu eba hweriogo welat, enarilak enemin wene pei lou wom ogulat e,
17Nis weni wathontouwogoluk edip lebige a’geat de, his en pangtak lagai erlak. Ye, lo’gu maruogoluk, lo’gu edip lebige ’gal e, his en lo’gu marogwi erlak, oluk ogwi ano ’gela’geat togwi o. 18At Yohanes ano so’boru emin, anggur e’gen a’bosu emin, no erlak ukpoluk welaga ano paget, is aphwami en e,
At ai mu’gat ebabut wiak a’ge ogola ’gwegeirik oruak o, oluk ogwi o. 19A’geat de, an abat daklau wegi ano nak e, so’boru emin, anggur e’gen a’bosu emin, nil wegerikmu re, aphwami en nobok ogulat,
So’boru emin, anggur e’gen a’bosu emin, emde lagorak nasulat e, ap pemerintah paget uang ’gonu oluk wogwi a’ge emin, ap wiak til no’gwi a’ge emin, enemin hwediktak poluk denagai yu hemit! oluk ogwi ai re, Allah ede modok ’gagalak tago ai en, op agoam enil holuk,
Hegit o, oluk e, pobi tua o,” oluk mo’gulentesi.
Is aphwami o seli lo’bok wene demat oluk
enede eberak erlak a’ge mo’gulentesi wene
(Lukas 10:13-15)
20Asogo mo’gulentesirik e, aphwami o seli lo’bok at en elalin tu puk a’ge tagoam enil hogu legesa a’geat de, enede eberak erlak welat, di wiak yu wiak togu legesa a’ge ukpo erlakma en welegesa a’ge ebano wene yagentasulat e, disogo mo’gulentesi,
21 #
Yes. 23:1-18; Yeh. 26:1–28:26; Yoe. 3:4-8; Amo. 1:9,10; Zak. 9:2-4 “His aphwami o Korazim a’ge emin, o Betsaida a’ge emin, eige. Nede e. Aphwami en elalin tu puk a’ge an his henemin welat taga legi ano, o Tirus Sidon eba tagallema re, is aphwami o eba a’ge enebabut heberlotluk e, ’belagwi poluk togwi ’gela’ge onosum wiak a’ge ’buktugulat, ul ’gwiang ena’gul pam pogulat, tugulat e, wiak togu legesa a’ge ai ukpoluk, enebabut pageat heberlelep a’geat de, his e, asogo tu henebit ai en e, wiagaphonobua ai o! 22A’geat de, an niak demat mo’gulhentaik. Pobuk o ologun pam Allah en wene henebam pasulat, no’gorliselat, tua ai erlige re, is aphwami o Tirus Sidon eba wene enebam poluk selangsogo ’gela’ge waronobua a’geat de, his nak e, modok e’ginsogo ’gela’ge wathonobua o, oluk mo’gulhentegis o. 23#Kej. 19:24-28; Yes. 14:13-15 Ye, his aphwami o Kapernaum a’ge yu honogola en e,
Allah en ’bogorl pam legeik nonobouwarik logo nonobouwa o, oluk honu’gwarek en erlikhorlogu legep a? Modok erlak o. We, aphwami warotluk lagaimu eba modok ’belakhonobua o. Is aphwami en elalin tu puk a’ge an en his henemin welat taga legi ano, o Sodom eba tagallema re, is eba enebe erlak agai erlak yogodak ya ogo modok hwedigat wellep o. 24#Mat. 10:15; Luk. 10:12Pobuk Allah en wene enebam pasulat, no’gorliselat tu ai erlige re, is aphwami o Sodom welegesa a’ge wene enebam poluk selangsogo ’gela’ge waronobua a’geat de, his nak e, modok e’ginsogo ’gela’geat, wathonobua o, oluk mo’gulhentegis o,” oluk mo’gulentesi.
“His set hwalogup en ne’bek manis o,”
oluk mo’gulentesi wene
(Lukas 10:21-22)
25-26Asogo mo’gulentesirik e, o ai erlige, at Yesus en Allah ebe mo’guleselat e,
“Naik Allah o! ’Bogorl ’gwiang eiye harat o! Wene ’berlegat ai re, is aphwami enede ’gagalak a’ge emin, di wene yu wene enaluk a’ge emin, enaluk agoma no oluk hisogo poluk e, is enebabut malik ’get dogo a’ge ’gela’ge nak e, ’baksogo mo’gulentigen ai re, hogola hagai epegentik en mo’gulentigen ai paget, hau wathebise legi o, naik,” oluk mo’gulesi. 27#Yoh. 1:18; 3:35; 10:15Asogo mo’gulesirik, is aphwami ebano disogo mo’gulentesi,
“An naik en di a’ge yu a’ge ’berlegat eiye welemagoluk woknesi o. Ye, an Allah omlogo yu, aphwami ’berlegat modok eneperlak a’geat de, naik Allah ematek nagat, aluk oruak o. Ai ’gela’ge re, an naik Allah ai, aphwami ’berlegat modok eneperlak a’geat de, an omlogo nematek nak e, naluk welegi o. Ye, Allah omlogo an enat nogola opoluk en naik ebe aphwami pema enaluk emagoluk ’baksogo mo’gulentasu a’ge aiat enaluk agai o.
28His henebam e’gin-pe’ginsogo set a’bik togu legep a’ge ai, an en set henebam a’ge no’gorlogo paikmu set hwalogup en, ne’bek manis o. 29-30#Yer. 6:16An nosum a’ge yagarak sum ebagal sakhorakma re, opsogo yagasogo wokhentaikmu serak hagup ai en e, henemarlo pam wik-wok, an nebabut enago welat eneragam ’gela’ge welago ano opsogo mo’gulhwerlil denaga lomup o. Asogo til denaga lorogup holuk, henede ha’buk ua o,” oluk mo’gulentesi.
Currently Selected:
Matius 11: Wul
Highlight
Copy
Compare
Share
Want to have your highlights saved across all your devices? Sign up or sign in
