Imamat 23
23
Allah en, “Henede eberak welat, an nebaget seni disogo setil laga lomup o,” oluk mo’gulentesi wene
1-2Nenaik ’gain Onuk Logo a’ge en e, Musa disogo mo’gulesi,
“Henede eberak welat, agauwa logon seni an erliknobuogoluk weat welat, henebe odoktoluk disogo togu lomup o, oluk mo’gulhentaik a’ge yu aphwami Israel a’ge mo’gulontomup o.
3 #
Kel. 20:8-10; 23:12; 31:15; 34:21; 35:2; Ula. 5:12-14 Agauwa hebarlik a’ge re, hene’gik wogu loroguptik e, agauwa sabit a’ge pam e, an henaik ’gain Nonuk Logo a’ge nu’gwarek nebaget set hwalogo weat wolomup o. O ai erlige re, henebe we, ’geba ’gela’ge, o wolorogup o’gwe lo’bok eba welat, hene’gik logon wo erlakma en henebe mesikmu odoksogo welat, an nebaget togu lomup o. 4Asogo togu lomup, oluk an henaik ’gain Nonuk Logo a’ge en egi ai, an nebaget tu a’ge lau wago holuk, seni togu lemagoluk wene ’belak hegitsogoat mo’gulontogu lomup o,” oluk mo’gulentesi.
Seni Paskah no’gulat so’boru roti e’gen periso a’ge emin worogo erlak a’ge no’gulom wene
5 #
Kel. 12:1-13; Ula. 16:1,2 Allah en asogo mo’gulesirik, mesik disogo mo’gulesi,
“An en delhenebegis ai henede ebesogo Henaik ’gain Nonuk Logo a’ge erliknobuagoluk dugwi edipmu en wenarogu legep a’ge ai tanggal 14 o mo obuksogo ’gwisokhwe eria pam no’gulomup o. 6#Kel. 12:14-20; 23:15; 34:18; Ula. 16:3-8Asogo togulat, o loruk ’gela’ge tanggal 15 pam e, seni roti e’gen periso a’ge emin ’belebak erlak a’ge werakho no’gulat, hwerli agauwa sabit a’ge pam en, so’boru roti peruagoluk e’gen emin ’belabogo worogo a’ge mesik modok nagup no yo. 7-8Agauwa sabit a’ge eria pam welat, so’boru di a’ge yu a’ge an henaik ’gain Nonuk Logo a’ge nebaget pogulom o. O agauwa naduk welat eria emin, agauwa hebarlik a’ge pam asogo til laga loroguptik agauwa sabit a’ge pam welat emin e, an henaik ’gain Nonuk Logo a’ge paget togulat, hene’gik yabuk modok wo mia o.
9-10His o an henaik ’gain Nonuk Logo a’ge en wokhentegismu eba laguptik e, di a’ge yu a’ge owi yoroguptik e’gen ’balogup a’ge, gandum owi yorogup a’ge e’gen naduk-naduk ’balogup a’ge herle ’geralogo ap an nebe eiye a’ge ene’bek woluk waga lomup o. 11His agauwa sabit a’ge pam an nebaget weat welat, loruk ’gela’ge an henaik ’gain Nonuk Logo a’ge en his henebe an nebam lo’buk uagoluk e, ap an nebe eiye a’ge ai en gandum e’gen ’balogo ’gerelak a’ge ai ene’gikmu wik-wok pei lagalat woknogu lemak o. 12His en gandum e’gen ’belak a’ge ai an nebaget pogulat e, wam domba emalik ierak umur 1 tahun a’ge ebe ebam mesik aik ’belak erlak op a’ge wusogo odouk narlnoum a’ge emin nobo yo.
13So’boru di a’ge yu a’ge an nobogulat e, tepung 2 kilo a’ge minyak e zaitun e’gen a’bosu emin mesik o’gwe ne’gerlak-he’gerlak takpoluk en narlik nobo yo. Asogo narlik nebagup holuk, an henaik ’gain Nonuk Logo a’ge nede op ema o. Asogo narlik nobogulat e, ik anggur e’gen a’bosu 1 liter nobo yo. 14Di a’ge yu a’ge eba an henaik ’gain Nonuk Logo a’ge paget owan po erlak welat, gandum e’gen ’gerat ’belak a’ge pema un no’gulat, weat werakho no’gulat, roti takpoluk werakho no’gulat, tu re, modok mia o. An en his togulom a’ge wene mo’gulhentegis a’ge ai re, his heneiyagai dogoma a’ge enebe ’berlegat hwelakpoluk til laga lemagoluk egi o,” oluk mo’gulesi.
Di a’ge yu a’ge e’gen ’bil-’bal ebaget seni sorogu lemagoluk mo’gulentesi wene
15 #
Kel. 23:16; 34:22; Ula. 16:9-12 Asogo mo’gulesirik, mesik disogo mo’gulesi,
“Agauwa an nebaget weat welat en, gandum e’gen naduk ’balogup a’ge herle ’geralogo an henaik ’gain Nonuk Logo a’ge nebaget pogulat e, agauwa se’ban 7 elitsogo wenarogulom o. 16Wenarogulat, se’ban 7 minggu a’ge pam o agauwa ebe lo’bok 49 wolomtik, mesik loruk ’gela’ge 50 ai pam, an henaik ’gain Nonuk Logo a’ge paget gandum ’get a’ge odoksogo nobou agalom o. 17His ap henebe lo’bok heneiyagai enemin en so’boru roti worogo ’biren a’ge an henaik ’gain Nonuk Logo a’ge nebaget nilemat nobou wagalom o. So’boru roti ai ebe lo’bok e, tepung 2 kilo a’ge e’gen roti periso a’ge emin ’belabogo worogo a’ge an nebaget poluk e,
Yu e’gen naduk-naduk ’balige a’ge, oluk an henaik ’gain Nonuk Logo a’ge nebaget pogulom o.
18 Roti ai ebam lo’boksogo re, aphwami Israel a’ge en wam domba emalik ierak a’ge ebe umur 1 tahun a’ge ebe sabiren a’ge emin, ye, sapi ierak ebe owan a’ge mesigat emin, ye, kambing ’biren ierak a’ge emin, an nebaget pogulom o. Wam eba ebe lo’bok e, ebam mesik aik ’belak erlak op a’ge holuk an henaik ’gain Nonuk Logo a’ge nebaget odouk narlnomogoluk nebaget pogulat, so’boru di a’ge yu a’ge nobogulat, ik anggur a’bosu mesik nobogulat, tu o. Asogo noboluk narlik nobogwiam e’ben op en nebam liok ese lema o. 19Ye, his wiak tigep a’ge an en erlagapsogo ukpaigoluk kambing ierak a’ge ebe mesigat a’ge emin, ye, an nemin la’buluogoluk domba emalik ierak a’ge umur 1 tahun dogo a’ge ebe ’biren a’ge emin, watnoumat o. 20So’boru roti worogo a’ge emin, domba emalik ebe ’biren eria emin, is ap an nebe eiye a’ge en an noboluk, ene’gik en wik-wok toluk en an wokno’gulom o. Woknotluk, is ap an nebe eiye a’ge en no’gulom o. Nobouwa a’ge ai ’berlegat e, an nu’gwarek en a’ge o. 21Di a’ge yu a’ge an nobouwa ai erlige re, his en a’ge seget wo erlakma en, an nebaget tuogoluk henebe odoktogu lomup o. Asogo odoktogu lemagoluk egi ai, his en dogoma a’ge enebe we, is ’geba ’gela’ge o welema eba lo’bok en welat hwelakpoluk hegitsogo modok til laga lemagat o.
22 #
Ima. 19:9,10; Ula. 24:19-22 Henaik ’gain Nonuk Logo a’ge anat ai en e, his en gandum owi yogo a’ge e’gen ’balogulat holuk e, esa’go’gwe ’baktua a’ge ai ’balogulat, ye, naduk ’balogulat ado ukpagup a’ge ai pobuk e’gen ’balogo odoktogulat, togup modok erlak o. We, ai re, aphwami ena’ge erlak a’ge emin, ap ’bok a’ge emin, horluagoluk ukpomup o,” oluk mo’gulesi.
Dugwi wenak-wenak ebe sabit pam lai lasu holuk seni sorogu lemagoluk mo’gulesi wene
23-24At Allah en asogo mo’gulesirik, mesik Musa disogo mo’gulesi,
“Dugwi wenarogu legep a’ge ano hebarligen woloroguptik, dugwi mesik sabit a’ge pam tanggal 1 pam set hwalogo weat wolom o. O ai erlige enede we’gerlogo re, ’bi’gong iak lok a’ge iak inghasuam e, odoktu oroguptik e, an nebaget togu lomup o. 25Asogo togulat e, so’boru di a’ge yu a’ge an henaik ’gain Nonuk Logo a’ge nebaget togulat e, agauwa ai pam yabuk seget a’bik togu lorogup erlak o,” oluk mo’gulesi.
Agauwa mesik pam wiak togwi a’ge erlagapsogo ukpoluk ho onobuagoluk ebaget togu lemagoluk mo’gulentesi wene
26-27 #
Ima. 16:29-34
At Allah en Musa asogo mo’gulesirik, mesik disogo mo’gulesi,
“Di tahun yu tahun dugwi wenarigep a’ge ano hene’gik hebarligen wolomtik en agauwa sabit a’ge lau ago holuk tanggal 10 pam his aphwami Israel a’ge wiak tigep a’ge an en erlagapsogo ukpoluk hononobuagoluk e, disogo togu lomup o. So’boru no erlakma en henebe odoktak toluk an nebaget togulat, so’boru di a’ge yu a’ge an Henaik ’gain Nonuk Logo a’ge nebaget narlik pogulom o. 28An Henaik ’gain Nonuk Logo a’ge en, his wiak tigep a’ge erlagapsogo ukpoluk hohenebikmu re, an nilem op nak wolomogoluk, o ai erlige his wiak togwi a’ge erlagapsogo ukpoluk hohenebik ai en hene’gik mesik togup modok erlak o. 29Sa en o ai erlige so’boru di a’ge yu a’ge mesik nouwa holuk, at ebe an neiyagai a’ge oruak oluk opo modok erlak o. 30Ye, ap sa en o agauwa mesik erlige e’gik mesik tago holuk, an henaik ’gain Nonuk Logo a’ge nebe en wene ebam paiktik ebe ’be’gi werik o. 31An en e,
His en disogo togu lomup, oluk wene mo’gulhentegis a’ge ai re, his en dogo’gwe a’ge enebe, o ’geba ’gela’ge, o wolomma eba lo’bok welat togulom a’ge paget eminat mo’gulhentegis o. 32Dugwi ai a’ge tanggal 9 pam o mo il ’goboksogo ’gwisokhwe hwerli tanggal 10 a’ge en o mo il ’goboksogo ’gua hwerli, di minggu yu minggu agauwa sabit a’ge pam e, an nebaget weat set hwalogo welegep ai hegitsogoat welat, so’boru no erlakma en weat modok wolomup o,” oluk mo’gulesi.
Orabo e’gela a’ge ’balogo werik poluk seni sorogulom o, oluk mo’gulesi wene
33-34 #
Ula. 16:13-15
At Allah en Musa asogo mo’gulesirik mesik disogo mo’gulesi,
“Orabo e’gela a’ge ’balogo werik poluk e, seni nouwogoluk, dugwi his en wenarogu legep hebarligen wolomtik en, sabit pam ago holuk, tanggal 15 edip pam en noluk, hwerli agauwa sabit a’ge pam en no’gu lomup o. 35-36O agauwa sabit a’ge pam eria hegit welat e, agauwa wolorogup a’ge ebe lo’bok so’boru di a’ge yu a’ge an nebaget pogulom o. Ye, tanggal 15 agauwa naduk-naduk wolorogup ai pam emin, ologun pam tanggal 21 emin, henebe odoktak poluk, an Henaik ’gain Nonuk Logo a’ge nebaget nak togulat, so’boru di a’ge yu a’ge an nebaget nak pogulat, togulat e, ai erlige hene’gik togulom e, modok erlak o. 37An Henaik ’gain Nonuk Logo a’ge en, his an nebaget togulom a’ge seni ai paget polik pegi a’ge ai mo’gulontogu lomup o. Asogo togulat, an Henaik ’gain Nonuk Logo a’ge erliknobuogoluk henebe odoktak poluk, an nebaget nak togulat, so’boru di a’ge yu a’ge wogulat, di a’ge yu a’ge odouk narlik pogulat, gandum ’gela’ge woknogulat, honuam mesik watnogulat, anggur e’gen a’bosu mesik na’gogo nobogulat, togulom a’ge, o agauwa lo’bok ebe elitsogoat nobogu lomup o. 38Asogo togulom ai re, di se’ban yu se’ban agauwa hebarligen wolomtik en agauwa mesik sabit a’ge pam an nebaget weat welegep ano a’ge welat, logon ebam louksogo weat wolom o. Ye, di a’ge yu a’ge his en an woknogu legep ai ’gela’geat woknogulat, mesik obok mo’gulnotluk en demat woknogulat, mesik e, henede enat woknogulat, togularat de, mesik ebam louksogo wokno’gulomat o.
39Di a’ge yu a’ge e’gen arat ’baloguptik holuk, dugwi wenarogu legep a’ge ano ’gela’ge dugwi hebarligen wolomtik en, sabit a’ge ago holuk, tanggal 15 pam edipmu en noluk e, pobuk agauwa sabit a’ge en seni no’gulom ai o. Agauwa naduk-naduk wolorogup ai emin, agauwa sabit a’ge pam wolomtik en mesik agauwa sirak a’ge wolorogup ai emin, an nebaget weat set hwalogo wolomup o. 40Hene’gik naduk-naduk di a’ge yu a’ge heniabukmu yogo a’ge e’gen op a’ge nak degelogo ’balip o. ’Balogulat, eremna e’gela ’gela’ge emin, e ede’bi e’gela a’bik a’ge pema emin, ’balogo re, an henaik ’gain Nonuk Logo a’ge Allah erliknobuogoluk honogola henagai opogulat, an nebaget edip pam enat asogo togu lomup o. 41Edip pam en, agauwa sabit a’ge pam honogola henagai hogulat togulom o. Dugwi wenarogu legep ano hebarligen wolomtik en sabit a’ge ago holuk, asogo togu lomup o, oluk mo’gulhentegis a’ge wene ’belak ai his heneiyagai dogoma a’ge en til modok laga lemagat o. 42-43His heneiyagai dogoma a’ge en e,
Nenaik ’gain Onuk Logo a’ge en nis nene’balak o Mesir en wogonoboluk liplau wagalat orabo e’gela a’ge we, lodu paget werik poluk welemagoluk mo’gulentesimu welegesa, oluk enaluk welemagoluk, his aphwami Israel a’ge ’berlegat orabo e’gela a’ge werikmu agauwa sabiren a’ge pam wolom o. Henaik ’gain Nonuk Logo a’ge Allah anat o, oluk egei o, oluk mo’gulontomup o,” oluk mo’gulesimu mo’gulentesi.
44At Nenaik ’gain Onuk Logo a’ge en,
“An erliknobuogoluk, seni an nebaget disogo til laga lomup o,” oluk egei a’ge at Musa en is aphwami Israel a’ge mo’gulontuagoluk mo’gulesi hegitsogoat mo’gulentesi.
Currently Selected:
Imamat 23: Wul
Highlight
Copy
Compare
Share
Want to have your highlights saved across all your devices? Sign up or sign in
