Yosua 8
8
O Ai o wisogo lip enebigisa wene
1Asogo toluk, at Allah en Yosua mo’guleselat,
“Hat hede yarluk eselat, hogorlok hagun o, an en ap ’gain a’ge Ai a’ge emin, Aphwami at ’gwelagentarok welago a’ge emin, at en eiye welagoma kota emin, o’gwiang emin, ’berlegat arat he’gikmu pegimu re, is ap enesegen oruak a’ge ’berlegat wogonoboluk o Ai a’ge enebam ’gwi lit o. 2Enebam goguptik, o Yerikho emin, ap ’gain Yerikho a’ge emin, modok erlagapsogo enebegen ano ’gela’ge, o Ai erlagapsogo pasulat, ena’ge-a’ge emin, onuam emin, ebano nak e, o hogul ’goguptik hundomok horloluk-horloluk libomup o. Asogo togupmu re, is ap enesegen oruak a’ge ebano nage. O Ai o’borl akhit eba hou sali louwagoluk perak onobomup o.”
3Mo’gulesimu, at Yosua osi enesegen oruak a’ge ’berlegat enemin o Ai a’ge enebam ’guogoluk, at Yosua en ap weim obogwi a’ge enanni wiak a’ge enebe 30.000 a’ge pulogo enebesirik, hubago louwagoluk, wene werak enebasulat, 4“His eba laguptik, dagansogo walekma hou sali lagup no yo. At e, we, horoksogo o Ai o’borlma ebaat leik-louktak poluk hou selak wolomup o. 5Arat hou sali lagai holuk e, an nosi enemin o Ai hutla’gwi lultik wolomulmu re, is en, naduk watnenebil liplau wegesa ano ’gela’geat nenebam libagai holuk e, nis e hweiye ’bogologwi uagoluk hweiye womul ani o. 6Hweiye ’bogologwi uagoluk togumu, is aphwami Ai a’ge ebano en, is naduk ’bogoligisa ano ’gela’geat, hweiye ’bogologwi ai o, oluk, muknonoboluk wagaimu nis hweiye wagalat lisogo wogonoboluk wagaiam, 7His hou selak wolorogup a’ge ano pu’galogulat, o Ai ano ’guagai holuk, At henaik Allah en o ai, wokho hene’gikmu pouwa ani o. 8Asogo wokhentasu holuk e, onowi wisogo lebigonobogulat, at Allah en, tip oluk egei a’ge hegitsogo togup en, an wene mo’gulhentasu legi a’ge yu pobi tip o.”
9Asogo mo’gulentasuam, o Betel ’gain oruakhwe, o Ai o mo obuk oso hegit eba o ’burl eba la’bot akhit hou salil lagaihwe, at Yosua ano aphwami Israel a’ge ado logon enemin ebanoat nogogisa.
10Nogoluk tono hubetsogoat Yosua ano o Ai laiyogoluk, is weim obogwi a’ge ebano odoktagonoboluk, at Yosua emin, ap Israel a’ge onuelak logon a’bigat emin, naduk wagalat, 11Ye, is at osi enesegen oruak a’ge ’berlegat enage ’bal-’bal pobuk wagalat, toluk o Ai ebanoat horok lai legesarik, o Ai abel yema akhit oruakhwe, o dogo mesik ’burl eba oruakhwe, etle akhit o’gwe o abel akhit hegit eba akhit nogouwogoluk tegisa.
12Nogouwogoluk togulat, at Yosua en ap weim obogwi a’ge enebe 5.000 ’gela’ge wogenebegeitik, o Betel en toluk ’burl eba hou selak oruakhwe, o Ai mo obuk oso akhit o’gwe o ’burl legenakma eba entai louwagoluk, perak enebesimu lagaihwe, 13At Yosua en is enesegen oruak a’ge a’bigat o Ai o abel akhit o’gwe oruakma eriano hwalogo enebesirik, hup eriano erligeat o dogoma ebanoat ’bil laga.
14Ye, o tono hubetsogo ap ’gain o Ai a’ge ano en ap enesegen oruak a’ge Israel ebano il entesirik, is Israel a’ge logon o kota o’borl akhit hisogo welegesa a’ge ebano eperlak welat, o Araba nogorlogo pesimu dogoma naduk ’gwelebak pegesema ebano Israel a’ge enemin weim obuogoluk, osi enemin ’berlegat liplau wegesa. 15Liplau wagaiam e, at Yosua osi enemin ano en, watnonobuagaimu no, oluk, we eniak eseiyat ’bogologwi uak oluk, hweiye ebela o lei o’gwe ebane wagaimu, 16-17is ap Ai a’ge ’berlegat at Yosua osi enemin mukho ’gwelap onobuak oluk, worlentigisarik, o Betel emin, Ai emin eba ap mesik modok wolom erlakma en ’goduk laru erlakma en husogo ukpoluk, is a’bigat ’berleksogo Israel a’ge muk onoboluk liplau wagaiam e, is aphwami Israel a’ge ebano wagai uak oluk-enilen wogonoboluk is ano til-til o walegat lau wegesa.
18Walek lau wagaiam, At ’gain Onuk Logo a’ge en Yosua mo’guleselat, “An en o Ai ano ebesigat hat he’gik pam wokheikmu re, hat wa’gun he’gikmu tenak welegen a’ge ai pam o Ai akhit eba ’bil hailu o,” mo’gulosoam at Yosua en at en wa’gun bouwa’gun o Ai akhit eba ’bilhai laga. 19Wa’gun ano owan ’bil ho erlak oruakhwe, is ap weim hou selak welegesa a’ge ano ’bogulogo liplau wagalat, o kota ano ebam libagalat, perleneat, o odouk ’narlegisa. 20-22Narlogwiam, is Yosua arilak enemin o lei ebano hweiye ’bogoligisarik wagai uak oluk ogulat togolik enil ono’borl akhit yethegesarik, enarilak hou salil legesa a’ge ebano o Ai ’guagalat, yethegesa ’gal o kota ano odouk narlegisema hobu ligagoma enil hegesarik, ’guk salonobogulat, is Ai a’ge mugonoboluk wegesa a’ge ebano warenebigisema, is Ai a’ge bogoluogoluk, enil yethegesa ’gal e, onowi wi nasulat hobu ’bogorl pam e’gerlik oruakma hegesa Ye is Israel hou selak welegesa a’ge ano o kota en mugonoboluk liplau wagalat, togukhwe enil entigisarik, modogat ’buktak nenebegesarikmu re, no’gosogo libomul o, oluk ogwi oruakma, is Israel erei akhit en, orogou akhit en wagalat, enebe mesik nak ogo mesik enelaluk ugonobogulat, mesik libagaihwe, tu erlakma en ’berleksogoat warenebegisa. 23Asogo waronobogularat de, ap Ai a’ge onue ’gain ano nak e, elaluk wik-wok Yosua e’bek pou wegesa.
24Is logon Yabuk o’gwe en, o lei o’gwe en, hweiye libagaimu, lagak-’bagaksogo wat enebil-enebil wa’gun pam ’berlegat wusogo onoboluk, pobuk togolik, o Ai ’gogulat aphwami pema welegesa a’ge ebano wusogo enebegesa. 25-26At Yosua en wa’gun ano sebelho erlakma en ’belik modok oruakhwe, is o Ai welegesa a’ge ’berlegat wat enebegisa ano re, hwami ap enebe la’bulogo 12.000 at warenebegisa. 27Enebe ebano, wusogo enebegesa a’geat de. At Allah en Yosua wene mo’gulesi ano hegitsogo is aphwami o kota Ai a’ge onuam emin, ena’ge-a’ge ’berlegat emin, o hogul ’gogulat ’berlegat horloluk hundomok libegesa.
28Yosua arilak enemin en, o Ai arat e narlegisarik, o Ai eba en di a’ge yu a’ge ’damul-demalsogo orluk ligago hwe o wogoat ukpegesema re, o yogodak ogo asogoat welemagoluk oruak. 29Ye, ap Ai a’ge onue ’gain ano e e’biangma poloksogo poluk, edikpegesema oruakhwe, mo il obuk osoam, ap werak ano wokho o Kota ’goduk ’gogumu ’godukmu hwik ha’boluk, helep uak wusogo pegesema o yogodak ogo oruagat o.
Dom Ebal pam en togulom a’ge Allah en Musa mo’gulesi a’ge, mo’gulogo ’belegegei wene
30-31 #
Ula. 27:2-8
#
Kel. 20:25
Togulom a’ge wene At Nenaik ’gain Onuk Logo a’ge en Musa mo’gulesimu pelal wogo a’ge ano pam a’ge nenaik at Allah eragam a’ge Musa en aphwami Israel mo’gulentesi ano hegit-sogo, at Yosua dom ebal pam At Allah en aphwami Israel a’ge enaik Allah ebaget wusogo odouk narlogulomma ebale hele’giselat, ’besieme’gen a’ge pam helep ’gagalak a’ge puk we helep worl a’ge pam nak heli’gogo poluk, At Allah paget wusogo narlogulat Allah emin hwedik welemagoluk, ebaget pogulat tegisa.
32Asogo tegisarik, at Allah en wene egei a’ge Musa en pelal wesi a’ge ano, at Yosua en wokho aphwami Israel a’ge enilem helep pam pelal wokho pesi.
33 #
Ula. 11:29; 27:11-14 Pasuam, is Allah eiye ena’gul onuk Lewi a’ge ebano en Allah wene ’belak peti hele’gik a’ge pam yagarak a’ge ano e yesogo ’burl tenak oruakhwe, is ap Israel a’ge onuelak enemin, weim wene le’gelogwi a’ge emin. Wene enebam pogulat no’gorlogulat togwi a’ge emin, ap ’bok onowirak Israel a’ge ’berlegat odoktak poluk, Allah ebaget togwi a’ge ogut heli’gogo peti ogola yaga tak a’ge yu paget enebe ’berlegat ene’berli mesik mu poluk welat, is pema me’gisogo dom Gerizim akhit onolukhwe pei lagalat, ye, is nin pema me’gisogo dom Ebal akhit onolukhwe pou wagalat, togwiam, is aphwami Israel a’ge enede aganhan enebam pogulat, asogoat togu lomup o, oluk, At Allah eragam a’ge Musa ano en mo’gulentesi a’ge ano hegitsogoat tegisa.
34-35Asogo togwiam, enede aganhan enebam po wene emin, hweim onobo wene emin, togulom a’ge wene ’belak tuesiga pam pelal wogo a’ge hegitsogo is aphwami Israel odoktak a’ge emin. Hwami emin malik wei a’ge emin, ap ’bok enemin oruak a’ge ebano emin, ’berlegat enilem at Musa en, disogo tip, asogo tip, “oluk mo’gulnentesi a’ge ebano mesi’gat nak ogo mesik ukpo erlakma en ’berlegat at Yosua en ’beli’gogo mo’gulentesi.
Currently Selected:
Yosua 8: Wul
Highlight
Share
Copy
Want to have your highlights saved across all your devices? Sign up or sign in
