Yosua 24
24
O Sikhem eba en at Yosua en aphwami Israel a’ge wene mo’gulentesi wene
1At Yosua en aphwami Israel a’ge ’berlegat o Sikhem odoksogo enebesirik, onuelak henarlue a’ge emin, ’gain a’ge emin, ap wene enebam pogulat, no’gorlogulat, togwi a’ge emin, ap tentara onuelak heberlak a’ge emin, wemagoluk mo’gulentesimu, Allah e’bek wegesa. 2#Kej. 11:27Wegesema, at Yosua en is ’berlegat disogo mo’gulentesi,
“Nis aphwami Israel a’ge Nenaik ’gain Onuk Logo a’ge en egei a’ge ai, his henesa’go opsogo hwelip o. At nenaik Allah Onuk Logo a’ge en e, disogo mo’gulhentesi,
Nadugat, his hene’balak welegesa eria pam e, is enebe o ik Efrat etle akhit eba welat, mu a’ge paget de,
Nenaik ebe yuat, oluk, ebam he’berik welat erliktogu legesa o. Is ap eba a’ge mesik e, Abraham ot onuk Nahor emin enaik onuk Terah aiyat o. 3#Kej. 12:1-9; 21:1-3Asogo oruakma, an en his hene’ba Abraham ano, o ik Efrat etle akhit eba en woluk wegi ai o. Woluk wegirik e, o Kanaan di owi yu owi ’berlegat ’gogolil wemagoluk mo’gulegis ai o. Ye, at en dogo’gwe a’ge modok a’bik wogentil legi ai, naduk Ishak e, Abraham wogegis. 4#Kej. 25:24-26; 36:8; 46:1-7; Ula. 2:5 Ye, pobuk Ishak eiyagai enebe ’biren, mesik e, Yakub, ye, mesik e, Esau, Ishak wogegis ai o. Asogo wogegistik, at Esau o Edom eba eiye welemagoluk wogegis. Asogo a’geat de, at Yakub hene’ba ai nak e, eiyagai enemin o Mesir eba legesa ai o.
5 #
Kel. 3:1–12:42
Asogo legesarikmu en, pobuk, an en aphwami Mesir a’ge wene lok a’ge enebam poluk, his o Mesir en wokhonoboluk liplau weigoluk Musa Harun emin yo’go onoboluk hene’bek peragenebegi ai o. 6#Kel. 14:1-31His hene’balak o Mesir en asogo wogonoboluk liplau wagaimu, aphwami Mesir a’ge en ’gwiangso ’gela’ge pam wam kuda en lisogo wogonoboluk lasu a’ge onuk kereta weim obogwi a’ge woluk emin, ap tentara onokuda pam ligotluk obogwi a’ge emin, enemin en mugonoboluk wegesa ai o. Asogo mugonoboluk wegesema, hene’balak ai, ik Laut Merah ye’gelakma eba lau wegesarik en,
7Delnenebin o, nenaik, oluk eniak loksogo mo’gulnegisa. Asogo mo’gulnegisema, an en e, is ho’gorlak, is aphwami Mesir a’ge ho’gorlak, ’burl eba o hubap pegirik, aphwami Mesir a’ge enebe ik laut ye’gelakma en sebelenebegismu enebe ’berlegat ik olomu legesa ai o. An en aphwami Mesir a’ge tagenebegi ai, ’berlegat his henil hegep ai o.
Ye, his o leimu aphwami erlakma eba mesik eminsogoat welegep ai o.
8 #
Bil. 21:21-35
Asogo oruakma, an en wokhonoboluk aphwami ena’gul onuk Amori a’ge onowi ik Yordan etle akhit, o mo yegelogo orlu ago hegit wokhonoboluk wegi o. Asogo wokhonoboluk wagaimu, is aphwami Amori a’ge en his wathonobuogoluk tigisa a’geat de, an en e, his en is mabenap enebagup oluk hene’gikmu pegi ai o. Asogo pegimu, his en is onowi sebelu agaihwe, an en enebe modok erlagap enebegi ani o. 9#Bil. 22:1–24:25Asogo erlagap enebegeimu, ap ’gain Zipor omlogo aphwami Moab a’ge onue ’gain onuk Balak en his wathenebigolugat tegei. Asogo tegeirik, osi yo’go enebesirik e, ap Beor omlogo Bileam en his heman honobuagoluk yo’go peragenebesi ai o. 10Asogo a’geat de, an en Bileam ogola agai a’ge ukpegimu, at en his obaphonobuagoluk an ’gonu mo’gulnesi ai o. Asogo mo’gulnesimu, Balak en wathonobuano oluk an en his delhenebegis ai o.
11 #
Yos. 3:14-17; 6:1-21 Holuk e, his pobuk ik Yordan ’balogo liplau wegeptik, o Yerikho arat wegep o. Asogo wegeptikmu en, is aphwami Yerikho a’ge en wathonobuogoluk tigisa. Ye, aphwami Amori a’ge en ogo, Feris a’ge en ogo, Kanaan a’ge en ogo, Het a’ge en ogo, Girgasi a’ge en ogo, Hewi a’ge en ogo, Yebus a’ge en ogo, wathonobuogolugat tigisa ai o. Asogo tigisa a’geat de, an en e, his en is ’berlegat mabenap enebagup en e, enebe hene’gik pam pegi ai o. 12#Kel. 23:28; Ula. 7:20Asogo pegimu, his en is waronobuogoluk lagaimu re, an en is enebabut dong-pongtak pasulat, onogorlok agalat, tuagoluk tagenebegimu re, aphwami Amori onuelak a’ge ’gaindek ononuk logo a’ge enebe ’biren eria henebam en hweiye legesa ai o. His hene’garok emin, henesegen emin, oruak ai en, henanni egep puk. Erlak o.
13 #
Ula. 6:10,11 O an en wokhentegismu yema his en set wik-wiaksogo takpoluk hwerlegep erlak o. Ye, o kota-kota an en wokhentegismu eba his hene’gik en mesik werigep ogo erlagat o. Asogo a’geat de, o eba his welat, anggur emin, e zaitun emin, owi his en yoru erlak a’geat de, e’gen daganogo opsogo nogu legep ai o, oluk egei,” oluk mo’gulentesi.
14Asogo mo’gulentesirik, at Yosua en wene mesik disogo mo’gulentesi,
“Nenaik ’gain Onuk Logo a’ge en asogo mo’gulnesi ai o. Holuk e, yogodak his en e, at hau wusogo ’gela’ge togu lomup o. At eragam a’ge otluk, henede mesigat welat, emin hwedik modok wolomup o. Nene’balak o Mesopotamia emin, Mesir emin, welat mu a’ge paget,
Nenaik ebe aiat, oluk ebam he’berik welat erliktogu legesa ai ’gela’ge, ai a’ge mesik erliktu erlak, we, Nenaik ’gain Onuk Logo a’ge emategat eragam a’ge oroguptik wolomup o. 15His en Nenaik ’gain Onuk Logo a’ge ematek eragam wolom henebit holuk e, o yogodagat,
Nis ai a’ge eragam omul, olugat u o. His en e, o nadugat hene’balak o Mesopotamia welat, mu a’ge paget de,
Nenaik ebe aiyat, oluk ebam he’berik welat eragam welegesa ai a’geat eragam wolomul oluk ogup a? At e, his yogodak aphwami ena’gul onuk Amori a’ge onowi pam welat, is en e,
Nenaik ebe aiyat, oluk ebam he’berik welat eragam welagai ai a’geat eragam wolomul ua ya. His enat se’geksogo it o. An nak e, nebe emin, neiyagai emin, Nenaik ’gain Onuk Logo a’ge emategat eragam welat motluk laga lomul o oluk mo’gulentesi.
16Asogo mo’gulentesimu, is aphwami Israel a’ge en e, disogo mo’guligisa,
“Nis en e, mu a’ge paget de,
Nenaik aiat, oluk ebam he’berik welat eragam a’ge omogoluk, Nenaik ’gain Onuk Logo a’ge ’goboksogo ukpoluk libomul modok erlak o. 17Nis nenebe emin, nene’balak emin, aphwami Mesir a’ge en eneragam a’ge ’gela’ge sennentarok oruakma, Nenaik ’gain Onuk Logo a’ge en delnenebegei ai o. Delnenebegeitik e, ebe en woknonoboluk aphwami ena’gul onuk mu a’ge onowi lo’gwe wagalat, nis pobi tuagoluk elalin a’ge taga laga ai, nenil arat hogu lege o. 18Ye, pobuk nis o yema ’gu agaimu, Nenaik ’gain Onuk Logo a’ge en aphwami ena’gul onuk Amori a’ge yema welegesa a’ge ’berlegat mukho lebigenebesi ai o. Holuk e, nis Nenaik ’gain Onuk Logo a’ge Allah ebe arat ai en e, nis ogo at eragam a’ge wolomul o,” oluk mo’guligisa. 19-20Asogo egesema, at Yosua en e, disogo mo’gulentesi,
“Asogo a’geat de, Nenaik ’gain Onuk Logo a’ge u’gwarek Allah emetik-ematek nak welago ai en e, his henebe Nenaik ’gain Onuk Logo a’ge eragam wolom e, elit erlak hwi a. At Allah re, aphwami at eragam a’ge welat, mu a’ge de, eragam om ebit modok welago yo. His en at ’goboksogo ukpoluk mu a’ge mesik eragam a’ge orogup holuk, at en his wiak togup a’ge ai erlagapsogo ukpouwa modok erlak o. At Allah naduk e, his obaphenebise laga a’geat de, his asogo togu lorogup holuk, at ebe his heneselei a’ge ’gela’ge emarik e, wene henebam poluk, henebe modok erlagap honobouwa o,” oluk mo’gulentesi.
21Asogo mo’gulentesimu, is aphwami Israel a’ge en e, disogo egesa,
“Erlak o! Asogo tul erlak o. Nis mu a’ge mesik eragam a’ge omul erlak, we, at Nenaik ’gain Onuk Logo a’ge emategat eragam a’ge wolomul o,” oluk mo’guligisa.
22Asogo egesema, at Yosua en e, disogo mo’gulentesi,
“His en e,
Nis mu a’ge mesik eragam omul erlak o. We, Nenaik ’gain Onuk Logo a’ge emategat eragam wolomul o, oluk egep a’ge ai honu’gwarek henaluk wolorogup ai o,” oluk mo’gulentesi.
Asogo mo’gulentesimu, is en e, disogo mo’guligisa,
“Demat. Nisat nenaluk wolomul o,” oluk mo’guligisa. 23Asogo mo’gulegisema, at Yosua en e, disogo mo’gulentesi,
“Holuk e, his en mu a’ge aphwami ena’gul onuk mu a’ge en,
Nenaik ebe aiyat, oluk ebam he’berik welat erliktogwi ai a’ge his tenak welegep ai lebikpomup o. Asogo lebikpoluk, his en e, henede nis aphwami Israel a’ge Nenaik ’gain Onuk Logo a’ge Allah pam he’berik poluk emin hwedik wolomup o,” oluk mo’gulentesi.
24Asogo mo’gulentesimu, is en e, Yosua disogo mo’guligisa,
“Nis e, aphwami Israel a’ge Nenaik ’gain Onuk Logo a’ge ematek eragam a’ge welat, at en,
Disogo togu lomup, asogo togu lomup, oluk mo’gulnentesi a’ge anoat hwelakpoluk hegitsogo togu lomul o,” oluk mo’guligisa.
25Asogo egesarik, o ai erlige at Yosua ebe emin, aphwami Israel a’ge emin, o Sikhem eba welat,
“Disogo togu lomok o,” oluk wene a’bosu ’balogo egesarik, at Yosua en, wene Allah en,
“Disogo togu lomup, asogo togu lomup,” oluk nenesa’go weregei a’ge wene emin, ye, is aphwami Israel a’ge wene ’belak a’ge ebam louksogo togulom a’ge emin, wene ebe ’belak a’ge wogentesi. 26Asogo egeitik, wene Allah en,
Disogo togu lomup, oluk nenesa’go weregei wene ai emin, wene ’belak a’ge pam louktak poluk togulom a’ge ai emin, ’berlegat wene Allah en nenesa’go weregei wene ano pam pelal wokho pesi. Asogo pesirik, helep lok a’ge mesik wesirik, ’gwiang ya Nenaik ’gain Onuk Logo a’ge u’gwarek o’gwiang welemak, oluk pegesema eba e mesik lok a’ge oruakma edipmu eba edikpesi. 27Asogo pesirik, aphwami ebano ’berlegat disogo mo’gulentesi,
“Nenaik ’gain Onuk Logo a’ge en.
Disogo togu lomup, asogo togu lomup, oluk mo’gulnentesi a’ge ano ’berlegat at aphwami en enesa’go holholuk enaluk wolom ’gela’ge, helep yu oruakma mo’gulhentegismu aluk ai en e, aphwami en enaluk welat mo’gulhonto ’gela’ge, at helep yu en,
His en Henaik ’gain Onuk Logo a’ge emin hwerli tu mia, oluk henede ’gagalise lemak o,” oluk mo’gulentesi. 28Asogo mo’gulentesirik, aphwami ebano ’berlegat onowi lo’gwe lo’bok ’bogoluagoluk mo’gulentesimu, is ebano togolik onowi lo’gwe lo’bok ’bogoligisa.
Yosua emin, Eleazar emin, enebe waregesa wene
29Pobuk, at Nun omlogo Yosua Nenaik ’gain Onuk Logo a’ge eragam a’ge ano ebe umur 110 tahun agarik waraga. 30#Yos. 19:49,50Asogo waragama, at ebe werak e, u’gwarek o’gwiangma o onuk Timnat-Serah o aphwami ena’gul onuk Efraim a’ge onowi re, dom pam, dom duk ebe onuk Gaas en e, abel ik elaruk akhit hegitsogo eba ’gwiang ’balogo saligisa.
31At Yosua ebe elaluk pam, is aphwami Israel a’ge Nenaik ’gain Onuk Logo a’ge eragam welegesa. Asogo welegesarik, at ebe waragarikmu en ogo re, ap aphwami is Israel a’ge onuelak logon Nenaik ’gain Onuk Logo a’ge en is Israel a’ge enebe ’berlegat enebaget pobi tuagoluk elalin a’ge taga laga a’ge ai ebe enaluk a’ge emin oruakhwe, enebe Nenaik ’gain Onuk Logo a’ge eragam modok welegesa.
32 #
Kej. 33:19; 50:24,25; Kel. 13:19; Yoh. 4:5; Per. 7:16 Ye, at Yusuf ebe werak is aphwami Israel a’ge en o Mesir en woluk wegesa ano re, o onuk Sikhem, ’gwiang at Yakub en ap onuk Sikhem aik onuk Hemor ai, eiyagai enebam uang perak 100 a’ge pam o’go ’balegeimu ebano ’gwiang ’balogo sebeligisa. ’Gwiang ai is aphwami Yusuf en dogo’gwe a’ge wogentegisema eiye egesa.
33Ye, pobuk at Harun omlogo onuk Eleazar ebe warat aga. Waragama, o kota onuk Gibea, o aphwami ena’gul onuk Efraim a’ge onowi dom pam eba ’gwiang ’balogo saligisa. O kota ai, ap Eleazar omlogo Pinehas wogigisa a’ge pam eba saligisa ai.
Currently Selected:
Yosua 24: Wul
Highlight
Share
Copy
Want to have your highlights saved across all your devices? Sign up or sign in
