Imamat 24
24
Allah owi saboma esaga heberlogo po wene
1At Allah en Musa Mo’guleselat,
2-4“Aphwami Israel a’ge wene le’gelogo mo’gulonto ano re, yuat o. Nowi sabo werikmu esaga a’guluak 7 ano re edip besi emas a’ge pam nak hele’gik a’ge nak hweriogo ano re an Allah nil pam oruak a’ge ano, ’gwialogo nak welemagoluk, loruk hupmu ebe logo nak pogulomma re, is aphwami Israel a’ge en e zaitun e’gen ’berelogo a’bosu op a’ge holuk woluk pou wagai holuk e, at Harun en e, wik-wok an nemin hwedik togumu ap nowi sabo werikmu wene werak a’ge yagasogo oruakma ebano sum sepnik mesik ogola akhit oruakhwe o’borl o’gwe esaga edip hweriogo Allah nil pam, eria oruak a’ge ebano hupmu en ’bekhit hubet agokhwe, magale oso nagat welemagoluk, ebelogo pogu lemak o. Ai, tugulom ai re, is emin en eneiyagai ene’balak dagetil laga lema a’ge emin en, modok modogat tugu lemak egei, oluk mo’gulontomup o, oluk mo’gulesi.
So’boru Roti a’ge werakho Allah owi werikmu pogulom wene
5 #
Kel. 25:30
Mo’gulentesirik e, is ap an nebe eiye a’ge en gandum e’gen modok opsogo e’gen wokho yagarak a’ge e’gin 12 kilo walhegeik wokho roti 12 hele’gik poluk ebelogo, worogo a’ge. 6An Allah nowi werikmu emas at en a’ge pam nak dalogo norogolema oruak a’ge ai pam roti hebarligen pam worogo a’ge eriano mesikmu pogulat, nin hebarligen eriano mesik mu pogulat takpogu lemak o. 7-9#Mat. 12:4; Mrk. 2:26; Luk. 6:4Asogo pogu lemarik e’ben op hogwi a’ge ano a’ge so’boru roti petne herlelik pogulat, roti ’berlegat yu re, hat Allah hebagerat o, oluk, pulogo poluk, e’ben op hogwi ano a’ge an Allah nebaget odouk narlogulat, ye, roti ano re, di a’ge yu a’ge an nebaget odoktak a’ge ebano odouk narlogulat, ap an nebe eiye a’ge wogonto a’ge polik ano asua modogatma re, Harun eiyagai enemin en no’gulomma ebale polikmu ebano en no’gulemagoluk, wogulat, tuak o. So’boru roti ebe ai re, o agauwa 6 arat takpoluk, set hwalhorlogulat, we wolom ai erlige An Allah nil pam nobou wagalat tugu lemagoluk, pulogo pegimu re, is aphwami Israel a’ge en modogat tugu lemak egei, oluk mo’gulontomup o, oluk, mo’gulesi.
Allah mi-miarak pogwi holuk, helep pam waronobogulom wene
10Ap mesik ia Israel a’ge, ye, aik e, Mesir a’geatma re, aphwami Israel a’ge welagaimu eba enemin welaga. O agauwa mesik pam ap Israel a’ge mesik o tabo odipmu oruakma emin yeik ’buk egesa. 11-12Yeik pugulat, hwe Israel a’ge emalik ano en at Allah mi-miarak pasulat onuk pam at en hweim yaro’gwik pasuam e ap ano Musa e’bek pou wegesarik, at Allah en no’gosogo takpo a’ge oluk, osoma hul a? oluk, yetharok welat, herle wusogo onobogumu ’gwelakpegesa. Ap ano ia onuk e, Selomit, ye, at ia ano aik a’gul onuk Dan a’geatma re, onuk e, Dibri at ai o.
13Ap ano pou wegesema ebano oruakma re, at Allah en Musa mo’guleselat, 14Ap an mi-miarak nebesi a’ge ai re, o tabo odipmu en woluk libotluk an mi-miarak nebasukhwe enesa’go hwelegisa a’ge ebano enebe ’berlek enat ene’gik ap ai a’gul pam poluk helep pam a’gul sagalogo pouwak o. 15-16Ye, sagalogo sogou sogo pouwagoluk, is Israel a’ge mo’gulonto ano re yuat o. Di ap yu ap en enaik Allah anat hweim nobogulat, an Allah nonuk mi-miarak nobogulat, togwi holuk e, is onomuat togumu re, wene mesik u erlakma enat waremak oluk, is aphwami Israel odoktak a’ge ebano en e, helep pam wusogo onobogu lemak o. Asogo tugulom ano re, aphwami Israel a’ge onowirak a’ge a, aphwami ’bok a’ge en a, Allah nonuk wiagapsogo nobogwi holuk e, o’go asogoat tagonobogu lemak o.
17 #
Kel. 21:12
Ap mesik en ap mesik weriso holuk e, at ogo, asogoat wusogo pogu lemak o.
18O’go hegitsogoat wat-wat ’bogulom a’geat de, ap mesik en ap mesik uam wusogo pasuam warago holuk e, ap weriso a’ge ano en uam oruak holuk e owi yakhorlouwak o.
19Ap mesik en are mesik edip ’bil-’baltak pasu holuk e, at takpasu ’gela’ge at weriso a’ge ano asogoat edip ’belagat pouwak o. 20#Kel. 21:23-25; Ula. 19:21; Mat. 5:38Ap mesik en ap mesik uak porlogo pasu holuk e, at ogo re, uak porlologo pasulat, il ’besilogo pasu holuk e, at ogo il asogoat ’besilogo pasulat, iak moluksogo pasu holuk e at ogo re iak moluktagat pasulat, aik ’bil ’baltak pasu holuk at ogo asogoat takpasulat, tugu lemak o. 21Ye, ap mesik en ap mesik uam werisoam warago holuk, ebalema owi yogo poat a’geat de, ap mesik en ap mesik werisoam warago holuk nak e, ebalema at ebeat waremak oluk wusogo pouwak o. 22#Bil. 15:16Aphwami Israel onowirak a’ge emin ap ’bok a’ge emin hegitsogoat wiak o’go tagonobogu lemak o, oluk, enaik Allah an enat egi o, oluk, mo’gulesi.
23Mo’gulesi a’ge ano at Musa en aphwami Israel a’ge mo’gulentesimu, ap Allah mi-miarak pesi a’ge ano o sabo odipmu en woluk liplai legesarik, helep pam Sogupsogo wusogo pegesa. Ai tigisa ai, at Allah en Musa mo’gulesi ano hegitsogoat tigisa.
Currently Selected:
Imamat 24: Wul
Highlight
Copy
Compare
Share
Want to have your highlights saved across all your devices? Sign up or sign in
