Yosua 23
23
At Yosua owene’gak ap Israel a’ge onuelak enebam pesi wene
1Is Israel a’ge onoweim selei a’ge e’berlik en sen entau wagaimu no oluk, at Allah ematek en aphwami Israel a’ge enede en erla’ge sogoat we welemagoluk, tagenebesimu oruakhwe, o momuat laga, o momuat lasukhwe, at Yosua ano arat sebal agama 2at Yosua en is ap Israel a’ge onuelak enemin, ap wene hwalogwi a’ge emin, wene enebam pogulat no’gorliselat togwi a’ge emin, weim le’gelogwi a’ge emin, ’berlegat worlentesimu wegesema, mo’gulentasulat, an dak egi hwerli en tahun a’bigat tegismu re, arat sebal egi o. 3At henaik Allah ematek en his henebaget weim tagalat, di aphwami yu aphwami o Yema welagai a’ge tagenebasu a’ge ebano henil hogu legep ani o. 4Is di aphwami yu aphwami an sebelogo enebegi a’ge ono’gwiang amin, is mukho lebik onobo erlak a’ge a’ge ono’gwiang emin, ik Yordan en ’bekhit, ik lok ye’gelak laut o mo obuk ilasu akhit o’gwe ai hwerli ’berlegat, his eiyesogo hono’gwiang eiyetak pagathwerlaguptik wolorogup en, an en arat so’busogo henebegimu ebano erlak wolomup o. 5At henaik Allah enat naduk-naduk honoweim sebelogo pesimu, his en mukho lebik onobogu loroguptik, at henaik Allah en wene modok daksogo hwalogo mo’gulhentesi ano hegitsogoat ono’gwiang ai pam eiye oroguptik wolorogup ani o.
6Asogoatma re, his honolukhwe erei akhit pogulat orogou akhit pogulat togup o. At e, henede pobuk mu om erlakma en modok ha’buksogo welat, togulom a’ge wene pesi a’ge Musa en pelal wesi a’ge ano ’berlegat hegitsogoat, opsogo til laga lomup o. 7Is di aphwami yu aphwami o Kanaan a’ge mukho lebik onobo erlakma en heneminat welegep a’ge ai, henemin hwedik togulat, Allah motluk lagai a’ge ai ebalema onodogwi asua motluk lagalat ononuk ’balogulat, demat o, oluk onuak ho’buk ’balogulat, ye, eneragam ’gonu oluk enebe onogorlogwap pogulat, tu mia o. 8At e naduk togu legep ano ’gela’geat, yogodak ogo at henaik Allah emategat henede ebam eberak poluk wolomup o.
9Di aphwami yu aphwami enebe a’bik enanni modok mia a’ge oruak ano, at Allah ematek en naduk otluk, mukho lebik enebasu lagama re, o yogodak hwerli is aphwami logon en his holuk nage pang togulat, welegep erlak o. 10#Ula. 3:22; 32:30At henaik Allah ematek e, wene hwalogo mo’gulhentesi ano hegitsogo, his weim togumu, at Allah ematek en lethentasukhwe, ap mesik nak en ap enebe 1.000 at mukho lip onobua o. 11Asogoatma re, at henaik Allah emategat henede hwedik wolorogup en e, pobi tit o.
12Ye, asogo tu erlakma en togolik wagalat, di aphwami yu aphwami lebik onobo erlak a’ge henemin oruak a’ge ano, henemin henede mesigat otluk, hwelani his a’ge is wogonobogulat, ye, is a’ge his wogonobogulat, asogo togulat henemin hwedik togwi holuk, 13at henaik Allah ematek en naduk-naduk di aphwami yu aphwami ai mukho lebik enebaik erlak o. At e, is aphwami ai en his hono’gorlop ’gotnok uagoluk, herle pogwi ’gela’ge, sepna pogwi ’gela’ge, hono’borl pam lagal ’bisok wiaksogo wathonobu ’gela’ge, henil pam ’bide orlok ’gela’ge, sellem takhonobogulat togukhwe, at henaik Allah ematek en hono’gwiang op a’ge wokhentesi a’ge yu pam en his henebe erlak aga lorogup ani o.
14Ye, an ano, is di aphwami yu aphwami warotluk, lok pam lagaimu ebano lasu legi o. Ebano lasumu, at henaik Allah ematek en, disogo tak paik, yusogo tak paik, oluk, op wene hwalogo mo’gulhentesi a’ge ano, mesik dagan e u erlakma en ’berlegat modok hegitsogo nagat ’bi-’beterak pesi a’ge ano modogat henaluk nak o. 15At henaik Allah ematek en, disogo tak paik, asogo tak paik, oluk, obab hono’bo a’ge hologo mo’gulhentesimu, hegit nak aga a’ge ebano hegit-hegit wiak togwi holuk, e’gin pegin disogo takhenebaik o, oluk, mo’gulhentesi ano ’gela’ge takhenebasukhwe, ’gwiang op a’ge wokhentesi a’ge yuno pam en, hena’guluak erlagapsogo pasu lema ani o. 16At henaik Allah en, wene modok daksogo hwalogo poluk, asogo togu lomup o, oluk, mo’gulhentesi a’ge ano, sagalogo ukpoluk, at motluk lo ’gela’ge, aphwami en a’ge dogwi asua motluk lagalat, onolukhwema sakhun otluk, erliktogwi holuk, at Allah olot het oduk ’gela’ge henebam pouwa, o. Henebam pasuam, hono’gwiang op a’ge wokhentesi a’ge ano pam enat henebe perleneat erlak aga lorogup ani o, oluk, mo’gulentesi.
Currently Selected:
Yosua 23: Wul
Highlight
Share
Copy
Want to have your highlights saved across all your devices? Sign up or sign in
