Yosua 17
17
A’gul onuk Manasye a’ge ado me’gerik a’ge ono’gwiang hwerli ’belak wene
1Ap Yusuf omlogo naduk dogo a’ge re, Manasye atma re, helep e’gen pei lo wom walholuk, a’gul onuk Manasye a’ge ono’gwiang ’balogo so’burentesi ano hwerli Yuat o. Ap Manasye omlogo naduk dogo a’ge re, Makhir atma re, omlogo onuk Gilead. At Makhir en ap esegen oruak a’ge ebe weim adoliat welagarikmu re, ik Yordan etle akhit o Gilead emin, o Basan emin, wogentesi. 2Ap a’gul Manasye a’ge ado me’gerik e, at Makhir pam en weiyelak a’ge ono’gwiang e, ik etle akhit arat wogentesimu re, ap a’gul onuk Manasye a’ge ado me’gerik wogonto erlak a’ge holuk helep e’gen pei lo wom wal takpoluk dogoma a’ge enebe lo’bok ik Yordan Yu akhit ’balogo wogentesi a’ge ononuk e, Abiezer, Helek, Asriel, Sekhem, Hefer, Semida, aiat o. Ap Yusuf omlogo Manasye pam en weiyelak ado ap nak dogo a’ge hunsogo is aiat o.
3Asogo a’geat de, Zelafehad aik e, Hefer, Hefer aik Gilead, Gilead aik Makhir, Makhir aik, Manasye at, dak egesarikmu re, ene’ba ap Zelafehad ano, eiyagai ap dagonobu erlak hwelani nak dak enebegeimu re, ononuk e, Mahla, Noa, Hogla, Milka, Tirza, eria dagenebegei. 4#Bil. 27:1-7Is hwelani ebano, ap Allah eiye a’ge Eleazar emin, ap Nun omlogo Yosua emin, is Israel a’ge onuelak emin, ene’bek wegesarik, is mo’gulontogulat, “At Allah en, is hwelani ai, onorokhwi eneminat ono’gwiang onowirak ’gela’ge eiye otluk horlogu lemak o, oluk, wene le’gelogo Musa mo’gulesimu re, nis eminat woknonto yo.”
Mo’gulogwiam at Allah en wene le’gelak Musa mo’gulesi a’ge hegitsogo, at Yosua en is enaik emin weiyelak a’ge ono’gwiang onowirak ’gela’ge otluk horlogumu-re, enemin welemagoluk wogentesi. 5-6A’gul onuk Manasye a’ge o mo orlu ago akhit o’gwe ik Yordan etle akhit o Gilead ’gwiang erangma emin, o Basan erangma emin, wogentesi a’geat de, is Manasye pam en weiyelak ap nak ono’gwiang onowirak a’ge ’gela’ge dogoma a’ge en eiye welemagoluk wogentasulat, at pam en weiyelak a’ge hwelani ebano re, eneminat wogentasulat de, ik yu akhit ’gwiang 10 ’belak a’ge eminat, wogentesi, o Gilead erang ai re, is Manasye pam en weiyelak-a’ge-ado wogentesi a’geat o.
7Ap Manasye a’ge ono’gwiang hwerli re, o Asyer en o Sikhem o mo orlu ago hegit akhit o’gwe o Mikhmetat pam lail-loluk, ai pam en egim-agam toluk o sogweik akhit motluk-motluk is aphwami En-Tapuah onowi hwerliat welaga.
8’Gwiang Tapuah ai re, ena’gul onuk Manasye a’ge ono’gwiangat a’geat de, is Manasye a’ge ono’gwiang hwerli pam o kota Tapuah ai nak e, is Efraim a’ge onowiat aga o.
9Ye, is Manasye a’ge ono’gwiang hwerli re, o Tapuah en ogo’bu o sogweik akhit motluk-motluk ik Kana lasumu eba lai lotluk, ik lasu a’ge ano motluk toluk ik lok ye’gelak a’ge laut waga a’ge ai hwerliat welaga. Is Manasye ono’gwiang ik Kana lasu a’ge hwerli pegesa a’ge hwerli pam pegesema orogobu o sogweik akhit kota-kota ano re, is Efraim a’ge eminat onowi kota-kota welaga a’geat de, is Manasye ono’gwiang hwerli re, o o’borl pam de o’borl akhit o’gwe ik a’ge ai pam en ’bekhit ik lok Ye’gelak laut hwerli pamat welaga
10’gwiang ik kana lasumu orogobu o abel akhit ai, a’gul onuk Efraim a’ge ono’gwiangat. Ye, erabu o o’borl akhit o’gwe re, a’gul onuk Manasye a’geat. A’gul onuk Manasye a’ge ono’gwiang hwerli re, o mo obuk ilasu ai hwerli akhit o’gwe, ik lok Yegelak laut anoat o. Ye, o o’borl akhit o’gwe ai re, ena’gul onuk Asyer a’ge ono’gwiang hwerliat o. Ye, o mo orlu ago akhit o’gwe ai re, Isakhar a’ge ono’gwiang hwerliat welaga o.
11Asogo a’geat de, ena’gul onuk Isakhar emin, Asyer emin, ono’gwiang hwerli ’belak a’geat de, is ono’gwiang pam o kota-kota ena’gul onuk o Manasye a’ge wogentesi ai, o kota Bet-Sean emin, o kota Yibleam emin, ik lok Yegelak laut iak pam kota Dor emin, o kota En-Dor emin, o kota Taanakh emin, o kota Megido emin, wogentasulat, o kota-kota ai, e’berlik o’borl o’borl o seli wei o’gwe-lok o’gwe a’bigat logon emin wogentesi a’geat de,
12 #
Hak. 1:27,28 Is aphwami Kanaan a’ge en, nonowi pam yema en lebik nonobo modogat erlak o, oluk, enede ’buk oruak en, ena’gul onuk Manasye a’ge en is mukho lebik onobo modok mia aga a’geat de, 13ena’gul onuk Manasye a’ge enanni agalat ’berleksogo lebik onobo erlak is logon eniabuk tagonobogu lemagoluk ugenebegesa.
14Is Yusuf pam a’ge weiyelak en Yosua mo’gulogulat, “At Allah en ede aganhan nenebam pil wagokhwe, nenebe a’bik ege a’geat de, helep e’gen hwikhai lo wom walholuk, ’gwiang we weisogo nak oluk sobut nentigen ai noluk o?”
15Asogo ogwiam, at Yosua en is mo’gulentasulat, “His aphwami henebe a’bik agalat ye, o ho’gorlakma Efraim ai weiyatma re, ’bete eselat tiso holuk e’gelama is aphwami Feris a’ge emin, Refaim a’ge emin, welagaimu eba honowi ut hwerlagup en, o eba selagap pagathwerla ligemis o.”
16Asogo mo’gulentesimu is ap Yusuf pam a’ge en weiyelak ebano en at mo’gulogulat, “O dom petne eba re, weiyat o, ye, is aphwami o dogo hwat pasegeimu eba o kota Bet-Sean welagai a’ge emin, o o’borl-o’borl o seli wei-wei a’ge welagai a’ge logon a’bigat emin, is o Yizreel dogo-ma welagai a’ge emin, en ono’gwiang so ebano re, besi a’ge nagat o.”
17Oluk mo’gulegisema at de, at Yosua en at Yusuf pam en weiyelak ena’gul onuk Efraim a’ge emin, Manasye a’ge emin, mo’gulentasulat, “Nis nenebe re, wiak wene, ye, nenanni a’bik ai demat egeptikmu re, helep e’gen hwikhai lo wom walholuk, o ’gwiang mesik nak ’balogo wokhentesi ai nak wokhentasu erlak o. 18At e, mesik e’gelama eba eminat wokhontouwama re, o selagap sogo re, esa’go-esa’go pil laga loroguptik, eiyetak pagathorloluk wolorogup ani o. Is aphwami o Kanaan a’ge enanni a’bik, ye, ono’gwiang so ’besi a’ge pam hele’gik a’geat de, is ogo, his mukho lebik honobo obat epasu legi o,” oluk mo’gulentesi.
Currently Selected:
Yosua 17: Wul
Highlight
Share
Copy
Want to have your highlights saved across all your devices? Sign up or sign in
