Yosua 18
18
Is logon ’gwiang ’balogo so-’but entesi wene
1Nenaik ’gain Onuk Logo a’ge en ’gwiang wogentesimu ebano sebeligisarik welat, aphwami Israel welagai a’ge ’berlegat o Silo eba odoktegisarik, Allah, emin, hwedik togumu owirabo ano arat edikpegesa a’geat de, 2Agauwa ai erlige Is Israel a’ge ena’gul onuk 7 pam en weiyelak a’ge ano, ono’gwiang dogoma a’ge en, owan eiye om erlak welegesa.
3Asogoatma re, at Yosua en is Israel a’ge ebano mo’gulentasulat, “At hene’balak enaik Allah en, ’gwiang wokhentesimu ebano eiyetak pagathorloluk wolorogup en, o eba lo a’ge opo erlakma en we yogunat degelak erlak oruakhwe, agauwa meren ema o. 4Asogoatma re, ap ena’gul onuk lo’bok enebe henagan lo’bok nak pulogo enebemit o. Pulogo pogwiam e, o ebano welemarik, ’gwiang enil ’gwelak hil loluk, ono’gwiang modok-modok horlul opogwi a’ge holuk o tak a’ge ebano paget odo balogo, togolik an oruakma yema wemak oluk, perakpaik ani o. Pagupmu re, o eba welemarik, ’gwiang enil ’gogolil lagalat, ono’gwiang modok-modok horlul opogwi a’ge ebano ene o disogo-o disogo tak o oluk onuk ’balogo togolik an ne’bek yema wemagoluk, perak enebaik o.
5Is ap Yehuda pam en weiyelak a’ge ono’gwiang e, o o’borl akhit o’gwe oruak o ye, ap Yusuf pam en weiyelak a’ge ono’gwiang e, o sogweik akhit welaga a’ge oruakhweat de, ’gwiang ’burl eria re, 7 hwerliat ’baluak o.
6O disogo oruak o, oluk, ’gwiang 7 hwerli ’gela’ge onuk ’balua a’ge ano woluk an woknosu agai holuk, at nenaik Allah en ’gwiang mesik ’balogo a’gul onuk ap sa a’ge wogum oluk epesi a’ge hul oluk, an en helep e’gen pei lo wom walholuk en so’but, hentaik o.
7Is ap Lewi a’ge nage ono’gwiang dogoma a’ge en eiye omtik horlogulom ’gela’ge horlogulom ano re, At Allah ebe eiye welat, ebaget yabuk togulom aiatma re, so’busogo wokhentasulat is ’gwiang ’belak mesik horlouwa erlak o. Ye, Is ap’gat pam en weiyelak emin, ap Ruben pam en weiyelak emin, Manasye pam en weiyelak ado me’gerik emin, ai ono’gwiang dogoma a’ge en eiye omtik wolom ’gela’ge o mo orlu ago akhit o’ge hegit ik Yordan etle akhit at Allah eragam a’ge Musa en arat wogentesi anoat o,” oluk mo’gulentesi.
8Asogo mo’gulentesimu, is ap ano legesarik, o asogo oruakhwe hege o, oluk, pelal wokho woluk wemagoluk, perakpasulat, at Yosua en, “His en o ai, pobirak pil laguptik o ano asogo oruakhwe hege o, oluk, pelal waguptik an oruakma Yema togolik woluk worogupmu, o Silo Yema, at Allah en’gwiang mesik ’belak a’ge ap a’gul onuk sa wogeik epesi a’ge oruakma hul oluk, helep e’gen pam walholuk, wokhontoma re, lit o.” 9Asogo mo’gulentesimu, is ap ano, ebela o ’gwiang horlo akhit ano lagalat, di kota yu kota pam welago a’ge ebano pobi til legesarik, ’gwiang 7 hwerli pelal ’balogo poluk, woluk is aphwami o Silo eba onowi sum awi werik poluk, oruakma ebano, Yosua emin oruakma, e’bek wegesa. 10Ebek wegesema, at Allah il pam o Silo eba at Yosua en, ’gwiang 7 ’belak ai, mesik sa horlouwa a’ge agoma hul oluk helep e’gen walholuk, ena’gul onuk Israel a’ge horlo erlak a’ge ebano a’ge mugonoboluk-onoboluk so’burentesi.
Is ap Benyamin a’ge ono’gwiang hwerli ’belak wene
11Naduk-naduk helep e’gen pei lo wom walhesi ’gal, e, helep ano woroksogo is ap Benyamin en dogo’gwe a’ge enebe lo’bok eneragam laga. Asogo lasuam, is Benyamin a’ge ono’gwiang so’burentesi ano re, a’gul onuk Yehuda a’ge onowi hwerlegesema logon orogobu oruakhwe a’gul onuk Yusuf pam en weiyelak a’ge hwerlegesema erabu oruakhwe, ’burlmu ebayat wogentesi.
12Is Benyamin a’ge ono’gwiang hwerli o o’borl akhit o’gwe eba, ik Yordan esa’go akhit horok lail lotluk, o Yerikho o o’borl akhit o’gwe dom esa’goma en o mo lasu a’ge yu akhit hegit motluk-motluk dom pam en, ologun hwerli lei pam o Bet-Awen lai lotluk, 13Eba en ’bekhit, o Lus ai, o Betel atma re, o Lus ’belap-’belap dom esa’goma o sogweik akhit lai lotluk, eba en olukhwe ’belagap poluk lagarik o Bet-Horon olukhwe akhit o sogweik akhit dom pam de o Atarot hwerli arat lail lagarik e,
14o mo obuk ilasu akhit o’gwe hegit ono’gwiang hwerli re, o Bet-Horon libagalat, o sogweik akhit o’gwe dom pam ma ebano en toluk ’belak ’gwi ’gwani legesarik o orogobu no motluk-motluk o Kiryat-Baal ai, o Kiryat-Yearim atma re, ap Yehuda a’ge onowi kotama eba lagarik ebanoat welaga.
15O sogweik akhit ono’gwiang hwerli re, o Kiryat-Yearim o’borl akhit eba horok lai lotluk, ’bekhit o mo obuk ilasu akhit o’gwe motluk-motluk ik elaruk porlolu tiso akhit Me-Neftoah eba laga. 16Eba en ’bekhit Refaim dogoma orogobu o o’borl akhit o’gwe o Ben-Hinom dogoma ’gwilotluk dom e’biang woluk ’bu agama en ’bekhit, Hinom dogoma ologun akhit orogobu is ap Yebus a’ge welagaimu dom abel akhit o sogweik akhit motluk-motluk legesarik, o En-Rogel lail lasulat, 17eba en onolukhwe hebeksogo wi-waling o’borl akhit o’gwe motluk-motluk o En-Semes en, dom aganhan e’gen Adumim, etle akhit o’gwe oruakhwe o Gelilot en, orogobu Ruben omlogo onuk Bohan egelep o ogu legesema orogobunoat lasulat, 18Eba en ’bekhit o Yordan dogo ’belap holuk o o’borl akhit o’gwe dom esa’go akhit motluk-motluk o lei lok o sogweik akhit o’gwe ebano en ’bekhit orogobu no. 19O Bet-Hogla ’belap-’belap o o’borl akhit o’gwe dom esa’go akhit motluk, ologun o sogweik akhit ik Yordan ’gwelabiso a’ge ye’gelak akhit, ik ye’gelak mayu egeik o’gut o o’borl akhit ebano lai lasulat, tak welaga a’ge ano re, o sogweik akhit ono’gwiang hwerli ano re, aiat o.
20Ye, o mo orlu ago akhit o’gwe ono’gwiang hwerli welaga ano re, ik Yordan lasu aiat. A’gul onuk Benyamin pam en weiyelak o’gwe en dogo a’ge dedelik hunsogo ono’gwiang dogoma a’ge en eiye otluk onowirak a’ge ’gela’ge erabu en ’bekhit orogobu akhit o ologun hwerli eiye egesarik welegesa ano re, aiat o.
21Ye, a’gul onuk Benyamin a’ge en dogo ’gwe a’ge dedelik o kota-kota eiye egesa a’ge onuk e,
Yerikho, Bet-Hogla, Emek-Kezis,
22Bet-Araba, Zemaraim, Betel, 23Haawim, Para, Ofra, 24Kefar-Haamonai, Ofni, Geba aiatma re, la’bulogo o kota 12 e’berlik o’borl o’gwe o seli logon wei-wei a’ge eminat horlogulat,
25Ye, o kota Gibeon, Rama, Beerot, 26Mizpa, Kefira, Moza, 27Rekem, Yirpeel, Tarala, 28Zela, Elef ai re, is Yebus a’ge onowi Yerusalem atma re ebano emin, kota Gibea emin, o kota Kiryat-Yearim eminatma re, la’bulogo o kota-kota 14 en o’borl o’gwe o seli wei o’gwe logon emin a’bigat horlogulat tegisa. A’gul onuk Benyamin pam en weiyelak o’gwe en dogo a’ge dedilogo ono’gwiang dogoma a’ge en eiye omtik onowirak ’gela’ge welemagoluk wogentesi ano re, aiat o.
Currently Selected:
Yosua 18: Wul
Highlight
Share
Copy
Want to have your highlights saved across all your devices? Sign up or sign in
