3 Yohanes 1
1
Gayus hau weregei wene
1 #
Per. 19:29; Rom. 16:23; 1Kor. 1:14 Gayus nare o. An en Allah eiyagai tenentarok welemagoluk ediknebesi a’ge honue ano nedemu en demat hebe nede welegi, oluk, wene yu pelal wokho he’bek perakpou wegi o. 2Nare o. Hat hede Allah pam he’berik welat op welegen ai ’gela’geat, hebam ou erlaksogo op welat di paget yu paget opsogo taga lorogun en, se’ban hat hebaget eselegi o. 3Hat en dem wene hesa’go hwelakpoluk opsogo taga legen ai en, is Allah eiyagai nenarilak nonorokhwi logon ne’bek wegesarik, disogo mo’gulnegisa, “At en dem wene tenak welat op hegitsogo tiso,” oluk hobok mo’gulnegisema nesa’go hwelegistik e, nogola nagai a’bik hasu legi o. 4Asogo ogwiam e, an en di paget, yu paget nogola weiyat ’gela’ge nagai hasu legi a’geat de, his henebe an neiyagai en dem wene tenak welat, op hegitsogo togwiam nesa’go hweliselat e, nogola nagai a’bik hasu legi o.
Gayus erliktegei wene
5-7Nare hebe nede o. Hat hebit om erlakma en Allah eiyagai nenarilak nonorokhwi enebe haluk a’ge heperlak a’ge ’berlegat lerentasu legen a’ge nak en e, “At en nis edeapnonoboluk disogo woknentesi,” oluk Allah eiyagai yema a’ge mo’gulentau wegesema nesa’go hwelegis o. Asogo tigen ai ’gela’ge, is ai en Kristus paget aphwami logon wene eneperlak a’ge mo’gulentai lagaiam, is en di a’ge yu a’ge logon wogonto erlak a’ge re, hat en Allah ede opsogo lerontoluk peragonoboma re, op o. 8Is ai dem wene Allah iak ano paget togwi ai, nis nenemin enat tu ’gela’ge togu lemagoluk, lerontogu lomogat o.
Diotrefes Demetrius emin enebaget mo’gulesi wene
9An en his Allah eiyagai a’ge enebaget pelal horoksogo wokho hene’bek perakpou wegi a’geat de, at Diotrefes ogola en e, “An Allah eiyagai onue ’gain eik o,” oluk epasu a’ge ai nak e, an niak hwelakpoluk tago erlak ai o. 10Asogo tago ai, mesik e, iak eseiyat nis nonobok wiak oso. Asogo eselat, at ede en e, “An taga legi ai re, weiyat. Nogola mia. Pobuk logon eminsogo tigat o,” oluk epasulat e, is Allah eiyagai logon wagaiam, at ebe en wogonobu erlakma en welat, is logon en wogonobuogoluk togwiam wene yagontoluk, enebe Allah eiyagai odoktogumu en mukho lebigenebasu ai en, an nebe weiktik en, at tago a’ge ai pobi tuagoluk e’gerli werik o. 11Nare o. Hebe nede o. Hat en e, is aphwami enebabut wiak togwi a’ge ai, enebabut wa’gun o. We, is enebabut op togwi a’ge holuk, enebabut wasu lomup o. Ap sa en ebabut op nak tiso a’ge ai ebe Allah eiyagai a’geat de, sa en ebabut wiak nak tiso a’ge holuk, at en Allah ebe il hasu erlakma en, eperlagat o. 12Asogo a’geat de, at Demetrius paget nak e, aphwami ’berlek emin, at Allah demat nak oso a’ge ano emin, an emin, “At op tiso,” oluk obok op ogu lege. At obok ogu lege ai, demat op ogu lege ai his henaluk o.
Wene ologun wusogo hau warenebegei wene
13An en wene a’bigat he’bek perakpou wom oruak a’geat de, odo a’bosu pam pelal wokho he’bek perakpou wom e, nebit o. 14We, an nebe perleneat hiau weiktik weneane nene’berli yet-yet ul o, oluk epasu legi o. 15At Allah ebabut op a’ge ano en hede ha’bugaphebasu lemak o. Nare. Ye, is nenarilak nonorokhwi yema a’ge nemin hwedik a’ge en hau wathebigisayat o. Ye, nis nenarilak nonorokhwi enemin hwedik a’ge o eba oruak a’ge, “At en hau wathenebegeiyat o,” oluk enebe lo’bok ononuk ’gwelakhegeik mo’gulontomup o. Nare.
Currently Selected:
3 Yohanes 1: Wul
Highlight
Copy
Compare
Share
Want to have your highlights saved across all your devices? Sign up or sign in